ئەڤرۆ نیوز:

راھێنەرێ ھەلبژارتیێ عیراقێ ناڤێ ٢٣ یاریزانان ئاشکرا کر بۆ ھەڤرکیێن قارەمانیا کاسا ئاسیا ئەوا دێ ھەڤرکیێن وێ ل ٥ ھەیڤا کانوونا دویێ یا سالا بھێت ل وەلاتێ ئیمارات دەسپێکەت.

راھێنەرێ سلوڤینی یێ ھەلبژارتیێ عیراقێ کاتانێچ ئەوێ نوکە د کەمپەکا راھێنانێ دا ل وەلاتێ قەتەر ناڤێ ٢٣ یاریزانان ئاشکرا کریە بۆ پێکھاتێ دووماھیێ یێ ھەلبژارتیێ عیراقێ بۆ ھەڤرکیێن کاسا ئاسیا ئەوا بریارە ل ٥ ھەیڤا بھێت ھەڤرکیێن وێ ل وەلاتێ ئیمارات دەسپێبکەن و ئەو یاریزانێن ھاتینە ھەلبژارتن ئەڤەنە.

جەلال حەسەن، محەمەد گاسد، محەمەد حەمید، وەلید سالم، عەلا مھاوی، ئەحمەد ئیبراھیم، عەلی فایز، رێبین سولاقا، سەعەد ناتق، عەلی عەدنان، فرانس پترس، ئەحمەد یاسین، سەفا ھادی، بشار رسن، ئوسامە رەشید، ئەمجەد عتوان، مەھدی کامل، حسێن عەلی، عەلی حەسنی، موھەنەد عەلی، ئەیمەن حسێن و عەلا عەباس.

ھەژی گۆتنێ یە ھەلبژارتیێ عیراقێ د کوما چارێ یا ڤێ قارەمانیێ دایە دگەل ھەلبژارتیێ ئیران و ڤێتنام و یەمەن، یاریا ئێکیچ یا ھەلبژارتیێ عیراقێ دێ ل ٨ ھەیڤا بھێت بیت دگەل ھەلبژارتیێ ڤێتنام.

زاخۆ، عەلی حاجی:

ژێدەرەک ژ تیما باسکت بۆلا یانا زاخۆ دیارکر سەرەرای وێ چەندێ قوناغا ئێکێ ژ خولا نایابا باسکت بۆلا عیراقێ ب دووماھی ھات لێ ھەتا نوکە مە پشکەکا کێم ژ پارێ ھەڤبەستێن خوە وەرگرتیە و پێدڤی بوو ھەتا نوکە نیڤا ھەڤبەسێن خوە وەرگرتبایە.

زێدەتر د ڤی چارچوڤەی دا وی ژێدەری نەڤیا ناڤێ خوە ئاشکرا بکەت بۆ رۆژناما ئەڤرۆ گۆت: پێدڤی بوو ھەر زوو کارگێریا یانا زاخۆ بەشەک دی ژ پارێ ھەڤبەستا یاریزانێن تیما باسکت بۆلێ ئەدا بکەت لێ ژبەرکو رێککەفتن ل سەر بەندێن ھەڤبەستێ دا ھاتیە قوناغا ئێکێ ب دووماھی بھێت ئەو دێ نیڤا ھەڤبەستێن خوە وەرگرن، ژبەرکو نوکە ھەموو یاریزانێن تیما باسکت بۆلێ پێدڤی ب مافێن خوە یێن دارایی نە داکو بۆ قوناغا بھێت ب ئاستەکێ باشتر یاریێن خوە بکەن دیسان دەستەیا راھێنەریا یانێ ژی بشێن زێدەتر گڤاشتنێ ل سەر یاریزانان بکەت داکو پێگیریێ ب راھێنان بکەن.

