ئەڤرۆ نیوز، مەحمود نهێلی
ئەڤە هەیاما چەند رۆژایە دوو هاولاتیێن کومەلگەها هێتوتی یا سەر ب ناحیا دێرەلۆک ل پشتا چیایی لینکی د بێ سەروشوون بووینە و گومان دهێتە کرن کەڤتبنە بەر بووردومانێ.
ئێک ژ کەس وکارێن وان دوو هاولاتیان بۆ ئەڤرۆ نیوز دیار کر، پشتی دەربازبوونا چەند رۆژان ل سەر بێ سەروشوون بوونا ڤان هەر دوو هاولاتیان ئەڤرۆ هەژمارەکا زۆرا خەلکی دەڤەرێ قەستا وی جهی کریە یێ ئەڤ هاوڵاتیە چووینێ، لێ هێشتا دیار نەبوویە.
وی کەسی دیار ژی کر، کو بەری دوو رۆژان ئەو دەڤەر ب دژواری هاتیە بوردومانکرن ژ بەر وی یەکی ژی دهێتە گومانکرن کەفتنە بەر بوردومانا فرۆکەیێن تورکیا .
تێ زانین ل رۆژا 23\1\2019 فرۆکەیێن تورکیا چەندین دەڤەرێن سنورێ ناحیا دێرەلۆک بوردومانکرن و دئەنجامێ دوو هاولاتیێن دەڤەرێ شەهیدبوونە و چار کەسێن دن ژی تا نوکە د بێ سەروشوونن.
ئەڤرۆ نیوز:
پشتی ھەلبژارتیێ عیراقێ قارەمانیا ئاسیا ب جە ھێلا دەمێ خوسارەت بووی ل گەل ھەلبژارتیێ قەتەر ل قوناغا ١٦ ئەوا نوکە ھەڤرکیێن وێ ل وەلاتێ ئیمارات دھێنەکرن ئێکەتیا تەپا پێ یا عیراقێ ژڤانێ یاریێن گەرا ١٤ یێن خولا عیراقێ دەست نیشانکرن.
ئێکەتیا تەپا پێ یا عیراقێ ل سەر مالپەرێ خوە یێ فەرمی دیارکریە بریارە ھەڤرکیێن گەرا ١٤ ل رۆژا ٢٨ ڤێ ھەیڤی ب دو یاریان بھێنەکرن ئەوژی دناڤبەرا حدود ل گەل ئەمانە بەغدا و جەویە ل گەل بەحری.
ھەژی گوتنێ یە ل ٢٤-١٢-٢٠١٨ ھەڤرکیێن خولا عیراقێ ھاتبوونە راوستاند ژبەر پشکداریا ھەلبژارتیێ عیراقێ د قارەمانیا کاسا ئاسیا دا کو نوکە یانا شورتە سەرکێشیا خولێ دکەت ب ٣٠ خالان و نوونەرا ئێکانە یا ھەرێما کوردستانێ یانا ھەولێر ل رێزا ٩ دھێت ب ١٦ خالان.
ئەڤرۆ نیوز:
بەرپرسێن یانا بروسیا دورتموند یا ئەلمانی ھەر نوکە ھزر ل ئینانا یاریزانەکێ نوو دکەن بوو ئینانا جھێ ستێرا وێ یا ئەمریکی کریستیان پولیستیچ ئەوێ بریارە ل ھاڤینا بھێت پەیوەندی ب یانا چێلسی یا ئنگلیزی بکەت.
مالپەرێ سکای سپورتس یێ ئەلمانی ئاشکراکریە یانا بروسیا دورتموند یا ئەلمانی ٥٠ ملیون بورۆ بەرھەڤکرینە بوو ئینانا ستێرا کوتیڤواری و یانا کریستال پالاس یا ئنگلیزی ویلفرد زاھا وەکو پێگوھورێ ستێرا وێ یا ئەمریکی کریستان ئەوێ بریارە ل دووماھیا ڤی وەرزی بەر ب یانا چێلسی ڤە بچیت.
ھەژی گوتنێ یە ویلفرد زاھا یێ ٢٦ سالی نوکە بوویە جھێ گرنگیا چەندین یانێن مەزن ل ئورۆپا و بریارە ھەڤبەستا وی ل گەل یانا وی ل ٢٠٢٣ ب دووماھیی بھێت و ئەو یاریزانێ ناڤبری ھەر ژ سالا ٢٠١٣ وەرە یاری ل وێ یانا کریستال پالاس دکەت و د ماوێ شەش سالێن بوری دا ٣٠٨ یاری ل گەل وێ یانێ کرینە و شیا ٤٦ گولان توماربکەت و ٥٩ گولان بوو ھەڤالێن خوە بەرھەڤبکەت.
