ئەڤرۆ نیوز، بارزان مزووری:
بەرپرسێ ھۆبا ئاڤدانێ ل قەزا شێخان بۆ ئەڤرۆ نیوز دیار کر ل دووڤ ئامارەکا دروست یا ھۆبا وان، د ئەڤ سالە دا ١٨١ ملیمێن بارانێ ل قەزا شێخان بارینە و گۆت: “د سالا بوری دا ھەتا ڤی دەمی ١٧ ملیمێن بارانێ باری بوون”.
ئەندازیار ئیبراھیم یوسف، بەرپرسێ ھۆبا ئاڤدانێ ل قەزا شێخان دیار کر کو بۆ جارا ئێکێ یە باران د ڤی وەرزێ سالێ دا ب ڤێ رێژێ دباریت و جۆتیار دێ گەلەک مفای ژ بارینا ڤێ بارانێ وەرگرن و پتریا جۆتیاران گەنمێ خوە چاندیە و گۆت: “نوکە مەترسیا ھشکبوونێ نەمایە ل سەر وان سکرێن ئاڤێ یێن کو ل سالا بۆری ھشکبووین، لێ ئەو کانیێن ل سالا بۆری ھشکبووین ھەتا نوکە ھەر وەکو خوە ماینە”.
ناڤھاتی خویا کر کو ل سنوورێ قەزا شێخان ٨٥ کانیێن کەڤنار یێن ھەین د دەمێ سێ سالێن بۆری دا ٥٠ کانی ھشک ببوون، لێ ئەوێن ماین مەترسیا ھشکبوونێ ل سەر نەمایە ژ بەر وان بارانێن نوکە دباران.
ژ ئالیێ خوە ڤە خورشید یونس خورشید، مختارێ گوندێ کەڤرەسوور یێ سەر ب ناحیا قەسرۆک ڤە بۆ ئەڤرۆ نیوز دیار کر کو ھەر ژ دەست پێکا ھاتنا ڤان بارانا ھەتا ئەڤرۆ خەلکێ گوندی چاڤەرێ دەرکەفتنا مەزنترین کانیە ل قەزا شێخان، چونکی کەڤنترین کانی یە و ھەتا بەری ھشک ببیت ژی بۆ مەرەمێن چاندنێ دھاتە ب کارئینان و سەرەرایی ڤێ چەندێ ببوو جھێ بھێنڤەدانا رێڤینکان ژی و گۆت: “ژێدەرێ ئاڤا کانیێ دکەڤیتە سەرێ وی چیایێ نوکە بیرا پەترولێ لێ ھاتیە لێدان و ژ بەر ڤێ چەندێ ئەڤ کانیە ھشکبوویە”.
د ئەڤ سالە دا ١٨١ ملیمێن بارانێ ل شێخان بارینە
نيشاندان
