ئەڤرۆ نیوز:
یاریزانێ ئەلمانی و یانا ئەرسنال یا ئنگلیزی مەسعود ئوزێل نزیکی یانا ئەنترمیلان یا ئیتالی بوویە ل ماوێ بۆ وەرزێ بھێت.
زێدەتر رۆژنامەیا زە سەن یا برێتانی دیارکریە بەری نوکە دەستەیا کارگێریا یانا ئەنترمیلان یا ئیتالی چەندین کومبوون دگەل بەرپرسێ کارێن یاریزانێ ئەلمانی مەسعود ئوزێل کرینە پێخەمەت ڤەگوھاستنا وی بۆ یانا ئیتالی لێ ھەتا نوکە چو تشتێ فەرمی پێشکێشی یانا وی یا ئنگلیزی نەکریە بۆ ڤێ مەبەستێ ژبەرکو نوکە یاریزانێ ناڤھاتی گرێدای ھەڤبەستا خوە یە دگەل یانا ئارسنال.
ئەڤرۆ نیۆز، هۆشەنگ تاجر:
ئیمام تاشچیەر ئەندامێ پەرلەمانێ تورکیا یێ سەر ب هەدەپێ دیار کر کو لەیلا گوڤەن ئەنداما پەرلەمانێ تورکیا یا هەدەپێ ٢٦ رۆژن ل زیندانێ دەست ب مانگرتنا ژ خوارنێ کریە و مە دڤێت وەکو هەدەپە ئەم پشتەڤانیێ ل مانگرتنا وێ بکەین و گۆت: (سبێدێ کۆمبوونا پارتیا مە ل پەرلەمانێ تورکیا یا هەی و پشتی کۆمبوونێ دێ دەست ب مانگرتنێ کەین و دێ مانگرتن ژی دو یان سێ رۆژان یا بەردەوام بیت).
پەرلەمانتارێ هەدەپێ ئەو یەک ژی دیار کر کو پەروین بولدان هەڤسەرۆکا هەدەپێ ل گەل ٩ ئەندامێن دی یێن پەرلەمانی دێ دەست ب مانگرتنێ کەن و هەڤالێن مە یێن کو ساخلەمیا وان باش بیت دێ پشکداریێ د مانگرتنێ دا کەن.
ئەڤرۆ نیۆز، ئەمیر ئەترووشی:
رێڤەبەرێ گشتیێ کارەبا پارێزگەھا دھۆکێ راگەھاند، حۆکمەتا ھەرێما کوردستانێ دێ ٤٠ ملیۆن لیترێن دی یێن گازوایلێ بۆ وێستگەھا کواشێ ھنێریت و یەکەیەکا نوو یا کارەبێ دێ کەڤیتە کاری و ٢٠٠ مێگاواتێن دی دەتە پارێزگەھا دھۆکێ.
ئەندازیار محەمەد سالح، رێڤەبەرێ گشتیێ کارەبا پارێزگەھا دھۆکێ بۆ ئەڤرۆ نیۆز دیار کر، ئەڤرۆ رۆژا دووشەمبی ٣/١٢/٢٠١٨، وەزارەتا سامانێن سرۆشتی یا حۆکمەتا ھەرێما کوردستانێ رازەمەندیا خکوە دەربریە بۆ ھنارتنا ٤٠ ملیۆن لیترێن گازوایلێ بۆ وێستگەھا کواشێ یا بەرھەمئینانا کارەبێ و ب ڤێ گازوایلێ دێ وێستگەھەکا دی یا کارەبێ کەڤیتە کاری و ٢٠٠ مێگاواتێن دی یێن کارەبێ ھێنە بەرھەمئینان و ل سەر کارەبا پارێزگەھا دھۆکێ زێدەتر لێ ھێت و دەمژمێرێن کارەبێ ژی دێ زێدەتر لێ ھێن.
ئەو یەک ژی دیار کر کو ئەم نەدشیاین بەھرا خوە یا درۆست یا زڤستانێ بۆ پارێزگەھا دھۆکێ کو رێژا ٢٦% ژ تۆرا کارەبا گشتی یا ھەرێمێ وەربگرین و بەری نھا ب تنێ ٥٠ میگاواتێن کارەبێ ژ کواشێ بۆ پارێزگەھا دھۆکێ دھاتن، بەلێ نھا ئەو کارەبە دێ زێدەتر بۆ دھۆکێ ھێت و گەھیتە ٢٠٠ ھەتا ٢٢٠ مێگاواتێن کارەبێ کو تایبەت دێ بۆ دھۆکێ بن و دێ شێین رێژا خوە یا پێدڤی ژ تۆرا گشتیا کارەبا ھەرێمێ وەربگرین.
