شێخان،بارزان مزووری:
ئەو ئاوارێن خیڤەتێن وان ل کەمپا شێخان ل رۆژا ٢٢ی چریا دویێ ٢٠١٨ێ بەر لەھیێن بارانێ کەفتین ژ لایێ دەزگەھێ خێرخوازی یێ بارزانی ڤە ھاتنە قەرەبووکرن و دووبارە جھێن وان ھاتنە دروستکرن.
ئەندازیار عامر عەبو،رێڤەبەرێ کەمپا شێخان یا ئاواران بۆ ئەڤرۆ نیوز دیار کر کو پتری ٣٠ خیڤەتان بەر لەھیێن بارانێ کەفتبوون و ھەموو بێ سەروبەر ببوون.
بێوار کەریم،نوێنەرێ دەزەگەھێ خێرخوازی یێ بارزانی بۆ ئەڤرۆ نیوز ئاشکرا کر کو ئەو خێزانێن ل کەمپا شێخان بەر لەھیێن بارانێ کەفتین ژ لایێ دەزگەھێ خێرخوازی یێ بارزانی ڤە ھاتنە قەرەبووکرن و گۆت: “ئەو خێزان ل دووڤ رێژا زیانان ھاتنە قەرەبووکرن و بەتەنی و ئاھێن خوارنێ و پێدڤیێن دی یێن ناڤ مالێ ل سەر ھاتنە بەلاڤکرن”.

ئەڤرۆ نیوز ، ئەمیر ئەترووشی:
ژ ئێک خێزانا ئێزدی یا ئاکنجی گۆندێ گرزەرکێ ل باشوورێ چیایێ شنگالێ ٤٥ کەس ژ ئالیێ تیرۆرستێن داعش ڤە ھاتبوونە رەڤاندن و ھەتا نوکە ٣١ کەس ھاتینە ڤەگەراندن و ھێشتا ١٤ کەس ژ ڤێ خێزانێ د دەستێ داعش دا ماینە.
زریان چیچۆ ئێک ژ ئەندامێن ڤێ خێزانێ، بۆ ئەڤرۆ نیوز دیار کر کو دەمێ تیرۆرستَن داعش ب سەر دەڤەرا شنگالێ و گۆندێ وان یێ گرزەکێ دا گرتی، ھندەک خێزانێن وان یێن بنەمالێ بزاڤا رەڤینێ کر، بەلێ ھەمی ھاتنە دەستەسەرکرن و بزاڤ ھاتنە کرن بنەمالا وان ب تمامی ژناڤببەن و ب تنێ ژ خێزانا وان ٤٥ کەس ژ مەزن و زارۆیان ھاتنە رەڤاندن.
ناڤبری ئاماژە دا وێ چەندێ کو ھەتا نھا ٣١ کەس ژ خێزانا وان ھاتینە ڤەگەراندن و ١٤ کەس ھێشتا د دەستێن تیرۆرستَن داعش دانە و چارەنڤیسێ وان یێ بەرزەیە و گۆت: “ھندەک ژ وان بربوونە تلەعفەر و سووریا و نزانین یێن دی ل کیڤەنە و بابێ من و دایکا من ژی ھێشتا ڤەنەگەریاینە و چو جە نەماینە مە پرسیار نەکری و چو دیارنینە”.
زریان ئاشکرا کر کو ئەو د پشتراستن رەوشا وان گەلەک یا خرابە و د ژیانەکا سەخت دانە و ژ حوکمەتا ھەرێما کوردستانێ دخوازن وان ب سلامەتی ڤەگەرینن.

ئەڤرۆ نیوز، قائید میرۆ:
وەزارەتا ناڤخۆ یا حوکمەتا ھەرێما کوردستانێ رێڤەبەریەک بۆ رێگرتنێ ل بازرگانیکرنا ب مرۆڤان دامەزراندیە و بڕیارە نڤیسینگەھەک ژی ل دەمەکێ نێزیک ل پارێزگەھا دھۆکێ بھێتە ڤەکرن، بەرپرسەکێ وەزارەتا ناڤخۆ ژی دیار کر کو ژ نوکە پێڤە دێ ل گورەی قانوونێ سەرەدەریێ ل گەل وان کەسان کەین یێن بازرگانیێ ب مرۆڤان دکەن.
موقەدەمێ مافپەروەر دارا فاروق، رێڤەبەرێ بەرھنگاربوونا بازرگانیێ ب مرۆڤان ل وەزارەتا ناڤخۆ بۆ ئەڤرۆ نیوز دیارکر کو ل وەزارەتا ناڤخۆ رێڤەبەریەک ب مەرەما بەرھنگاربوونا بازرگانیکرنێ ب مرۆڤان ھاتیە دامەزراندن و بڕیارە شەش نڤیسینگەە ژی ل پارێزگەھێن ھەرێما کوردستانێ بھێنە ڤەکرن، کو ئێک ژوان دێ ل پارێزگەھا دھۆکێ بیت، ب مەرەما رێگرتنێ ل بازرگانیکرنێ ب مرۆڤان، وەزارەتا ناڤخۆ ئیدی دێ ل گورەی قانوونێ سەرەدەریێ دگەل وان کەسان کەت یێن مامەلێ و بازرگانیێ ب مرۆڤان دکەن و گۆت: “ل رۆژا ٧ی ھەیڤا تیرمەھا ئەڤ سالە پەرلەمانێ کوردستانێ قانوون پەسەندکریە لدۆر رێگرتنێَ ب بازرگانیا مرۆڤان، لەوڕا ھەر ل گورەی ئەڤێ قانوونێ دێ رەوشا بازرگانیکرنێ ب مرۆڤان ھێتە کۆنتڕۆلکرن و دووڤچوون و ڤەکۆلین دێ ھەبن”.
رێڤەبەرێ بەرھنگاریا بازرگانیکرنێ ب مرۆڤان خویا کر کو ل ھەرێما کوردستانێ بازرگانی ب مرۆڤان دھێتەکرن، ب تایبەتی ئەڤێن دبێژنێ کرێکارێن بیانی، چونکی ل گورەی پێزانینێن ل بەردەست ئەڤ کرێکارە ژ لایێ کۆمپانیان ڤە دھێنە ھەرێما کوردستانێ و گەلەک جاران دھێنە ڤەگوھاستن بۆ بەغدا و دەڤەرێن ناڤین و باشوورێ عیراقێ ب مەرەما کڕین و فرۆتنا وان ب پارەکێ زێدەتر و گۆت: ” لیژنەک ژ دەزگەھێن ئاسایش و ئاسایشا ساخلەمی و پۆلیسان ھاتیە پێک ئینان ب مەرەما ڤەکۆلینێ ل دۆر بابەتێ فرۆتنا گۆلچیسکان ژ لایێ وەلاتیان ڤە، چونکی ل گورەی قانوونێ دڤێت لیژنە پەسەندێ بدەتە ھەر کەسەکی ھەکە بڤێت ئەندامەکێ لەشێ خوە بدەتە کەسەکێ دی، نابیت ب چو شێوەیەکی کڕین و فرۆتن ب ئەندامێن لەشێ مرۆڤی و گۆلچیسکا بھێتەکرن ب تنێ ھەکە کەسەکی بڤێت بشێوەیێ خوەبەخش نەبیت”.