ئەڤرۆ نیۆز:
بەرپرسەکێ وەزارەتا ناڤخوە یا فرەنسا بۆ ئاژانسا فرانس پرێس دیار کریە کو سەرۆکێ فرەنسا ژ بەر رەوشا ئالۆز یا خوەنیشادانێن ل وەلاتی ڤەگەریە پاریسێ و بریارە کۆمبوونەکا نەئاسایی ل گەل ئەندامێن کابینا حوکمەتێ بکەت و رەوشا نها یا خوەنیشادانێن ل فرەنسا گەنگەشە بکەن.
هەمان بەرپرسی ئەو یەک ژی دیار کریە کو سەرۆکێ فرەنسا هێرشێن ل سەر هێزێن پۆلیسان شەرمزار کریە و رەنگە رەوشا نەئاسایی ل فرەنسا بهێتە راگەهاندن دا بشێن کۆنترۆلێ ل سەر رەوشا ئالۆز یا نها ل فرەنسا بکەن.
ئەڤرۆ نیوز:
تیما تەپا پێ ئەی سی میلان بەری دەمەکێ کێم شیا سەرکەفتنێ ل سەر یانا پارما توماربکەت ب دو گۆلان بەرامبەر گۆلەکێ ل ناف ئەرد و جەماوەرێ خوە دا ژ یاریێن گەرێ چاردێ یا خولا ئیتالیا یا تەپا پێ.
پشتی ب دووماھی ھاتنا نیڤا ئێکێ ب وەکھەڤی ژ یاریێ د نیڤا دویێ دا ل خولەکا ٤٩ یاریزانێ یانا پارما روبێرتو ئەنگلیس شیا گۆلا ئێکێ بۆ یانا خوە توماربکەت پشتی ڤێ گۆلێ یانا میلان ب ھەمی شیانێن خوە یاری کر و شیان دو گۆلان توماربکەن ل خولەکا ٥٥ و ٧١ ب رێکا یاریزانێن خوە پاتریک کوترونی و فرانکی کیسی.
ب ڤی ئەنجامی میلان دوبارە ڤەگەریا رێیا سەرکەفتنا و پێشڤە ھاتە رێزا چارێ ب ٢٥ خالان.
ئەڤرۆ نیۆز:
ئاندرێی باکلانۆڤ دبلۆماتکارێ ناڤدارێ روسیا بۆ ئاژانسا سپۆتینگ نیۆز دیار کریە کو گەلەک ناکۆکی د ناڤبەرا تورکیا و رژێما بەشاری دا ل دۆر رۆژئاڤایێ کوردستانێ هەنە، لێ تورکیا نها بزاڤا هندێ دکەت کو کوردێن سووریێ بکەتە قوربانی دا پەیوەندیێن خوە ل گەل بەشاری و حوکمەتا سووریێ ئاسایی بکەت.
ناڤهاتی هەروەسا دبێژیت تورکیا چەندین جاران ب نهێنی ل گەل رژێما بەشاری کۆمبوویە و دیار کریە کو نەهێلن کورد ل سووریێ هەرێمەکێ بۆ خوە ئاڤا بکەن و هەکە هوون رێگریێ ل کوردان بکەن ئەم ژی دێ دەستان ژ پشتەڤانیکرنا گرۆپێن ئۆپۆزسیۆنێ بەردەین، ئانکۆ تورکیا بۆ ئاساییکرنا پەیوەندیێن خوە ل گەل سووریێ دخوازیت کوردان بکەتە قوربانی.
ئەڤرۆ نیۆز، ئەمیر ئەترووشی:
بریارە پشتی دەمەکێ کورت پارێزگارێ دھۆکێ فەرھاد ئەترووشی کۆنگرەیەکێ رۆژنامەڤانی ل دۆر بھایێ کارەبا موەلیدەی بۆ مەھا ١١ ساز بکەت.
