ئەڤرۆ نیوز، قائید میرۆ:
ئەندامەکا جڤاتا پارێزگەھا کەرکووکێ ھۆشداریێ ل دۆر رەوشا کەرکووکێ ددەت و ئاشکرا کر کو ب پیلان پێلەکا ئینانا عەرەبێن شۆفێنی بۆ کەرکووکێ دەستپێکریە و مەترسیە د ھەلبژارتنێن داھاتی دا دەنگی بدەن و چارەنڤیسێ کەرکووکێ بەر ب ئاقارەکێ نەدیار ببەن و گۆت: “دانانا پارێزگارەکێ نە حزبی باشترین رێکە بۆ دانانا پارێزگەرەکێ کورد و نەمانا پارێزگارێ ب داگیرکاری ھاتی”.
جوان حەسەن، ئەنداما جڤاتا پارێزگەھا کەرکووکێ بۆ ئەڤرۆ نیوز دیار کر کو ئینانا عەرەبێن ھاوردە بۆ پارێزگەھا کەرکووکێ یا بەردەوامە و پارێزگارێ کەرکووکێ ھەموو ئاسانکاریان بۆ ھاتنا عەرەبێن شۆفێنی و داگیرکرنا ئەردێ کوردان دکەت، ئەڤە ددەمەکی دایە ئەڤان وەلاتیێن ئەرەب دچوارچوڤێ مادێ ١٤٠ یێ دستوورێ عیراقێ دا ل سالێن بۆری قەرەبوو ژی وەرگرتیە و ڤەگەڕیاینە دەڤەرێن بەرێ ھاتین، مخابن نوکە ھەمان عەرەبێن سەردەمێ رژێما بەعس ئەردێ کوردان داگیرکری یێن ڤەدگڕنە سەر ئەردێ کوردان، ھەر پشتی روودانێن ١٦ی ئۆکتۆبەر ھەوەکا ھاتنا عەرەبان بۆ کەرکووکێ دەستپێکریە و رۆژ بۆ رۆژێ زێدەتر دبیت، ئیدارەیا کەرکووکێ ب بەھانەیێن جودا یا ھاریکارە بۆ عەرەبێن شۆفێنی و گۆت: “ھەتا مە بەلگە ھەنە پارێزگارێ داگیرکەرێ کەرکووکێ بناڤێن جودا پارچێن ئەردی ل سەر عەرەبێن ھاوردە بەلاف دکەت و رێک ب وەلاتیێن عەرەبێن کەڤنە بەعسی ھاتیەدان خانی و ئاڤاھیان بشێوەیێ زێدەگاڤی ل سەر ئەردێ کوردان ئاڤا بکەن، ئەڤە ددەمەکی دایە نابیت بێی بڕیارا جڤاتا پارێزگەھێ پارێزگار ئەردی بەلاڤ بکەت و ئەڤ دەستھەلات نینە، بەلێ ل بەغدا ھاریکاری ھەیە و پیلان ھەیە بۆ زێدەکرنا وەلاتیێن عەرەب”.
ئەڤێ ئەنداما جڤاتا پارێزگەھا کەرکووکێ ئاماژە دا وێ چەندێ کو ھژمارەکا کەمپێن ئاوارێن عەرەب ھەبوون ل کەرکووکێ، ب تایبەتی ئەڤێن ل حەویجە ئاوارەبووین، نوکە ھەموو کەمپ ھاتینە ڤالاکرن و عەرەب دچنە ناڤا سەنتەرێ باژێڕی و ب زێدەگاڤی خانیان ئاڤا دکەن، ئەڤە پیلانەکا مەترسیدارە ل سەر پاشەڕۆژا کەرکووکێ، چونکی فۆڕما ئاھێن خوارنێ یێن ئەڤان وەلاتیان ژی دھێتە ڤەگوھاستن بۆ کەرکووکێ ئەڤە ئاماژەیەکە ل ھەلبژارتنێن داھاتی دێ شێن پشکداریێ د دەنگدانێ دا بکەن و گۆت: “مەترسی ل سەر دیارکرنا چارەنڤیسێ ئەڤان دەڤەران ھەیە، چونکی ب پیلانەکا دارشتی بکۆم یێ دھێنە ھنارتن بۆ کەرکووکێ و نیەتێن خراپ ھەنە”.
ل دۆر بابەتێ دانا پارێزگارێ کەرکووکێ ژی جوان حەسەن دیار کر کو ئێکەتیێ بەحسێ گۆھڕینا بەربژێرێ خوە کریە بۆ وەرگرتنا پۆستێ پارێزگارێ کەرکووکێ ئەڤە پێنگاڤەکا باشە، ھەر چەندە ئێکەتیێ ب فەرمی نەگوتیە ئەم دێ دەستا ژ پۆستێ پارێزگاری بەردەین، بەلێ گۆتیە ئەم دێ بەربژێرێ خوە گۆھۆڕین و گۆت: “ب دیتنا من ھەر کوردەکێ دلسۆز ببیتە پارێزگارێ کەرکووکێ گەلەک باشترە ژ وێ چەندێ پارێزگەرەکێ حزبی پۆستێ پارێزگاری وەربگریت، چونکی بدیتنا من ھەموو لایەنێن سیاسی بگەھنە رێکەفتنێ پێنگاڤەکا پیرۆزە پارێزگارەکێ کورد یێ بێلایەن ببیتە پارێزگارێ کەرکووکێ”.