ئەڤرۆ نیۆز:

ئیمام تاشچییەر پەرلەمانتارێ ئامەدێ یێ سەر ب هەدەپێ ل پەرلەمانێ تورکیا دیار کر کو پشتی بریارا دادگەها مافێ مرۆڤان ل دۆر ئازادکرنا دەمیرتاشی هەلویستێ بەرپرسێن تورکیا زۆر توند بوو و نها ژی کار دکەن ب رێیا هندەک دوسەیێن کەڤن یێن ل سەر دەمیرتاشی وی ل زیندانێ بهێلن و ژ بەر هندێ ژی ئەز باوەر ناکەم کو حوکمەتا تورکیا نها دەمیرتاشی ئازاد بکەت، رەوشا نها مخابن ڤێ نیشا ددەت.

پەرلەمانتارێ هەدەپێ ئەو یەک ژی دیار کر کو هەرچەندە ئەم بەر ب هەلبژارتنێن باژێرڤانیان ڤە دچین لێ ئەردۆگان دیسان دخوازیت ب رێیا قەیومان، ئانکۆ کەسەکێ دی ب جهێ هەڤسەرۆکێن باژێرڤانیان سیاسەتا خوە ل باکورێ کوردستانێ برێڤە ببەت و ئەو یەک ژی بێ رێزیەکا مەزنە کو ل گەلێ مە دهێتە کرن.

ئەڤرۆ نیۆز:

فەرماندارەکێ هێزێن سووریا دیموکرات بۆ ئاژانسا رویتەرز دیار کریە کو ئەمریکا نها دەست ب ئاڤاکرنا ئێکەمین خالا پشکنینێ یا سنۆری ل گرێ سپی کریە و گەلەک کەلوپەلێن سەربازی و ئامیرێن پێشکەفتی تێدا هاتنە بجه کرن و چەکێن گران ژی ل وی بنگەهی هاتنە دانان.

هەمان فەرماندارێ سەربازی ئەو یەک ژی دیار کر کو دێ دو بنگەهێن دی یێن سەربازی ل گرێ سپی هێنە ئاڤاکرن و هەروەسا دێ دو بنگەهێن سەربازی ژی ل کۆبانێ هێنە ئاڤاکرن و گۆت: (هێزێن مە ل گەل هێزێن ئەمریکا دێ سنۆری پارێزن و ناهێلن ئارامیا دەڤەرێ تێک بچیت).

ئەڤرۆ نیۆز:

ل گۆر نووچەکا ئاژانسا فەرمی یا ئیرانێ بەری دەمەکێ فەرماندارەکێ ئیرانێ ب ناڤێ مستەفا عەبدولمەلەکی ل باژێرێ بانە د شەرەکێ دا ل گەل گرۆپەکێ چەکدار جانێ خوە ژ دەست دایە، لێ هەتا نها ناهێتە زانین کا ئەو گرۆپا چەکدار کێ بوویە و ئارمانجا وان ژ هێرشا ل سەر ناڤەندا سەربازی ل باژێرێ بانە چ بوویە.

ل ئالیێ دی هەتا نها چو پارتێن کوردی بەرپرسیاریا خوە ل هەمبەر شەرێ ل بانە دیار نەکرینە، لێ فەرماندارێ باژێرێ بانە دیار کریە کو ڤەکۆلینێن وان ل دۆر روودانێ بەردەوامن و دێ پاشی ئەنجامێ ڤەکۆلینێ بۆ رایا گشی ئاشکرا کەن.