ئەڤرۆ نیوز:
راپورتێن رۆژنامەڤانی ل ئیسپانیا ئاشکرا کرینە یانا سیڤيلیا یا ئیسپانی گەھشتی یە رێککەفتنێ ل گەل یانا چێلسی بوو ڤەگوھاستنا ھێرشبەرێ وێ یێ ئیسپانی موراتا پشتی وی یاریزانی حەزا خوە دیارکری بوو ڤەگەراندنا خوه بۆ خۆلا لالیگا و ئەڤ جارە ب رێیا یانا سیڤيلیا .
ھەردیسان ھاتیە ئاشکرا کرن ژی چاڤەرێ دھێتەکرن ل ماوێ چەند رۆژێن بھێت ھەڤبەستا موراتای ل گەل سیڤيلیا ب فەرمی بھێتە راگەھاندن پشتی ھەردو يانه گەھشتی نە رێککەفتنێ.
ئەڤرۆ نیوز، بارزان مزووری:
سکرتێرێ سەندیکا رۆژنامەڤانێن کوردستانێ تایێ مووسل دیار کر کو هەتا ئەڤرۆ ژی پەیامنێر و وێنەگرێن مە یێن سەر ب سەندیکا مووسل ڤە نەشێن رومالێ بکەن ل پارێزگەھا مووسل و دەشتا مووسل و شەنگالێ، وان دەڤەرێن لبن دەستھەلاتداریا حەشدا شەعبی گەلەک ب زەحمەت کەفتی ژ بەر کو دەمێ رۆژنامەڤانێن مە بۆ رومالکرنێ سەرەدانا وان جھان دکەن ل پێنج جھان رەزامەندیێ وەردگرن هەتا بشێن بچنە وان جھان، پتری سێ جاران ھەڤالێن مە یێن رۆژنامەڤان ھاتیکە دەستەسەرکرن و ھاتینە قەدەغەکرن ژ وێنەگرتن و وێنەکرنێ ل شەنگالێ ژی کامیرێن رۆژنامەڤانان ھاتبوو دەستەسەرکرن و بۆ ماوێ ١٠ دەمژمێرا ژی نەھێلایە بزڤرنە جھێن خوە یێن لێ چووین.
ئەکرەم سلێمان سکرتێرێ سەندیکا رۆژنامەڤانێن کوردستانێ تایێ مووسل بۆ ئەڤرۆ نیوز گوت: (ئەم یێ کار دکەین کو دو لیژنا پێک بینین، لیژنەک ل سەندیکا رۆژنامەڤانێن بەغدا و لیژنەک ل سەندیکا رۆژنامەڤانێن کوردستانێ تایێ مووسل کو ئەوان ئاریشان چارەسەر بکەت، رێککەفتنەک دناڤبەرا مە دا بھێتە ئیمزاکرن کو رۆژنامەڤانێن مە ب ئازادانە رۆمالێ ل مووسل بکەن ژ بەر کو رۆژنامەڤانێن وان ل کوردستانێ ب ئازادانە رۆمالێ دکەن کەس رێگر نینە ژ رومالا وان ل کوردستانێ، بەلێ رۆژنامەڤانێن مە نەشێن سەرەدانا مووسل بکەن ژ بەر وان گروپێن چەکدار یێن دەستھەلاتدار).
ئەڤرۆ نیوز، قەیس وەیس:
رێڤەبەرێ رێڤەبەریا رێکخستنا پلێتێن ئاھێن خارنێ دیارکر ئەڤرۆ روژا چارشەمبى ل باژێرێ بەغدا پشکداری د پروژێ کارتا ئەلکترونی یا ئەرزاقی دا كر و حەفتیا بھێت دێ دەست ب سیستەمێ نوو ھێتەکرن کو دێ ژ پارێزگەھا دھوکێ دەستپێکەت.
زێدەتر حسێن سەبری دداخویانیەکا تایبەت دا بۆ ئەڤرو نیوز گۆت: حەفتیا بھێت دێ دەست ب سیستەمێ نوو یێ پلێتا ئەلکترونی یا ئەرزاقی ھێتەکرن کو دێ ژ پارێزگەھا دھوکێ دەستپێکەت ژبەر رێک و پێکیا کارێ رێڤەبەریا مە و شارازای دگەل کارێ ئاوارەیان دا کو ئەف سیستەمە ھاتیە جێبەجێکرن، کار دێ ژلایێ رێکخراوا WFP ھێتەکرن ب سەرپەرشتیا وەزارەتا بازرگانیا عیراقێ ژبو پتر ئاسانکاری بۆ ھاولاتیان ھێتە کرن درێڤەبرنا ماملێن خوە دا دیسان و دەستکاری و سەختەکرنا وێ ناھێتە کرن.
