ئەڤرۆ نیوز:
رۆژناما بیلد یا ئەلمانیا راگەهاند کو ژ بەر فشارێن ئەمریکا حوکمەتا ئەلمانیا گەشتێن فرۆکێن ئیرانی ب تایبەتی ژی یێن کۆمپانیا ماهان یا ئیرانی دایە راگرتن و رێ نەدایە گەشتا ئەلمانیا بکەن.
رۆژناما ئەلمانیا ئاماژە ب هندێ ژی کریە کو ئەمریکا گەفێن سزادانا کۆمپانیێن ئەلمانیا و حوکمەتا وی وەلاتی کریە و ژ بەر هندێ ژی حوکمەتا ئەلمانیا ئەڤ بریارە دایە.
ئەڤرۆ نیوز، هۆشەنگ تاجر:
ئەحمەد زەکەریا چاڤدێرێ سیاسی یێ رۆژئاڤایێ کوردستانێ بۆ ئەڤرۆ نیوز راگەهاند کو هەتا نها ژی هێزێن ئەمریکا ل جهێن خوە ماینە و دەست ب ڤەکێشانێ نەکرینە و گۆت: (ئەو دەنگوباسێن دبێژن ژ دوهی وەرە ئەمریکا دەست ب ڤەکێشانا هێزێن خوە کریە راست نینن و هەتا نها ژی هەموو هێزێن ئەمریکا ل جهێ خوە ماینە).
ناڤهاتی راگەهاند کو راستە بریار هاتیە دان لێ ئەمریکا وەسا زوو نەشێت ژ سووریێ دەرکەڤیت، چونکو گەلەک کارێن ئەمریکا د نیڤیێ دا ماینە و ئەز بخوە باوەر ناکەم ئەمریکا وەسا زوو ژ سووریێ دەرکەڤیت.
ئەڤرۆنیوز، سەباح زێباری:
سامی رێکانی شروڤەکارێ سیاسی بۆ ئەڤرۆ نیوز ددەتە دیار کرن کو ئەمریکا ھەمی گاڤا ڤیایە کو ھێزێن خوە ل وان جھا بکاربینیت کو مەرەم و بەرژەوەندی ھەبن، ئەڤە ھەر ژ کەڤندا ستراتیژیەتا ئەمریکا بوویە، ھەروەسا ھندەک لایەنێن دی بووینە ئەگەر کو مەترسی ل سەر بەرژەوەندیێن ئەمریکا پەیدا بن ل دەڤەرێ دا، ئەڤ تشتە ژی ب رێککەفتن و دانوستاندن یێ ھاتیەکرن، ئەڤە بەرنامە و ستراتیژیەتا ئەمریکایە.
ناڤھاتی زێدەتر گۆت کو ئەمریکا شەری بۆ کەسێ ناکەت ئەگەر نەبینیت مفایێ وێ پترە ژ زیانێ و ئەمریکا ب کارنامێ کار دکەت، ئەو کارنامە ژی وەکی گرێبەستەکێ یە، د ناڤبەرا وێ و مللەتێ وێ دا، ئەوان چ گۆتی یە بۆ خەلکی ل دووڤ وێ چەندێ دچن، تایبەت پتر ل سەر سەنگێ بھێزبوونا ئابووری کار دکەت، ئەڤ بریارا نھا ژی دایی ژ چارچوڤێ قانوونێ نەدەرکەفتی یە، مەبەستا ئەمریکا ژی پتر شەرەکێ بازرگانی یە، کو ستراتیژیەتا ئەمریکا دەولەت فێری ڤێ چەندێ کرینە، لەوما ئەمریکا ھەڤال و دوژمنێن دەمدرێژ نینە و ل دووڤ گوھۆرینێن روژانە دچیت.
سامی رێکانی زێدەتر خوەیا کر کو ئەڤ بریارا ئەمریکا ژی پشتی چەند دانوستاندن و رێککەفتنا ھاتیە کرن، دناڤبەرا ترامپی و ئەردۆگانی دا و نە دوورە رێککەفتن دگەل ھندەک لایەنێن دی ھاتبیتەکرن.
