ئەڤرۆ نیوز، لەزگین جوقی:
رێڤەبەرێ کومپانیا گشتی یا ئاھێن خوارنێ ل پارێزگەھا دھۆکێ دیار کر کو ئەڤ سالە ژی وەکو سالێن بۆری ئاھێن خۆارنی یێن ھەموو ھەیڤان ل سەر وەلاتیان نەھاتنە بەلاڤکرن و ھێشتا بەغدا ژی چو بریار نەداینە بۆ ئاھێن خوارنێ یێن وان ھەیڤێن نەھاتینە بەلاڤکرن.
ئەحمەد تەھا، رێڤەبەرێ کومپانیا گشتی یا ئاھێن خوارنێ ل پارێزگەھا دھۆکێ بۆ ئەڤرۆ نیوز دیار کر کو ھەتا نوکە نەھاتیە زانین ل سالا بھێت چ گوھۆڕین دێ د ئاھێن خوارنێ یێن ھەیڤانە دا ھێنەکرن و گۆت: “د ئەڤ سالە دا ب تنێ ئاھێن خوارنێ یێن حەفت ھەیڤان ل سەر وەلاتیان ھاتینە بەلاڤکرن و ھەتا نوکە نەھاتیە زانینن یێن ھەیڤێن مای دێ ھێنە بەلاڤکرن یان نە”.
ناڤھاتی ئاماژە دا وێ چەندێ کو ئەڤ سالە ل ھەیڤێن ئێک و دو و چار و پێنج و حەفت و دەە و یازدە ئاھێن خوارنێ ل سەر وەلاتیان یێن ھاتینە بەلاڤکرن و ل ھەیڤێن سێ و شەش و ھەش و نەە نەھاتینە بەلاڤکرن و نوکە ژی ئەم یێن د ھەیڤا 12 دا و ھەتا نوکە یا دیار نینە کا دێ ئاھێن خوارنێ ڤێ ھەیڤێ و ھەیڤێن دی یێن ماین ئاھێن خارنێ ل سەر وەلاتیان ھێنە بەلاڤکرن یان نە.
رێڤەبەرێ کومپانیا گشتی یا ئاھێن خوارنێ ل پارێزگەھا دھۆکێ خویا کر کو چو سالان ب تایبەتی ژی ژ سالا 2014 ێ ھەتا نوکە 100 % ئاھێن خوارنێ ل سەر وەلاتیان نەھاتینە بەلاڤکرن و یێن ھندەک ھەیڤان ماینە و گۆت: “ھەتا نوکە ژی چو بەحس بۆ قەرەبووکرنا وەلاتیان ژ پێش ئاھێن خوارنێ ڤە یێن سالا 2015 و2016 و2017 و 2018 ێ نینە، لێ ئەم چاڤەرێ وەزارەتا بازرگانیا بەغدا دکەین بۆ ھەر بریارکی دەربارەی چارەنڤیسێ ئاھێن خۆارنی یێن ھەیڤیێن نەھاتینە بەلاڤکرن”.

ئەڤرۆ نیوز، رێوار مزیری:

ئەندازیارەکێ سەرۆکاتیا باژێرڤانیا دھۆکێ و د ھەمان دەم دا سەرۆکێ لیژنا ھاتنوچوونا ناڤ باژێرێ دھۆکێ بۆ ئەڤرۆ نیوز دیار کر کو وان پرۆژەک بۆ کێمکرنا قەرەبالغا د ناڤ باژێری دا بەری سێ سالان پێشکێشی پارێزگەرێ دھۆکێ کریە، لێ ژ بەر قەیرانا دارایی یا سەر ب ھەرێمێ دا ھاتی ھەتا نوکە نەھاتیە بجە ئینان.

ئەندازیار سەلاح سندۆری، ژ سەرۆکاتیا باژێرڤانیا دھۆکێ و د ھەمان دەم دا سەرۆکێ لیژنا ھاتنوچوونا ناڤ باژێرێ دھۆکێ ئاشکرا کر کو دو ئەگەر ل باژێرێ دھۆکێ بوو پەیدا بوونا قەرەبالغا ترۆمبێلان یێن ھەین ئێک، شۆفێر ب رێنمایێن ھاتنوچوونێ د پێگیر نینن ب تایبەت شۆفێرێن تەکسیان، ئەگەرێ دویێ ژی وەلاتیێن مە د ھاریکار نینن و ھاتنوچوونێ د سەر ھێلێن دەربازبوونێ ڕا ناکەن و گۆت: “ھەکە وەلاتی 70% ژی پێگیریێ ب رێنمایێن ھاتنوچوونێ بکەن50% دێ قەرەبالغا ترۆمبێلان د ناڤ باژێرێ دھۆکێ دا کێمتر لێ ھێت”.

ناڤھاتی ئاماژە دا وێ چەندێ کو بۆ چارەسەریا قەرەبالغا د ناڤ باژێرێ دھۆکێ دا وان پرۆژەکێ مەزن ژ سالا 2015ێ وەرە پێشکێشی پارێزگارێ دھۆکێ کریە وی ژی ب گرنگی ڤە ئەو پرۆژە وەرگرتیە، لێ ژ بەر قەیرانا دارایی یا سەر ب ھەرێمێ دا ھاتی نەشێن دەست ب جە ئینانا وی پرۆژەی بکەن و گۆت: “مە پرێن ھاتنوچوونا وەلاتیان ل دھۆکێ ددان، لێ وەلاتیان ھاتنوچوون د سەر ڕا نەدکر ژ بەر ڤێ چەندێ مە راکرن و ل ھندەک جھێن دی دانن”.

ل دووماھیێ ئەندازیار سەلاحی خویا کر کو ئەڤ سالە وان حەفت رەمپە د ناڤ باژێرێ دھۆکێ دا چێکرینە.