ئەڤرۆ نيوز:
شاندەكێ بلند یێ ژوورێن بازرگانی یێن توركیا د چارچوڤێ كومبوونەكێ دا ل گەل نێچیرڤان بارزانی سەرۆكێ حوكمەتا هەرێما كوردستانێ، پێشنیازا ڤەكرنا ناڤەندەكا هەردەمی یا بازرگانی ل هەرێما كوردستانێ كر. شاندێ ژوورێن بازرگانی یێن توركیا پێكهاتبوون ژ ژوورێن بازرگانی یێن دیاربەکر، مێردین، ئۆرفا، وان، باتمان، شرناخ و جزیرێ، شاندێ ژوورێن بازرگانی یێن توركیا دیاركرن، پشتی ب دووماهی هاتنا شەرێ داعش و قەیرانا دارایی، دووبارە دێ پتر گرنگی ب بازرگانیكرن ل گەل هەرێمێ دەن.
ئه‌ڤرۆنيوز:
سه‌رۆك وه‌زيرێن ئيسرائيلێ راگه‌هاند، ل ده‌مه‌كێ نێزيك دێ من سه‌ره‌دانێن زێده‌تر بۆ وه‌لاتێن عه‌ره‌بى هه‌بن.
ئيسرائيلێ كو نوكه دناڤ وه‌لاتێن عه‌ره‌بى دا، تنێ ل گه‌ل ئوردنێ ومسرێ په‌يوه‌نديێن دبلوماسى يێن هه‌ين، مژوولى دروستكرنا په‌يوه‌نديايه ل گه‌ل وه‌لاتێن عه‌ره‌بى يێن كه‌نداڤى و ل هه‌يڤا بۆرى سه‌ره‌دانه‌كا فه‌رمى بۆ وه‌لاتێ عومان ئه‌نجام دابوو ول گه‌ل سولتان قابوس بن سه‌عيد سولتانێ عومانێ كۆمببوو.
ئه‌ڤرۆنيوز:
سه‌رۆكێ ئه‌مريكى دونالد ترامپ ل كۆچكا سپى ب حه‌يده‌ر عه‌بادى سه‌رۆك وه‌زيرێن عيراقێ يێ به‌رێ راگه‌هاندبوو كه ئه‌مريكا دخوازيت عيراق قه‌ره‌بوويا له‌شكرێ ئه‌مريكى ب پاره‌ى وپه‌ترۆلێ بكه‌ت، ل به‌رامبه‌ر ژناڤبرنا رژێما سه‌دامى ل سالا 2003 .
مالپه‌رێ (ئاكسيۆز) يێ ئه‌مريكى به‌لاڤكر” دچارچۆڤێ كۆمبوونه‌كا ترامپى ل گه‌ل عه‌بادى، ترامپى دو جاران ب عه‌بادى گوتبوو كو پێدڤيه عيراق ب په‌ترۆلا خوه قه‌ره‌بوويا وان زيانين ب ئه‌مريكا كه‌فتين ل به‌رامبه‌ر ژناڤبرنا رژێما سه‌دامى ول ده‌مێ پرۆسا شه‌رێ عيراقێ تووشى ئه‌مريكا وله‌شكرێ وێ بووين”.
چه‌ند ژێده‌ران ل كۆچكا سپى بۆوى مالپه‌رێ ئه‌مريكى دياركر كو ترامپى گوتبوو عه‌بادى، ئه‌مريكا ب ترليۆنان دۆلار بۆ عيراقێ يێن خه‌رج كرين وعيراقێ ژى په‌ترۆل يا هه‌ى وپێدڤيه چاره‌يه‌كێ بۆ وێ په‌ترۆلێ ببينن، دبه‌رسڤێ دا ژى عه‌بادى گوتبوو ترامپى ( سه‌رۆك ترامپ وه‌كو تو يێ ئاگه‌هدار گه‌له‌ك كۆمپانيێن ئه‌مريكى يێن ل عيراقێ وكارى دبوارێن په‌ترۆلێ وغازێ دا دكه‌ن).
ئەڤرۆنیۆز، ئەمیر ئەترووشی:
رێڤەبەرێ گشتي يێ دەزگەهێ مین و تەقەمەنیان ل پارێزگەها دهۆكێ راگەهاند كو هەتا نوكە 424 هزار مەترێن دووجار یێن ئەردێ شنگالێ ژ مین و تەقەمەنیان هاتینە پاقژكرن و ئەڤە ژی نە ل دووڤ خواستا مەیە، چونكو حكوومەتا عیراقێ رێگریێ ل كارێ مە دكەت.
