ئەڤرۆ نیوز، لەزگین جوقی:
قایمقامێ قەزا شنگالێ دیار کر کو ئیدارا شنگالێ چەندین داخواز ژ قۆنسلێ ئەمریکا ل ھەرێما کوردستانێ کرن ژوان ژی ئەمریکا فشاری ل سەر بەغدا دروست بکەت و ھەموو ھێزێن نەقانوونی شنگالێ چوول بکەن و ئاوارە بزڤرنە ڤە.
مەحما خەلیل، قایمقامێ قەزا شنگالێ بۆ ئەڤرۆ نیوز دیار کر کو ئیدارا شنگالێ داخواز ژ قۆنسلێ ئەمریکا کر ب رژدی کاربکەن بۆ دیتنا چارەنڤیسێ ب ھزاران کەسێن ئێزدی یێن ل جینوسایدا شنگالێ ھاتینە بێ سەرووشوونکرن، ھەتا نوکە چو ژ چارەنڤیسی وان دیارنینە، ھەروەسا داخواز ھاتەکرن فشارێ بێخیتە سەر حوکمەتا عیراقی بۆ دەرخستنا ھێزێن نە شەرعی د ناڤ ئاخا شنگالێ دا و پاراستن و ھەڤکاریا پێکھاتێن دەڤەرێ بکەن داکو خەلک بشێت ب ئاشتی و ئازادی د ئارامی بژین و بزڤرنە سەر جە و مالێن خوە ل شنگالێ.
ناڤھاتی خویا کر کو داخواز ژ نوونەرێن وەلاتێ ئەمریکا ل ھەرێما کوردستانێ ھاتەکرن کار بکەن بۆ پشتەڤانیا دەڤەرا شنگالێ و فشارێ ل سەر حوکمەتا عیراقێ بکەن بۆ وێ چەندێ شنگال ژ ھێزین نەقانوونی بھێتە ڤالاکرن و گۆت: “قۆنسلێ ئەمریکا بەرھەڤیا خوە نیشا دا ب ھەموو شیانێن خوە پشتەڤانیا ئیدارا شەرعی یا شنگالێ بکەت”.

ئەڤرۆ نیوز، لەزگین جوقی:
سەرۆکێ جڤاتا پارێزگەھا نەینەوا دیار کر کو بۆ پرکرنا میلاکێ ئەمنی داخواز ژ بەغدا ھاتیەکرن کو دەرگەھێ ناڤ نڤیسینێ بۆ پۆلیس و لەشکری ل مووسل بھێتە ڤەکرن داکو خەلک بھێتە دامەزراندن و د وارێ ئەمنی دا کاربکەن.
سەیدۆ چەتۆ، سەرۆکێ جڤاتا پارێزگەھا نەینەوا بۆ ئەڤرۆ نیوز دیار کر کو دوسیەیا ئەمنی یا مووسل بۆ بەغدا ھاتیە رەوانەکرن و تێدا داخواز ھاتیەکرن ئەو پۆلیسێن بەری نوکە ژ کاری ھاتینە لادان ھەموو ڤەگەڕنە سەر دەوامێن خوە د ناڤ دامودەزگەھێن ئەمنی دا ل مووسل ب تایبەتی ژی ئەو پۆلیسێن تومەتا تیرۆرێ ل سەر دەرنەکەفتی دووبارە بۆ سەر کاری بھێنە زڤراندن و گۆت: “جڤاتا پارێزگەھا نەینەوا داخواز ژ بەغدا کر دەرگەھێ ناڤ نڤیسینێ بۆ پۆلیس و لەشکری ل مووسل بھێتە ڤەکرن داکو خەلک بھێتە دامەزراندن و د وارێ ئەمنی دا کاربکەن”.
ناڤھاتی ئاماژە دا وێ چەندێ کو ژبلی ڤان داخوازان جڤاتا پارێزگەھا نەینەوا داخوازەکا دی ژ بەغدا کریە بۆ زڤراندنا بۆدجا پارێزگەھا نەینەوا و گۆت: “بەری تیرۆرستێن داعش مووسل داگیر بکەن ١١% بۆدجە بۆ مووسل د ھاتەدان، لێ نوکە بۆ سالا بھێت بەغدا یا کریە ١% ئەڤە ژی گەلەک کێمە، چونکو نوکە مووسل د وارێ ئەمنی و ئاڤەدانیێ دا پێدڤی ب پارەکێ مەزن ھەیە”.