ل دووماھیێ حسێنی بەحسی شێوازێ کارکرنا ڤی سیستەمی کر و گوت: ھەر کەسێ ئەمرێ خودێ کر وەزارەتا تەندروستی مافێ ھەی لدەف خوە ناڤێ وی د سیستەمی دا رەش بکەن دیسان زاروکێن نوی ژ لایێ وانڤە دێ ھێنە زێدەکرن ب شێوەکێ ئەلکترونی دیسان ھەر بریکارەکی دێ ئامیرەکێ تایبەت ھەبیت د شێت مامەلێن خەلکی برێڤە ببەت بێی بشێت دەستکاریێ تێدا بکەن دیسان خالێن سنوری ھەر کەسێ چو ژ دەرڤەی وەلاتی و بۆ ماوێ دو ھەیڤا نە زڤری ئوتوماتیکی دێ ناڤێ وی ھێتە رەش کرن.
ئەڤرۆ نیوز، هۆشەنگ تاجر:
خالد محەمەد زادە رۆژنامەڤانێ کورد یێ رۆژهەلاتێ کوردستانێ بۆ ئەڤرۆ نیوز دیار کر بۆ جارا ئێکێ ل ئیرانێ ژنەکا کورد دبیتە قائیمقاما باژێرکێ زێویەی سەر ب باژێرێ سەقز یێ رۆژهەلاتێ کوردستانێ و گۆت: (ئێک ژ داخوازیێن کوردێن رۆژهەلات ژ حوکمەتێ ئەڤە بوویە پۆستێن ئیداری یێن رۆژهەلاتێ کوردستانێ رادەستی کوردان بکەن و ژ بەر هندێ ژی ئەڤە دبیتە جارا ئێکێ کو ژنەکا کورد ڤی پۆستی وەربگریت).
ناڤهاتی راگەهاند ژی کو خەلکێ رۆژهەلات دەستخوەشیێ ل ڤێ پێنگاڤێ دکەن و هێڤیدارن حوکمەت رێزێ ل داخوازیێن وان بگریت.
ئەڤرۆ نیوز، هۆشەنگ تاجر:
مەسعود تەک سەرۆکێ گشتی یێ پارتیا سوسیالیست یا کوردستانێ ل باکور بۆ ئەڤرۆ نیوز دیار کر کو ترامپ هەر رۆژێ تشتەکێ دبێژیت و ژ بەر هندێ ژی سەرکردێن کورد ل رۆژئاڤا نزانن کا دێ چ کەن و گۆت: (هەتا نها ژی هەلویستێ ئەمریکا ل دۆر رۆژئاڤا دیار نینە، رەنگە ئەمریکا دەستان ژ کوردان بەر نەدەت لێ ئەو یەک رامانا هندێ ژی نادەت کو ئەمریکا دێ بۆ کوردان گەلەک تشتان کەت، دڤێت کورد بخوە سیاسەتەکا سەربخوە برێڤە ببەن و پشتا خوە ب ئەمریکا گەرم نەکەن).
ل ئالیێ دی رۆژناما تایمز ژی دیار کریە کو رەنگە ئەردۆگان بێی دەستوریا ئەمریکا ژی هێرشی کوردێن سووریێ بکەت.
ئەڤرۆ، سالار دۆسکی:
بەرپرسێ مالا لاوان ل دھۆکێ دیارکر مالا لاوان ب ھەفکاری ل گەل پەیمانگەھا داڤێنشی، ژڤانە ل حەفتیا داھاتی پرۆژەکێ زانستێن سەربازی کو تێدا (١٢٠) کور و کچ تێدا پشکداربن ڤەکەت.
رێڤینگ شێخکی، بەرپرسێ مالا لاوان ل دھۆکێ بۆ ئەڤرۆ نیۆز گۆت: ١٢٠ کچ و کورێن پەیمانگەھا داڤێنشی دێ بۆ ماوێ (١٠) رۆژان ل سەربازگەھا (پێشابیرێ) دناڤ پێشمەرگەی دا فێری ھەموو راھێنانێن پێشمەرگەی بن، سمینار و وورک شوپ و ئاھەنگ دێ ھەبن.
شێخکی ئەو چەندە ژی گۆت: پرۆژە دێ ب شێوازەکێ ئەزموونی بیت، بەرپرسێ ئێکەتیا لاواێن کوردستانێ کاک (مەیسەر عوبێد) دیارکریە کو ھەکە پرۆژی سەرکەفتن ئینا دێ بیتە پرۆژەکێ سەرانسەری و ھەموو ناڤەندێن لاوان ل سەر ئاستێ ھەرێما کوردستانێ ھێتە ئەنجامدان.
شێخکی ئەو ژی ئاشکراکر کو ئارمانج ژ ئەنجامدانا پرۆژەی ئەوە گەنجان لەشکەکێ ساخلەم ھەبیت و یێ بەرھەڤ بیت بۆ ھەر گرفتەکا تەنگاڤ کو ل پاشەرۆژێ بشێت خزمەتا وەلاتێ خوە بکەت.