ژێدەرەکی تایبەت بۆ ئەڤرۆ نیۆز دیار کر کو نھا پارێزگارێ دھۆکێ فەرھاد ئەترووشی ل گەل قائیمقامێ دھۆکێ و لیژنا موەلیدەیان د کۆمبوونێ دایە و بریارە پشتی دەمەکێ کێم کۆنگرەیەکێ رۆژنامەڤانی ل دۆر بھایێ کارەبا موەلیدەی بۆ مەھا ١١ ساز بکەت و ھندەک بریارێن نوو و یێن دلخۆشکەر رابگەھینیت.
ئەڤرۆ نیوز، محەمەد عەلی:
سەرۆکێ لژنا تایبەت بۆ دویڤچوونا روودانێن یاریا دناڤبەرا دھۆک و زاخۆ یا ئێکەتیا تەپاپێ یا کوردستانێ بۆ ئەڤرۆ نیۆز دیارکر کو پشتی راپۆرتا خوە ب دووماھی ئیناین دێ شەمبیا بھێت بریار و راسپاردە ھێنە راگەھاندک و گوت: یا مە دیتی جھێ دلگرانیێ بوو و دڤێت ئەڤ بابەتی ب رژدی بھێتە چارەسەرکرن پێخەمەت ئەڤ روودانە ل کوردستانێ دوبارە نەبن.
زێدەتر ھادی کەریم گۆت: ئەز دگەل ھەردو ئەنداما سەلام حسێن و ئەحمەد عەبدوللا وەکو لژنە ژلایێ ئێکەتیێ ڤە ھاتینە راسپاردن ژبۆ دووڤچوونا بابەتێ زیانێن ب یاریگەھێ کەڤتین و گۆت: ل دووڤ راپۆرتێ دیاربوو کو ١٠١٠ کورسی ھاتینە شکاندن و ھژمارەک ژێ ھاتینە سۆتن و ترۆمبێلا خزمەتگۆزاریا ھاتیە ژناڤبرن و یا جھێ سەرسۆرمانێ بۆ جارا ئێکێ یە ل کوردستانێ سۆتنا یاریگەھێ ژلایێ چەندەک ژ جەماوەرەکێ یانەکێ ڤە دھێتە کرن و ئەڤە ژی پێنگاڤەکا مەترسیدارە.
ھەروەسا ناڤھاتی دیارکر کو پشتی پێزانین و دوڤچوونا یاریگەھێ کرن سەرەدانا جیھەتێن ئەمنی و پۆلیسا ژی ھاتیە کرن.
ژلایەکێ دویڤە ھادی کەریم گۆت: دڤێت ئێکەتیا تەپا پێ ب جورئەت بریارێ بدەت ژبۆ بەرژەوەندیا گشتی یا خولێ و پاراستنا یاریگەە و گیانێ ھەموو کەسێن دناڤ یاریگەھێ دا و دیارکر کو بیێ جێوازی دێ سەردەری دگەل ھەموو لایەنا ھێتە کرن و ئەگەر چاڤ لڤێ روودانێ بھێتە گرتن ترسا ھەبوونێ دناڤ یاریگەھێن ھەریمێ ب گشتی دێ ھەبیت.
ئەڤرۆ نیوز، لەزگین جوقی:
راوێژکارێ جڤاتا روحانیا ئێزدیان بۆ ئەڤرۆ نیوز دیارکر کو ھەردو نوونەرێن ئێزدیان ل پەرلەمانێ عیراقی دێ جڤاتا روحانیا ئێزدیان بەرھەڤ بن داکو کیشەیێن ئێزدیان دگەل خوە ببنە بەغدا.
