ئه‌ڤرۆ نیوز، سه‌باح زێبارى:
باژێرڤانیا ئاكرێ دیاردكه‌ت كو ئاكرێ باژێره‌كێ كه‌ڤناره و هنده‌ك تاخێن وێ ترومبێل ناگه‌هیتێ له‌وما نه‌چارن ب گوهدرێژان گلێشێ وان تاخا بگه‌هینه جادا گشتى، دیاركر ژى كو چوار گوهدرێژ دگه‌ل خودانێن وان روژانه گلێشێ وان تاخا رادكه‌ن.
بلند ره‌زا زوبێر سه‌روكێ شاره‌وانیا قه‌زا ئاكرێ ب وه‌كاله‌ت دیار دكه‌ت كو كو ل سالا 2011 كومپانیا(ئێم ئار ئێف) گرێبه‌ستا خوه گرێدایه هه‌تا سالا 2021ێ دێ به‌رده‌م بیت، ئه‌ڤ كومپانیایه ب ئه‌ركێ 19 باژێرڤانیا رادبیت ل هه‌رسێ قه‌زایێن( ئاكرێ،به‌رده‌ره‌ش،شێخان) ب هه‌مى ناحیانڤه، هه‌روه‌سا ڤێ كومپانیایێ 750كرێكار هه‌نه و105 ل سه‌نته‌رێ ئاكرێ دانه و 150 ترومبێل و چوار گوهدرێژ رادبن ب كومكرنا گلێشى، پشتى دوماهى هاتنا گرێبه‌ستا كومپانیێ ئه‌و ئامیر و كه‌ل و په‌ل دێ بۆ حكومه‌تێ مینن.
ئاماژه دا وێ چه‌ندێ كو مه هنده‌ك تاخێن كه‌ڤن ل ئاكرێ هه‌نه و ترومبێل ناگه‌هنه ناڤ تاخاندا، ژبه‌ركو ئاكرێ باژێره‌كێ كه‌ڤناره و هه‌ر دكه‌ڤندا دناڤ وان كولانادا گوهدرێژ هاتینه بكارئینان بۆ ڤه‌گوهاستنا كه‌ل و په‌لا و ئه‌م نه‌شێین ده‌ستكاریێ ژى تێدابكه‌ین، له‌وما ئه‌م نه‌چارین ب رێیا وان چوار گوهدرێژان، روژانه گلێشێ وان تاخێن كه‌ڤن بگه‌هینه جادا گشتى و ترومبێل راكه‌ن، خه‌رجیا خودانێ گوهدرێژى ژلایێ كومپانیێ یه مه‌هانه دهێته خه‌رجكرن.
سه‌باره‌ت ئه‌و ده‌نگ و باسێ هاتیه به‌لاڤكرن كو هژمارا گوهدرێژێن كاردكه‌ن و یێن موچه‌ى وه‌ردگرن نه وه‌كهه‌ڤن سه‌روكێ شاره‌وانیا ئاكرێ ل دور ڤێ پرسێ گۆت كو سالا 2016ێ یێ ده‌ست ب كاربووى وه‌ك سه‌روكێ شاره‌وانیێ و تنێ ئه‌ڤ ئاماره ل به‌رده‌ستن، ئه‌و ئامارا هاتیه گوتن ره‌نگه وى ده‌مى بیت كو هێشتا كومپانیێ گرێبه‌ستا خوه نه‌گرێدابیت، كو دبیته به‌رى سالا 2011ێ، لێ پشتى ڤێ سالێ چ تشتێ هوسا نه‌بوویه، تنێ چوار گوهدرێژن و نه‌زێده‌تر و گرێبه‌ستێن وان ژى د ده‌ستێ كومپانیێ دانه، تنێ ئه‌م چاڤدێریێ ل سه‌ر دكه‌ین.
نيشاندان
