ئەڤرۆ نیوز، زنار تۆڤی:

ئەڤە ماوێ حەفتیەکێ یە دەرگەھێ گۆمرکا سەرزێری یێ کو دکەڤیتە دناڤبەرا ھەرێما کوردستانێ و وەلاتێ تورکیا دا، ژ ئالیێ تورکیا ڤە ھاتیە گرتن و ھەتا نوکە نەھاتیە ڤەکرن، ئەڤ دەرگەھە دکەڤیتە گوندێ سەرزێری ل ناحیا کانی ماسێ و د ماوێ ڤان سالێن بوری دا، گەلەک ژ خەلکێ پارێزگەھا دھۆکێ و پارێزگەھێن دیتر یێن ھەرێما کوردستانێ ھاتنوچوون د ڤی دەرگەھی را کریە.

سەربەست سەبری ئاکرەیی رێڤەبەرێ ناحیا کانی ماسێ بۆ ئەڤرۆ نیوز دیارکر ژ ئەگەرەکێ نەدیار ئەڤە ماوێ حەفتیەکێ یە دەرگەھێ گۆمرکا سەرزێری ل ناحیا کانی سێ ژ ئالیێ تورکیا ڤە ھاتیە گرتن و ھەتا نوکە نەھاتیە ڤەکرن، لێ ھەتا نوکە ژی فەرمانبەرێن مە و یێن تورکیا ژی رۆژانە دھێنە سەر کارێ خوە، لەوما ئەڤ چەندە ھیڤیەکێ ددەتە مە کو ل دەمەکێ نێزیک جارەکا دی ئەڤ دەرگەھە دێ ھێتە ڤەکرن و خەلک دێ ھاتنوچوونێ تێدا کەنە ڤە، ھەروەسا نوکە پارێزگارێ دھۆکێ و قائیمقامێ ئامێدیێ ژی د پەیوەندیێن بەردەوام دانە ل گەل پارێزگارێ جۆلەمێرگێ و قائیمقامیا چەلێ، ژ پێخەمەت ئەڤ دەرگەھە ب زووترین دەم بھێتە ڤەکرن و ئەم ب ھیڤینە کو بھێتە ڤەکرن.

ناڤھاتی زێدەتر گۆت: (گرتنا ڤی دەرگەھی زیانەکا مەزن گەھاندیە خەلکێ مە، چونکو خەلکێ ڤێ دەڤەرێ گەلەک دوکان و مارکێت ڤەکرینە و گەلەک کەلوپەل ژی کڕینە، لێ ژ ئەگەرێ گرتنا ڤی دەرگەھی ئەو دۆکان و مارکێت ھەموو ماینە راوەستیای و ھەروەسا نوکە خەلک سەرەدانا کانی ماسێ ژی ناکەن، چونکی ژ ئەگەرێ ڤەکرنا ڤی دەرگەھی بزاڤەکا بچووک یا بازرگانی ل ڤێ دەڤەرێ پەیدا ببوو، ھەروەسا ژ ئالیێ دیتر ژی ڤە دێ زیانەکا مەزن بەر ب خەلکێ مە یێ باکور ژی کەڤیت، ژ بەر کو وان ژی ب رێیا ڤی دەرگەھی سەرەدانا ھەرێما کوردستانێ دکر و ھندەک کەلوپەل ژی ل گەل خوە دئینان، لێ ژ ئەگەرێ گرتنا ڤی دەرگەھی نوکە ئەو بزاڤا بازرگانی نەمایە، دیسا رێیا ھاتنوچوونا خەلکێ ھەرێما کوردستانێ و یێ باکور ژی ژ ئەگەرێ گرتنا ڤی دەرگەھی درێژ بوویە و خەلک نەچارن د دەرگەھێ ئیبراھیم خەلیل را ھاتنوچوونێ بکەن.

ئەڤرۆ نیوز:

 ئەڤرۆ رێکەفتی ٣٠/١/٢٠١٩ لدۆرێن دەمژمێر ١١سپێدێ ژ ئەگەرێ شۆرتەکی کارەبی ئاگر بەربوو خیڤەتا ئاوارەیەکی شنگالێ ل کەمپا کەبەرتوو۲

باسم قاسم پەیامنێرێ ئەڤرۆ نیوز ژناڤ کەمپێ دا دیارکرن، ئەڤ حالەتا ئاگربەربوونێ ژ ئەگەرێ شۆرتەکی کارەبێ بوو ل ئەوی دەمێ کارەبا نیشتیمانی ھاتی ئێکسەر ئاگر بەربوو خیڤەتی و زارۆیەکی ئەوێ خێزانێ بناڤێ “خێراھات خێری حامد” کو تەمەنێ وی سال و نیڤەک بوو دناڤ خیڤەتێ دا دمینێت و ب رێژەیا ٩٥% لەشێ وێ دشەوتێت و دھێتە رەوانەکرن بۆ نەخوشانێ  ل باژێرێ دھۆکێ و پشتی چەند دەمژمێران ل نەخوەشخانێ ڤە ئەوی گیانێ خوە ژ دەست دا.