مەسعود مەلا شەفیق، رێڤەبەرێ گشتى يێ دەزگەهێ مین و تەقەمەنیان ل پارێزگەها دهۆكێ، بۆ ئەڤرۆنیۆز دیار كر، هەر ژ رۆژا شنگال ژ دەستێن تیرۆرستێن داعشێ هاتیە ئازادكرن، مە شەش تیمێن كاری دەستی پێكئیناینە و چار تیمێن میكانیكی و سێ تیمێن سەیێن میندۆز بۆ پاقژكرن و راكرنا مین و تەقەمەنیان ژ ئەرد و خانیێن شنگالێ و هەتا نوكە تیمێن مە 365 مین و تەقەمەنی راكرینە و 424 هزار مەترێن دوجار یێن ئەردێ شنگالێ ژ مین و تەقەمەنیان هاتینە پاقژكرن.
ديار كر كو ئەو پاقژكرن و راكرنا مینان یا هەتا نوكە هاتیە كرن، ل دووڤ خواستا مەنينە، چونكى حوكمەتا عیراقێ رێگریێ ل كارێ مە دكەت و گەلەك جاران ئاستەنگ بۆ كارێ مە پەیداكرینە و گۆت ژی” زێدەباری راكرنا مینان، هژمارەكا مه‌زن یا گولە هاونان ژ سەر ئەردی هاتینە راكرن”.
ئەڤرۆ ،بارزان مزووری:
موقه‌ده‌م كاكل ژ رێڤەبەریا هاتنوچوونا ناڤ باژێرێ هەولێرێ بو ئەڤرۆ نیوز راگه‌هاند كوئەڤرۆ مەغرەب ل نێزیك دەمژمێر 5:55 خۆلەك رێككەفتی 26/11/2018 هاتین ئاگەهداركرن كو روودانەك ل جادا 120 مترى روودایە و ده‌مێ تیمێن مە یێن پولیسێن هاتن وچوونێ گەهشتنە جهێ روودانێ دياربوو ترومبێلەكا ژ جۆرێ BMW تایبەت رەنگێ رەش وەرگەریایە د ئەنجام دا گەنجەك ب ناڤێ”بیار شێرزاد” گیانێ خوه ژ دەست دا ودو گەنج ژی ب ناڤێ” كارزان سعداللە،محەمەد كانەبی” بریندار بوون وبۆ نەخوه‌شخانا تەنگاڤیان ل هەولێرێ هاتن ڤەگوهاستن.ئەو گەنجێ گیانێ خوژ دەستدای بۆ نوژداریا داد هاته رەوانەكرن.
پێشمەرگەيه‌كى بۆ ئەڤرۆ نیوز گۆت” ئەو كه‌سێ دڤێ روودانێ دا گيانێ خوه ژده‌ستداى پێشمەرگە بوو دگەل من دەوامێ دكەت، دگەل دو هەڤالێن خوه مۆلەت ژجهێ خو وەرگرت بوو وب مه‌ره‌ما كرینا كەلوپەلان چبوونه بازاری ول جادا 120 مترى تووشی روودانێ دبن و گیانێ خو ژ دەست دا”.
ناڤهاتی دیار كر كو ناڤێ وی “بیار شێرزاد جەرجیس” ئاكنجیێ قەزا شێخانە پێشمەرگە بوو ل گەل هێزا تایبەت/ئێك وزاڤايێ دو هه‌يڤى يه.
ئەڤرۆنیۆز، سالار دۆسكی:
ژڤانە ئەڤ شەڤە ل دەمژمێر ئێكی شەڤ ل دووڤ دەمێ كوردستانێ فلمێ كوردیthe demoner كو ژ قارەمانیا شەهیدێ پێشمەرگە (فاخر بەرواری) يه ل كەنالێ BBC4 كو ئێك مەزنترین كەنالێ جیهانی یە بهێتە نیشادان،
كەنالێ ناڤبری ناڤێ فلمی گوهۆریە یە بۆ (Hurt Locket Hero) كو ئەڤە ناڤێ فلمەكێ بریتانی بوو، ب هەمان شێوە كەسەكی مین دهەلگرتن و شیا گەلەك خەلاتێن بەركەفتی وەربگریت، لێ جوداهی یا فلمێ the demoner ئەوە چیرۆكەكا راستی یە ..
