ئه‌ڤرۆ نيوز:
وه‌لاتيه‌كێ تاخێ شندوخا د نامه‌يه‌كێ دا كو بۆ ئه‌ڤرۆنيوز هنارتيه دياركر يه ، كو دوهى ل ده‌مژمێر 2 نيڤرۆ وه‌ره كاره‌با نيشتيمانى ل تاخێ وان هاتيه برين و پتر ژ 24 ده‌مژمێره هێشتا كاره‌با نيشتيمانى ب تاخێ وان نه‌هاتيه دان.
پشتى هاتنا وه‌رزێ زڤستانێ ، خواست ل سه‌ر بكارئينانا ده‌مژمێرێن كاره‌بێ زێده بووينه و بوويه ئه‌گه‌ر پێدانا ده‌مژمێرێن كاره‌با نيشتيمانى كێم ببن.
ئەڤرۆ نیۆز، ئەمیر ئەترووشی
رێڤەبەریا گشتیا پۆلیسێن نەینەوا بۆ جارا ئێکێ ب ھەلکەفتا جەژنا ئێزی یا کوردئێن ئێزدی بۆ ماوێ پێنچ رۆژان مۆلەت دانە فەرمانبەرێن خوە یێن کوردێن ئێزدی.
سەیدو چەتۆ، سەرۆکێ جڤاتا پارێزگەھا نەینەوا، بۆ ئەڤرۆ نیۆز دیار کر، مە وەکو جڤاتا پارێزگەھا نەینەوا سەرەدانا رێڤەبەریا گشتیا پۆلیسێن نەینەوا کر و د ڤێ سەرەدانێ دا پشتی مە ژێ خواستی، رێڤەبەرێ گشتیێ پۆلیسێن نەینەوا بریار دا بۆ ماوێ پێنچ رۆژێن جەژنا ئێزدی مۆلەتێ بدەتە ھەموو پۆلیس و ئەفسەر و فەرمانبەرێن خوە یێن کوردێن ئێزدی دناڤ رێڤەبەریێ دا.
ئاشکرا ژی کر کو ئەڤە بۆ جارا ئێکێ یە تشتەکێ ب ڤی رەنگی پەیدا دبیت و ھەر ژ رۆژا دووشەمبی ١٠/١٢/٢٠١٨ ھەتا رۆژا شەمبی ١٥/١٢/٢٠١٨ دێ بۆ فەرمانبەر و پۆلیسێن کوردێن ئێزدی بێھنڤەدانا فەرمی بیت و د ڤێ سەرەدانێ مە مە گەنگەشە ل سەر رەوشا ئێمناھیا دەڤەرێ ژی کر.
ئەڤرۆ نیۆز ، زنار تۆڤی:
ئەڤرۆ دوشەمبی کۆنسۆلێ گشتی یێ ئەمریکا ل ھەرێما کوردستانێ ستیڤ فەیگن سەرەدانا کەمپا ئاوارا یا باجد کەندالا ل پارێزگەھا دھۆکێ دا، کو نوکە ١٠ ھزار ئاوارە دناڤا وێ کەمپێ دا دژین. ھەروەسا د ناڤا وێ کەمپێ دا کۆنسۆلێ گشتی سەرەدانا پرۆگرامێن پشتگیریێن حوکمەتا ئەمریکی کرن، یێن کو بۆ پالپشتیا دارایی ھاتینەکرن ژ لایێ نڤیسینگەھا رێکخراوا ھاریکاریێن ئەمریکا بۆ ھاریکاریێن کارەساتێن دەرڤەی ئەمریکا.
ھەروەسا کۆنسۆلێ گشتی ل گەل چەند خێزانێن ئاوارە و رێڤەبەر و کارگێریا کەمپێ یا ب سەر ئاژانسا نەتەوێن ئێکگرتی ڤە بۆ پەنابەران ل عیراقێ کۆمبوو.
ئەڤرۆ نیۆز:
ئەحمەد ئاجەت نڤیسەرێ رۆژناما یێنی شەفەق یا نێزیکی حوکمەتا ئاکپارتیێ ئەڤرۆکە راگەهاند کو تورکیا هەموو بەرهەڤیێن خوە بۆ ئۆپەراسیۆنەکێ ل رۆژهەلاتێ فراتێ تەمام کرینە و چاڤەرێ هندێ یە کو ل دەمەکێ گونجای دەست ب ڤێ ئۆپەراسیۆنێ بکەت.
