ئه‌ڤرۆ نیوز،هه‌ژار مه‌عروف:
چاڤه‌رێ دهێته‌کرن سوباهی و دوزبا یاریێن گه‌را شه‌شێ ژ خۆلا پلا نایاب یا کوردستانێ بهێنه‌کرن کو هه‌ر چار نوونه‌رێن پارێزگه‌ها دهۆکێ بریاره روژا هه‌ینی یاریێن خوه ئه‌نجام بده‌ن کو هه‌تا راده‌یه‌کێ مه‌زن ئه‌رکێ هه‌ر چار نوونه‌رێن پارێزگه‌ها دهۆکێ یانێن دهۆک، زاخۆ، زێره‌ڤانی و ئاکری یێ ب زه‌حمه‌ت نابیت
یانه دهۆک خودانا رێزا دوێ د لیسته‌یا خۆلێ دا ب یازده خالان دێ یاریا خوه ل گه‌ل یانا به‌رایه‌تی که‌ت ل یاریگه‌ها برایه‌تی ل باژێرێ هه‌ولێر کو دهۆک به‌ر ب هه‌ولێرێ چوویه بۆ ده‌ستڤه ئینانا سێ خالان به‌ردوامی بده‌ته هه‌ڤرکیا خۆلێ و ده‌لیڤه‌یێ ژ ئه‌و ره‌وشا نوکه یا یانا برایه‌تی تێدا بوریت کو ژ پێنچ یاریان بتنێ دو خال هه‌نه.
ژلایه‌کێ دیڤه هه‌لگرا ناسناڤێ وه‌رزێ بوری تیما ته‌پا پێ یا زێره‌ڤانی دێ بیته مێڤانا یانا شێروانه ل یاریگه‌ها که‌لار کو هه‌ردو تیم د ره‌وشه‌کا لاواز دا بورن کو زێره‌ڤانی شه‌ش خال هه‌نه ژ پێنچ یاریان و شێروانه ئێک خال هه‌یه بتنێ ل رێزا دووماهیێ دهێت.
تیما زاخۆ د ڤێ حه‌فتیێ دا دێ بزاڤێ که‌ت سه‌رکه‌فتنا ئێکێ ل وه‌رزێ ئه‌ڤ ساله توماربکه‌ت سه‌ر کیستێ یانا ده‌ربه‌ندیخان ده‌مێ ل یاریگه‌ها خوه مێڤانداریا وێ یانێ دکه‌ت کو زاخۆ ل پێنچ یاریێن بوری دا چار وه‌کهه‌ڤیی تومارکرینه و به‌رامبه‌ر ده‌ربه‌ندیخان شه‌ش خال هه‌نه کو سه‌رکه‌فتنه‌ک و سێ وه‌کهه‌ڤی ل گه‌ل ئێک خوساره‌تیی هه‌یه.
تیما ئاکرێ نوونه‌را چارێ یا پارێزگه‌ها دهۆکێ ئه‌وژی دێ ل یاریگه‌ها خوه مێڤانداریا نه‌وروز که‌ت کو ئاکرێ داخوازیت بوریا دوێ ل دیڤ ئێک ل یاریگه‌ها خوه مفای ژ ئه‌رد و جه‌ماوه‌ر خوه بینت و سه‌رکه‌فتنا دوێ ل وه‌رزێ ئه‌ڤ ساله توماربکه‌ت پشتی ل حه‌فتیا چارێ شیای ل یاریگه‌ها خوه سه‌رکه‌فتنێ ل سه‌ر هندرین توماربکه‌ت ل یاریگه‌ها خوه، ئاکرێ نوکه خودانا چار خالانه ژ سه‌رکه‌فتنه‌ک و وه‌کهه‌ڤیه‌کێ و سێ خوساره‌تی هه‌نه و نه‌ورور ژی شه‌ش خال هه‌نه ژ سه‌رکه‌فتنه‌ک و سێ وه‌کهه‌ڤی ل گه‌ل ئێک خوساره‌تی .
