ئەڤرۆ نیوز، عەلی حاجی:
شاندەکێ ژ لقێ 8 یا پارتی دیموکراتی کوردستان و سازیێن حکومی و شاندەکێ پەرلەمانتارێن کوردستانێ ل زاخۆ ئەڤرۆ 25/12/2018ب مەرەما پیرۆزکرنا جەژنا حەزرەتا مەسیح سەرەدانا مەترانخانا زاخۆ و مەسیحیێن ل زاخۆ کرن.

ئەڤرۆ نیوز، ئەمیر ئەترووشی:
پەیڤدارێ رێڤەبەریا ھاتنوچوونا پارێزگەھا دھۆکێ راگەھاند، ئەو پلانا دھێتە دانان بۆ ھندێ تەکسی ب کت و جۆت کاربکەن، ئانکو ھەر رۆژەکێ یێن ژمارە کت و رۆژەکێ یێن ژمارە جۆت کاربکەن، گەلەک یا ب زەحمەتە بھێتە بجھئینان.
موقەدمێ مافپەروەر ئازاد تاھا، پەیڤدارێ رێڤەبەریا ھاتنوچوونا پارێزگەھا دھۆکێ بۆ ئەڤرۆ نیوز دیار کر، ئەڤ بریارە ل سەر شۆفێران دێ گەلەک یا دژوار بیت، چونکو گەلەک شۆفێر ھەنە ب تنێ کارێ شۆفێریا تەکسیێ دکەن و بۆ وان دەست نادەت رۆژەکێ کاربکەن و رۆژەکێ کارنەکەن و گۆت: “ئەگەر دڤێت ژینگەھێ ب پارێزن، پێدڤیە ل شوونا ڤێ بریاری کار ب ترۆمبێلێن پاس و ترام بھێتە کرن، چونکی نوکە گەلەک تەکسی ھەنە قوتابیان دئینن و د بەن و ھەکە ئەڤ بریارە بھێتە بجھئینان، دێ چاوا ئەڤ تەکسیە کارێ خوە کەن “.
محەمەد تاھر بریفکانی رێڤەبەرێ فەرمانگەھا ژینگەھا دھۆکێ بۆ ئەڤرۆ نیوز دیار کر، ژ بەر زێدەبوونا ترۆمبێلان د ناڤ باژێری دا، رۆژ بۆ رۆژێ ژینگەە پیستر لێ دھێت، لەوما پێدڤیە پلانەک بۆ ھاتنوچوونا ترۆمبێلان و ئینانا وان ژ سنووران بھێتە دانان و ئەو ترۆمبێلێن ب کرێ ژی کاردکەن کێمتر لێ بھێن، چونکو ئەو بەردەوان ھاتنوچوونێ دکەن و گۆت: “سالانە رێژەیەکا مەزن یا ترۆمبێلان ل باژێرێ دھۆکێ زێدە دبیت، ئەڤە ژی کارتێکرنەکا خراب ل سەر ژینگەھا دھۆکێ دکەت، چونکو دەمێ پانزین دھێتە سوتن کەرەستێن کێمیایی ژێ دەردکەڤن”.

سەلاح جەھوەر، رێڤەبەرێ گشتیێ ڤەگۆھاستنێ و ھێلا ئاسنی ل وەزارەتا ڤەگوھاستن و گەھاندنێ بەری نھا بۆ رۆژناما ئەڤرۆ دیار کر بوو، ئەڤە ماوێ سالەکێ یە ئەو کار د چێکرنا پرۆژەیەکی دا دکەن و نھا ب دووماھی ھاتیە، ناڤێ پرۆژەی (تەکسی تەلەفۆنە)، بەلێ ژ ئەگەرێ وێ یەکێ ژمارا تەکسیان ل ھەرێمێ گەلەک یا زێدەیە، ژ بەر ھندێ کۆمپانی نەشێت ھەموو تەکسیان وەربگریت و دێ کارکرنا وان بیتە تاک و جۆت، بۆ ھندێ پتریا تەکسیان ژ ڤی پرۆژەی مفاداربن.

ل ھەرێما کوردستانێ زێدەتر ژ ٨٠ ھزار تەکسیان ھەنە و ھەرێما کوردستانێ ب تنێ پێدڤی ب ٣٠ ھزار تەکسیان ھەیە و ٥٠ ھزار تەکسی ب زێدەھی ل کوردستانێ نە و نھا زێدەتر ژ ٩٢ ھزار ترۆمبێلێن کرێ ل کوردستانێ ھەنە.