ئەندازیار محەمەد سالح، رێڤەبەرێ گشتیێ کارەبا پارێزگەھا دھۆکێ ئەو یەک ژی نە ڤەشارت کو د ماوێ ڤان دوو رۆژان دا ئەڤ رێژەیا گازوایلێ دێ گەھیتە پارێزگەھا دھۆکێ و دێ وێستگەھەکا نوو یا کارەبێ ل کواشێ کەڤیتە کاری و گۆت: بۆ ھەر یەکەکا کارەبێ ل کواشێ نێزیکی ٨٦٣ ھزار لیتر پێدڤی نە بۆ بەرھەمئینانا کارەبێ.
ئەڤرۆ نیوز:
تیما تەپا پێ یانا ھەولێر بەری دەمەکێ کێم تووشی خوسارەتیا سیێ بوو د خولا عیراقێ یا تەپا پێ دا بۆ یانێن نایاب ڤێ جارێ ژی ل سەر دەستێ یانا سەماوە ب گۆلەکێ بێ بەرامبەر.
گۆلا یانا سەماوە ل دەسپێکا یاریێ د نیڤا ئێکێ دا ژلایێ سەراج ناسر تومارکر ل خولەکا دویێ ژ یاریێ، پشتی ڤێ گۆلێ ھەولێر ب ھەموو شیانێن خوە بزاڤ کرن بۆ راستڤەکرنا ئەنجامێ یاریێ لێ ھەموو بزاڤێن وان بێ مفا بوون و نەشیان ڤێ چەندێ دەستڤە بینن ھەتا یاری ب ئەنجامێ گۆلەکێ بێ بەرامبەر د بەرژەوەندیا یانا سەماوە خودانا ئەرد و جەماوەری دا ب دووماھی ھاتی کو دبیتە یاریا سیێ د خولێ دا یانا ھەولێر تووش دبیت.
ئەڤرۆ نیوز، لەزگین جوقی:
رێڤەبەرێ پەروەردا کوردی ل قەزا شنگال بۆ ئەڤرۆ نیوز دیارکر کو پتر ژ ٦٠٠ مامۆستایێن وانەبێژ ل سنۆری پەروەردا شنگال ھەنە ب ھەڤکاریا ڤان وانەبێژان قوتابخانێن شنگال دھێنە برێڤەبرن.
حسێن خدر، رێڤەبەرێ پەروەردا کوردی ل قەزا شنگال بۆ ئەڤرۆ نیوز دیارکر ھەموو وانەبێژ پارێ خوە یی ھەیڤانە یی وانە گۆتنێ وەردگرن ئەڤ ھژمارا وانەبێژان بابەتیێن ھەمە جۆر ل قوتابخانێن کوردی سنۆرێ شنگال و کەمپێن ئاواران رێڤەدبەن لێ ل ھندەک کەمپێن ئاواران بارگرانیەکا مەزن ل سەر قوتابخانیێن ئاواران ھەنە سی دەوامی نە و رێژا قوتابیان گەلەک یا زێدەیە.
ئاشکرا کر ھەگەر خەلکێ شنگال زڤرنە سەر جە و مالێن خوە بێگومان ئەڤ رێژا وانەبیژان دێ گەلەک زێدەتر بیت چونکو نوکە ل کەمپێ ھەموو خەلکێ شنگال کۆمکرینە ل شنگال خەلکێ یی بەلاڤکریە ل سەر گۆند و کۆمەلگەە و ناحیە و دەڤەران بێگومان ئەڤ دێ بیتە ئەگەر فشارەکا زێدەتر بۆ کیماسیا میلاکیێ ل سەر پەروەردا شنگال دروست بیت.
ناڤھاتی ئەو ژی دیارکر رەوانەکرنا پەرتووکێن کوردی و پێدڤی خۆاندنا بۆ قوتابخانێن کوردی یا زەحمەت ئاستەنگ دھێنە چێکرن چونکو پێدڤیە مووسلێ را بھێنە رەوانەکرن وگەلەک زالگەھێن پشکنینێ ھەنە ھەتا رادەیەکی ئاستەنگ دھێنە دروستکرن.
ئەڤرۆ نیوز:
د نامەیەکێ دا سەروکێ رەوتا سەدر بۆ سەروک وەزیرێن عیراقێ عادل عەبدولمەھدی ھنارتیە و خواستیە ب ڤی شێوەی وەزێرێ نافخو و بەرگریێ ب ھەلبژریت بەروڤاژی دێ ھەلویستەکێ دی وەرگرن.
د ڤێ ناما سەدری دا ھاتیە پێدڤیە سەروکێ حوکمەتا عیراقێ گوھـ ل فشارێن چو لایەنا نە گریت بۆ دانانا وەزیرێن نافخو و بەرگریێ و پێدڤیە کەسێن تەکنوقرات بۆ ڤی پوستی بھێنە دیارکرن ئەوا بریارە سوبەھی رۆژا سێشەمبی بریارا دووماھیێ ل پەرلومانێ عیراقێ دەرکەڤیت بۆ دانانا وان ھەردو وەزیران.
