ئەڤرۆ نيوز:
ب ئاماده‌بونا فه‌رهاد ئه‌مین ئه‌ترووشی پارێزگه‌رێ‌ دهوكێ‌ دیداره‌كا بازرگانی دناڤبه‌را ژورا بازرگانی و پیشه‌سازیا دهوك و ژورا بازرگانی و پیشه‌سازی یا باشورێ‌ كومارا تركیا ب ئاماده‌بونا بازرگان و خودان كومپانیێن هه‌ردوو لایه‌نان ل شه‌ڤا 26 ل سه‌ر 27-11-2018 ل ئوتێلا ریكسوس هاته‌ ئه‌نجامدان.
ل ده‌ست پێكێ‌ پارێزگه‌رێ‌ دهوكێ‌ خوشحالیا خو ب ئه‌نجامدانا دیدارێ‌ دیاركر وگوت كو پشتی په‌یوه‌ندیێن هه‌رێما كوردستانێ‌ دگه‌ل حكومه‌تا ئیراقێ‌ به‌ره‌ف ئاساییبونێ‌ چوین ،  ئه‌م پێشبینی دكه‌ین كو ئاستێ‌ ئالوگوریا بازرگانی دناڤبه‌را وه‌لاتێ‌ تركیا وهه‌رێما كوردستانێ‌ وئیراقێ‌ ل سالا 2019به‌ره‌ف زێده‌بونێ‌ بچیت وئه‌ڤ جوره‌ دیداره‌ دناڤبه‌را بازرگانێن كوردستانا تركیا وبازرگانێن پارێزگه‌ها دهوكێ‌ كاره‌كێ‌ زور باشه‌ ودێ‌ ده‌لیڤێن كاری وبازرگانی ل هه‌مبه‌ر وه‌لاتیان ل هه‌ردوو ئالیان ڤه‌كه‌ت .
هه‌روه‌سا گوت به‌ری سالا 2017ێ‌ مه‌ وه‌كو پارێزگه‌ها دهوكێ‌ وحكومه‌تا هه‌رێمێ‌ پێنگاڤێن باش هاڤێتبون بو خورتكرنا بزاڤا بازرگانی دگه‌ل تركیا وه‌كو ڤه‌كرنا پرا سیێ‌ ل براهیم خه‌لیل وڤه‌كرنا خالا سنوری ل سه‌ر زێری وچاڤه‌ریده‌كه‌ین پتر ده‌رگه‌ه بهێنه‌ڤه‌كرن.
پارێزگه‌رێ‌ دهوكێ‌ پێشنیار كر كو بازرگان وكومپانیێن تركی كارگه‌ها ل سنورێ‌ پارێزگه‌هێ‌ دامه‌زرینن بو وێ‌ یه‌كێ‌ كه‌ل وپه‌لێن بیناسازی وخزمه‌تكاری ل پارێزگه‌هێ‌ بهێنه‌ به‌رهه‌م ئینان ولسه‌ر بازرگانێن كوردستانێ‌ وئیراقێ‌ ئه‌رزانن ببن هه‌روه‌سا جهه‌ك بو بازارێ‌  ئازاد بهێته‌ دانان چونكو پارێزگه‌ها دهوكێ‌ یا هه‌ڤسویه‌ دگه‌ل تركیا ژرویێ‌ جوگرافی وكومه‌لایه‌تی وده‌رگه‌هه‌كێ‌ مه‌زن یێ‌ بازرگانیه‌ بو تركیا وده‌ڤه‌رێ‌ ،  ل دوماهیێ‌ خواست كو ده‌زگه‌هێن حكومه‌تا كوردستانێ‌ ل سنورێ‌ پارێزگه‌هێ‌ هه‌موو ئاسانكاریا بو بازرگانێن تركی بكه‌ن بو وێ‌ یه‌كێ‌ بزاڤا بازرگانی بهێته‌ خورتكرن وبه‌رهه‌ڤیا پارێزگه‌هێ‌ نیشان دا بو هه‌ر هاریكاریه‌كێ‌.
پاش شێخ ئه‌یاد حسن سه‌روكێ‌ ژورا بارزگانی ل دهوكێ‌ ومحمد كایا سه‌روكێ‌ ژوار بازرگانیا ئامه‌دێ‌ وسه‌روكێ‌ ژوارا بازرگانیا باتمانێ‌ گوتارێن خو پێشكێشكرن وهه‌مویان ته‌كه‌زی ل سه‌ر خورتكرنا بزاڤا بازرگانی دناڤبه‌را هه‌رێمێ‌ وباشورێ‌ تركیا دا كر.
پاش ژورا بازرگانیا دهوك پروتوكوله‌ك دگه‌ل ژورێن  بازرگانیا ئامه‌د وباتمانێ‌ واژوكر.
ل دوماهیێ‌ دان وستاندن دناڤبه‌را هه‌ردوو ئالیان ده‌ست پێكرن وچه‌ندین گرێبه‌ست دناڤبه‌را بازرگانێن باشورێ‌ كومارا تركیا وبازرگانێن پارێزگه‌ها دهوكێ‌ هاتنه‌ وااژوكرن .
هه‌ژی گوتنێ‌ یه‌ دڤێ‌ دیدارێ‌ دا نێزیك سه‌د بازرگان وسه‌رمایه‌دارێن ژورا بازرگانیا(دیاربه‌كر وشرنه‌خ وباتمان و وان وجزیرێ‌) ل باشورێ‌ تركیا وسه‌دان بازرگانێن پارێزگه‌هێ‌ به‌رهه‌ڤببون.