ئەڤرۆ نیوز, ئێقبال عومەر:

ب تنێ خێزانەکا مەسیحی د ناڤ سەنتەرێ ناحیا شێلادزێ یا سەر ب قەزا ئامێدیێ ڤە دژیت، ئەڤە د دەمەکی دایە کو ب دەھان ھزار خێزانێن موسلمان د ناڤ ناحیا ناڤھاتی دا ھەنە و ئەڤرۆ مۆسلمانێن ڤێ ناحیێ ب مەرەما پیرۆزباھیا جەژنا حەزرەتا مەسیح سەرەدانا وێ خێزانا مەسیحی دکرن.

خوشابە قەشو ھورمز، خەلکێ گوندێ ھیشێ یێ سەر ب عەشیرەتا رێکان ڤە یە ل سنوورێ ناحیا شێلادزێ بۆ ئەڤرۆ نیوز دیار کر کو ل سالا 1930 ل گوندێ ھیش ژدایکبوویە و نھا ئاکنجیێ ناحیا شێلادزێ یە و گوت: ل سالا 1976 حوکمەتا بەعسا ژناڤچوویا عیراقێ ئەم بزوری ژ سەر گوندێن مە راکرین و برینە دەشتا نەینەوا و ل تلکێفێ ئاکنجیکرین کو پێک ھاتا گوندیێن مە ب دەھان خێزان بوون, پاشان من و چەند گوندیێن من مە مالێن خوە ڤەگوھاستە شێلادزێ ژ بەر کو ئەز نەشیام ل دەشتێ ژیانا خوە ببمە سەری، چونکو ئەم فێری سرۆشتێ وێ دەڤەرێ نەببوین, پشتێ چەند سالان ھندەک ژوان خێزانێن مەسیحی چوونە ژ دەرڤەی وەلاتی و ھندەک ژی چوونە ناڤەراستا عیراقێ، بەلێ ئەز نەشیام تەرکا سروشتێ ڤێ دەڤەرێ و ڤان مروڤێن موسلمان بکەم لەوما ئەڤە سەرێ چەندین سالانە ئەم دناڤ موسلمانێن ڤێ دەڤەرێ دژین وو ھەتا نوکە خەلکێ ڤێ دەڤەرێ چو نەخۆشی نەگەھاندینە مە”.

ناڤھاتی خویا کر کو ھەمی جەژن و خوەشی و نەخوەشیان ئەو ل گەل موسلمانان پشکدار دبن و ھەروەسا موسلمانێن ڤێ دەڤەرێ ژی دگەل وان دپشکدارن و چو جوداھیەکێ ئەو دناڤبەرا خوە و موسلمانان دا نابینین.

ژ لایێ خوەڤە مبارەک سەدیق، کو ب مەرەما جەژن پیرۆزکرنێ سەرەدانا ڤێ مالا مەسیحی کربوو بۆ ئەڤرۆ نیوز گوت: “یا دیارە ل دەڤەرا مە ئەڤ پێکڤە ژیانە ھەر ژ کەڤن دا یا ھەی و ئەو مەسیحیێن د ناڤ مە دا چو جاران ھەست ب ھندێ نەکریە کو جوداھیەکا دناڤ بەرا مەدا یا ھەی، بەلکو ھەمی دەمان مە پێکڤە رێورەسمێن خوە یێن گێراین چ یێن ئایینی بن یان ھەر بیرەوەری و ھەلکەفتەک بیت”.

ئەڤرۆ نیوز، سالار دۆسکی:
ب ھەلکەفتا جەژنا مەسیحی، پانزینخانەکێ ل باژێرێ دھۆکێ پانزینا خوە ئەرزانکر و ئاشکرا کر کو بۆ ماوێ حەفتیەکێ دێ یا بەردەاوم بیت.
گازی مستەفا بناڤی، خودانێ پانزینخانا بناڤی 2 ل باژێرێ دھۆک، ئەڤرۆ 25/12/2018 بەری نیڤرۆ بۆ ئەڤرۆ نیۆز ئاشکراکر کو ب ھەلکەفتنا ھاتنا جەژنا برایێن مەسیحی پانزین بۆ ماوێ حەفتیەکێ ئەرزانکریە و ھەتا سەرێ سالا نوو دێ ئەڤ بھایە بیت، ئەڤ نەریتە ل پانزیخانا مە ھەیە ل ھەموو ھەلکەفتێن ئاینی و نەتەوەیی یێن مللەتێ مە.
خودانێ ھەمان پانزینخانە گۆت ژی: نوکە بھایێ پانزینێ ل پانزیخانا مە ل بن بھایێ کڕیارێ دایە، ئانکو بھایێ کڕینا پانزینا کار ب 645 دیناران دگەھیتە پانزینخانێ نوکە ئەم لترێ ل پانزیخانێ د دەینە ب625 دیناران ، پانزینا موحسەن ب 690 دیناران دگەھیتە وێزگەھێ و نوکە لترێ ب 750 دیناران دفرۆشین.