ئەڤرۆ نیوز:
پشتی دیارکرنا بھایێ ئەمپێرا کارەبا کوەلیدان ژلایێ لژنەیا موەلیدان یا سەر ب قائیماقمیا دھۆک ڤە بویە جھێ نەرازیبونا ھاولاتیان پارێزەرەکێ دھۆکێ ب رێکا داواکارێ گشتی سکالایەک تومارکریە و خواستیە داواکارێ گشتی ب رولێ خوە رابن.
پارێزەر مەسعود سلێمان د سکالایا خوە دا دیارکریە پێدڤیە داواکارێ گشتی ب رولێ خوە رابیت و دووڤچوونا بریارێن لژنەیا موەلیدان بکەت و ل دووڤ دەمژمێرێن دانا کارەبێ بھایێ وێ بھێتە دیارکرن ژبەرکو ئەڤ بھایێ نھا ھاتیە دیارکرن ناگونجیت دگەل دەمژمێرێن کارەبێ.
ئەڤرۆ نیۆز:
بەرپرسەکێ هێزێن سووریا دیموکرات راگەهاند کو د ئۆپەراسیۆنەکا تایبەت دا ل رۆژهەلاتێ سووریێ شیاینە ل گوندەکێ ئێک ژ جێگرێن ئەبۆبەکر بەغدادی و بەرپرسێ سەرەکی یێ داعشێ ل سووریێ دەستەسەر بکەن.
فەرماندارێ هێزێن سووریا دیموکرات هەروەسا دیار کریە کو ناڤێ جێگرێ بەغدادی “ئوسامە عوەید” کو ل سووریێ گەلەک کریارێن تیرۆرستی ب فەرمانا وی هاتنە ئەنجام دان و وان شیاینە د ئۆپەراسیۆنەکا تایبەت دا وی تیرۆرستی دەستەسەر بکەن.
ئەڤرۆ نیوز:
ل باژێرێ دبلن ل ئێرلەندا ئەڤرۆکە پشککێشانا ڤاڤارتنێن قارەمانیا ئوروپا ٢٠٢٠ ھاتە ئەنجامدان و ئەوا تێدا ٥٥ ھەلبژارتیا مافێ پشکداریێ ھەی و ل سەر دەە کومان ھاتینە بەلاڤ کرن و ٢٠ ھەلبژارتیێن رێزێن ئێکێ و دویێ دێ ئێکسەر دەربازبن و یێن دی دێ کەڤنە د قوناغا یاریێن ڤەبر دا ھەتا ھژمارا ھەلبژارتیان تمام دبیت بۆ ٢٤ ھەلبژارتیان، پشتی پشککێشان ھاتیە ئەنجام دان ڤی شێوەی ئەڤ ھەلبژارتنە کەفتە د ڤان کومان دا.
کوما ئێکێ/ ئنگلتەرا، چیک، بلگاریا، مونتینیگرو، کوسوڤو
کوما دویێ/ پرتوگال، ئوکرانیا، سربیا، لتوانیا، لوکسمبورگ
کوما سیێ/ ھولەندا، ئەلمانیا، ئێرلەندا باکور، ئەستونیا، روسیا سپی
کوما چارێ/ سویسرا، دنیمارک، ئێرلەندا، جەبەل تارق، جورجیا
کوما پێنجێ/کرواتیا، وێلز، سلوڤاکیا، ئەزربیجان، مەجەر
کوما شەشێ/ ئسپانیا، سوید، نرویژ، رومانیا، گزیرتێن فارو، مالتا
کوما حەفتێ/پولەندا، نەمسا، ئسرائیل، سلوڤینیا، مقدونیا، لاتڤیا
کوما ھەشتێ/ فرەنسا، ئایسلەندا، تورکیا، ئەلبانیا، مولدوڤا، ئەندورا
کوما نەھێ/ بەلچیکا، روسیا، ئسکوتلەندا، قبرس، کازاخستان
کوما دەھێ/ ئیتالیا، بوسنە، فنلەندا، یونان، ئەرمینیا
ئەڤرۆ نیوز:
ئەڤرۆ رۆژا ئێکشەمبی ب سەدان ماموستایان ل باژێرێ بەسرا دەست ب خوەنیشاندا کر بەرامبەر ئەنجومەنێ پارێزگەھێ و تێدا داخوازا دامەزراندنێ کر.