ئەو یەک د دەمەکێ دایە کو ئەمریکا چەندین خالێن سنوری ل سەر سنورێ رۆژئاڤایێ کوردستانێ و تورکیا دروست کرینە دا تورکیا هێرشی رۆژهەلاتێ فراتێ نەکەت و بەری نها ژی چەندین جاران بەرپرسێن ئەمریکی دیار کرینە کو ئەو ل دژی هندێ نە تورکیا هێرشی رۆژهەلاتێ فراتێ بکەت.
ئەڤرۆ نیوز:
ئه‌ڤرو پشتى نیڤرو 10-12-2018 فه‌رهاد ئه‌مین ئه‌تروشى پارێزگه‌رێ دهوكێ پێشوازیا زیاد ره‌ئوف نوینه‌رێ حكومه‌تا هه‌رێما كوردستانێ ل پولونیا كر.
دهه‌ڤدیتنه‌كێدا به‌حسێ ره‌وشا ئاواره وپه‌نابه‌ران ل سنورێ پارێزگه‌ها دهوكێ وئه‌و هاریكاریێن بو وان دهێنه پێشكێشكرن هاته كرن.
دته‌وه‌ره‌كێ دى به‌حسێ هه‌ول وبزاڤێن نوینه‌راتیا حكومه‌تا كوردستانێ ل وه‌لاتێ پولونیا ژبو په‌یداكرنا هاریكاریێن مروڤایه‌تى بو ئاواره وپه‌نابه‌ران ب گشتى هاته كرن .
پارێزگه‌رێ دهوكێ خوشحالیا خو ب سه‌ره‌دانێ دیاركر وسوپاسیا نوینه‌رتیا حكومه‌تا كوردستانێ كر كو شیاینه په‌یوه‌ندیێن به‌رده‌وام دگه‌ل وه‌لاتێ پولونیا ئاڤاكه‌ن وره‌وشا وێ ژمارا زور یا ئاواره وپه‌نابه‌ران ل پارێزگه‌ها دهوكێ بو ده‌ستهه‌لاتدارێن پولونیا به‌رچاڤكه‌ن وبه‌رپرسێن وى وه‌لاتى رازیكه‌ن كو ئه‌ڤرو وه‌زیرا گه‌شه‌پێدانا مروڤایه‌تى یا وى وه‌لاتى سه‌ره‌دانا كه‌مپێن ئاواره‌یان ل دهوكێ كریه وژنێزیك هایدارى كێم وكاسى وپێدڤیێن وان بوینه.
ژلایێ خوڤه نوینه‌رێ حكومه‌تا كوردستانێ ته‌كه‌ز كر كو ژمارا ئاواره وپه‌نابه‌ران ل پارێزگه‌ها دهوكێ یا زوره وفشاره‌كا مه‌زن ئێخستیه سه‌ر هه‌موو خزمه‌تكارى له‌ورا ئه‌م وه‌كو نوینه‌راتیا حكومه‌تا كوردستانێ ل پولونیا دێ به‌رده‌وام بزاڤا كه‌ین كو حكومه‌تا پولونیا هاریكاریا ئاواره وپه‌نابه‌ران وخه‌لكێ خوجهێ پارێزگه‌هێ بكه‌ت.
هه‌ژى گوتنێ یه ل شه‌ڤا 9-10/12/2018 خانم (بیێتا كێمپ) وه‌زیرا گه‌شه‌پێدانا مروڤایه‌تى یا وه‌لاتێ پولونیا وشاندێ پێرا ونوینه‌رێ حكومه‌تا كوردستانێ سه‌را هه‌رێما كوردستانێ دایه وئه‌ڤرو شاندێ ناڤبرى سه‌را كه‌مپا خانكێ یا ئاواره‌یێن شنگالێ وجهێن دى دایه وژنێزیك هایدارى ره‌وشا وان بویه.