ئەڤرۆ نیوز:
وەزیرێ دەرڤە یێ ئەمریکا مایک پۆمپیۆ ئەڤرۆکە گەهشتیە بەغدا و بریارە ل دۆر رەوشا سووریێ و هەبوونا هێزێن ئەمریکا ل عیراقێ و هەروەسا بابەتێ سزایێن ئابووری یێن ل سەر ئیرانێ ل گەل بەرپرسێن عیراقێ هەڤدیتنان بکەت.
سەرۆکێ پەرلەمانێ عیراقێ محەمەد حەلبووسی پێشوازی ل وەزیرێ دەرڤە یێ ئەمریکا کر و بریارە پۆمپیۆ ل گەل چەندین سەرکردێن عیراقێ هەڤدیتنان بکەت.
وەزیرێ دەرڤە یێ ئەمریکا بەری کو سەرەدانا عیراقێ بکەت سەرەدانا ئوردنێ کربوو و دیار کربوو ئەمریکا دێ بۆ ئارامیا رۆژهەلاتا ناڤین یا پێدڤی کەت و سوپاسیا وان وەلاتان ژی دکەین یێن کو پێگیریێ ب سزایێن مە یێن ل سەر ئیرانێ بکەن.
ئاکرێ، سەباح زوھێر:
تەیب محمد بەرسێ ئامارا ساخلەمیا ئاکرێ بۆ ئەڤرۆ نیوز دیارکر ل دویڤ ئامارا ساخلەمیا ئاکرێ یا سالا بوری ل نەخوشخانا تەنگاڤیان ٤ ھزار و ٧١١ نشتەرگەری بۆ خەلکێ دەڤەرێ ھاتینەکرن.
ئاماژە دا وێ چەندێ کو ئەڤ نشتەرگەریێن دھێنەکرن جورا و جورن کو روژانە بۆ خەلکی دھێنە ئەنجامدان، کو ل نەخوشخانا گۆلان نوکەدا روژانە پتری ٢٠ نشتەرگەریا دھێنە ئەنجامدان.
ئەڤرۆنیوز:
ھاتن و چوونا پارێزگەھا دھۆکێ راگەھاند ئەڤرۆ رۆژا چارشەمبی ژ ئەگەرێ دو روودانێن ھاتن وچوونێ ل سنوورێ قەزا بەردەڕەش سێ کەس برینداربوون.
ئەڤرۆ چارشەمبی رێکەفتی ٩/١/٢٠١٩ ژئەگەرێ دو روودانێن ھاتن و چوونێ ل دەڤەرا قەزا بەردەرەش سێ کەس برینداربوون، ئاشکرا ژی کر روودانا ئێکێ ژ پێکدادان د ناڤبەرا دو ترومبێلان ل سەر رێیا گشتی یارناڤبەرا قەزا بەردەرەش و ناحیا روڤیا ل نزیک گوندێ قەرەناس روودا و د ئەنجام دا سێ کەس بریندار بوون.
روودانا دویێ لە سەر رێیا قەزا بەردەرەش و ناحیە کەلەک ل نزیک گوندێ گردەپان ھاتیە روودان ئەوژی پێک ھاتبوو ژ وەرگەڕانا ترومپێلەکا بارھەلگر لێ خۆشبەختانە چوو زیانێین گیانی نەبوون.
ئەڤرۆ نیوز، نەوزاد ھلۆری:
ئەڤرۆ ل گوندێ لیرەی یا سەر ب دەڤەرا بارزان کو نێزیکێ باژێرێ شەمزینان یا باکوورێ کوردستانێ یە، پتری ٤٠سم بەفرێ بارینە، بڤێ یەکێ رێیا وان و پتری ٥٠ گوندێن دن کەفتیە دمەترسیێ دا.
بارزان عەبدولڵا، وەلاتیەکێ گوندێ لیرەیە بۆ ئەڤرۆ نیوز گۆت: (ئەڤرۆ ل گوندێ لیرەی یا سەر ب ناحیا شێروان مەزن ل دەڤەرا بارزان ٤٠سم بەفر باری یە، رێیا ھاتنووچۆنا مە و پتری ٥٠ گوندێن دن کەفتیە د مەترسیێ دا، بەلێ سوپاس بو خودێ تیمێن رامالینا بەفرێ ھاریکارن و بەردەوامن لسەر کارێ خوە).
زێدەتر گۆت: (بەفرێ دیمەنێن زور جوان داینە گوندێ مە و سرۆشت ب تەمامی سپی بویە، و خەلکەکێ زور بو بوراندنا دەمەکێ خوش سەردانا گوندێ مە و دەوروبەران دکەن).
دھێتە زانین کو ھەر ژبەر بەفرێ، ئەڤرۆ ل خالا گوندێ سەڤرە رێیا ھاتنووچۆنێ دناڤبەرا شێلادزێ و دەڤەرا بارزان ھاتیە برین.
نيشاندان