ئه‌ڤرۆنيوز:
ئێڤاريا ئه‌ڤرۆ ئه‌ينيێ 23/11/2018 سه‌رۆك مه‌سعود بارزانى ل باژێرێ نه‌جه‌ف ل گه‌ل موقته‌دا سه‌در رێبه‌رێ ره‌وتێ سه‌درى وليستا سائيرون كۆمبوو.
سه‌رۆك بارزانى ل هه‌ر ئه‌ڤرۆ درۆژا دويێ يا سه‌ره‌دانا خوه بۆ به‌غدا ل گه‌ل حه‌يده‌ر عه‌بادى سه‌رۆكێ ليستا نه‌سر وئه‌رشه‌د سالحى سه‌رۆكێ به‌ره‌يێ توركمانى وعه‌مار حه‌كيم سه‌رۆكێ ره‌وتێ حيكمه وسالح موتله‌گ سه‌رۆكێ به‌ره‌يێ ديالۆكا نيشتمانى كۆمبوو.
ئەڤرۆ نیوز، ئازاد نسری:
ئه‌ڤرو پشتى نیڤرو 23-11-2018 ل كوچكا مێهڤانداریا به‌رێز فه‌رهاد ئه‌مین ئه‌تروشى پارێزگه‌رێ دهوكێ پێشوازیا شانده‌كێ فره‌نسى كر كو یێ پێك هاتى بوو ژبه‌رێزان برونو ئوبرت بالیوزێ فره‌نسا ل به‌غدا ودومینیك ماس كونسلێ فره‌نسا ل هه‌ولێرێ وچار په‌رله‌مانته‌رێن فره‌نسى ب سه‌روكاتیا (ماریلا دیساد نز) كر.
دهه‌ڤدیتنه‌كێدا ب ئاماده‌بونا اسماعیل محمد احمد هاریكارێ پارێزگه‌رى بو كاروبارێن ئاواره وپه‌نابه‌ران به‌حسێ ره‌وشا ئاواره وپه‌نابه‌ران ل ناڤ وده‌رڤه‌ى كه‌مپان وئه‌و هاریكاریێن حكومه‌تا كوردستانێ وجڤاكێ نیڤ ده‌وله‌تى بو پێشكێش دكه‌ت ب گشتى هاته كرن.
پارێزگه‌رێ دهوكێ خوشحالیا ب سه‌ره‌دانێ دیاركر وگوت ل پارێزگه‌ها دهوكێ مه‌زنترین رێژا ئاواره وپه‌نابه‌ران لێ هه‌یه ونوكه 17كه‌مپ هه‌نه وئه‌ڤه پتره ژچارسالایه خه‌لكێ ئاواره وپه‌نابه‌ر دناڤدا دژین وڤێ رێژا زور یا ئاواره وپه‌نابه‌ران فشاره‌كا زێده ئێخستیه سه‌ر هه‌موو سه‌كته‌رێن خزمه‌تكارى وبناڤێ خه‌لكێ پارێزگه‌هێ وحكومه‌تا هه‌رێما كوردستانێ وكارگێریا پارێزگه‌هێ سوپاسیا خه‌لك وحكومه‌تا فره‌نسا كر هه‌مبه‌ر ئه‌و هاریكاریێن بو ئاواره وپه‌نابه‌ران پێشكێش كرین هه‌روه‌سا هه‌مبه‌ر ئه‌و هاریكاریێن سیاسى وله‌شكرى یێن فره‌نسا وجڤاكێ نیڤ ده‌وله‌تى بو خه‌لكێ هه‌رێمێ وپێشمه‌رگێ كوردستانێ پێشكێش كرین بو تێكشكاندنا تیرورستێن داعش.
هه‌روه‌سا سوپاسیا حكومه‌تا فره‌نسا كر ژرویێ سیاسیڤه كو پشتى رودانێن 16ئوكتوبه‌رێ گه‌له‌ك هاریكاریا حكومه‌تا هه‌رێمێ كریه وسه‌روكێ فره‌نسا بخو پێشوازیا سه‌روكێ حكومه‌تا كوردستانێ كر وئابولوقا سیاسى ل سه‌ر هه‌رێمێ شكاند وگوت ئه‌ڤ هه‌لویستێن خه‌لك وحكومه‌تا فره‌نسا نه‌تشته‌كێ نوویه به‌لكو ژكه‌نه‌ڤدا حكومه‌تا فره‌نسا گه‌له‌ك هاریكاریا گه‌لێ كوردستانێ كریه وخواست ئه‌و پشته‌ڤانى ژهه‌موو رویكیڤه یا به‌رده‌وامبیت.
پاش سه‌روكا شاندێ په‌رله‌مانێ فره‌نسا ده‌ست خوشى وسوپاسیا پارێزگه‌ها دهوكێ وحكومه‌تا كوردستانێ وخه‌لكێ ده‌ڤه‌رێ كر كو شیاینه گه‌له‌ك ئاواره وپه‌نابه‌ران ب حه‌وینن وته‌كه‌زكر كو حكومه‌تا فره‌نسا وگه‌لێ فره‌نسا دێ به‌رده‌وام پشته‌ڤانیا خه‌لكێ كوردستانێ كه‌ن هه‌مبه‌ر هه‌ر گه‌فه‌كا بكه‌ڤیته سه‌ر ده‌ڤه‌را وان .