ڤان خوەنیشاندەران بریار دایە خوەنیشاندانێن خوە بەرفرەھتر بکەن ئەگەر داخوازیێن وان نەھێنە جێبەجێکرن کو ھەمی ژی ئەون یێن ھەتا نوکە ب شێوازێ وانەبێژ کار دکەن بو ماوێ چەند سالایە لەورا نوکە داخوازا دامەزراندنێ کر.
ئەڤە د دەمەکی دایە ل رۆژا شەمبی ژی خوەنیشاندان ھاتبونە ئەنجامدان و تێدا خوەنیشاندەران داخوازا خزمەتگوزاری و دەلیڤێن کاری کریە و داخواز کریە ھندەک بەرپرسێن گەندەل بھێنە دورخستن.
ئەڤرۆ نیۆز، هۆشەنگ تاجر:
ئیسماعیل خەلیل چاڤدێرێ سیاسی ل رۆژئاڤایێ کوردستانێ بۆ ئەڤرۆ نیۆز دیار کر کو ئەڤرۆ ل باژێرێ عەمودێ کۆنفرانسەک ل دۆر رەوشا نها یا عەفرینێ دێ هێتە سازکرن و گەلەک کەسایەتی ل ئورۆپا، ئەمریکا و رۆژئاڤایێ کوردستانێ تێدا پشکدار بن و دێ گۆتارەکێ پێشکێش کەن.
چاڤدێرێ سیاسی دیار کر ژی کو بەری دەستپێکرنا کۆنفرانسێ برنارد کۆشنەر وەزیرێ بەرێ یێ دەرڤە یێ فرەنسا و دۆستێ گەلێ کورد بۆ دەزگەهێن راگەهاندنێ ئاخڤی و دیار کر کو ئەم ل هەمبەر رەوشا خراب یا عەفرینێ و جینۆسایدا ل دژی کوردان دهێتە کرن بێدەنگ نابین و دێ هاریکاریا گەلێ عەفرینێ کەین و گۆت: (بریارە پشتی دەمەکێ پشتی دەمەکێ روونشتنا ئێکێ برێڤە بچیت و دێ چەندین کەسایەتی ل رۆژئاڤا و وەلاتێن جیهانێ دێ گۆتارەکێ پێشکێش کەن و پشتی دانێ ئێڤارێ دێ روونشتنا دویێ ژی برێڤە چیت کو چەندین فەرماندارێن سەربازی و هندەک کەسایەتیێن ئورۆپا دێ ل دۆر رەوشا عەفرینێ ئاخڤن).
ناڤبری ئەو یەک ژی دیار کر کو هندەک کەسێن ئەکادیمی و سیاسی ل وەلاتێن مسر، ئەمریکا و روسیا ژی د کۆنفرانسێ دا پشکدارن و هندەک بابەتێن کۆنفرانسێ ژی هەتا نها نەهاتینە راگەهاندن.
ئەڤرۆ نیوز، ئەمیر ئەترووشی:
ل نیڤا شەڤا دەربازبووی ئاگر بەربوو تانکێن پەترۆلێ و زیانێن مەزن پەیداکرن و پشتی ھینگی ئاگر ھاتە کۆنترۆلکرن.
رائیدێ مافپەروەر بێوار عەبدولعەزیز، پەیڤدارێ رێڤەبەریا بەرەڤانیا باژێری ل پارێزگەھا دھۆکێ بۆ ئەڤرۆ نیۆز دیار کر، ئەڤرۆ ل دەمژمێر ٣:٣٠ بەری سپێدێ پەیوەندی ب یەکا کونترۆلی ل رێڤەبەریا مە ھاتەکرن ب ھەبوونا روودانەکا ئاگری ل کۆمەلگەھا کواشێ کو ئاگر بەربوویە تانکێن پەترۆلێ ل کارگەھەکێ و دەملدەست بنگەھێ سێمێلێ ل جھێ روودانێ ئامادەبوو و ئاگر کونترول کر و گۆت: “خۆشبەختانە چو زیانێن گیانی پەیدا نەبووینە و ب تنێ زیانێن مادی ھەبوون”.
