ئەڤرۆ نیوز، هۆشەنگ تاجر:

ئەحمەد بابایی ئەندامێ رێکخراوا مافێ مرۆڤی یا رۆژهەلاتێ کوردستانێ بۆ ئەڤرۆ نیوز دیار کر کو دو رۆژن ل باژێرێن خانێ، مهاباد، سنە و ئورمیێ هێزێن ئێمناهیێ ب بەهانا هندێ کو پرۆپگاندا بۆ پارتەکا کوردی کرینە دەست ب دەستەسەرکرنا ١٣ وەلاتیێن کورد کرینە و هەتا نها ژی چارەنڤیسێ وان دیار نینە.

ناڤهاتی ئەو یەک ژی دیار کر کو سەرێ سالێ هەتا نها نێزیکی ٧٠ وەلاتیێن کورد ل باژێرێن جودا جودا یێن رۆژهەلاتێ کوردستانێ هاتینە دەستەسەر کرن و چەند کەس ژی ژ ترسان نەچار ماینە ژ رۆژهەلاتێ کوردستانێ بچنە وەلاتەکێ دی.

ئەڤرۆ نیوز ، زنار تۆڤی:
چاڤدێرەکێ سیاسی بۆ ئەڤرۆ نیوز گوت: ئاسایشا نیشتیمانی فاکتەرەکێ ب هێز و گرنگە بۆ ئاڤەدانی و پێشکەفتن و وەرارا وەلاتی، ئەڤە ئەرک و بەرپرسیارەتیا هەموو لایەکێ یە، هەلبەت پاراستنا گیانێ وەلاتیان و سەروەت و سومبۆلێت نەتەوەیی و ئاخ و سەروەری و بەرژەوەندیێن نیشتیمانی ئەرک و بەرپرسیارەتیا حوکمەتێ و دەستهەلاتێ و وەلاتیان ب خوە ژی یە، لەوما فەرە لایەنێن فەرمی دووڤچوونێن نێزیک و بەردەوام و مەیــدانی هـەبن بۆ پەژراندن و پەیرەوکـرنا سیاسەتا خـوە ل سەر ئەردی.
مەسعود چەلکی ئەو چاڤدێرێ سیاسیە زێدەتر دیارکر ژی: فەرە دڤی چارچۆڤەی دا هەلسەنگاندنێن جـددی بهێنە کـرن و رێکــارێن ژ هـەژی و پێنگـاڤێن راست بهێنە هاڤێتن و پەیرەوکرن و خالێن هەستیار و یێن ب هێـز و یێن لاواز هەموو بهێنە دیارکرن، یا پێدڤی بهێتە ئەنجامدان، ژ ئەنجـامێ سستی و نە خەمخوریا هەمە لایەنی ژ هندەک بادەک و هـندەک هەلویست و بزاڤ و لڤین و پێنگاڤێن نە دجهـێ خـوە دا ژ لایەکی یان ژ چەند لایانڤە ئاریشە و ئالـوزیێن چـاڤەرێکری دهێنە پێش و خەلکێ بێ مەرەم و بێ گونەهـ دبنە قوربان، هەروەسا بەرژەندی و سـیایەتا حوکمەت و دەستهەلاتێ بخـوە ژی دبنە ئارمانج و دکەڤن بەر لەکە و گەف و هێرشان.
وی چاڤدێری گۆت ژی: هندەک پێشهات و روودان دزیقن و دهێنە پێشچاڤێت مرۆڤی و دڤی واری دا گەلەک جـارا ئاگەهـی و هشیاریێن پێشوەخت ژی هەبینە لـێ‌ ب قەدەر مەترسیا دوخـی گرنگی پێ ناهێتەدان و ل سەر راوەستان ناهێتە کـرن و تەدبیرێن پێشین و دەستپێکی ل دەم و وەکو پێدڤی ناهێنە بجهکـرن، هەلبەت هەر کارەکێ کارڤەدان ب دووڤ دا دهێن، لەوما هیڤیـا مەیە ئەم ل ئاست بەرپرسیاری و ئەرکێن خوە یێن هەڤنیشتیمانی بین و مل بملێ سازیێن حوکمەتێ و دەزگەهێن نیشتیمانی خزمەتێن پێدڤی پێشکێش بکەن و ل ئاست هەر قوناغ و پێشهاتەکێ بەرپرسیارانە و دلسۆزانە هزر بکەین و بشێن زوو و ب سانەهی و ب کێم زیان وێ قوناغێ دەرباز بکەین و نەهێـلین کارڤەدان مەودایەکـێ مەزنتر ڤەگـریت و کارتێکرنا نەرێنـی و وێـرانکەر، داکو بهـایێن وێ گـرانتـر نەبیت.