ئه‌ڤرۆ نیۆز، ئازاد نسری:
سه‌رۆك مه‌سعود بارزانی و شاندێ ل گه‌ل دا پشتی سه‌ره‌دانه‌كا چه‌ند رۆژی بۆ به‌غدا و وه‌لاتێن كه‌نداڤی و دیدار و چاڤپێكه‌فتن ل گه‌ل به‌رپرسێن پله بلندێن عیراق و ئیماراتا ئێكگرتیا عه‌ره‌بی و كوێت ئه‌نجامداین، ئه‌ڤرۆ 27/11/2018 ب رێیا فرۆكخانا نێڤده‌وله‌تی یا هه‌ولێرێ ڤه‌گه‌ڕیا هه‌رێما كوردستانێ.
ئەڤرۆ نیۆز:
رۆژناما تایمز یا بریتانی ئەڤرۆ د راپۆرتەکێ دا دیار کریە کو رێککەفتنا تورکیا و روسیا ل دۆر ئدلبێ نەهاتیە بجهئینان و گرۆپێن کو تورکیا پشتەڤانی ل وان دکر گرێدای رێککەفتنێ نەبووینە و ل چەندین دەڤەران چەکێن قەدەغەکری ل دژی وەلاتیان بکار ئیناینە کو جارا دووماهیێ ژی ل چەندین تاخێن حەلەبێ بوویە.
د بەردەوامیا راپۆرتێ دا ئەو یەک ژی دیار کر کو روسیا ب هەموو رەنگەکێ پشتەڤانیێ ل بەشاری و بهێزبوونا وی دکەت و تورکیا ژی بۆ بەرژەوەندیێن خوە ب نهێنی هاریکاریا وان گرۆپێن چەکداری دکەت و ژ بەر هندێ ژی رەنگە ئەو یەک ببیتە ئەگەرێ ئالۆزیێن نوو د ناڤبەرا روسیا و تورکیا دا و رێککەفتن بهێتە هلوەشاندن.
ئەڤرۆ نيوز، ژیمان سەعید:
رێڤەبەرێ بەنکا خوینێ ئاشکەرا کر کو نھا رۆژانە ئەو پێدڤی نێزیکی 100 بتلێن خوینێ دبن و دا زانین کو دا پێرا بگەھن، خوینێ پۆلین دکەن و ل دووڤ پێدڤیاتیێ ددەنە نەخۆشان.
عادل عەبدلسەلام، رێڤەبەرێ بەنکا خوینێ بۆ ئەڤرۆ دیارکر کو رۆژانە نێزیکی 80 ھەتا 100 بتلێن خوینێ ددەینە نەخۆشان و پتر ژ 700 بتلان مە د ناڤ بەنکێ دا دمینن بۆ وان نەخۆشێن تەنگاڤ و گۆت: “رۆژانە پێدڤی ب 100 بتلێن خوینێ دبین و ژ وان 100 بتلان ژی 10%ێ دھێتە ھاڤێتن و ئەوێن دھێنە ھاڤێتن ژی ئەون یێن کو ب کێری ب کارئینانێ نەھێن.
رێڤەبەرێ بەنکا خوینێ ئەو ژی نەڤەشارت کو ھەر کەسێ بچیت خوینێ بدەت بەری کو خوین ژێ بھێتە کێشان ھندەک پشکنین بۆ دھێنە کرن دا کو پشت راست بن کو ئەوی کەسی چو نەخوشی لێ نینن و ھندەک جاران ژی د پشکنینان دا ھندەک نەخۆشی دەردکەڤن بۆ نموونە ئاریشە د کلیێن وی دا یێن ھەین یان د گەدێ دا یان ژی خوینا وان کێمترە ژ 13ێ ئەڤە ئەگەر زەلام بیت، نابیت خوین ژڤان بھێتە کێشان و بدەنە نەخۆشان.