ئەڤرۆ نیوز، لەزگین جوقی:
بەرپرسێ بنگەھی لالش یێ رەوشەنبیری و جڤاکی تایێ سنۆنی بۆ ئەڤرۆ نیوز دیارکر کو رەوشا قوتابخانەیێن خواندنا کوردی ل دەڤەرا سنۆنی یا باش نینە و د مەترسیێ دایە، چونکو رەوانەکرنا پێدڤی و کەلوپەلان بۆ ڤان قوتابخانەیان یا ب زەحمەتە.
سلێمان فانۆ، بەرپرسێ بنگەھێ لالش یێ رەوشەنبیری و جڤاکی تایێ سنۆنی بۆ ئەڤرۆ نیوز دیارکر کو ئەڤرۆ 2ى كانوونا ئێكێ 2018 بنگەھی لالش شیا ھندەک ھاریکاریان بگەھینیتە قوتابخانێن دەڤەرا سنۆنی ل نێزیک چیایێ شنگال ب تایبەتی قوتابخانێن خواندنا کوردی چونکو ھاریکاری بۆ وان دکێمن ئەو پێدڤی کەلوپەلێن ھەمەجۆر یێن قوتابخانەیان ھەنە و ھژمارەکا مامۆستایان خوەبەخش دەوامێ ل سنۆنێ دکەن بۆ ب رێڤەبرنا قوتابخانێن خواندنا کوردی، چونکو میلاک یێ کێمە، ئەڤ مامۆستایێن خوەبەخش داخوازا ھاریکاریێ دکەن دا کو بشێن بەردەوامیێ ب رێڤەبرنا قوتابخانەیان بدەن.
ناڤھاتی ئەو ژی دیارکر کو رەوانەکرنا پرتووکێن کوردی و پێدڤیێن خواندنا بۆ قوتابخانێن کوردی یا زەحمەتە و ئاستەنگ دھێنە چێکرن چونکو پێدڤیە ژ مووسل بھێنە رەوانەکرن و گەلەک زالگەھێن پشکنینێ ھەنە ھەتا رادەیەکی ئاستەنگ دھێنە دروستکرن.
ئه‌ڤرۆ نيوز، نيوار محه‌مه‌د سه‌ليم:
رێڤه‌به‌ريا گشتى يا په‌روه‌ردا پارێزگه‌ها دهۆكێ راگه‌هاند كو ئه‌وان پرۆسا به‌لاڤكرنا گازا سپى ل سه‌ر قوتابخانان ده‌سپێكريه و بڕياره به‌رى سه‌رێ سالێ هه‌موو قوتابخانه گازا سپى وه‌ربگرن.
ئه‌حمه‌د عه‌بدولا زوبێر، به‌رپرسێ راگه‌هاندنێ ل رێڤه‌به‌ريا گشتى يا په‌روه‌ردا پارێزگه‌ها دهۆكێ بۆ ئه‌ڤرۆ نيوز گۆت: “دوهى رۆژا شه‌مبى رێكه‌فتى 1ى كانوونا ئێكێ پرۆسا به‌لاڤكرنا گازا سپى ل سه‌ر قوتابخانان ده‌سپێكريه”.
زێده‌تر گۆت: “ئه‌م ل گه‌ل كۆمپانيا به‌لاڤكرنا گازێ رێكه‌فتينه و ب گۆره‌يى رێنمايێن مه، دێ د ماوه‌كێ گه‌له‌كێ نێزيك دا هه‌موو قوتابخانه‌يێن سنورێ پارێزگه‌ها دهۆكێ گازا سپى وه‌رگرن كو كێمتره ژ هه‌يڤه‌كێ”.
ل سنورێ پارێزگه‌ها دهۆكێ 1648 قوتابخانه هه‌نه، هه‌وه و وه‌كو به‌رپرسێ راگه‌هاندنێ ل رێڤه‌به‌ريا گشتى يا په‌روه‌ردا پارێزگه‌ها دهۆكێ ئاماژه پێ كرى ل ده‌سپێكێ پرۆسا به‌لاڤكرنا گازا سپى ل ده‌ڤه‌رێن سار ده‌سپێكريه و گۆت: “ده‌سپێكا پرۆسێ ل ئامێديێ و زاخۆ و ئاكرێ ده‌سپێكريه”.