ئەڤرۆ نیوز، قائید میرۆ:

بەرپرسەکێ حوکمەتا ھەرێما کوردستانێ ئاشکرا کر کو خالێن سنووری دێ ل ھەمبەر ئینانا تڕۆمبێلان ھێنە توندکرن و گۆت: “رێکێ نادەین تڕۆمبێلێن سالوخەتێن بلند نەبن بھێنە ھەرێما کوردستانێ و پابەندی بڕیارا بەغدا ژی نابین بۆ قەدەغەکرنا چو جۆرێن تڕۆمبێلان”.
نەوزاد ئەدھەم، رێڤەبەرێ گشتیێ بازرگانی ل حوکمەتا ھەرێما کوردستانێ بۆ ئەڤرۆ نیۆز دیار کر کو ل ھەرێما کوردستانێ چو پلان نینن بۆ کێمکرنا ئینانا تڕۆمبێلان ژ دەرڤە، بەلێ حوکمەتا ھەرێمێ بڕیاردایە رێنمایێن توند دەربکەت، داکو مەرجێن ستاندەرد د ناڤ ئەڤان تڕۆمبێلان دا ھەبن یێن دھێنە ھەرێما کوردستانێ، چونکی ئەو دخوازن مەرجێن سلامەتیێ د تڕۆمبێلان دا ھەبن بۆ پاراستنا ژیانا وەلاتیان د دەمێ پەیدابوونا روودانێن ھاتنچوونێ دا، لەوڕا پێدڤیە تڕۆمبێلێن دھێنە د ناڤ ھەرێما کوردستانێ دا سالوخەتێن بلند ھەبن و دێ پشکنینێن ھوور بۆ ھێنەکرن.
ل دۆر بڕیارا دەستەیا خالێن سنووریا عیراقێ بۆ قەدەغەکرنا تڕۆمبێلێن دەستێ دویێ نەوزاد ئەدھەم دیار کر کو ھەرێما کوردستانێ پابەندی بڕیارا حوکمەتا عیراقێ نابیت ھەروەکی رێڤەبەرێ گشتیێ گومرکا ھەرێما کوردستانێ دووپاتی ل سەر ڤێ چەندێ کری و دێ ئینانا تڕۆمبێلێن بیانی یێن کۆمپانیان و یێن دەستێ دویێ ژی بەردەوام بیت و گۆت: “ئەڤ سالە چو رێنمایێن نوو نابن بۆ ئینانا تڕۆمبێلان ژ بلی ئەڤێن من ئاماژە بۆ کری کو دڤێت کوالێتا بلندبیت و سالوخەتێن باش ھەبن”.

ئەڤرۆ نیوز، قائید میرۆ:

بڕیارە ل رۆژێن داھاتی پارێ کارمەندێن ل سەر سندۆقێن دەنگدانێ بھێتە بەلاڤکرن و بەرپرسەکێ کۆمسیۆنا بلندا ھەلبژارتنێن ھەرێما کوردستانێ ژی دبێژیت، گرێبەستا ئەڤان کارمەندان ب دووماھی ھاتیە و ب تنێ کارێ وان ل رۆژا ھەلبژارتنان بوویە دگەل کۆمسیۆنێ.
دکتۆر جۆتیار عادل، ئەندامێ جڤاتا کۆمسیاران ل کۆمسیۆنا راپرسی و ھەڵبژارتنێن ھەرێما کوردستانێ بۆ ئەڤرۆ نیوز دیار کر کو ل رۆژێن داھاتی دێ دەست ب بەلاڤکرنا کریا کارمەندێن گرێبەست ل سەر سندۆقێن دەنگدانێ ھێتەکرن، یێن ل ڕۆژا ٣٠ی ئەیلوولا بۆری پشکداری د ھەلبژارتنان دا کری وەک کارمەندێن سەر سندۆقان، چونکی ل گورەی گرێبەستا دگەل وان کارمەندان ھاتیە ئەنجامدان ئەرک بۆ ھاتیە دیارکرن و د بەرامبەر دا کوژمەکێ پارەی دێ بۆ ھێتە مەزاختن و گۆت: “د ھەلبژارتنێن بۆری یێن پەرلەمانێ کوردستانێ دا ژبلی کارمەندێن ھەمیشەیی یێن کۆمسیۆنێ نێزیکی ٥٠ ھزار کارمەند بشێوەیێ گرێبەست کار دگەل کۆمسیۆنێ کریە بۆ ب رێڤەبرنا پڕۆسا ھەلبژارتنان”.
ناڤھاتی خویا کر کو گرێبەستا ئەڤان پێنجی ھزار کارمەندان ب دووماھی ھاتیە و ب تنێ بۆ ئێک خۆلا ھەلبژارتنان بوویە، ئانکو ئەڤان کارمەندێن گرێبەست ددەمێ نوکە دا چو پەیوەندی ب کۆمسیۆنا ھەلبژارتنان ڤە نەمایە و ھەتا ھەلبژارتنێن بھێت ل گورەی پێدڤیان دێ کارمەندێن گرێبەست ھێنە وەرگرتن.