ئەڤرۆ نیوز ، عەلی حاجی:

ل گورەی ئامارەکا پشکا بەرەڤانیا باژێرێ زاخۆ ، دیار دکەت ل سالا ٢٠١٨ێ دا ٣٩٥ روویدانێن ئاگری ل سنورێ دەڤەرا زاخۆ پەیدا بوینە و ٦٣ روویدانێن خەندقینێ پەیدا بوینە ل سنورێ پشکا بەرەڤانیا زاخۆ روویدانە.

ئەڤیندار عزەت ژ راگەھاندنا پشکا بەرەڤانیا باژێرێ زاخۆ ئەڤرۆ نیوز گوت : ٣٩٥ روویدانێن ئاگر بەربونێ ل سنورێ قەزا زاخۆ رووداینە کو ژ سەرجەمێ وان تنێ ٧ کەسان گیانێ خوە ژدەست دایە و ١٥ کەس ژی بریندار بوینە و٦٣ روویدانێت خەندقینێ پەیدا بوینە سەرجەمێ وان ھەمی روویدانا ٤٥ کەس ژخەندقینێ ھاتینە رزگار کرن و ١٨ کەسێن دی ژی خەندقینە و گیانێ خوە ژدەست داینە.

ناڤبری زێدەتر گوت : ژبەر کو ل ناڤا باژێرێ زاخۆ دا خابیر ھەیە و تێرا دەرباز دبیت و گەشتیارێن بیانی ژی دھێنە زاخۆ ل چاڤ سالانێن دەرباز بوی رێژەیا خەندقینێ زێدە بویە ، ھەر دیسان رێژەیا سوتنێ کیمتر بویە.

ئەڤرۆ نیوز ، زنار تۆڤی:

ئەڤرۆکە رێژەکا باش یا بەفرێ ل چەندین دەڤەرێن سەر ب پارێزگەھا دھۆکێ ڤە بارینە و نوکە ل گەلەک جھان بەفر بەردەوام یا دباریت.

دێوالی حەمێ بریندار رێڤەبەرێ سەخبێری و پاراستنا رێک و پرا ل دھۆکێ بۆ ئەڤرۆ نیوز گۆت: ئەڤرۆ ھەموو رێکێن سەرەکی ژ ئەگەرێ بارینا بەفرێ ھاتبوونە گرتن، لێ تیمێن رامالینا بەفرێ ل سەرانسەری پارێزگەھا دھۆکێ رێکێن سەرەکی ژ بەفرێ رامالینە و پاقژکرینە و نوکە ژی کارێ رامالینا بەفرێ یێ بەردەوامە.

ناڤھاتی زێدەتر گۆت: نوکە ژی ب رەنگەکێ بەردەوام بەفر یا دباریت، لەورا دخوازین شۆفێر ب ھشیاری ھاتنوچوونێ بکەن، چونکی رێوبار ب زەحمەت کەفتیە، ھەروەسا ھەکە ب ڤی رەنگی بەفر یا بەردەوام بیت، ئەڤ شەڤە رێکێن ژ دەرڤە و ب تایبەتی ل دەڤەرێن چیایی رێک ھەموو دێ ھێنە گرتن.

ئەڤرۆ نیوز، نەوزاد ھلۆری:

ھەیسەم زێباری ئێکە ژ وەلاتیێن ناحیا دینارتێ دیارکر کو ئەڤرو چویە سەرێ چیایێ پیرس و بەفرەکا زور ل چیایێ پیرس باری یە.

زێدەتر بو ئەڤرۆ نیوز گۆت: ل چیایێ پیرس نێزیکێ میرتەکا بەفرێ باری یە، ھەتا نوکە ژی بەفر بارین یا بەردەوامە، تیمێن رامالینا بەفرێ ژی بەردەوامن ل سەر لادان و رامالینا بەفرێ ل سەرێ چایی، لێ پێدڤی یە شوفێر ھوشیارێ خوە بن ژ بەرکو جادا چیایێ پیرس ل ھەندەک جھان حلیسوکە و بەفر بارین ژی یا بەردەوامە.