ده‌رباره‌يى رێژا پێدانا گازا سپى ژى ئه‌حمه‌د عه‌بدولا زوبێر گۆت: “هه‌ر قوتابخانه‌ك دێ ل دووڤ رێژا پۆلا و قوتابيان به‌هرا خوه يا گازا سپى وه‌رگريت”.
ئەڤرۆ نیۆز، قائید میرۆ:
بڕیارە رۆژا سێشەمبیا بھێت جڤاتا نوونەرێن عیراقێ ل دۆر پەسەندکرنا پۆستێن وەزارەتێن مایی یێن حوکمەتا عیراقێ کۆمبیت و پەرلەمانتارەکا پارتی ژی دبێژیت، وەزارەتا کۆچ و کۆچبەران بۆ پارتی ئێکلابوویە.
مەیادە محەمەد نەجار، ئەنداما فڕاکسیۆنا پارتی ل پەرلەمانێ عیراقێ بۆ ئەڤرۆ نیوز دیار کر کو بڕیارە ل رۆژا سێشەمبیا داھاتی جڤاتا نوونەرێن عیراقێ ل دۆر پەسەندکرنا پۆستێن وەزارەتێن مای یێن حوکمەتا عادل عەبدولمەھدی کۆمببیت و دەنگی ل سەر وەزیرێن دھێنە پێشکێشکرن بدەت، بەلێ مخابن ھەتا نوکە لایەنێن عیراقی ل دۆر پۆستێن ھەر دو وەزارەتێن ناڤخۆ و بەرڤانیێ دا نەگەھشتینە رێکەفتنێ.
ئەڤێ پەرلەمانتارا پارتی خویاژیکر کو وەزارەتا کۆچ و کۆچبەران بۆ پارتی دیموکراتی کوردستان مسۆگەربوویە و نەوزاد ھادی پارێزگارێ ھەولێرێ بەربژارێ پارتیە بۆ وەرگرتنا وەزارەتا کۆچ و کۆچبەران و گۆت: “ھەشت وەزارەت ماینە وەزیرێن وان نەھاتینە پەسەندکرن”.
ئه‌ڤرۆ نیوز:
ئه‌ڤرو سپێدێ 2-12-2018 به‌رێز به‌شیرحه‌داد جێگرێ سه‌روكێ په‌رله‌مانێ ئیراقا فیدرال وشانده‌كێ فراكسیونا پارتی ل په‌رله‌مانێ ئیراقێ سه‌را پارێزگه‌ها دهوك دا ژلایێ به‌رێزان فه‌رهاد ئه‌مین ئه‌تروشی پارێزگه‌رێ دهوكێ وجێگرێن پارێزگه‌ری پێشوازی لێ هاته كرن.
دهه‌ڤدیتنه‌كێدا به‌حسێ ره‌وشا پارێزگه‌ها دهوكێ وپێدڤیێن ده‌ڤه‌رێ ژرویێ خزمه‌تكاری وره‌وشا ئاواره وپه‌نابه‌ران ل سنورێ پارێزگه‌هێ وئه‌و هاریكاری وخزمه‌تكاریێن كارگێریا پارێزگه‌هێ ورێكخراوێن مروڤایه‌تی پێشكێش دكه‌ن ب گشتی هاته كرن.
پاش دكونگره‌كێ روژنامه‌ڤانیدا پارێزگه‌رێ دهوكێ بناڤێ كارگێریا پارێزگه‌هێ بخێر هاتنا شاندێ په‌رله‌مانێ ئیراقا فیدرال كر وئاماژه دا وێ ژمارا زور یا ئاواره‌یان ل سنورێ پارێزگه‌هێ وپێدڤیێن ده‌ڤه‌رێ ب پروژێن خزمه‌تكاری وهیڤی خاستن كو شاندێ په‌رله‌مانێ ئیراقێ وان پێدڤی وكێم وكاسیان ل به‌ر چاڤ وه‌رگرن وگرنگیێ پێ بده‌ن ودگه‌ل لایه‌نێن به‌رپرس ل په‌رله‌مان وحكومه‌تا ئیراقا فیدرال به‌حسبكه‌ن وهاریكاریا پارێزگه‌ها دهوكێ وئاواره‌یان بكه‌ن.