ھەر د ڤێ نامێ دا سەدر گەف ل عادل عەبدولمەھدی کریە ئەگەر ل دووڤ وی شێوێ وی دیارکری ھەردو وەزیرێن نافخو و بەرگریێ نە ھەلبژێریت ئەو دێ بیتە ئوپوزوسیون د حکومەتا داھاتی دا و مە داخوازا دامەزراندنا چو کەسان نه کریە بۆ ڤان پوستان داکو خوە ژ فشارێ دووربێخی و نەکەڤیتە ژێر فشارا چو لایەنێن دی لەورا پێدڤیە ئەو ب خوە بریارێ بدەت بۆ ھەلبژارتنا ڤان دو وەزیران ژبەرکو ھندەک لایەنا دڤێت عیراقێ د رێیەکا تاری دا ببەن.
دیسان خواستیە پێدڤیە د ماوێ شەش ھەیڤان بۆ سالەکێ دا ھەلسەنگاندنا ئاستێ کابینەیا خوە بکەت و ئەو ب خوە ب سەلمینیت.
ئەڤرۆ نيۆز، لەزگين جوقى:
سەرۆكێ جڤاتا پارێزگەها مووسل دياركر كو شاندەكێ جڤاتا مووسل بۆ كار ئاسانى كرنێ قەستا هەرێما كوردستانێ كرن و بابەتێ ئەمنى ل مووسل گەنگەشەكرن ب تايبەتى ژى دگەل وەزارەتا ناڤخوە يا هەرێما كوردستانێ.
سەيدو چەتۆ، سەرۆكێ جڤاتا پارێزگەها مووسل بۆ ئەڤرۆ نيۆز دياركر كو جڤاتا مووسل سەرا چەندين دەزگەهێن حوكمەتا هەرێما كوردستانێ کرینە و ئەڤرۆ ژى دگەل وەزيرى ناڤخوە بابەتێ ئەمنى ل مووسل هاتە گەنگەشەكرن هەروەسا ژى داخواز هاتە كرن كارئاسانى بهێنە كرن بۆ ڤەكرنا رێیا سحێلا بۆ شنگال.
دهێتە زانین دەمێ حەشدا شەعبى هێرشى دەڤەرێن كوردستانێ كری پێشمەرگێ كوردستانێ ل سحێلا داستانەكا مەزن تۆمار كرن، ژ بەر ئالوزى و ئاستەنگێن حەشدا شەعبى هەتا نوكە ژى رێیا سحێلا هاتيە داخستن و گەلەك جاران ئيدارا شەرعی يا شنگالێ هەولدان كرينە دگەل حوكمەتا عيراقى بچنە شنگالێ و رێیا سحێلا بهێتە ڤەكرن لێ هەتا نوكە نەهاتيە ڤەكرن.
ئەڤرۆ نیوز:
ھەمی چاڤ ل جیھانێ دێ بەر ب ئاھەنگا خەلاتێ تەپا زێری یا باشترین یاریزان ل جیھانێ بۆ سالا ٢٠١٨ چن ئەوا دێ باشترین یاریزان تێدا ھێتە دەستنیشان کرن ژلایێ رۆژنامەیا فرانس فوتبول یا فرەنسی ڤە.
بریارە ئەڤ ئاھەنگە ئەڤرۆ رۆژا دوشەمبی بھێـتە ئەنجامدان ل پایتەختێ فرەنسا پاریس ل دەمژمێر ١٠:٤٥ ل دووڤ دەمێ ھەرێما کوردستانێ.
یاریزانێ کرواتی و یانا ریال مەدرید لوکا مودرێچ بەربژێرەکێ بھێزە بۆ دەستڤەئینانا ڤی ناسناڤی پشتی ناسناڤێ باشترین یاریزان ل سەر ئاستێ ئوروپا و جیھانێ د موندیالا روسیا دا دەستخوە ڤە ئینای.
ئەڤرۆ نیۆز:
پەیڤدارێ فەرمی یێ ئێکەتیا نیشتمانیا کوردستانێ سەعدی ئەحمەد پیرە دیار کر کو پیرۆزباهیێ ژ مەسرور بارزانی دکەین کو هاتیە بەربژارکرن بۆ پۆستێ سەرۆکێ ئەنجوومەنێ وەزیران یێ هەرێما کوردستانێ و هێڤیدارین کو د ئەرکێ خوە دا سەرکەفتی بیت.
پەیڤداریێ ئێکەتیێ هەروەسا دیار کر کو ئەم وەکو ئێکەتی دێ ب هەموو رەنگەکێ پشتەڤانیێ ل مەسرور بارزانی کەین و گۆت: (مەسرور بارزانی هەتا نها گەلەک کارێن گرنگ ئەنجام داینە و خوەدان ئەزموونەکا باشە د رێڤەبەریا وەلاتی دا و ئەم هێڤیدارین د ئەرکێ خوە یێ نوو دا ژی سەرکەفتی بیت).
نيشاندان