فلمێ ناڤبری هەتا نوكە شیایە 11 خەلاتان ل فیستەڤالێن ناڤخوەيى و دەرڤە وەربگریت..ئه‌و فلمه ژ دەرهێنانا(هوگر هروری)یە.
ئه‌ڤرۆنيوز:
بريكارێ وه‌زاره‌تا كاروبارێن شه‌هيد وئه‌نفالكريان بۆ ئه‌ڤرۆنيوز راگه‌هاند، ناڤێن قوتابيێن كه‌سوكارێن شه‌هيدان نوكه رێڤه‌به‌ريێن گشتى يێن كاروبارێن شه‌هيد وئه‌نفالكريان ل پارێزگه‌هان يێن ناڤێن دناڤ ليستێن قوتابيێن كه‌سوكارێن شه‌هيد وئه‌نفالكريان دهووربين دكه‌ن ب مه‌ره‌ما خه‌رجكرنا كريا ساله‌كێ يا خواندنێ بۆ وان.
به‌ره‌ڤان حه‌مدى، بريكارێ وه‌زاره‌تا كاروبارێن شه‌هيد وئه‌نفالكريان بۆ ئه‌ڤرۆنيوز گۆت” پشتى هووربينيكرنا وان ناڤان، رێڤه‌به‌ريێن گشتى يێن كاروبارێن شه‌هيد وئه‌نفالكريان دده‌مێ دو حه‌فتيێن بهێت دا دێ هنێرنه گه‌نجينێن پارێزگه‌هان بۆ مه‌زاختنا چه‌كێن پارێ خواندنێ يێ قوتابيێن كه‌سوكارێن شه‌هيد وئه‌نفالكريان بۆ سالا خواندنێ 2016 – 2017 وهنارتنا وان پاران بۆ زانكۆيان.
ئه‌ڤرۆنيوز:
وه‌زيرێ دارايى وئابوورى ل هه‌رێما كوردستانێ، رێباز حه‌ملان، ئه‌ڤرۆ دوشه‌مبى 26/11/2018 راگه‌هاند، نێچيرڤان بارزانى سه‌رۆك وه‌زيرێن هه‌رێما كوردستانێ بريارا دامه‌زراندنا نه‌خه‌شخانه‌كا تايبه‌ت ب په‌نجه‌شێرێ ل دهۆكێ دايه.
رێباز حه‌ملان، وه‌زيرێ دارايى وئابوورى ل ئاڤاهيێ پارێزگه‌ها دهۆكێ ل گه‌ل هه‌ر حه‌فت قايمقامێن قه‌زايێن پارێزگه‌ها دهۆكێ ورێڤه‌به‌رێن فه‌رمانگه‌هێن دهۆكێ كۆمبوونه‌كا به‌رفرهه ئه‌نجامدا.
وه‌زيرێ دارايى دوێ كۆمبوونێ دا راگه‌هاند، نێچيرڤان بارزانى سه‌رۆك وه‌زيرێن هه‌رێما كوردستانێ رازيبوونا خوه دياركريه ل سه‌ر دروستكرنا نه‌خوه‌شخانه‌كا تايبه‌ت په‌نجه‌شێرێ ل دهۆكێ.
ئه‌ڤرۆ نیوز، نه‌وزاد هلۆرى:
وه‌لاتیه‌كێ ناحیا سیده‌كان یا سه‌ر ب قه‌زا سوران ، بناڤێ (عه‌بدولواحد حسێن برادوستى) رابویه ب دابه‌شكرنا نه‌فتا مالان ب سه‌ر 61 قوتابخانه و باخچێن زاروك و پشكێن نافخوه‌ى ل سنوورێ ناحیا سیده‌كان، نوونه‌رێ ئه‌وى هاولاتى ژى دیاركر كو وه‌كو ده‌ستپێك دێ 220 لیترا بو هه‌ر قوتابخانه‌كێ هاتینه‌دان.
