ئەڤرۆ نیوز:

بەری دەمەکێ وەزیرێ دەرڤە یێ روسیا سیرگێی لاڤرۆڤ راگەهاند کو هەرێما ئارام یا کو بریارە بهێتە ئاڤاکرن د بن کۆنترۆلا تورکیا دا نابیت، چونکو ئەو هەرێم ئاخا سووریێ یە و دڤێت د بن کۆنترۆلا حوکمەتا سووریێ دا بیت و نابیت تورکیا قانوونێن نێڤدەولەتی بنپێ بکەت.

ئەو یەک د دەمەکێ دایە کو دوهی پەیڤدارێ سەرۆک کۆماریا تورکیا دیار کربوو کو دێ هەرێما ئارام د بن کۆنترۆلا تورکیا دا بیت و کوردێن رۆژئاڤایێ کوردستانێ ژی ئەو یەک رەت کرن و دیار کرن کو تورکیا دخوازیت ب ڤی رەنگی رۆژئاڤایێ کوردستانێ داگیر بکەت.

ئەڤرۆ نیوز:

بەری دەمەکێ ل باژێرێ منبجێ د ئەنجاما پەقینەکێ دا چەندین سەربازێن ئەمریکا بریندار بوون و چەند سەرباز ژی هاتنە کوشتن لێ هەتا نها هژمارا دروست یا کوشتیان نەهاتیە راگەهاندن و هێزێن ئەمریکا بریندارێن خوە ب هیلیکۆپتەران دبەنە نەخوەشخانێ.

بەرپرسەکێ سەربازی ل منبجێ راگەهاند کو هەتا نها ئەگەرێ پەقینێ ناهێتە زانین و دێ دووڤچوونا بابەتی کەین.

ل ئالیێ دی دەستەیا سەربازی یا منبجێ ژی راگەهاند کو سەربازێن ئەمریکی ژی تێدا نەه کەسان جانێ خوە ژ دەست دایە.

رێکخراوا تیرۆرستی یا داعشێ بەرپرسیار خوە ل هەمبەر پەقینا منبجێ دیار کر، لێ هەتا نها بەرپرسێن سەربازی یێن منبجێ ئەو یەک پشتراست نەکرینە.

ئەڤرۆ نیۆز، قائید میرۆ:

چاڤدێرەکێ رەوشا سووریا ئاشکرا کر ئەمریکا سۆز دایە دەمەکێ نێزیک دێ رەوشا سووریا بھێتە ئاسایی کرن یان ژی رەوش ب تەمامی کەڤیتە بن مەترسیەکا مەزن ھەروەسا دبێژیت، دستوورێ سووریێ بھێتە بەرھەڤکرن دێ مافێن ھەموو ئایین و پێکھاتان ھێتە گەرنتی کرن.

دکتۆر کاوە ئازیزی، چاڤدێرێ رەوشا سووریێ بۆ ئەڤرۆ نیۆز دیار کر” ئەمریکا سۆز دایە پێنگاڤێن کردەیی بھێنە ھاڤێتن ل دۆر رەوشا سووریا، ھەتا رەوش زێدەتر ئالۆز نەبیت و بەرۆڤاژی پێدڤیە رەوش بھێتە ئاسایی کرن نابیت جارەکا دی شەڕ دەرکەڤیت، بڕیارە ژی ل رۆژێن داھاتی لیژنا بەرھەڤکرنا دستوورێ سووریێ دەست بکارێن خوە بکەت، ئاخڤتنا ئەمریکا بۆ رەوشا سووریێ ئەڤە بوویە یان دڤێت رەوش ب تەمامی بھێتە ئاسایی کرن، یان ژی دێ بەرەف پەقینێ بچیت، واتە گورەی سۆزێن ئەمریکا بیت دێ رەوشا سووریا بەرەف باشتر چیت ژ رەوشا نوکە تێدا، بەلێ ب دیتنا من رەوشا سووریێ زێدەتر ئالۆز نابیت، ژ بەر کو ئەڤا چێبوویی ل سالێن بۆری خراپتر نابیت.

 ل دۆر رۆلێ کوردان د ناڤا دستوورێ سووریێ دا دکتۆر کاوە ئازیزی ئاماژەکر” دستوورێ نوو یێ سووریێ دێ ل سەر بنەمایێن دیموکراتی و بەندێن مافێ مرۆڤی ھێتە ئاڤاکرن و مافێ ھەموو پێکھاتێن ناڤا سووریێ بھێتە پاراستن، کو ئەز باوەرم ل نڤیسینا پڕۆژێ دستوورێ سووریێ چو ئاریشە نابن، بەلێ ددەمێ بجهئینانێ دێ ئاستەنگ پەیدا بن، چونکو ھەکە دستوورەک دیموکراتی وەک خوە بھێتە بجهئینان و ھەلبژاردنەک ئازاد بھێتە ئەنجامدان، ئەڤە بێگومان دەستھەلات ل دەستێ عەلەویاندا نامینیت و دێ بکەڤیتە د دەستێ سوننان، ئەڤە ژی جھێ قەبوولکرنا تەخا عەلەویان نینە، بەلێ ئەز بخوە دگەل دستوورەکێ نوو مە بۆ پاراستنا مافێن ھەموو ئایین و پێکھاتەیان وی دەمی مافێ کوردان ژی دێ وەرە پاراستن و گەرەنتی کرن.