خدر دێر خانەسۆری، راوێژکاری جڤاتا روحانیا ئێزدیان بۆ ئەڤرۆ نیوز دیارکر کو جڤاتا روحانی پشکداریا ھەموو ئەندامێن جڤاتی بریار دان ھەردو ئەندامێن پەرلەمانێ عیراقی یێن ئێزدی حەسەن نەرمۆ و سائیب خدر رۆژەکی بھێن ل جڤاتا روحانی بەرھەڤ بن و دان وستاندن ل سەر ھەموو کێشەیێن ئێزدیان بھێنە کرن ئەو کێشە بۆ بەغدا بھێنە رەوانەکرن ب ریێا ھەردو نوونەرێن ئێزدی بگەھنە عادل عبدالمھدی سەروکێ حکومەتا عیراقێ و مەحمەد حلبوسی سەرۆکێ پەرلەمانێ عیراقێ ب تایبەتی کێشەیا ئاوارێن ئێزدی ئەڤە چار سالن پتریا خەلکێ شنگال لژێر خێڤەتان دا ھەتا نوکە بەغدا وەکو پێدڤی بۆ خەلکی تشتەک نەکریە.
ناڤھاتی دیارکر کو دی داخواز ژ عادل عبدالمھدی و مەحمەد حلبوسی ھێتە کرن چارەسەریەکێ ل کێشەیا ئاوارێن شنگال بکەن یان ژی میکانزمەک بۆ ڤەگەریانێ بھێتە دانان وئیمناھیێ ل شنگال دروست بیت ھەتا خەلک بکارن ڤەگەرنە سەر مال و مولکێن خوە.
ئەڤرۆ نیۆز، قائید میرۆ
د کۆمبوونا دوھی یا پەرلەمانێ عێراقێ دا ناڤێ ھژمارەک دادوەران رادەستی پەرلەمانی ھاتەکرن ھەتا شەش دادوەر وەکی ئەندامێن دادکەھا بلندا پێداچوونا عێراقێ بھێنە دیارکرن، بەلێ فڕاکسیۆنێن کوردستانێ ئەفچەندە رەتکر بێی ھەبوونا دادوەرەکێ کورد بھێنە پەسەندکرن.
دادگەھا بلندا پێداچوونا عێراقێ ل شەش دادوەران پێکھاتیە و ژلایێ پەرلەمانی دھێنە پەسەندکرن، بڕیاربو دوھی رۆژا شەمبی بھێنە دیارکرن، بەلێ ئەف بابەت ھاتە گیرۆکرن و بڕیارە د کۆمبوونا داھاتی دا بھێنە ھەڵبژارتن، ھەدار بارزانی پەرلەمانتارا پارتی لپەرلەمانێ عێراقێ بۆ ئەڤرۆ نیۆز دیارکر” دەمێ لیستا ناڤێن دادوەران بۆ ئەندابوونێ ل دادگەھا پێداچوونێ گەھشتیە بەردەستێ مە پەرلەمانتارێن کورد رەتکر، ژبەرکو چو دادوەرێن کورد تێدانەبوون.
ھەدار بارزانی ئاشکراکر” بڕیارە د کۆمبوونا داھاتی دادوەرێن دادگەھا پێداچوونا عێراقێ بھێنە دیارکر ژلایێ پەرلەمانی ڤە، بەلێ دڤێت دادوەرەکێ کوردژی ببیتە ئەندام، بێی ھەبوونا نوونەرێ کورد ل دادگەھا پێداچوونێ ئەم رازینابین و دەنگی لسەر چو دادوەرەکی نادەین، چونکە مافێ کوردایە وەک پێکھاتەکا سەرەکیا عێراقێ ئەندامەک ھەبیت ل دادگەھا بلندا پێداچوونا عێراقێ و نابیت تنێ ھەموو دادوەر عەرەب و پێکھاتێن دی بن.
ئەڤرۆ نیۆز، قائید میرۆ:
کارەبا نیشتیمانی ل ھژمارەکا دەڤەرێن ھەرێما کوردستانێ بۆ دەمێ چەند رۆژانە کێمتر بوویە و بەرپرسەکێ وەزارەتا کارەبێ ژی ئاشکرا کر، باران و لەھیا رۆژێن بۆری زیان ب تۆڕێن کارەبێ گەھاندینە.