ئەڤرۆ نیۆز:
ئەحمەد تورک هەڤسەرۆکێ بەرێ یێ باژێرڤانیا مێردینێ و کەسایەتیێ سیاسی یێ باکورێ کوردستانێ راگەهاند کو گەلەک ئالی داخواز دکەن کو ل گەل هەدەپێ هەڤپەیمانیەکێ بۆ هەلبژارتنان دروست بکەن و ئازادی و مافێ مرۆڤان ژی وەکو بنەمایێ هەڤپەیمانیان ل قەلەم ددەن و گۆت: (بێی کوردان ل تورکیا ئازادی و دیموکراسی پێش ناکەڤیت و ژ بەر هندێ ژی یێن بخوازن ل گەل کوردان هەڤپەیمانیێ دروست بکەن دڤێت گوهداریا داخوازیێن کوردان بکەن).
ئەحمەد تورک هۆشداریا هندێ ژی ددەت کو نابیت چو هێز هزرا هندێ بکەت کو کورد دێ هەما وەسا پشتەڤانیێ ل وان کەن، چونکو داخوازیێن کوردان ل تورکیا دیارن و ئێدی کورد وەکو بەرێ دەنگێ خوە نادەنە هەر هێزەکا سیاسی.
ئەڤرۆ نیوز:
بالیوزێ ئەمریکا ل عیراقێ داخواز ژ کاندیدێ حەشدا شەعبی فالح فەیاز کر خوە ژ بۆ پوستێ وەزارەتا نافخویا عیراقێ ڤەکێشیت.
ل دووڤ چەند ژێدەرێن رۆژنامەڤانیا عەرەبی ئاشکرا کریە دوگلاس سلێمان بالیوزێ ئەمریکا ل عیراقێ دگەل فالح فەیاز کومبوویە و داخواز ژێ کریە خوە ژ بەربژارکرنا پوستێ وەزیرێ نافخو ڤەکێشیت پێخەمەت پاراستنا پروسەیا سیاسی رێگری کرن ل پەقینا رەوشا سیاسی ل عیراقێ.
بەرامیەر ڤێ چەندێ فالح فەیاز رەتکریە خوە ژ ڤی پوستی ڤەکێشیت ژبەرکو بابەتێ کاندیدکرنا وی ژلایێ سەروک وەزێران عادل عەبدولمەھدی و ھەڤپەیمانیا فەتحە ھاتیە دان و ب بریارا چو کەسان نەھاتیە کاندید کرن.
ژبەر ناکوکیا ناڤبەرا لایەنێن شیعی دا ھەتا نوکە ھژمارەکا کاندیدێن وەزارەتا ل عیراقێ نەھاتینە دانان و حەفت وەزارەت ھەتا نوکە ماینە ڤالا.
ئەڤرۆ نیوز:
ئه‌ڤرو سپێدێ 10-12-2018به‌رێز فه‌رهاد ئه‌مین ئه‌تروشى پارێزگه‌رێ دهوكێ پێشوازیا (دومینیك ماس) كونسلێ وه‌لاتێ فره‌نسا ل هه‌رێما كوردستانێ كر.
دهه‌ڤدیتنه‌كێدا به‌حسێ په‌یوه‌ندیێن دوو قولى دناڤبه‌را هه‌رێما كوردستانێ وه‌لاتێ فره‌نسا وئه‌و هاریكاریێن حكومه‌تا فره‌نسا پێشَكێشى هه‌رێما كوردستانێ دكه‌ت دبیاڤى كاروبارێن مروڤایه‌تى وسیاسى وله‌شكرى دا نه‌خاسمه ئه‌و هاریكاریێن بو ئاواره وپه‌نابه‌ران دهێنه پێشكێشكرن هاته كرن.
دته‌وه‌ره‌كێ دى دا به‌حسێ ره‌وشا چاندنێ وهاتنا رێژێن باش یێن بارانان وكارتێكرنا وان بارانان ل سه‌ر كه‌رتێ چاندنێ بوزێده‌كرنا به‌رهه‌مێ كشتوكالى هاته كرن.
پارێزگه‌رێ دهوكێ خوشحالیا خو ب سه‌ره‌دانێ دیاركر وسوپاسیا وه‌لاتێ فره‌نسا كر هه‌مبه‌ر ئه‌و هاریكاریێن بو هه‌رێما كوردستانێ پێشكێش دكه‌ت وخواست كو فره‌نسا یا به‌رده‌واه‌مبیت ل سه‌رهنارتنا وان هاریكاریا.