ئەڤرۆ نیوز:
شڤێدی پشککێشانا قارەمانیا کوپا ئەمریکا ٢٠١٩ ئەوا دێ ھەڤرکیێن وێ ل وەلاتێ بەرازیل ھێنە کرن ل ڤێ ھاڤینا بھێت، ب پشکداریا ١٢ ھەلبژارتیان ل سەر سێ کومان ھاتنە بەلاڤ کرن.
د ڤێ قارەمانیێ دا ھەردو ھەلبژارتیێن قەتەر و ژاپون وەک مێڤاندار دێ پشکداریێ کەن ژ بەرکو کیشوەرێ ئەمریکا ژێرێ تنێ ١٠ وەلاتان ب خوە ڤە دگریت لەورا دو ھەلبژارتی ھاتنە داخواز کرن بۆ پشکداریێ، ھەر کومەکێ سەرکەفتیێ ئێکێ و دویێ دێ دەربازبن زێدەباری باشترین دو ھەلبژارتیێن رێزا سیێ.
کوما ئێکێ: بەرازیل، بولیڤیا، ڤەنزوێلا، پیرو
کوما دویێ: ئەرژەنتین، کولومبیا، پارگوای، قەتەر
کوما سیێ: ئوروگوای، ئێکوادور، ژاپون، چیلی
ئەڤرۆ نیوز:
یانا ریال مەدرید ل ماوێ چەند رۆژێن بوری داخوازیا یانا ریال بیتس رەتکر پشتی وێ یانێ داخوازی ژێ کری ب شێوەیێ خواستن ھێرشبەرەکێ خوە بدەنە وێ یانێ ل ڤەگوھاستنێن زڤستانێ.
مالپەرێ دیفنسا سنترال یێ ئیسپانی ئاشکراکریە یانا ریال بیتس ب فەرمی داخوازی ژ یانا ریال مەدرید کر بوو ڤەگوھاستنا ھێرشبەرێ وێ یێ گەنچ ماریانو دیاز .
ھەژی گوتنێ یە ماریانو دیاز ل وەرزێ ئەڤ سالە ژ یانا لیون ھاتبوو ڤەگوھاستن بوو یانا ریال مەدرید و ھەتا نوکە بتنێ د ١٣ یاریان دا ل گەل یانا ریال پشکداری کریە و بتنێ گولەک تومارکریە.
ئەڤرۆ نیوز:
یانا موناکو یا فرەنسی ب فەرمی ھەڤبەستا راھێنەرێ خوە و ستێرا بەرێ یا فرەنسی تێری ھنری ھەلوەشاند پشتی ھەر ژ وەرگرتنا وی ل ماوێ ٢٠ یاریێن بوری نەشیا ئەنجامێن باش ل گەل یانێ توماربکەت و ھاریکارێ تێری ھنری فرانکو بارسی بەروەخت ھاتە دەست نیشانکرن وەکو راھێنەرێ ئێکێ وێ تیمێ.
ھەژی گوتنێ یە یانا موناکو ل ھەیڤا ئەکتوبەرا ٢٠١٨ ھنری وەکو راھێنەرێ ئێکێ یێ یانێ دەست نیشانکربوو ب سەرپەرشتیا وی راھێنەری یانا موناکو ل ٢٠ یاری ئەنجامدابوون و شیابوو ٤ سەرکەفتنا ل گەل ٥ وەکھەڤیا و ١١ خوسارەتیا توماربکەت و ل دووماھیی پێنچ یاری بتنێ وێ یانێ دو خال ب دەستخوڤە ئینابوون و نوکە ل رێزا بەری دووماھیێ د لیستەیا خولێ دا دھێت.
ئەڤرۆ، ھەژار مەعروف:
ھێرشبەرێ نوو یێ بەرازیلی یێ یانا ھەولێر ئەڤرۆ ب رێیا فروکخانەیا ھەولێرێ گەھشتە پایتەختێ ھەرێما کوردستانێ ب مەرەما پەیوەندی کرنێ ب یانا ھەولێر بۆ یاریێن بھێت پشتی ل ماوێ چەند رۆژێن بوری رێککەفتن ل گەل وی یاریزانی ھاتیەکرن.
رێبین رەمزی بەرپرسێ راگەھاندنا یانا ھەولێر بۆ رۆژناما ئەڤرۆ دیارکر یانا ھەولێر ل ماوێ چەند رۆژێن بوری گەھشتیە رێککەفتنێ ل گەل ھێرشبەرێ بەرازیلی مارسیل سکرامنتو ھەتا دووماھیا ڤی وەرزی و ھەر دوھی ب فەرمی پلێتا وی یاریزانی یا نیڤدەولی گەھشتە یانا ھەولێر و ب فەرمی ئەو یاریزان بوو یاریزانێ یانێ .
