ئه‌ڤرۆ نيوز:
پيرۆز راگرتنا ئالايێ كوردستانێ، ئه‌ركه‌كێ نيشتيمانى يه ل ده‌ف هه‌ر تاكه‌كى كورد، وه‌كو ديار سالانه د 17 هه‌يڤا 12 دا، ل پرانيا قوتابخانه و زانكۆ و جهێن گرێداى فه‌رمانگه‌هێن حكومى ڤه رێز ل ڤێ رۆژێ دهێته گرتن، لێ جهێ تێبينا من ل قوتابخانێن ئه‌هلى يێن دهۆكێ، رۆژێن نيشتيمانى هند گرنگى پێ ناهێته دان و گروڤه ژى بۆ ڤێ يه‌كێ، كۆرێ من ل قوتابخانه‌كا ئه‌هلى يا دهۆكێ دخوينيت، ئه‌ڤرۆ مه جلكێن كوردى كرنه به‌ر ژبه‌ر كو رۆژه‌كا پيرۆزه، لێ تشتێ سه‌ير كورێ مه، كره گرى و گوت: باب، رێڤه‌به‌ريا مه نه‌گوتيه مه رۆژا ئالايه و ئه‌ز نه‌شێم ڤان جلكان بكه‌مێ، ژبه‌ر كو هه‌ڤالێن من كه‌س ناكه‌تێ، ئه‌ڤه د ده‌مه‌كێ دا كو به‌رى چه‌ند رۆژان رۆژا (هه‌له‌وين) بوو، كارگێريا قوتابخانێ نامه‌يه‌كا فه‌رمى بۆ هه‌مى دايك و بابان فرێكربوو و ئاماژه پێ كربوو كو دێ ئه‌ڤ رۆژه هێـته ساخكرن وجلێن هه‌له‌وين ل به‌ر بكه‌ن، ئه‌ز بخوه ژى سودفه وێ رۆژێ چوومه قوتابخانێ، من پرانيا قوتابيان ئه‌و جل ل به‌ر كربوون و ئاهه‌نگه‌ك ژى بۆ گێرا.
ل ڤێره ئاخافتنا د.چنار سه‌عه‌د عه‌بدولا ئه‌نداما ئه‌نجوومه‌نێ سه‌كردايه‌تيا پارتى ل بيرا خوه دئينين كو به‌رى هه‌يڤه‌كێ د سميناره‌كێ دا ئاماژه پێ كربوو كو: هه‌وه ئاگه‌هـ ژ زارۆيێن خوه هه‌بيت، ل قوتابخانێن ئه‌هلى چو پرسه‌كا نيشتيمانپه‌روه‌رى و گيانه‌كێ كوردايه‌تيێ بۆ ناهێته به‌حسكرن.
ل ڤێره په‌ياما مه بۆ رێڤه‌به‌ريا گشتى يا په‌روه‌ردا دهۆك ئه‌وه، فه‌ره هه‌وه پێداچوونه‌ك د سياسه‌تا خوه يا ره‌فتاركرن ل گه‌ل قوتابخانێن ئه‌هلى بۆ ساخكرنا رۆژێن نيشتيمانى هه‌بيت و بكه‌نه ئه‌رك ل سه‌ر ڤان قوتابخانان كو پتر گرنگيێ پێ بده‌ن ب تايبه‌ت د سيسته‌مێ وان دا، ژبه‌ر كو ئه‌گه‌ر ئه‌ڤ رێوره‌سمه ل وان قوتابخانان بهێته ساخكرن ژى، ئه‌گه‌ر د مێشكێ قوتابى دا، گرنگيا رۆژێن نيشتيمانى بۆ نه‌هێته گوتن، چو مفاى ناگه‌هينيتێ.
ژ نڤيسينا: رۆژنامه‌ڤانه‌كى
نيشاندان