ئەڤرۆ نیۆز، قائید میرۆ:

ئیبراھیم برۆ، ئەندامێ ئەنجوومەنێ نیشتیمانیا کوردی ل سووریێ  بۆ ئەڤرۆ نیۆز دیار کر” ڤەخواندنێن جودا بۆ تویتا سەرۆکێ ئەمریکا دھێنەکرن، بەلێ بەحسێ دەڤەرەکا ئارام دکەن ل سووریێ گورەی زانیاریێن مە مەرەما ترەمپی ئەڤە پلانا ئەمریکا یا بەری نوکە بەرھەڤی بۆ ھاتیە کرن بھێتە بجهئینان، کو ئەمریکا ل بەرە دەڤەرەکا ئارام ل رۆژھەلاتێ فۆرات ئاڤا بکەت، ئەڤە ژی بۆ پاراستنا رۆژئاڤایێ کوردستانێ و ھێزێن لەشکەرێ رۆژ و ھێزا کریستیان و عەرەبێن عەشیرەتێن دەڤەرێ دێ ل ئەڤێ دەڤەرا ئارام ھێنە جێگیرکرن.

ل دۆر پەیوەندیێن پەیەدە و ئەمریکا ژی ئیبراھیم برۆ دبێژیت” سالێن بۆری ب مەرەما بەرھنگاربوونا داعشێ ئەمریکا ھاریکاریا پەیەدێ کریە، بەلێ دەما نوکە ئەمریکا دبێژیت نابیت چو زۆلمەک لسەر کوردان ھەبیت مەرەم پەیەدە نینە، بەلکو ئەمریکا ب زەلالی گۆتیە ئەم پشتەڤانیا رۆژئاڤایێ کوردستانێ دکەین دگەل ڤێ چەندێ ژی دژی بەرژەوەندیێن تورکیا نینە، یا دروست ئەڤە ئەمریکا پشتەڤانیا کوردان دکەت و ئێک کەسێ سەر ب پەکەکێ ژی ناھێلیت ل رۆژئاڤایێ کوردستانێ.

ئەڤرۆ نیوز:

بەرپرسەکێ کۆچکا سپی یا ئەمریکا راگەهاند کو ئەڤرۆکە هەر دو سەرۆک ئەرکانێن ئەمریکا و تورکیا دێ کۆمبن و ل دۆر چاوانیا ڤەکێشانا هێزێن ئەمریکا ژ سووریێ و رەوشا باکورێ سووریێ دانوستاندنان بکەن.

دەزگەهێن راگەهاندنا تورکیا ژی دیار دکەن کو جەنەرال جۆزێف دانفورد دێ ل گەل یاشار گولەر سەرۆک ئەرکانێ تورکیا کۆم بیت، لێ هەتا نها ژی جهێ کۆمبوونێ و دەمێ کۆمبوونێ بۆ رایا گشتی نەهاتیە ئاشکرا کرن.

ئەڤرۆ نیوز:

بەری دەمەکێ کۆمبوونا شاندێ پارتی و گۆرانێ بۆ چاوانیا پێکئینانا کابینا نوو یا حوکمەتا هەرێما کوردستانێ ب دووماهی هات و ل گۆر داخۆیانیەکا هەڤپشک هەر دو ئالیان بریار داینە کو دو لیژنان ئاڤا بکەن دا ئەڤ لیژنە چاوانیا کارنامێ کابینا نوو یا حوکمەتێ گەنگەشە بکەن و ئالیەتا چاوانیا پشکداریێ د کابینا نوو ژی بهێتە دیار کرن.

د پشکەکا دی یا داخۆیانیا هەڤپشک دا ئاماژە ب هندێ هاتیە کرن کو هەر دو ئالی د کۆمبوونێ دا ب گیانەکێ بەرپرسیارانە سەرەدەری ل گەل قۆناغا نوو کرینە و رژدی ل چاکسازیێ د هەموو بیاڤەکێ دا هاتیە کرن.