یاریێن سوباهی روژا پێنچ شه‌مێ بریاره یانا پێشمه‌رگا سلێمانیێ سه‌رکێشا خۆلێ مێڤانداریا یانا هندرین بکه‌ت و هه‌ولێر ل گه‌ل پێشمه‌کا هه‌ولێر و ئارارات ل گه‌ل گازی باکور
ئه‌ڤرۆنيوز:
سه‌رۆكێ ئه‌مريكى دونالد ترامپ ئه‌ڤرۆ چارشه‌مبى 21/11/2018 سوپاسيا سعوديێ مه‌زنترين به‌رهه‌مئێنه‌را په‌ترۆلێ ل رێكخراوا ئوپك كر ژبه‌ر رۆلێ وێ د ئينانا خوارێ يا بهايێن په‌ترۆلێ ل بازارێن جيهانى وداخوازكر بهايێن په‌ترۆلێ زێده‌تر بهێنه خوار.
ترامپى ل سه‌ر به‌رپه‌رێ خوه يێ تويته‌رى به‌لاڤكر” بهايێن په‌ترۆلێ يێن دهێنه خوار، ئه‌ڤه كاره‌كێ باشه، بهايێ په‌ترۆلێ بلا بگه‌هيته 54 دۆلاران پشتى كو 82 دۆلار بوون، سوپاس بۆ سعوديێ وبلا زێده‌تر بهايێن په‌ترۆلێ بهێنه خوار”.
دهۆك، لەزگین جوقی
رێڤەبەرێ گشتیی یێ كاروبارێن ئێزدیان ل وەزارەتا ئەوقافێ وكاروبارێن ئايينى ل هەرێما كوردستانێ بۆ ئەڤرۆ نیوز دیاركركو ل رۆژا 21/11/2018 رێڤەبەریا كاروبارێن ئێزدی داخواز كر قوتابێن ئێزدی ل زانكۆیێن جیهانی ب تایبەتی یێن ئەمریكی و ئورۆپی بهێنە وه‌رگرتن.
خەیری بۆزانی، رێڤەبەرێ گشتیی یێ كاروبارێن ئێزدیان ل وەزارەتا ئەوقافێ وكاروبارێن ئايينى ل هەرێما كوردستانێ بۆ ئەڤرۆ نیوز دیاركر كو راپۆرتەك ل سەر ئێزدیان دهێتە بەرهەڤكرن ژلایی كچەكێ ڤە ئەو راپۆرت دێ ل رۆژا (نادیا موراد) تێدا هاتیە خەلاتكرن ب خەلاتی نوبلێ ل وی جهێ نادیە موراد خەلات وەرگرتی هێتە بەلاڤكرن.
دياركر، هەروەسا رێڤەبەریا مه داخوازا هەڤكاريێ د رزگاركرنا كچ وژن وزارۆكێن كوردێن ئێزدى يێن هەتا نوكە ماینە ددەستێن رێكخراوا تیرۆرستێن داعشێ دا كريه.
جینوسایدا شنگال 6417 كەس هاتبوونە رەڤاندن ژوانا ژی 3548 كچ وژن بوون و2869 زارۆك وزەلام بوون و هەتا نوكە دۆرین 3334 كەسان ژ دەستێن تیرۆرستێن داعشێ رزگار بووینە وهێشتا چارەنڤیسێ دۆرێن سێ هزار كەسێن دێ يێ دیار نینە.
ئه‌ڤرۆنيوز:
وه‌زيرێ ساخله‌ميێ ل هه‌رێما كوردستانێ راگه‌هاند، ب ئه‌ليكترۆنيكرنا سيسته‌مێ كواليتيا ده‌رمانان ب هاريكاريا جڤاتا وه‌زيران هاتيه ئه‌نجامدان وسيسته‌م داتابه‌يسه‌كێ دێ ب خوه‌ڤه گريت بۆ كواليتيا وان ده‌رمانێن دهێنه دناڤ كوردستانێ دا.
رێكه‌وت حه‌مه ره‌شيد، وه‌زيرێ ساخله‌ميێ ل هه‌رێما كوردستانێ ئه‌ڤرۆ چارشه‌مبى 21/11/2018 دكۆنگره‌كێ رۆژنامه‌ڤانى دا گۆت” ل سالا 2012 ده‌مێ كواليتيا كونترۆلى هاتيه دامه‌زراندن، وه‌زاره‌تا ساخله‌ميێ شيانێن پشكنينا حه‌بكه‌كا پاراسيتۆل نه‌بوو، به‌لێ نوكه رۆژانه پشكنێن بۆ ده‌رمانێن زۆر دهێنه ئه‌نجامدان وژنوكه وپێڤه هه‌موو مامه‌له‌كا ده‌رمانان ل تاقيگه‌ه وگۆمرك وفرۆكخانه وكۆمپانيێن ده‌رمانان دێ ل بن كونترۆلا وى سيسته‌مى بيت وبۆ چو كه‌سه‌كى نينه ل ده‌رڤه‌ى وى سيسته‌مى مامه‌لێ ب ده‌رمانان بكه‌ت”.