عادل عەبدلسەلام ئاماژە ب وێ چەندێ ژی کر کو نھا ئەو خوینێ ھەموویێ نادەینە چ نەخۆشان، ئانکو خوینێ دکەنە پشک پشک دا کو نە ب تنێ نەخۆشەک مفایی ژ وی جورێ خوینێ ببینیت، بەلکو سێ ھەتا چار نەخۆشان دێ مفای ژ جورێن خوینێ بینن. “بۆ نموونە بۆ نەخۆشێن تەلاسیمیا ب تنێ پێدڤی ب خروکێن سور ھەنە خرۆکێن سور ب تنێ ددەینێ و ئەوێن پێدڤی ب ماددێ ئاسنی ھەین ب تنێ وی ماددەی ددەینێ و ئەوێ ب تنێ خوینا وی کێم بیت خوینێ ب تنێ ددەینێ”.
ئەڤرۆ نیوز:
ئێکەتیا نشتیمانی یا کوردستان ئەڤرۆ رۆژا سێشەمبی ئاشکرا کر ئەوان پوستێ وەزارەتا داد بۆ خوە ئێکلا کریە ل دووڤ پشکا خوە د حکومەتا نوو یێ عیراقێ دا پشتی رێککەفتنا سیاسی ل سەر ھاتیە کرن.
د ڤی چارچوڤەی دا جوان احسان سەروک لیستا ئێکەتیێ د پەرلەمانێ عیراقێ دا دیارکر وان پوستێ وەزارەتا داد د حکومەتا نوو یا عیراقێ دا بۆ خوە ئێکلا کر پشتی رێککەفتنا سیاسی ھاتیە کرن ل سەر پشک و بەربژێرێ وان کو ئەو ژی خالد شوانی یە بۆ ڤی پوستی ھاتیە دەستنیشان کرن و چو نە رازیبون ل سەر وی نەبووینە بەری نوکە.
راگەھاندنا جڤاتا نوونەرێن عیراقێ دیارکر ل رۆژا سێشەمبیا بھێت دێ کومبونا جڤاتێ دوبارە ھێتە ئەنجامدان بۆ تمامکرنا پێکئینانا کابینا نوو یا حکومەتێ.
ئەڤرۆ نیوز، لەزگین جوقی:
ل رۆژا ٢٧/١١/٢٠١٨ د. نزار عسمەت رێڤەبەرێ گشتیی یێ ساخلەمیا پارێزگەھا دھۆکێ پێشوازی ل د. خەمیس سەعد نوونەرێ وەزارەتا ساخلەمیا عیراقی و د. فەلاح ئەلتایی رێڤەبەرێ گشتیێ ساخلەمیا پارێزگەھا مووسل کرن.
د. نزار عسمەت رێڤەبەرێ گشتیی یێ ساخلەمیا پارێزگەھا دھۆکێ د ھەڤدیتنەکێ دا دگەل شاندی وەزارەتا ساخلەمیا عیراقی بەحسێ رەوشا ئاواران دوارێ ساخلەمیێ دا کرن و ئەو فشارا مەزن یا سەر دام و دەزگەھێن ساخلەمیا دھۆکێ دروست بووی ژبەر ھژمارا زۆر یا ئاواران وپەنابەران ل سنۆری پارێزگەھا دھۆکێ و داخوازکر زێدەتر ھەڤکاریا ساخلەمیا دھۆکێ بھێتە کرن د واری ساخلەمیێ دا بۆ خزمەتکرنا خەلکێ پارێزگەھا دھۆکێ و ھەموو ئاوارە و پەنابەران.
د. خەمیس سەعد نوونەری وەزارەتا ساخلەمیی ل عیراقی دیارکرکو ساخلەمیا دھۆکێ پشتەڤانیەکا باش د وارێ ساخلەمیێ دا ل ئاواران کریە پشتی مە سەرەدانا ھندەک بنگەھێن ساخلەمیی ل کەمپان کری مە دیت رەوشا ساخلەمیێ ل کەمپان گەلەک یا باشە وھەموو پێدڤین نوشداری و تاقیگەھی و دەرمانخان ل بنگەھان ھەنە.
ل رۆژا ٢٧/١١/٢٠١٨ ساخلەمیا عیراقی قەستا ساخلەمیا دھۆکێ کر بۆ ھایدار بوون ل سەر رەوشا ساخلەمیی ل کەمپان.
