ئەڤرۆ نیۆز:

ل گۆر چەندین ژێدەرێن میدیایی ل پارێزگەها ئەهوازێ کو پرانیا ئاکنجیێن وێ عەرەبن ل دژی گەندەلیێ و نەبوونا خزمەتگوزاریان وەلاتیان بەری دەمەکی دەست ب خوەنیشادانان کرن و درووشم ل دژی دەستهەلاتێ بلند کرن و داخوازا دەست ژ کارکێشانا پارێزگاری و بەرپرسێن ئیداری یێن پارێزگەهێ کرن.

یوسف عەزیزی نڤیسەر و چالاکڤانێ عەرەب ل سەر تۆرا جڤاکی یا فەیسبووکێ راگەهاند کو خەلکێ ئەهوازێ گەهشتینە ڤێ باوەریێ کو دەستهەلاتا تەهرانێ ناخوازیت خزمەتا وان بکەت، پارێزگەها ئەهوازێ ئێکە ژ پارێزگەهێن هەری دەولەمەند ب ئاڤێ و پەترۆلێ، لێ مخابن خەلکێ ئاڤا ڤەخوارنێ یا پاقژ نینە و خەمساریا بەرپرسان ژی وەسا کریە کو ئەڤرۆکە خەلک داخوازا دەرکرنا بەرپرسان ژ پارێزگەهێ بکەن.

ئەڤرۆ نیۆز:

نوونەرێ روسیا ل نەتەوێن یەکگرتی داخواز ژ جڤاتا ئاسایشێ کریە ئەڤرۆکە بلەز ل دۆر ئاریشا د ناڤبەرا ئەکرانیا و روسیا دا کۆم ببیت و بریارەکێ ل دۆر وی بابەتی بدەت.

نوونەرێ روسیا دبێژیت گەمیێن شەری یێن ئوکرانیا قانوونێن نێڤدەولەتی بنپێ کرینە و نێزیکی گزیرتا ئازاک بووینە و گەمیێن مە ژی نەچار ماینە تەقە ل وان بکەن و دڤێت نها جڤاتا ئاسایشێ بریارەکا بلەز ل دۆر ڤی بابەتی بدەت دا ئاریشە مەزنتر لێ نەهێت.

پشتی کو قرم ژ ئوکرانیا جودا بوو، ئاریشا روسیا و ئوکرانیا دەسپێ کریە و هەتا نها ژی ئاریشە بەردەوامە و ئوکرانیا روسیا ب دەستێوەردان د کاروبارێ ناڤخوە یێ وەلاتێ خوە تومەتبار دکەت و روسیا ژی دبێژیت وەلاتێن رۆژئاڤایی دخوازن ئارامیا ل روسیا و وەلاتێن جیران تێک بدەن.

ئەڤرۆ نیۆز:

بەری دەمەکێ هەلیکۆپتەرەکا سەربازی ل دەڤەرا سانجاک تەپە ل ئستەنبۆلێ کەفتە خوارێ و د ئەنجام دا چوار سەربازان جانێ خوە ژ دەست دان و ئێک ژی بریندار بوویە، پارێزگارێ ئستەنبۆلێ ئەو یەک بۆ دەزگەهێن راگەهاندنا پشتراست کر و راگەهاند کو هەتا نها ئەگەرێ کەفتنا هەلیکۆپتەرێ دیار نینن و ڤەکۆلین ل دۆر روودانێ ژی د بەردەوامن.

ل ئالیێ دی تیمێن پشکنینێ و هێزەکا زۆر یا پۆلیسان ل جهێن روودانێ نە و هاتنوچوونا وەلاتیان ل دەڤەرا سانجاک تەپە هاتیە راگرتن و ژ بەر هندێ ژی قەرەبالغەکا زۆر ل وێ دەڤەرێ دروست بوویە.