ئەڤرۆ نیوز، مەحمود نھێلی:
چەندین سالە سێ باخچێن یاریێن زارۆیان و پارکێن بھێنڤەدانێ ل سەنتەرێ ناحیا دێرەلۆکێ ژکار کەفتینە و پێدڤی ب نووژەنکرنێ نە و وەلاتی ژی ژ بەر نەبوونا چ یاریگەھان دلگرانیا خوە نیشان ددەن.
بەیار عەلی، ئاکنجیێ سەنتەرێ ناحیا دێرەلۆک بۆ ئەڤرۆ نیوز دیار دکەت کو ھەبوونا پارکان و باخچێن بھێنڤەدانێ ئێک ژ کارێن فەرن پێدڤیە ل دێرەلۆکێ ھاتبانە چێکرن،، لێ ھەتا نوکە ئەڤ یەکە ل دێرەلۆکێ نینە و گۆت: “مە گەلەک جاران یا دخواز ژی کری کو باخچەک ل دێرەلۆکی بھێتە چێکرن داکو زارۆیێن مە یاریان تێدا بکەن و خوە دیر بکەن ژ کار و یاریێن دیتر، کو مەترسی ل سەر ھەبیت”.
ژ ئالیێ خوە ڤە سامی ئوشانە، رێڤەبەرێ ناحیا دێرەلۆک بۆ ئەڤرۆ نیوز دیار کر کو راستە نوکە سێ پارکێن ژ کارکەفتی ل دێرەلۆکێ ھەنە و ھەر سێ ژی پێدڤی ب نووژەنکرنێ، لێ بەری چەند سالان ئێک ژ وان پارکان ھاتبوو نووژەنکرن لێ وەک پێدڤی نەھاتە سەخبێکرن ژ بەر وێ یەکێ ژی یاریێن وێ ژ لایێ زارۆیان ڤە ھاتنە شکاندن و پارک ب ئێک جاری ھاتە بەردان.
دەربارەی باخچێ باژێرڤانیێ ژی ئەڤێ دناڤبەرا رووبارێ زێ و سپنە دا ژی ناڤبری ئاشکرا کر کو بەری نوکە و ل دەمێ بەرفرەھیێ خەلکی ئاوارە خەلکێ رەڤی ژ بەر شەرێ پەکەکێ لێ ئاکنجی ببوون و پشتی ئاریشا ڤالا کرنێ ھاتیە چارەسەکرن ، ئەڤ قەیرانا ئابووری ب سەر ھەرێمێ دا ھات و گۆت: “بۆ ئەڤ سالە چەند پرۆژە وەک قووناغا ئێکی ل دێرەلۆکێ دەسپێکرینە و مە ژی ئەو پرۆژە یێن زۆر گرنگ ھەلبژارتینە کو ژیانا خەلکێ دەڤەرێ پێڤە گرێداینە و نوکە ل ژێر ب جھئینانێ دانە”.