مورشد برادوستى، نوونه‌رێ ئه‌وى هاولاتى بۆ ئه‌ڤرۆ نیوز گۆت: (ده‌مه‌كێ زوره خه‌لكێ ده‌ڤه‌را سیده‌كان چاڤه‌رێ حوكمه‌ت و لایه‌نێن شوله‌ژێ دكه‌ت، بو وه‌رگرتنا نه‌فتێ ب تایبه‌تى ل قوتابخانان، به‌لێ هه‌تا نوكه چوو نه‌فت لسه‌ر خه‌لكى نه‌هاتیه دابه‌شكرن، هه‌ر چه‌نده به‌رى نوكه چه‌ند خرڤه‌بون ژلایێ خه‌لكى و رێكخراوێن ژینگه‌ى و جڤاكى هاتینه‌كرن بو دابه‌شكرنا نه‌فتێ ب سه‌ر قوتابخانان به‌لێ چوو به‌رسڤ نه‌بوون، ژبه‌رڤێ خێرخوازه‌كێ ده‌ڤه‌رێ بناڤێ عه‌بدولواحد حسێن برادوستى رابوو ب دابه‌شكرنا نه‌فتێ لسه‌ر هه‌موو قوتابخانێن ده‌ڤه‌را سیده‌كان)
زێده‌تر گۆت: (دابه‌شكرنا نه‌فتێ ژلایێ وى وه‌لاتى بێ به‌رامبه‌ره و دوهى رۆژا دووشه‌مبى رێكه‌فتى 26 چریا دوویێ 2018 ل هه‌موو قوتابخانێن ئاماده‌یى و بنه‌ره‌تى ل ده‌ڤه‌را سیده‌كان هاته دابه‌شكرن، ل گه‌ل دابه‌شكنرا نه‌فتێ بو باخچه‌كێ زاروكا و پشكا نافخوه یا ماموستایێن ژن ل ده‌ڤه‌رێ، هژمارا گشتى یا وان 61 قوتابخانایه و باخچێن زاروكا و پشكێن نافخوه‌ى بوو، هه‌ر ئێك ژ وان جهان وه‌كو ده‌ستپێك دێ 220 لیتر وه‌رگرتن).
ب گوره‌ى ئاخفتنێن برادوستى، ئه‌وى هاولاتى پێشتر ژى چه‌ندین جاران هه‌ڤكارى لسه‌ر خه‌لكێ هه‌ژار و كێم ده‌رامه‌ت و گه‌نجان دابه‌شكرین، ئه‌ڤه زێده‌بارى وێ یه‌كێ كو چوو پله و پوست د حوكمه‌ت و حزبى دا نینن و مه‌ره‌ما وى تنێ خزمه‌تكرنا خه‌لكێ ده‌ڤه‌رێ یه.
ئه‌ڤرۆنيوز:
وه‌زاره‌تا ساخله‌ميێ ل هه‌رێما كوردستانێ، برياره‌كا نوو ل دۆر رێكلامكرنێ بۆ ده‌رمانان وبابه‌تێن ده‌رمانسازى ده‌ردكه‌ت.
د نڤيسارا وه‌زاره‌تا ساخله‌ميێ دا ل هه‌رێما كورستانێ يا هژمار 5305 وب ئيمزايا رێكه‌وت حه‌مه ره‌شيد وه‌زيرێ ساخله‌ميێ، هاتيه”ژبۆ به‌رژه‌وه‌نديا گشتى وساخله‌ميا وه‌لاتيان، ب چو شێوه‌كى رێ ناهێته دان بۆ رێكلامكرنێ وپرۆپاگنده‌كرنێ بۆ وان ده‌رمان وبابه‌تين ده‌رمانسازى كو بۆ بكارئينانا وان پێدڤى ب راچێتا نوشدارى هه‌يه”.
د وێ نڤيسارێ دا هاتيه ژى” ئه‌و ده‌رمانێن دى كو پێدڤى ب راچێتێ نينه، دڤێت ب رێيا وه‌زاره‌تا ساخله‌ميێ مۆله‌تا رێكلامكرنێ بهێته وه‌رگرتن، هه‌روه‌سا نابيت جلك وكه‌لوپه‌لێن نوشدارى وتاقيگه‌هى ل ريكلاما چو جۆره كه‌لوپه‌له‌كى وخوارنان نه‌هێنه بكارئينان، به‌رۆڤاژى دێ پێرابوونين قانوونى هێنه وه‌رگرتن”.
نيشاندان