ژلایێ خوڤه به‌شیر حه‌داد جێگرێ سه‌روكێ په‌رله‌مانێ ئیراقا فیدرال بناڤێ سه‌روكاتیا په‌رله‌مانێ ئیراقێ سوپاسیاپارێزگه‌رێ دهوكێ وخه‌لكێ پارێزگه‌هێ كر هه‌مبه‌ر حه‌واندن وهاریكاریكرنا ئاواره وپه‌نابه‌ران ل سنورێ پارێزگه‌ها دهوكێ .
هه‌روه‌سا گوت: سه‌ره‌دانا مه بو پارێزگه‌ها دهوكێ ل دوڤ به‌رنامه‌كی هاتیه دارشتن كو به‌ری نوكه مه سه‌ره‌دانا پارێزگه‌هێن به‌سرا ونه‌جه‌ف ونه‌ینه‌وا وهه‌لبچه وجهێن دی كریه وژنێزیك هایداری ره‌وشا وان پارێزگه‌ها بوین وئه‌ڤرو مه سه‌ره‌دانا دهوكێ كریه كو ژنێزیك هایداری ره‌وشا پارێزگه‌هێ وئاواره‌یان ببین ، ئه‌م دزانین كو وێ ژمارا زور یا ئاواره‌یان فشاره‌كا مه‌زن ئێخستیه سه‌ر كه‌رتێن ته‌ندورستی وپه‌روه‌ردێ و سه‌كته‌رێن دی یێن خزمه‌تكاری وئه‌م ب رێكا لیژنێن په‌رله‌مانی دێ هه‌ولده‌ین هاریكاریا پارێزگه‌ها دهوكێ بهێته كرن وهنده‌ك ژبودجا پارێزگه‌هێن دی بو پارێزگه‌ها دهوكێ بهێته ته‌رخانكرن چونكو ئاوارێن پارێزگه‌هێن دن حه‌واندینه.
هه‌روه‌سا بودجا پارێزگه‌هێ بهێته زێده‌كرن وهاریكاریا وان بهێته كرن وپشته‌ڤانیا پروژێن مه‌زن وستراتیجی بهێته كرن .
سه‌باره‌ت بودجا گشتی یا كوردستانێ گوت : مه‌رج نینه 17% بودجه بو هه‌رێمێ بهێته ته‌رخانكرن به‌لكو ب رێكا ب ده‌ستڤه ئینانا پشكا هه‌رێمێ ژبودجا سه‌روه‌ریێن ئیراقێ وقه‌رێن بانكی وموچێ پێشمه‌رگه‌ی وهنده‌ك ده‌رگه‌هێن دی یێن سه‌روه‌ری دێ بودجا هه‌رێمێ نێزیكی بودجا خویا جاران بیت.
ل دورقه‌ربوكرنا زیان ڤێكه‌فتیێن لافاوا وتوبارانكرنا فروكێن تركیا ل سه‌ر وه‌لاتیان جێگرێ په‌رله‌مانێ ئیراقێ گوت: ڤان بابه‌تان دێ گه‌هینینه لایه‌نێن به‌رپرس وپێدڤیه حكومه‌تا ئیراقێ قه‌ره‌بویا وان بكه‌ت.
سه‌باره‌ت ڤه‌گه‌راندنا ئاواره‌یان بو سه‌ر جهێن وان تایبه‌تی ئاوارێن قه‌زا شنگالێ گوت: نوكه هه‌ولدانا دكه‌ین كو كه‌مپێن ئاواره‌یان بهێنه گرتن و ئاواره ڤه‌گه‌رنه سه‌ر جهێن خو وهه‌موو پێدڤیێن ژیانێ بو وان بهێنه دابینكرن وهه‌تا مابن ل ناڤ كه‌مپان دڤێت حكومه‌تا ئیراقێ ب ئه‌ركێن خو رابیت وهاریكاریا وان بكه‌ت.
پاش شاندێ ناڤبری جودا جودا سه‌را جڤاتا پارێزگه‌ها دهوكێ وسه‌روكاتیا زانكویا دهوك وكه‌مپا كه‌به‌رتو ئێك ودوو یێن ئاواره‌یان دا وژنێزیك هایداری ره‌وشا وان جها بو.
نيشاندان