ھەردیسان ناڤبری دیارکر ژی یاریزانێ ناڤبری ل وەرزێ ٢٠١٨ یاری ل خۆلا ئەندونوسیا کری کو ئێک ژ ھێرشبەرێن بەرنیاسە ل سەر ئاستێ وێ خولێ کو ل وەرزێ ئەڤ سالە ١٢ گولان دوێ خولێ دا تومارکربوون.
رێبین ئاماژە ب وێ چەندێ ژی کر ئەڤە دبیتە پیشەکارێ دوێ ل ڤەگوھاستنێن زڤستانێ یانا ھەولێر ھەڤبەستا ئەوی ئیمزا دکەت پشتی ل ماوێ چەند رۆژێن بوری ھەڤبەستا بەرەڤانێ ھەلبژارتیێ سوریا و یانا نەجەف عەلا شبلی ئیمزاکری .
ھەژی گوتنێ یە مارسیل سکرامنتو ژ سالا ٢٠١٦ وەرە یاری ل خۆلا ئەندونوسیا دکەت کو ل سالا ٢٠١٦ یاری ل گەل یانا سەمین پادانگ کر کو ئێک ژ یانێن خولا پلا ئێک کو د وی وەرزی دا ٣٦ یاری ئەنجامدان شیابوو ٢١ گولان توماربکەت ھەردیسان ٨ گول دخولا کاسا وی وەلاتی ژی دا تومارکر و ل سالا ٢٠١٧ بەر ب خولا پلا نایاب یا وی وەلاتی چو و دوێ سالی دا شیا ٩ گولان توماربکەت ژ سەرجەمێ ٢٢ یاریان و ل وەرزێ ٢٠١٨ یاری ل دو یانێن وی وەلاتی کر کو ل قوناغا ئێکێ ل گەل یانا پێرسیپورا حەفت گول تومارکرن ژ سەرجەمێ ١٦ یاریان و ل یاریێن قوناغا دوێ ھەڤبەستا یانا باریتو پاتیرا و ١٤ یاریان دا ل گەل وێ یانێ شیا پێنچ گولان توماربکەت و ھەردیسان بەری نوکە یاری ل خۆلا پلا ئێک یا بەرازیل و پلا نایاب یا سوید یاری کریە.
ھەموو گولێن مارسێل ل ھەردو وەرزێن بوری دخۆلا ئەندونسیا دا
ئەڤرۆ نیوز ٬ عەلی حاجی
پشتی دوهی دەنگ و باسێ مرنا پێشمەرگەیەکێ خەلکێ دەرکارێ بناڤێ ( ئەمین عیسا ) بەلاڤبوی و ئەگەرێن وێ دیار نەبوی ددیفچونەکا ئەڤرۆ نیوز دا ئەگەرێن مرنا وی پێشمەرگە ئاشکەرا بوون.
شەوکەت عیسا برایێ پێشمەرگەیێ گیانێ خوە ژدەست دای بۆ ئەڤرو نیوز گوت : پشتی دوهی دەنگ و باسێ مرنا برایێ من ل گوندێ نوردینا گەهشتیە من و ئەگەرێن مرنا وی دیار نەبوین ئەڤرۆ روژا پێنجشەمبی چەند کەسەکێن ژبنەمالامە سەرەدانا گوندێ نوردینا کرن ول جهێ برایێ من گیانێ خوە ژدەست دای هندەک بەرمایکێن فروکەکا بێ فروکەفان ل وی جهی مابوون و دیار بوو فروکێن بێ فروکەڤان خوە ب برایێ مە ڤە پەقاندی یە و بوویە سەدەمێ گیان ژ دەست دانا برایێ من .
ئەڤرۆ نیوز:
رۆژنامەیێن نێزیکی یانا ریال مەدرید ئاشکراکرینە یانا ریال مەدرید دخوازیت بوو وەرزێ بھێت ب ھێز بھێتە دناڤ ھەڤرکیا ڤەگوھاستنا یاریزانان دا و کوژمەکێ مەزن یێ پارەی ئامادەکریە بوو ڤەگوھاستنا چەند ستێرێن بەرنیاس ل سەر ئاستێ جیھانێ.
ھەردیسان ئەوان رۆژناما ئاشکرا کریە ژی یانا ریال مەدرید کوژمێ ١٩٠ ملیون یورۆیا بەرھەڤکرینە بوو ڤەگوھاستنا دو یاریزانان ئەوژی ستێرا بەلجیکی و یانا چێلسی یا ئنگلیزی ئادین ھازارد کو ١٠٠ ملیون بوو ئەوی یاریزانی ئامادەکرینە و ھەردیسان ٩٠ ملیون یورۆ بۆ ڤەگوھاستنا ستێرا ئەرژەنتینی و یانا یوڤانتوس دیبالا .
نيشاندان