ئەڤرۆ نیوز، نەوزاد ھلۆری:

ژئەگەرێ ھەبوونا شەری و بوردومان و توپبارانا فروکە و سوپایێ تورکیا بۆ دەڤەرا بارزان، ھەتا نوکە پتری ٨٠ گوندێن قەزا مێرگەسوور نەھاتینە ئاڤاکرن، کو ژ وانان ٥٤ گوندێن ناحیا شێروان مەزنن.

کوڤان شێروانی، رێڤەبەرێ ناحیا شێروان مەزن بو ئەڤرۆ نیوز گۆت: ئەڤە چەندین سالە خەلکێ گوندێن ناحیا شێروان مەزن چاڤەرێ وێ یەکێ دکەن کو دەڤەرا وان ئارامیا وێ بزڤریت ڤە و جارەکا دن ئەو ژی بچنە سەر گوندەوارێن خوە، بەلێ ژبەر بوردومان و توپبارانا فروکە و سوپایێ تورکیا ھەتا نوکە کەس نەوێریت بچیتە سەر گوندێن خوە.

زێدەتر گۆت: نوکە تنێ ١٨ گوندێن ناحیا شێروانی مەزن ئاڤەدانن و ئەڤێن دن ھەموو ھاتینە چولکرن، و ژیانا خەلکێ وان گوندان نەخوش بوویە، ژبەرکو بێ بەھر بوینە ژ رەز و بیستان و جھـ و وارێن خوە.

ناڤبری ئەو چەندە ژی دیارکر پێدڤی یە لایەنێن شولەژێ ب جدی کار ل سەر وێ یەکێ بکەن کو ئەمن و ئارامیێ بۆ دەڤەرێ بزڤرینن ڤە و زێدەتر گۆت: ژیانا خەلکێ گوندان ل سەر تەش و کەوالی و چاندنێ یە، نوکە کو وەرزێ زستانێ یە تیمێن رامالینا بەفرێ نەشێن بچنە وان گوندان چونکی مەترسیا بوردومانێ ھەیە.

ئەڤرۆ نیوز ، زنار تۆڤی:

د ماوێ 24 دەمژمێرێن بوریدا پێلەکا سەرمایێ ناحیا کانی ماسێ ڤەگرتیە و د ئەنجامدا رێژەکا باش یا بەفرێ ل سەنتەرێ ناحیا کانی ماسێ و خالا گۆمرکا سەرزێری باریە و نوکە ژی بەفر بەردەوام یا دباریت و رێیا چەندین گوندان ژی هاتیە گرتن.
سەربەست سەبری ئاکرەیی رێڤەبەرێ ناحیا کانی ماسێ بۆ ئەڤرۆ نیوز دیارکر: کو ل شەڤا بوری هەتا نوکە ب رەنگەکێ بەردەوام بەفر یا ل ناحیا کانی ماسێ دباریت و هەتا نوکە 55 سم بەفرێ ل سەنتەرێ ناحیا کانی ماسێ بارینە و ل دەرگەهێ سەرزێری ژی 65 سم بەفرێ بارینە و لدووڤ پێشبینیان، ئەڤرۆ رێژا بارینا بەفرێ ل سەرزێری دێ گەهیتە 80 سم، ل سەنتەرێ ناحیێ ژی دێ گەهیتە 65 سم، ئەڤرۆ ژی بەفر دێ یا بەردەوامبیت. ناڤهاتی گوت ژی: هەر ل سپێدەهیا ئەڤرۆ تیمینێن رامالینا بەفرێ دەست ب رامالینا بەفرێ کریه ل جادێن سەرەکی و رێکێن سەرەکی هاتینە ڤەکرن، لدووڤدا دێ رێکێن گوندان ژی ڤەکەین، هەروەسا مە داخواز ژ خەلکێ و رێڤنگان کریە، کو ژ رێکێن سەرەکی دەرنەکەڤن،داکو ئاسێ نەبن، ژ ئەگەرێ بارینا بەفرێ، چونکی رێژەکا باش یا بەفرێ ل ڤێ دەڤەرێ باریە.