هه‌روه‌سا گوت: حكومه‌تا فره‌نسا كا چاوا به‌رى نوكه دوارێ سیاسى وله‌شكرى ومروڤایه‌تى دا هاریكاریا خه‌لكێ كوردستانێ كریه ل داهاتى ژى دێ به‌رده‌وام هاریكاریا خه‌لكێ سڤیل كه‌ت ودێ هاریكاریا خه‌لكێ ئاواره ژى كه‌ت بو ئاڤه‌دانكرنا ده‌ڤه‌رێن وان كو ژبن ده‌ستێن داعش هاتینه رزگاركرن.
هه‌ژى گوتنێ یه هه‌ر ئه‌ڤرو سپێدێ 23-11-2018شاندێ فره‌نسى سه‌ره‌دانا كه‌مپا قادیا یا ئاوارێن ده‌ڤه‌را شنگالێ كر بو وژنێزیك هایدارى ره‌وشا رونشتڤانێن كه‌مپێ ببون.
ئەڤرۆ نیۆز:
رۆژنامەڤانەکێ ناڤدارێ تورک کو د بابەتێ سووریێ دا کار دکەت دیار کو هەتا نها ژی بابەتێ مافێ کوردان ل سووریێ د گەنگەشێ دایە و ئەمریکا و روسیا ژ بەر ناکۆکیێن خوە چو بریار ل دۆر مافێن کوردان نەداینە و پارچەبوونا هێزێن کوردی ل سووریێ ژی وەسا کریە کو مەترسی ل سەر پاشەرۆژا کوردان ل سووریێ هەبیت.
فەهیم تاشتەکین نڤیسەر و ڤەکۆلەرێ ناڤدارێ تورک دیار دکەت کو ئەمریکا دو رۆژ بەری نها ژی کاروانەکا دی یا چەکان دایە هێزێن سووریا دیموکرات دا شەرێ داعشێ بکەن، لێ هەتا نها ژی ئەمریکا ل دۆر پاشەرۆژا سووریێ و پێگەهێ کوردان چو سۆز نەداینە پەیەدێ و هێزێن سووریا دیموکرات و ژ بەر هندێ ژی مەترسی ل سەر پاشەرۆژا کوردان ل سووریێ یا هەی.
ناڤهاتی ئاماژە ب هندێ ژی دکەت کو هەکە کورد د ناڤا خوە دا نەبنە ئێک و داخوازێن خوە ل سەر روسیا و ئەمریکا فەرز نەکەن رەنگە پشتی ب دووماهی هاتنا شەرێ داعشێ چو حسابەک بۆ کوردان نەهێتە کرن، چونکو تورکیا دەست ب یاریەکا مەترسیدار کریە و بزاڤێ دکەت نەهێلیت کورد ل سووریێ بگەهنە مافێن خوە و ئەڤە ژی مەترسیەکا مەزنە.
ئه‌ڤرۆ نیوز،هه‌ژار عه‌عروف:
تیما ته‌پا پێ یا هه‌ولێر ژ ده‌رڤه‌ی یاریگه‌ها خوه شیا سه‌رکه‌فتنه‌کا گرنگ ل سه‌ر یانا ئه‌لحسێن توماربکه‌ت ب دو گولان به‌رامبه‌ر گوله‌کێ ژ چارچوڤێ یاریێن گه‌را هه‌شتێ ژ خۆلا پلا نایاب یا عیراقێ.
ده‌ستپێکێ تيما هه‌ولێر ل دقیقا ٢٥ ب گولا یاریزانێ خوه ئه‌حمه‌د سه‌رتیپ پێشکه‌ڤت و ل دقیقا ٦٠ یاریزانێ یانا ئه‌لحسێن گولا وه‌کهه‌ڤیێ بوو تیما خوه تومارکر و میران خسرو ل دقیقا ٨٥ جاره‌کا دی یانه هه‌ولێر پێشئخست پشتی ب لێدانا سزایێ گولا بوو یانا خوه تومارکری و تیما خوه به‌ر ب سه‌رکه‌فتنا سێ ل ڤی وه‌رزی بر.
ب ڤێ سه‌رکه‌فتنێ هه‌ولێر خالێن خوه گه‌هاندنه ١٢ خالان ل رێزا
هه‌شتێ دهێت و کێمتر سێ خالان ژ تیما رێزا دوێ.
ئه‌ڤرۆ نیوز،هه‌ژار مه‌عروف:
فوتو:قه‌یس وه‌یسی:
به‌ری ده‌مه‌کێ کێم یاریێن هه‌رسێ نوونه‌رێن پارێزگه‌ها دهۆکێ د خۆلا پلا نایاب یا کوردستانێ ب دووماهیی هاتن کو بتنێ یانا زاخۆ شیا سه‌رکه‌فتنێ توماربکه‌ت و دهۆک وه‌کهه‌ڤبوو زێره‌ڤانی ژی خوساره‌ن بوو.