ژلايێ خوه‌ڤه په‌يڤدارێ وه‌زاره‌تا ساخله‌ميێ ئاماژه ب وێ چه‌ندێ دا كو دێ بهاى ل سه‌ر هه‌موو ده‌رمانان دانين وهه‌ر ده‌رمانخانه‌كا گرانتر بفرۆشيت دێ تووشى سزايێن قانوونى بيت، نوكه بها بۆ 5600 جۆرێن ده‌رمانان يێ هاتيه دانان، ئه‌وێن ماين ژى دێ بها بۆ هيته دانان.
ئەڤرۆ نیوز ، زنار تۆڤی:
پێشانگەها نێڤدەولەتی یا هەولێرێ ، ئەڤرۆ چارشەمبێ 21/11/2018 هاتە ڤەکرن و دێ بۆ ماوێ چار رۆژان یا به‌رده‌وام بیت، کو پێشانگەهەکا تایبەتە ب مادێن خوارنێ و ئامیرێن چاندنێ، ب پشکداریا زێدەتر ژ 100 كۆمپانیێن نافخۆیی و بیانی.
بەدیع محەمەد، جێگری سەرپەرشتیارێ پێشانگەها نێڤدەولەتی یا هەولێرێ د كۆنگره‌کێ رۆژنامه‌ڤانی دا گۆت، ڤەکرنا هەر پێشانگەکێ گرنگیا خوە هەیە، د هەر وارەکێ دابیت، هەروەسا خوارنی و ئامیرێن چاندنێ گرنگیا خۆ هەیە بۆ زێدەتر پەرەپێدانا كوالێتیا مادێن خوارنێ و نیشاندانا چەندین ئامیرێن چاندنێ و ناساندنا وان بۆ نافخۆیا هەرێما كوردستانێ بۆ كارگەهێن پیشەسازی و چاندنێ.
هەروەسا گۆتیە 103 كۆمپانیا پشکداری تێدا كریه و 70% ژ وان کۆمپانیان یێن توركینە و ئەوێن دیتر ژی یێن ئیرانی، عێراقی و نافخۆیی نە.
ئەوژی گۆتیە، ئەڤ پێشانگەهە دێ ژ 11/21 هەتا 11/24 ، ئانکودێ بۆ ماوێ چار رۆژان یا بەردەوام بیت.
دهۆك، لەزگین جوقی:
سەرۆكێ لیژنا پەيوەندیان ل جڤاتا پارێزگەها نه‌ينه‌وا دیاركركو پتر ژ 9 هزار تیرۆرستێن داعشێ دزیندانێن مووسلێ دانە، نوكە ل مووسلێ ئاریشا نەبوونا جهی بۆ زێندانكرنا تیرۆرستان پەيدابوویە وبەردەوام ژی تیرۆرست دهێنە دەستەسەركرن وهژمارا وان دزێندانی بەر ب زێدەبوونی دچیت.
خەلیل شەمۆ، سەرۆكێ لیژنا پەيوەندیان ل جڤاتا پارێزگەها نه‌ينه‌وا دیاركركو ئەم دگەلداینە گۆژمه‌كێ پاره‌ی بۆ پۆلیسێن مووسل بهێتە تەرخانكرن ژبۆ دابینكرنا ئاسایشێ ل مووسل، چونكى پولیسێن گازندیان ژ نەبوونا ئامیرین پولیسیان و ترۆمبێلان دكەن هەروەسا ژی هژمارا پۆلیسان ژی ل نەینەوا یا كێمە وپارە ژی بۆ چێكرنا بنگەهێن پۆلیسان نینە و پارە بۆ ئاڤاكرنا زیندانان ژی نينە، نوكە ل دووڤ گۆتنا پۆلیسێن مووسل پتر ژ 9 هزار تیرۆرستێن داعشێ ل مووسل ددەستەسەركرینە وپتریا وان ب تۆمەتا كوشتنێ و كریارێن تیرۆرستی یێن هاتینە ده‌سته‌سه‌ركرن ودبيت ئەڤ هژمارا تیرۆرستێن داعشێ هێشتا بهێتە زێدەكرن چونكى بەردەوام شانێن نڤستی دهێنە ئاشكراكرن و دەستەسەركرن”.