ئاشکەرا کر کو ل بەرە بۆ سالا بھێت ٢٠١٩ێ ھەڤکاریا ساخلەمیا دھۆکێ بکەت نەھیلن زێدەتر فشار ل سەر ساخلەمیێ دروست بیت ھەتا نوکە رێژەکا زۆر یا ئاواران ماینە سنۆری ھەرێما کوردستانێ ب تایبەتی ژی ل پارێزگەھا دھۆکێ نەزڤرینە سەر جە و مالێن خوە ژبەر ئەگەرێن ھەمە جۆر ل دەشتا نەینەوا و پارێزگەھا مووسل نوکە ئەم یێ ھەولدەن ھەموو شیانیێن خوە پشتەڤانیا ساخلەمیا دھۆکێ بکەن دواری پتر گەھاندنا خزمەتێن ساخلەمیی بۆ ئاواران.
د. فەلاح ئەلتایی رێڤەبەرێ گشتیی یی ساخلەمیا مووسل بۆ ئەڤرۆ نیوز دیارکرکو ئەڤە چار سالن ئاوارە مووسل ل پارێزگەھا دھۆکێ ئاکنجیی یێن بووینە بارگرانیەکا مەزن ل سەر ھەموو دام ودەزگەھیێن حکومەتا ھەرێمێ ل دھۆکێ نوکە ئەم یی ھەولدەن ھاریکاریا ئاواران دواری ساخلەمیێ دا بۆ سالا بیت بھێتە کرن.
ئەڤرۆ نیوز:
وەزیرێ دارایی یێ حکومەتا عیراقێ فوئاد حسێن ل نڤێسینگەھا خوە یا تایبەت ل بەغدا پێشوازی ل دینا مەنسووری رێڤەبەرا ھنارتیێ ئاژانسا ئەمریکا بۆ گەشەپێدانا نیڤدەولەتی یا USID و شاندێ دگەل دا کر.
د ڤێ دیدارێ دا دینا مەنسووری ب ھەلکەفتا پیروزکرنا وەرگرتنا پوستێ وەزارەتا دارایی ژلایێ فوئاد حسێن ڤە کر و ئامادەکاریا خوە دەربری بۆ ھەر پشتەڤانیەکێ بۆ پێشخستنا شیانێن کارمەندێن وەزارەتا دارایی.
ژلایێ خوە ڤە فوئاد حسێن سوپاسیا سەروکێ USID کر ژبەر رولێ ڤێ ئاژانسێ د پێشخستنا دامو دەزگایێن حکومەتا عیراقێ و گرنگیێ زێدەتر ب پێشخستنا شیانێن کارمەندێن دارایی بکەن.
ناڤھاتی ئاماژە ب وێ چەندێ ژی کر نوکە حکومەتێ بەرنامەیەکێ دوور ژ مەرکەزیەتێ ھەیە بۆ چاکسازیێ د سیستەمێ بانکێ دا و دوبارە ئاڤاکرنا ژێرخانەیەکا ئابووریا بھێز بۆ عیراقێ داکو تنێ پشبەستنێ ل سەر داھاتێ نەفتێ نەکەت تایبەت د ڤان کاودانان دا ژبەرکو بھایێ نەفتێ یێ گونجای نینە.
ئەڤرۆ نیوز:
تیما تەپا یا یانا گارە سەرکەفتن د یاریا خوە یا ئەڤرۆ ژ کوما دویێ یا خولا ھەرێما کوردستانێ یا تەپا پێ بۆ یانێن پلە ئێک تومارکر ل سەر یانا خانەقین ب دو گۆلان بێ بەرامبەر د یاریا وان دا ئەوا ل یاریگەھا چالاکیێن وەرزشی ھاتیە کرن ژ گەرا دویێ.
ھەردو گۆلێن یانا گارە ل نیڤا ئێکێ ژلایێ یاریزانێ وێ ئەحمەد جاسم ڤە ھاتنە تومارکرن، ب ڤێ سەرکەفتنێ گارە بھێز ھاتە د ھەڤرکیێ دا و ھژمارا خالێن خوە کرە چار خال.