ئەڤرۆ نیوز:
ل زیندانا سینجان یا زارۆیان ل باژێرێ ئەنقەرە دوهی ئالۆزی دروست بوون و د ئەنجام دا سەد زارۆ بریندار بوون کو هاتە راگەهاندن برینا هندەک زارۆیان یا گرانە.
دەزگەهێن ئێمناهیێ یێن تورکیا نەهێلان پارێزەرێن زارۆیان بچنە زیندانێ و هێزەکا مەزن یا پۆلیسان گەهشتە جهێ روودانێ.
ل دۆر چاوانیا روودانێ ژی دەزگەهێن راگەهاندنا تورکیا دبێژن زارۆیان ل دژی رەوشا خراب یا زیندانێ سەرهلدان کرینە و ٧ زێرەڤانێن زیندانی ژی بریندار بووینە.
ئەڤرۆ نیوز:
رۆژناما نیویورک تایمز یا ئەمریکی ئەڤرۆ د راپۆرتەکێ دا ئاماژە ب ئەنجامێن بریارا ترامپی یا ل دۆر ڤەکێشانا هێزێن ئەمریکا ل سووریێ کر و دیار کر کو کورد بوونە قوربانیێن بریارا ترامپی و تورکیا دێ هێرشی رۆژهەلاتێ فراتێ کەت، ئەو یەک ژی دێ بیتە ئەگەرێ هندێ دیسان کورد تووشی ئازارەکا دی ببن.
رۆژناما ئەمریکی دیار دکەت ژی کو گڤاشتنەکا مەزن ل ئەمریکا ل سەر ترامپی هەیە کو ژ بریارا خوە ڤەبیت، لێ ترامپ ژ بەر بەرژەوەندیێن بازرگانی یێن ل گەل تورکیا هەتا نها ژی ل سەر بریارا خوە رژدە.
ئەڤرۆ نیوز:
یانا یوڤانتوس یا ئیتالی ب فەرمی راگەھاند ئەوان ھەڤبەستا ستێرا ھێلا بەرەڤانیا یانێ یێ بەرازیلی ئەلکیس ساندرو ھەتا سالا ٢٠٢٣ درێژکر پشتی ل گەل یاریزانێ ناڤبری گەھشتی یە رێککەفتنێ .
یانا یوڤانتوس ل سەر مالپەرێ خوە یێ فەرمی نووکرنا ھەڤبەستا ساندرو راگەھاند بەرامبەر موچەیەکێ سالانە ب ٥ ملیون یورۆیان .
ب نووکرنا ھەڤبەستا ئەڤی یاریزانێ بەرازیلی یانا یوڤانتوس دەرگەە بەرامبەر ھەر ئێک ژ یانێن ریال مەدرید و مانچێستەر یوناید و پاریس سانجێرمان گرت ئەوێن ل ماوێ بوری بزاڤێن مەزن کرین بوو ڤەگوھاستنا ڤی یاریزانی.
ھەژی گوتنێ یە ئەلکیس ساندرو ئەوێ ل سالا ٢٠١٥ ژ یانا پورتو یا پورتوگالی ھاتیە گەگوھاستن ١٣٤ یاری ل گەل یانا یوڤانتوس ل ماوێ سێ سالێن بوری کرینە و ئێک ژ یاریزانێن گرنگە نوکە ل ناڤا پێکھاتیێ یانا یوڤانتوس.
ئەڤرۆ نیوز، نەوزاد ھلۆری:
د گەرا ١٤ێ دا، بزاڤا رەوشەنبیری ل ئاکرێ دەستەکا نوو بۆ ب رێڤەبرنا وەرزێ نوو یێ کاری ھەلبژارت و تێدا دکتور نەزار خورشید وەکو بەرپرسێ نوو یێ بزاڤێ ھاتە دیارکرن. ئەڤرۆ سپێدێ، ٢٢ کانوونا ئێکێ ٢٠١٨K زێرەڤان تەموو، ئەندامێ بزاڤا رەوشەنبیری ل ئاکرێ بۆ ئەڤرۆ نیوز گۆت: “دگەرا ١٤ێ دا، بزاڤا روشەنبیری ل ئاکرێ د پرۆەسەیکا ئازاد و دیموکراسی دا، رابوو ب ھەبژارتنا دەستەیەکا نوو بو ب رێڤەبرنا وەرزێ نوو یێ خوە یێ کاری”.