محەمەد ئەمین ھەورامانی، پەیڤدارێ وەزارەتا کارەبێ بۆ ئەڤرۆ نیۆز دیارکر” ئەگەرێ کێمبوونا دەمژمێرێن کارەبا نیشتیمانی بۆ تێکچوونا رەوشا سەقایێ ھەرێما کوردستانێ و زێدەبوونا خواستا وەلاتیان لسەر کارەبێ ڤەدگەڕیت و د دەمێ نوکە دا پشتی پلێن گەرمێ داکەفتی وەلاتی ب شێوەیەکێ بەرچاف کارەبێ بکار دئینن و بەرھەمێ ھەرێما کوردستانێ تنێ سێ ھزار میگاواتن.
ھەورامانی گۆت ژی” مخابن باران و لەھیا رۆژێن بۆری ھەرێما کوردستانێ ڤەگرتی زیان گەھاندینە تۆڕێن کارەبا نیشتیمانی و نوکە تیمێن وەزارەتێ مژۆلی سەخبێرکرنا جھێن زیان پێکەفتیە و رۆژانە بەردەوامی١١ ھەتا ١٢ دەمژمێران کارەبا نیشتیمانی ددەینە وەلاتیان و چو پلان ژی بۆ زێدەکرنا کارەبێ نینە، چونکە ئەم یێ بەرەف وەرزێ زڤستانێ دچین و خواست ل سەر کارەبێ زێدە دبیت.
ئەڤرۆ نیوز، لەزگین جوقی:
بەرپرسێ ھۆبا نەخۆشیا ئایدزێ ل رێڤەبەریا کارۆبارێن خوپاراستنێ ل ساخلەمیا پارێزگەھا دھۆکێ دیارکر کو ئەڤرۆ ٢/١٢/٢٠١٨ ھەوەکا بەرفرەە یا ھوشیاریا ل سەر نەخۆشیا ئایدزێ دەستپێکر چەندین تیم یێن ھاتینە پێک ئینان دی ناڤ زانکۆ وپەێمانگەھان گەرن دی گەل قوتابیان رووننە خوارێ دی گەنگەشی ل سەر نەخۆشیا ئایدزێ کەن بۆ وی چەندی خەلکێ مە ھەموو خوە ژ ڤی نەخۆشیا مەترسیدار بپارێزن.
د. فەرھاد ئیسماعیل، بەرپرسێ ھۆبا نەخۆشیا ئایدزێ ل رێڤەبەریا کارۆبارێن خوپاراستنێ ل ساخلەمیا پارێزگەھا دھۆکێ بۆ ئەڤرۆ نیوز دیارکر کو ئەڤ ھەوا ھوشیاریا ساخلەمیی ل سەر نەخۆشیا ئایدزێ دی بۆ ماوی ٧ رۆژان یا بەردەوام بیت دێ ھەولدان ھێنە کرن پتریا قوتابیان نووترێن پیزانینان لسەر نەخۆشیا ئایدزێ وەربگرن ب رییا تیمین ساخلەمیێ .
ناڤھاتی ئەوژی گۆت ساخلەمیا دھۆکێ بەردەوام ھەولدەت ھەموو رێیان رەوشەنبیریا ساخلەمیی دناڤ خەلکێ دا پەیدا بکەت پتر خەلک ھوشیاربن لسەر مەترسیا نەخۆشیان ب تایبەتی ژی نەخۆشیا ئایدزێ ئەڤرۆ ٢/١٢/٢٠١٨ ل سنۆری پارێزگەھا دھۆکێ دەست ب ھەوا ھوشیاریا قوتابیان ھاتە کرن ل ناڤ زانکۆ وپەێمانگەھیێن سنۆری پارێزگەھا دھۆکێ.
نيشاندان