ئەڤرۆ نیوز، هۆشەنگ تاجر:

کامران رزایی ئەندامێ رێکخراوا مافێ مرۆڤان یا رۆژهەلاتێ کوردستانێ بۆ ئەڤرۆ نیوز دیار کر کو د. ناسر ئەمینی خواه دیرۆکناسێ ناڤدارێ کورد کو ب هەڤکاریا زانکۆیا دانیمارک شیا شوونوارێن حەفت هزار سال یێن بەری نها ل باژێرێ روانسەر یێ رۆژهەلاتێ کوردستانێ پەیدا بکەت ژ ئالیێ دەزگەهێ ئیلاعاتێ ڤە هاتە دەستەسەر کرن و گۆت: (پشتی دەستەسەرکرنا ناڤهاتی هێزێن ئێمناهیێ هێرشی مالا دکتوری ژی کرن و هەموو کەلوپەلێن وی ل گەل خوە برن).

ئەندامێ رێکخراوا مافێ مرۆڤی ئەو یەک ژی دیار کر کو ئارمانجا ڤێ هێرشی و دەستەسەرکرنا دکتوری بۆ هندێ یە کو رژێما ئیرانێ ناخوازیت ناڤودەنگێ دەڤەرێن کوردی یێن رۆژهەلاتێ کوردستانێ ل جیهانێ بەلاڤ ببن و ناخوازن پێگەهێ دیرۆکی یێ کوردان ئاشکرا بیت، چونکو بەری نها ژی چەندین جاران گەف ل دکتور ناسری کربوون کو دڤێت ل دەڤەرێن رۆژهەلاتێ کوردستانێ ڤەکۆلینێن دیرۆکی نەکەت.

ئەڤرۆ نیوز:

رۆژناما تایمز یا بریتانی د راپۆرتەکێ دا ئەڤرۆ دیار کر کو شامێ داخوازیا کوردان یا ل دۆر هەرێمەکا خوەسەر ل باکورێ سووریێ قەبوول کریە و روسیا ژی پشتەڤانیێ ل هندێ دکەت، چونکو روسیا ناخوازیت ب رێیا هەرێما ئارام تورکیا دەستێوەردانێ د کاروبارێن ناڤخوە یێن سووریێ دا بکەت و دخوازیت شام ب دانا مافێن کوردان هەموو ئاریشێن خوە چارەسەر بکەت.

د بەردەوامیا راپۆرتێ دا ئاماژە ب سەرەدانا ڤێ دووماهیێ یا ئەردۆگانی بۆ روسیا ژی هاتیە کرن و هاتیە راگەهاندن کو روسیا ب رەنگەکێ ئاشکرا دیار کریە ئەم ل دژی هندێ نە ئاخا سووریێ بکەڤیتە ژێر کۆنترۆلا تورکیا و هێزێن دی، دڤێت کورد و شام هەموو پرسێن خوە چارەسەر بکەن.

ئەڤرۆ نیوز، هۆشەنگ تاجر:

دارا ناتق ئەندامێ سەرکردایەتیا پارتی دیموکراتی کوردستان/ ئیران بۆ ئەڤرۆ نیوز دیار کر کو ب هەلکەفتا ٧٣ سالیا دامەزراندنا کۆمارا کوردستانێ ل باژێرێ مهابادێ ناڤەندا هەڤکاریا پارتێن رۆژهەلاتێ کوردستانێ کو ژ هەموو پارتێن رۆژهەلات پێک دهێت چەندین چالاکی بۆ ڤێ هەلکەفتێ ساز کرن و پارتێن رۆژهەلات دێ ل سەر رێبازا قازی محەمەد و کۆمارا کوردستانێ د بەردەوام بن و گۆت: (چالاکیێن مە یێن سیاسی و کەلتوری دێ ل سەر ڤێ بنەمایێ بەردەوام بن، چونکو کۆمارا کوردستانێ وەرچەرخانەکا مەزن د دیرۆکا کوردستانێ دا بوو).

ناڤهاتی راگەهاند ژی کو کۆمارا کوردستانێ بنەمایەکێ بهێز یێ نەتەوی ل رۆژهەلاتێ کوردستانێ ئاڤا کریە کو کارتێکرنا خوە ل هەموو بزاڤێن کوردی کریە و نها ژی ئەو یەک بوویە خالەکا بهێز بۆ ئێکەتیا پارتێن کوردی ل رۆژهەلاتێ کوردستانێ.