زێدەتر گۆت: “دکتور نەزار خورشید وەکو بەرپرس ھاتە ھەلبژارتن، دیسان زەکەریا حەمید وەکو بەرپرسێ نڤیسینگەھا رەوشەنبیری و سالح محەمەد وەکو بەرپرسێ کارگێری و دارایی و ئازاد موستەفا وەکو بەرپرسێ راگەھاندنێ و رۆژا مەجید وەکو بەرپرسا پەیوەندیان ھاتنە ھەلبژارتن، ھەر ئێک ژ ئەلند ئاکرەی و رێکەفت زوھێر وەکو ئەندامێن یەدەک ھاتنە ھەلبژارتن). دھێتە زاینن کو بزاڤا رەوشەنبیری ل ئاکرێ ل رێکەفتی ئێکێ تەمووزا سالا ١٩٩١ ھاتیە دامەزراندن و ھەتا نوکە ١٤ جاران دەستەیا خوە گوھری یە، زورترین بزاڤ و چالاکیێن رەوشەنبیری و ئەدەبی و ھونەری ل قەزا ئاکرێ دکەت.
ئەڤرۆ نیوز، نەوزاد ھلۆری:
شەڤا بوری تا سپێدەھیا ئەڤرۆ ژ لایێ دو فرۆکێن تورکیا ب دژواری دەڤەرا زێبارێ ھاتە بوردومانکرن، ژبەرکو ئەو دەڤەر بەری نوکە ھاتیە چولکرن ھەتا نوکە زیانێن وێ بوردومانێ نەھاتینە زانین، ھەتا بەرھەڤکرنا ئەڤی نووچەیی ژی زڤرینا فروکەیان بۆ دەڤەرا زێبارێ بەردەوامە.
مێھرەڤان کادانی، وەلاتیەکێ دەڤەرا زێبارێ یە دیارکر کو شەڤا بوری ھەتا سپێدەھیا ئەڤرۆ گوندەوارێن وان ژلایێ فروکێن تورکیا ھاتیە بوردومانکرن و بۆ ئەڤرۆ نیوز گۆت: (ئەو دەڤەر و گوندێن کو ھاتینە بوردومانکرن پێکدھێن ژ گوندێن نپاخ و چاربوت و زنجیرە چیایێ گارە، بەلێ ژبەرکو بەری نوکە ئەو گوند ژ بەر مەترسیا بوردومانا فروکەیان و شەری ھاتینە چولکرن، ھەتا نوکە چوو زانیاری لسەر زیانێن بوردومانێ ناھێنە زانین).
زێدەتر گۆت: (پشکەک ژ خەلکێ وان گوندان ب مەرەما کاری و خودانکرنا تەرش و کەوالی دچنە سەر گوندێن خوە، بەلێ ژبەر مەترسیا بوردومانێ، خوە ل وان جھان دویرکریە).
بوردومانا فروکێن تورکیا ددەمەکێ دایە کو چەند روژێن بوری گوندێ کادانا ژبەر بەردەوامبوونا بوردومانێن تورکیا ب ئێکجاری ھاتە چولکرن و خەلکێ وێ ئاوارەیێ دینارتە و دەوروبەران بوون.
ئەڤرۆ نیوز:
راھێنەرێ یانا ریال مەدرید یا ئسپانی سانتیاگو سولاری دکۆنگرەکێ رۆژنامەڤانی دا ھوشداری دا یاریزانێن خوە کو پێدڤیە د یاریا ئەڤرۆ یا دووماھیا موندیالا جیھانێ دا ل وەلاتێ ئیمارات و ل ھەمبەر یانا عەین یا ئیماراتی د ھشیاریەکا تمام دا بن.
زێدەتر سکولاری دوپاتکریە کو دڤێ قارەمانیێ دا ئاستێن ژ ھەژی یێن ھاتینە دیتن ژ تیمێن پشکدار لەورا یا فرە ئاستەکێ بلند ل یاریا دووماھیێ ل ھەمبەر یانا عەین یا ئیماراتی ئەڤ شەڤە ل یاریگەھا باژێرێ زاید یێ وەرزشی پێشکێش بکەن.