ئەڤرۆ نیوز:
ستێرا بەلجیکی و یانا چێلسی یا ئنگلیزی پشتی دوھی شیای سەرکێشیا یانا خوە چێلسی بکەت بوو سەرکەفتنێ ل سەر یانا واتفورد ب دو گولان بەرامبەر گولەکێ کو ھەردو گولێن یانا چێلسی ژلایێ ھازارد ھاتنە تومارکرن کو ب تومارکرنا ئەوان ھەردو گولان یاریزانێ ناڤبری ھژمارا گولێن خوە گەھاندنە ١٠٠ گولان ل گەل وێ یانێ.
ھازارد ئەوێ ل سالا ٢٠١٢ ژ یانا لیل یا فرەنسی پەیوەندی ب چێلسی کری کو د ماوێ شەش سالێن بوری دا ئایدین ھازارد ٣٢٢یاری ل گەل وێ یانێ کرینە و ب تومارکرنا دو گولێن دوھی ناڤبری ھژمارا گولێن خوە گەھاندنە ١٠١ گولان کو دبیتە یاریزانێ دەھێ د مێژویا وێ یانێ دا ١٠٠ گولان توماربکەت کو وی یاریزانێ ناڤبری ٢٢٦یاری دخۆلا پرێمرلیگ دا کرینە و ٧٩ گول تومارکرینە.

گولێن ھازارد چەوا ھاتینە تومارکرن ل گەل چێلسی
٧٠ گول ب لنگێ راستێ
٢٥ گول ب لنگێ چەپێ
٥ گول ب سەری تومارکرینە
٩١ گول د ناڤا دەڤەرا پەنەلتی
٩ گول دەرڤەی دەڤەرا پەنەلتی
١ گول ب لێدانەکا ئێکسەر
٢٣ گول ب لێدانا پەنەلتی تومارکرینە

ئەڤرۆ نیوز:

د یاریێن حەفتیا ھەژێ یا خولا ئیتالیا دا یانا ئەنترمیلان شیا سەرکەفتنێ ل سەر ناپولی توماربکەت، ھندەک پشتەڤانێن یانا ئەنترمیلان کریارێن رەگەز پەرستیێ دژی یاریزانێ ناپولی کولیبالی ئەنجام دا دیسان د کوشتنا پشتەڤانەکێ ژی پشتی یاریێ روودا.

ل دۆر ڤان رودانان راھێنەرێ ناپولی کارلو ئەنچلوتی دیارکر سێ جاران وان داخواز ژ دادڤانێ ڤێ یاریێ کر یاریێ رابگریت ژ بەر کریارێن رەگەز پەرستیێ دژی یاریزانێ وان کولیبالی لێ بێ مفا بوو لەورا ئەگەر ل یاریێن بھێت ئەڤ چەندە دوبارە بیت دێ یاریێ بجھـ ھێلێن ژبەرکو ئەڤ کریارە نە د بەرژەوەندیا تەپا پێ یا ئیتالیا دا نینە.

پشتی ب دووماھی ھاتنا ڤێ یاریێ ژی چار پشتەڤانان ژ دەرڤەی یاریگەھێ شەر کریە و تێدا ئێک ژ وان پشتەڤانان ھاتیە کوشتن ب لێدانا کێرێ لەورا پشتی ڤان رودانان سەروکێ پولیسێن باژێرێ میلان دیارکریە ئەو دێ چەند بریاران دژی پشتەڤانێن یانا ئەنترمیلان وەرگرن دێ وان چار پشتەڤانان دەستەسەر کەن دیسان ئێدی ریێ نادەن پشتەڤانێن یانا ئەنتر بەر ب یاریگەھێن دی بچن بۆ پشتەڤانیا یانا خوە دیسان دێ رێگریێ ل وان پشتەڤان ژی وەرگرن یێ، کریارێن رەگەزپەرستیێ دژی یاریزانێ ناپولی کولیبالی ئەنجام داین و ناچنە د یاریگەھا جوزێپی میاتزا دا.