ل یاریگه‌ها خوه تیما ته‌پا پێ یا زاخۆ پشتی بورینا پێنج گه‌را نه‌شیای سه‌رکه‌فتنێ توماربکه‌ت و دڤێ حه‌فتیێ دا شیا سه‌رکه‌فتنا ئێکێ ل وه‌رزێ ئه‌ڤ ساله ل سه‌ر کیستێ یانا ده‌ربه‌ندیخان توماربکه‌ت ب دو گولان به‌رامبه‌ر گوله‌کێ و زاخۆ خالێن خوه گه‌هاندنه حه‌فت خالان ژ سه‌رجه‌مێ شه‌ش یاریان سیه رکه‌فتنه‌ک و خوساره‌تیه‌ک و چار وه‌کهه‌ڤی هه‌نه.
ژلایه‌کێ دیڤه تیما دهۆک خوه ژ خوساره‌تیه‌کا مسوگه‌ر قورتالکر پشتی وه‌کهه‌ڤبووی ل گه‌ل یانا برایه‌تی ب دو گولان کو هه‌تا ده‌قیقا ٩٠ یانا برایه‌تی یا پێشکه‌فتی بوو لێ دقیقا دووماهیێ یاریزانێ دهۆک موئه‌ید عه‌بدولسه‌مه‌د دهۆک ژ خوساره‌تیه‌کا مسوگه‌ر قورتالکر ده‌مێ گولا وه‌کهه‌ڤیی تومارکری ب ڤی ئه‌نجامێ دهوک خالێن خوه گه‌هاندنه ١٢ خالان ژ شه‌ش یاریان کو سێ سه‌رکه‌فتن و سێ وه‌کهه‌ڤی هه‌نه.
ژلایه‌کێ دیڤه ل که‌لار تیما زێره‌ڤانی به‌ردوامی دا ئه‌نجامێن خوه یێن لاواز پشتی ڤی حه‌فتیێ ژی نه‌شیای سه‌رکه‌فتنێ توماربکه‌ت ده‌مێ ئه‌ڤ کاره ل گه‌ل یانا شێروانه خوساره‌ت بووی ب دو گولان به‌رامبه‌ر گوله‌کێ و ل سه‌ر بریارا سه‌رپه‌رشتێ یاریێ یاریا دناڤبه‌را ئاکرێ و نه‌وروز ژبه‌ر که‌شو هه‌وای خراب هاته پاشئێخستن.
ئەڤرۆ نیۆز:
سەرۆک بارزانی د سەرەدانا خوە یا بۆ بەغدا ئەڤرۆکە ل گەل حەمار حەکیم سەرۆکێ رەوتا حیکمە کۆمبوو و پشتی کۆمبوونا سەرۆک بارزانی راگەهاند کو رەوشەکا نوو ل عیراقێ هاتیە پێش و ئەز گەشبینم دێ شێین پێکڤە ئاریشان چارە بکەین و گۆت: (ئارمانجا سەرەدانا من بۆ هندێ یە دا ئەم پێکڤە دانوستاندنان ل دۆر ئاریشێن نها بکەین و پێکڤە بزاڤا چارەکرنا هەموو ئاریشان بکەین).
سەرۆک بارزانی هەروەسا دیار کر کو هاتنا من بۆ بەغدا پشتەڤانیە بۆ حوکمەتا نوو یا عیراقێ ب سەرۆکاتیا عادل عەبدولمەهدی و ل گەل ئالیێن سیاسی یێن عیراقێ ژی دانوستاندنان دکەین، چونکو رەوشەکا نوو ل عیراقێ هاتیە پێش و ئەز گەشبینم دێ شێین پێکڤە چارەسەریەکا گونجای بۆ ئاریشێن نها پەیدا کەین.
ئەڤرۆ نیۆز:
مەولوود چاڤوش ئوگلۆ وەزیرێ دەرڤە یێ تورکیا راگەهاند کو بریارا دادگەها ئورۆپا یا ل دۆر ئازادکرنا دەمیرتاشی بنپێکرنا قانوونێن ئورۆپا یە و ئەڤ بریارا ئورۆپا دایی سیاسی یە و ئەم ڤێ یەکێ قەبوول ناکەین و گۆت: (ل ئورۆپا یێن ب تاوانا تیرۆرێ بهێنە دادگەهکرن دڤێت بگەهنە سزایێن خوە، لێ ئورۆپا نها ژ بەر دەمیرتاشی بریارەکا دی ددەت و ئەم ڤێ یەکێ قەبوول ناکەین).
وەزیرێ دەرڤە یێ تورکیا هەروەسا ئەو یەک ژی دیار کر کو من ١٢ سالان ل کۆنسەیا ئورۆپا کار کریە و هەتا نها من نەدیتیە کو بریارەکا وەسا بدەن، ژ بەر هندێ ژی ئەم وەکو تورکیا دبێژین بریارا دادگەهێ سیاسی یە و بۆ هندەک مەرەمان دخوازن ل دژی مە بکار بینن.
نيشاندان