زێدەتر ناڤھاتی ئاماژەکر ئەو دێ لێگەریانا سەرکەفتنێ کەن و بۆ ب دەستڤە ئینانا ڤێ ئارمانجێ پێدڤیە یاریزانێن وی ب ھشیاری و رێزگرتن و یاریا ب کوم ل ھەمبەر تیما مێڤان بچنە د ناڤ یاریێ دا و ئەڤە دێ رێکا سەرکەفتنا وان بیت بۆ ب دەستڤەبرنا ناسناڤێ سیێ ل دووڤ ئێک.
ل دووماھیێ سولاری ئەو چەندە ژی ئاشکراکر ئەو ێ ب نەخشە و شێوازێ خوە یێ جاران چنە دناڤا یاریێ دا ئەوژێ ب بەرەڤانیەکا ھشک و ھێرشبەریەکا ب لەز و پاراستن ل سەر ھێلا ناڤین چونگو گەھشتن ب یاریا دووماھیێ و ل ھەمبەر عەین نە ژ نەشکەکێ ڤە بوویە.
ئەڤرۆ نیوز، بارزان مزووری:
ئەو زارۆیا ل رۆژا 20 کانوونا ئێکێ 2018 ل بەر دیوارێ خواندنگەھەکا د ناڤ سەنتەرێ قەزا شێخان دا ھاتیە دیتن و رادەستی پۆلیسان ھاتیە کرن ل دووڤ بریارا دادوەرێ ڤەکولینێ ل نەخۆشخانا شێخان یا زارۆکبوونێ چاڤدێریا وێ دھێتەکرن، ل دووڤ وان پێزانیننَن ژوورا تومارێ یا نەخۆشخانا ناڤھاتی داینە ئەڤرۆ نیوز ھەتا نوکە پتری 10 کەسان ژ ژن و مێرێن بێ زارۆ ناڤێن خوە تومارکرینە بۆ وێ چەندێ کو ڤێ زارۆیێ بۆ خوە ب خودان بکەن.
پیر ئەودی سلێمان، بەرپرسێ پشکنینان ل نەخۆشخانا شێخان بۆ ئەڤرۆ نیوز ئاشکرا کر کو ھەموو پشکنین بۆ لەشێ وێ زارۆیێ ھاتینە ئەنجامدان و لەشێ وێ گەلەک یێ ساخلەمە و بۆ خوارنا شیری ژی گەلەکا باشە، بەلێ چ نیشان لێ دیارنەبووینە کا ئەڤ زارۆیە کیە و ژ کیڤە ئینایە وی جھێ لێ ھاتیە دیتن و گۆت: “ھەتا نوکە پتری 10 کەسان ژ ژن و مێرێن بێ زارۆ ناڤێن خوە تومارکرینە بۆ وێ چەندێ کو ڤێ زارۆیێ بۆ خوە ب خودان بکەن”.
د. نارین فەرەچ، نوبەدارا ھوبا زارۆبوونێ ل نەخۆشخانا شێخان یا گشتی بۆ ئەڤرۆ نیوز ئاشکرا کر کو ل دووڤ پشکنینێن بۆ ڤێ زارۆیێ ھاتیە ئەنجام دان ژیێ وێ نێزیکی 30 رۆژایە و رەوشا وێ یا ساخلەمی گەلەک یا باشە و چ نەخوشی لێ نینن و گۆت: “نوکە ژ ئالیێ دو نۆشدارێن کچ ڤە د ناڤ ئێک ژ ژوورێن تایبەت ڤە ل ھۆبا زارۆبوونێ دھێتە ب خودانکرن”.
ناڤھاتیێ خویا کر کو گەلەک کەس سەرەدانا وان دکەن بۆ وێ چەندێ ئەڤ زارۆیا کچ ب وان بھێتە دان، بەلێ یا وان بتنێ چاڤدێریە ھەتا رۆژا ئێکشەمبی 23 کانونا ئێکێ 2018 دادوەرێ ڤەکۆلینێ بریارێ ل سەر ڤێ زارۆیێ د دەت و بۆ جھەکێ دی دھێتە رەوانەکرن”.
تێبینی: ب مەرەم سەرۆچاڤێن ڤێ زارۆیێ ھاتینە ڤەشارتن
نيشاندان