ئەڤرۆ نیۆز، بارزان مزوورى:

ئيسماعيل محەمەد ئەحمەد هاريكارێ پارێزگارێ دهۆك د بوارێ كارۆبارێن ئاواران و پەنابەران دا ديار كر كو پشتى سالا 2014 هژمارەکا زۆر يا ئاواران قەستا هەرێما كوردستانێ كر ب تايبەت پشتى رێكخراوا تيرۆرستى يا داعشێ چەندين دەڤەرێن عێراقێ داگیر کری، 700 هزار خێزانا يێن ئاوارەیی پارێزگەها دهۆکێ بوون و 21 كەمپ ل دهۆکێ هەنە ل سەرانسەرێ عێراقێ ژى 38 كەمپ هەنە ژ وان 38 كەمپا بەهرا پتر ل پارێزگەها دهوكێ نە، ئانکۆ رێژا 60% كەمپ ل پارێزگەهێ هەنە ئەڤە ژى بارگرانيەكا مەزنە ل سەر هەموو سەكتەرێن ژيانێ ل پارێزگەها دهوكێ.

ناڤهاتی بۆ ئەڤرۆ نیۆز ديار كر كو پێدڤيە حوكمەتا فيدرال زێدەتر پشتەڤانيا وان ئاوارا و پەنابەرا بكەت ل پارێزگەها دهوك يا ديارە ژى 92%  ئەو ئاوارە برايێن مە يێن ئێزدى نە هەتا نها ژى چ هەول نەداينە كو بزڤرنە ڤە سەر جهێن خوە، ژ بەر چەندين ئەگەرا ژ وان ژى يێن ئەمنى و گەلەك ئەگەرێن دى ئەڤە ژى پێدڤى ب كارەكێ مەزن هەتا ئاوارە ب سەر فەرازى ڤەگەرنە ڤە سەر جهێن خوە.

ئەڤرۆ نیۆز، نەوراد هلۆری:

 وەزارەتا دارایی یا حوکمەتا هەرێما کوردستانێ خویکا وەرگرتی یا لسەر جگاران دێ ب رێژا 100٪ زێدە کەت، خوەدانێ بازارەکێ کومفرۆشیا جگاران ل شێلادزێ دیارکر کو ئەڤ یەک ژی دێ بیتە ئەگەر کو جگارە گران بیت.

ب گورەی راگەهاندنەکێ کو پشکا راگەهاندن و پەیوەندیان یا سەر ب رێڤەبەریا گشتی یا گومرکان ل وەزارەتا دارایی و ئابووریا یا هەرێما کوردستانێ بەلاڤکریە، رێژا خویکا وەرگرتی یا سەر جگارێن هاواردە دێ 100٪ زێدە بیت.

 حسێن فازل، خوەدانێ ئێک ژ بازارێن فرۆتنا ب کوم یا جگاران ل شێلادزێ بۆ ئەڤرۆ نیۆز گۆت: (ئەڤ بریارا وەزارەتا دارایی ئەرێنی و نەرێنی هەنە، ئەرێنی ئەوە کو دبیت رێژا کێشانا جگاران کێم بیت و بەرهەمێ ناڤخوە بەر ب پێشڤە بچیت، بەلێ نەرێنی ئەوە کو دێ بهایێ جگاران گەلەک گران بیت ب تایبەتی ل سەر جگارێن ئورۆپی و ئەمریکی کو پرانیا بازارێن هەرێما کردستانێ ئەڤ جورێ جگارە لێ هەنە).

زێدەتر گۆت :(ب چو شێوەیان جگارێن ئیرانی و پشکەکا تورکی گران نابیت ژ بەر کو ئەو سنوردارن ل گەل هەرێمێ، رەنگە ب رێیێن قاچاخ بهێنە ناڤا هەرێمێ).

ناڤبری دیار کر ژی کو قەیرانا داراریی کارتێکرنەکا زۆر لسەر بازارێ جگاران کریە و گۆت ژی : (بهایێ جگاران چەند گران بیت دێ جگارکێش هەر کێشن، ژ بەر ڤێ پێدڤیە پێداچوون د ڤێ بریارێ دا بهێتەکرن).

راگەهاندنا وەزارەتا دارایی ب هژمار 18974 ل رۆژا 28 چریا دویێ 2018 دەرچوویە، دێ روژا 28 شوبات 2019 کەڤیتە د وارێ بجهکرنێ دا، مەرەم ژی ئەوە کو پاراستنا بەروبومێ ناڤخوەیی و وەکو ئێک لێکرنا خویکا هەرێمی و عیراقێ یە ل سەر جگارانە.