ژلایێ خوڤه كونسلێ فره‌نسا خوشحالیا خو دیاركر هه‌مبه‌ر هه‌بونا په‌یوه‌ندیێن خورت دناڤبه‌را فره‌نسا وهه‌رێما كوردستانێ وته‌كه‌زكر كو وه‌لاتێ فره‌نسا دێ به‌رده‌وام هاریكاریا حكومه‌تا هه‌رێما كوردستانێ وئاواره وپه‌نابه‌ران كه‌ت.
ئەڤرۆ نیۆز، هۆشەنگ تاجر:
فەرشاد جەلیلی ئەندامێ رێکخراوا مافێ مرۆڤی یا رۆژهەلاتێ کوردستانێ بۆ ئەڤرۆ نیۆز دیار کر کو ئارەش کەیخوسرەوی پارێزەرێ ناڤدارێ رۆژهەلاتێ کوردستانێ کو د ناڤ خەلکی دا جەماوەریەکێ خوە یێ باش هەبوو ب تومەتا کو دژبەریا سیستەمێ ئیرانێ کریە و ئاژاوەگەری دروست کریە، ژ ئالیێ دادگەها شۆرەشا ئیسلامی یا ئیرانێ ل باژێرێ سەقز یێ رۆژهەلاتێ کوردستانێ ب سزایێ ٦ سال زیندان هاتە سزا دان.
ناڤهاتی راگەهاند کو پارێزەرێ کورد بەری نها د چەندین خوەنیشادانان دا بەرهەڤ ببوو و پشتەڤانی ل مافێ کۆلبەران و خەلکی کربوو و ژ بەر هندێ ژی هێزێن ئێمناهیێ و سازیێن دەولەتی ب تومەتا کو دژبەریا سیستەمێ ئیسلامی یێ ئیرانێ کریە زیندانی کرن و گۆت: (رۆژانە لاوێن کورد و کەسێن ناڤدار ل ئیرانێ یان دهێنە کوشتن یان ژی زیندانی دکەن و نموونا دی ژی کوشتنا دەرهێنەرێ ناڤدارێ کورد رەحیم زەبیحی بوو کو دەستێ دەزگەهێ هەوالگیری یێ ئیرانێ د کوشتنا وی دا هەبوو).
ئەڤرۆ نیوز، لەزگین جوقی:
رێڤەبەرێ کاروبارێن ئێزدیان ل پارێزگەھا دھۆکێ دیارکرکو وەرگرتنا خەلاتی نوبل یێ ئاشتیێ ژلایی کچا رزگابوویا دەستێن تیرۆرستێن داعش نادیا مراد گەلەک یێ گرنگە بۆ ھەموو کچ وژنێن ئێزدی.
عێدان شێخ کالۆ، رێڤەبەرێ کاروبارێن ئێزدیان ل پارێزگەھا دھۆکێ سەر رێڤەبەریا گشتیا کاروبارێن ئێزدیان ل ھەرێما کوردستانێ بۆ ئەڤرۆ نیوز دیارکرکو دانا خەلاتان بۆ رزگاربوویێن ئێزدی ژلایی دەولەتیێن جیھانی ڤە پێنگاڤەکا زۆر گرنگە چونکو دێ بیتە ئەگەر دوسیەیا ئێزدیان بھێتە رێڤەبرن ھەتا نوکە ل عێراقی دوسیەیا جینوسایدا شنگال نەھاتیە رێڤەبرن ئەڤ جۆرە خەلاتیێن گرنگ یێن جیھانی دەمێ رزگاربوویێن ئێزدی دھێنە دان ھێڤیەکا مەزن بۆ خەلکێ دروست دکەت چونکو دبیت ئەڤە ببینە پێنگاڤ بۆ جینوسایدی ودیارکرنا چارەنڤیسی کەسین ھەتا نوکە بەرزبووی کو ھەتا نوکە پتر ژ ٣١٠٠ رەڤاندیێن ئێزدی دیارنینن.
ئاشکەرا کرکو ھزارەھا کچ بووینە قوربانیێن دەستێن تیرۆرستێن داعش دەمێ کچەک دھێتە خەلاتکرن ئەم گەلەک دلخوش دبن ھیڤیەک مەزن دروست بیت بۆ رێڤەبرنا دوسیەیا ئێزدیان”.
ل وەلاتی نەرویج خەلاتی نوبل یێ ئاشتیی دی ب کچا کوردا ئێزدی نادیە مراد ھێتە دان ئەڤە ئێکەمێن جارا کچە کورد ڤی خەلاتی جیھانی وەردگریت.
نيشاندان