ئەڤرۆ نیوز:

ئایلیت شاکید وەزیرا دادێ یا حوکمەتا ئیسرائیلێ راگەهاند کو ترامپ وەکو ئێک ژ هەڤپەیمانێن ئیسرائیلێ دهاتە نیاسین و بریارێن گەلەک باش ژی دان، لێ مخابن بریارا ترامپی یا ل دۆر ڤەکێشانا هێزێن ئەمریکا ژ سووریێ ب تەمامی ل دژی بەرژەوەندیێن ئەمریکا و ئیسرائیلێ نە.

وەزیرا دادێ یا ئیسرائیلێ راگەهاند کو ئەردۆگان ب هەموو رەنگەکێ دوژمناتیا جوهیان دکەت و بریارا ترامپی دێ بیتە ئەگەرێ بهێزبوونا ئەردۆگانی و ئەو یەک ب چو رەنگەکێ ناهێتە قەبوول کرن و گۆت: (ئەم هێڤیدارین ترامپ ژ بریارا خوە ڤەبیت، چونکو بریارەکا شاشە و د بەرژەوەندیا ئەمریکا دا نینە).

ئەڤرۆ نیوز، هۆشەنگ تاجر:

چاڤدێرەکێ سیاسی یێ باکورێ کوردستانێ بۆ ئەڤرۆ نیوز دیار دکەت کو پشتی بریارا ئەمریکا یا ل دۆر ڤەکێشانا هێزێن خوە ژ سووریێ گەلەک  تشت دێ هێنە گوهۆرین وە وەکو بەرێ نامینن، ل دۆر پەیەدێ ژی دبێژیت: نها چو رێ ل پێشبەری پەیەدێ نەماینە دڤێت ل گەل روسیا و رژێما سووریێ دانوستاندنان بکەت، رەنگە بگەهنە چارەسەریەکێ ژی لێ بابەتێ تورکیا جودایە، چونکو تورکیا قەبوول ناکەت یەپەگە وەکو هێزەکا چەکدار ل سەر سنورێ وێ هەبیت و دێ داخواز کەت کو پەیەدە دەستان ژ چەکی بەردەت.

ئیبراهیم گوچلو چاڤدێرێ سیاسی ل باکورێ کوردستانێ ئەو یەک ژی دیار کر کو هەکە هێزێن روسیا و سووریێ ل سەر سنوری بهێنە بجهکرن ژی تورکیا رازی نابیت هەتا کو پەیەدە دەستان ژ چەکان بەرنەدەت دێ هەلویستێ تورکیا وەکو خوە یێ توند بیت، چونکو تورکیا دبێژیت مەترسی ل سەر وەلاتێ مە هەیە و ژ بەر هندێ ژی هەتا نها رەوش ئالۆزە و دیار نینە کا دێ بەر ب کیڤە بچیت.

ئەڤرۆ نیوز:

ماریا زاخارۆڤا پەیڤدارا وەزارەتا دەرڤە یا روسیا بەری دەمەکێ ل دۆر ڤەکێشانا هێزێن ئەمریکا ژ سووریێ راگەهاند کو پشتی ئەمریکا هێزێن خوە ڤەکێشا دڤێت سەربازێن سووریێ بچنە وان جهان و گۆت: (نابیت چو هێزەکا دی یا بیانی بچنە وان جهان و ئەم ل دژی هندێ نە، چونکو دێ رەوش ئالۆزتر لێ هێت).

پەیڤدارا وەزارەتا دەرڤە یا روسیا ئەو یەک ژی دیار کر هەتا هێزێن بیانی ل سووریێ بن رەوشا وی وەلاتی ئارام نابیت و ژ بەر هندێ ژی دەرکەفتنا ئەمریکا دێ پێنگاڤەکا باش بیت.