ئه‌ڤرۆ نيوز:

ژێده‌ره‌كێ ئه‌منى ئه‌ڤرۆ رۆژا ئێكشه‌مبى راگه‌هاند كو نڤيسينگه‌ها سه‌رپه‌رشتيارێ گشتى ل وه‌زاره‌تا ناڤخۆ يا عيراقێ، رێڤه‌به‌رێ پۆليسێن هاتنوچوونا كه‌ركووك و 23 ئه‌فسه‌ر و كارمه‌ندێن ژ پۆليسێن كه‌ركووك ده‌سته‌سه‌ركرن.

ئه‌وى ژێده‌رى بۆ سومه‌ريه‌ نيوز گۆت: “نڤيسينگه‌ها سه‌رپه‌رشتيارێ گشتى ل وه‌زاره‌تا ناڤخۆ يا عيراقێ، عه‌قيد شێرزاد ئه‌حمه‌د محه‌مه‌د، رێڤه‌به‌رێ پۆليسێن هاتنوچوونا كه‌ركووك ب تاوانا تۆماركرنا ترۆمبێللان ب ره‌نگه‌كێ نه‌يێ قانوونى ده‌سته‌سه‌ركريه‌”.

ئه‌وى ژێده‌رى ئاماژه‌ ب وێ چه‌ندێ ژى كريه‌ كو نڤيسينگه‌ها سه‌رپه‌رشتيارێ گشتى، رێڤه‌به‌رێ پۆليسێن ره‌حيماوا و ئه‌فسه‌ره‌كێ نه‌هێلانا تاوانان ل بنگه‌هى و دو ئه‌فسه‌رێن دى و 19 كارمه‌ندێن دى يێن پۆليسان ده‌سته‌سه‌ركرن.

ده‌سته‌سه‌ركرنا رێڤه‌به‌رێ و ئه‌فسه‌ر و كارمه‌ندێن بنگه‌هێ پۆليسێن ره‌حيماوا، پشتى وێ چه‌ندێ دهێت كو دوهى راگرتيه‌كێ تۆمه‌تبار ب كوشتن و دزيكرنێ ل باژێرێ كه‌ركووك ژ وى بنگه‌هى ره‌ڤى يه‌.

ئه‌ڤرۆ نيوز:

بڕياره‌ ئه‌ڤرۆ رۆژا ئێكشه‌مبى جڤاتا وه‌زيرێن هه‌رێما كوردستانێ بۆ دانوستاندن ل سه‌ر بوودجێ 2019ێ كۆم ببيت و به‌حس ل ميكانيزمێن به‌لاڤكرنا داهات و خه‌رجيان بكه‌ن.

ژێده‌ره‌كى ژ جڤاتا وه‌زيرێن هه‌رێما كوردستانێ راگه‌هاند كو ئه‌ڤرۆ رۆژا ئێكشه‌مبى ل ده‌مژمێر 11:00ى به‌رى نيڤرۆ جڤاتا وه‌زيران ب سه‌رۆكاتيا نێچيرڤان بارزانى و قوباد ته‌له‌بانى دێ كۆم بيت و گه‌نگه‌شێ ل سه‌ر بوودجا 2019ێ يا عيراقێ و پشكا هه‌رێما كوردستانێ و به‌هرا وێ د ناڤ بوودجه‌ى دا كه‌ن.

ئاماژه‌ ب وێ چه‌ندێ ژى كر كو د وێ كۆمبوونێ دا جڤاتا وه‌زيرێن هه‌رێمێ دێ راپۆرته‌كێ ل سه‌ر كاودانێن داراى و وان پێشنياز و رێكاران پێش كه‌ت كو ل پشت وى داهاتى و خه‌رجيێن ل هه‌رێمێ هه‌ين ل گه‌ل ئه‌وى كۆژمێ پاره‌ى يێ دێ ژ به‌غدا هێت كا چاوان سه‌ره‌ده‌ريێ ل گه‌ل بكه‌ن.

ده‌رباره‌ى ئه‌گه‌رێ بڕياردان ل سه‌ر پاشكه‌قتێ مووچه‌ى، ئه‌وى ژێده‌رى بۆ خه‌ندان گۆت: “به‌رنامه‌كێ ژ وى جورى د كارناما جڤاتا وه‌زيران دا نينه‌، بڕياره‌ ژ وى ره‌نگى ژى ده‌م دڤێت، هه‌تا حوكمه‌تا هه‌لسه‌نگاندنێ بۆ كاودانێن دارايى يێن خوه‌ دكه‌ت”.