ئەڤرۆ نیۆز:
ئەحمەد تورک کەسایەتیێ سیاسی یێ باکورێ کوردستانێ و هەڤسەرۆکێ بەرێ یێ باژێرڤانیا مێردینێ ئەڤرۆ پشتی کۆمبوونا هەدەپێ یا ل پەرلەمانێ تورکیا بۆ دەزگەهێن راگەهاندنێ ئاخڤی و دیار کر کو دڤێت حوکمەت رێزێ ل دەنگێ وەلاتیان بگریت و دوورخستنا هەڤسەرۆکێن باژێرڤانیێن هەدەپێ ژ ئالیێ دەولەتێ ڤە بنپێکرنا قانوونێن تورکیایە و دڤێت ئەو یەک ب دووماهی بهێت.
ناڤهاتی ل دۆر هندێ کا بەرهەڤە ببیتە هەڤسەرۆکێ باژێرڤانیەکێ ل باکورێ کوردستانێ یان نە؟ دیار کر کو هەکە گەلێ مە ل باکورێ کوردستانێ داخوازیەکا وەسا ل من بکەت یان ژی هەدەپە ب فەرمی داخواز ژ من بکەت ئەز بەرهەڤم خوە کاندید بکەم، لێ هەتا نها من هزر ل دۆر هندێ نەکریە.
ئەڤرۆ نیۆز، هۆشەنگ تاجر:
رێکخراوا مافێ مرۆڤی یا رۆژهەلاتێ کوردستانێ دوهی راپۆرتەک ل دۆر رێژا خوە کوشتنا زەلامان ل رۆژهەلاتێ کوردستانێ بەلاڤ کر و د راپۆرتێ دا هاتیە دیار کرن کو ئەڤسالە هەتا نها ٦٨ زەلامان ل رۆژهەلاتێ کوردستانێ ژ بەر بێکاریێ و هەژاریێ دووماهی ب ژیانا خوە ئیناینە کو رێژا ١٥% ژ ڤان کەسان ژیێ وان خوار ٢٠ سالیێ بوویە.
د ڤێ دەربارێ دا حەمید بەهرامی مامۆستایێ جڤاکناسیێ ل زانکۆیێ بۆ ئەڤرۆ نیۆز دیار کر کو ئێک ژ ئەگەرێن سەرەکی یێ زێدەبوونا رێژا خوە کوشتنا زەلامان ل رۆژهەلاتێ کوردستانێ رەوشا خراب یا ئابووریێ یە، بێکاری ل رۆژهەلاتی زێدە دبیت و کار نینە و ژ بەر هندێ ژی گەنج و زەلام تووشی ئاریشێن دەروونی دبن و ژ نەچاریێ دووماهیێ ب ژیانا خوە دئینن.
ئەڤرۆ نیوز، عەزیز ھەورامی :
ب ئامادەبونا کەس و کارێن قوربانیێن کێمیابارانا ھەلەبچە ئەڤرۆ دووەم دادبینی د دادگەھکرنا تومەتبارێن کەیسا فروتنا چەکێ کێمیایی بۆ حکومەتا بەعس ھاتە ئەنجامدان لێ ژ بەر ئامادەنەبوونا تومەتباران ئەڤ رووینشتنە ھاتە پاشخستن.
د ڤی چارچوڤەی دا گابریێل کامیرون پارێزەرێ ئەمریکی د دوسەیا کێمیابارانا ھەلەبچە د کونگرەکێ رۆژنامەڤانی دا دیارکر کاغەزا سکالایێ ب رێکا نوونەراتیا حکومەتا ھەرێما کوردستانێ بۆ ھەمی وان کومپانیا چووینە ل وەلاتێن وان و ب زمانێ وان و پێنج کەس تومەتبارن د ڤی کەیسێ فروتنا چەکێ کێمیابارانی دا بۆ حکومەتا بەعس.
ئەو کومپانیێن تومەتبار ژی ئوروپی نە ژ وەلاتێن ئەلمانیا، بەلچیکا، ھولەندا، فرەنسا ب رێکا حکومەتا ھەرێمێ ژی ھاتینە ئاگەھدارکرن ب سکالایێ.
ناڤھاتی ئەو چەندە ژی دیارکر کو ئەڤ دادگەھکرنە ب یاسایی برێڤەچوویە و زێدەتر ژ ١٤٠٠ کەسان سکالا تومارکرینە وە ئەڤ دوسەیە دێ یا بەردەوام بیت ھەتا ئەو کومپانیێن چەکێ کێمیاوی دایە رژێما بەعس بگەھنە سزایێ خوە.
نيشاندان