خه‌ليلى گۆت ژى” هێشتا شانێن نڤستی یێن تیرۆرستان ل مووسل يێن هه‌ين بەری چەند رۆژان ب رێيا قنینەكێ غازی تیرۆرستان كریارەكا تیرۆرستی ئەنجامدا، هەروەسا ل بەر دەرگەهێه‌خارنگەهەكا مووسل ژی كریارەكا تیرۆرستی هاتە ئەنجامدان ئەڤ كرياره‌كێ ژى هەموو شانێن نڤستی يێن داعشێ ئەنجام ددەن، به‌لێ نوكە ل مووسل ئاریشا نەبوونا جهی بۆ زێندانكرنا تیرۆرستێن داعشێ پەيدابوویە.
ئه‌ڤرۆنيوز:
په‌رله‌مانێ عيراقێ ئه‌ڤرۆ 21/11/2018 هه‌موو ئه‌و بريارێن حه‌يده‌ر عه‌بادى سه‌رۆك وه‌زيرێن به‌رێ يێ عيراقێ دده‌مێ ئه‌وێن دناڤبه‌را ئێكێ ته‌موزێ هه‌تا 24 چريا ئێكێ ده‌ركرين، هه‌لوه‌شاندن.
د روونشتنا ئه‌ڤرۆ يا په‌رله‌مانێ عيراقێ ب پتريا ده‌نگێن په‌رله‌مانتاران بريارا هه‌لوه‌شاندنا هه‌موو خالێن گۆمركى دناڤبه‌را هه‌رێمێ وبه‌غدا ده‌ركر.
ژ ئه‌گه‌رێ خيانه‌تا 16 ئه‌كتۆبه‌رێ، كه‌ركووك وخورماتوو وده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ راده‌ستى حه‌شدا شه‌عبى هاتن كرن ونێزيكى هه‌شت هه‌يڤان حه‌شدا شه‌عبى رێيا هه‌ولێر – كه‌ركووك داخستبوو، پاشى حوكمه‌تا عيراقێ ئه‌ڤ رێ ب مه‌رج ڤه‌كر ئه‌وژى دانانا خالێن گۆمركى دناڤبه‌را پارێزگه‌هێن هه‌رێما كوردستانێ وبه‌غدا.
ئەڤرۆ نیوز، نەوزاد هلۆری:
ئێڤاریا ئەڤرۆ ب بەهەڤبوونا هژمارەکا زور یا نڤیسەر و پێشمەرگێن شورەشێ و خەلکێ دەڤەرێ، نووترین پەرتووکا نڤیسەر کوڤان ئێحسان و کاوار ئەنوەر ل سەر شەهیدەکێ شورەشێ ل ناحیا بامەڕنێ هاتە ئیمزاکرن و بەلاڤکرن.
کوڤان ئێحسان نڤیسەرێ پرتووکێ بۆ ئەڤرۆ نیوز گۆت: ( پشتی ماندووبونەکا زور ئەم شیاین نووترین پرتووک لسەر شەهید زوهێر بامەڕنێ دروست بکەین و ئەڤرۆ د رێورسمەکێ دا بەلاڤ بکەین، پەرتووک بەحس ل رولێ شەهیدی و وان کەسانێن کو روول ل گەل وی هەی دکەت، دێ ب دیاری هێتە بەلاڤکرن)
ژلایەکێ دن ڤە پێشمەرگێن شورەشێ و نڤیسەرێن دەڤەرێ دیارکر کو کوردان دیروکەکا درێژ هەیە، بەلێ نەهاتیە نڤیسان، تنێ ل بامەرنێ نێزیکێ 150 شەهیدان هەنە، تنێ ژیانا هندەک ژ وان هاتیە نڤیسان.
ئه‌ڤرۆ نیوز:
راپورتێن روژنامه‌ڤانی ل ئسسپانیا وه‌سا داینه دیارکرن ستێرا هه‌لبژارتیێ به‌رازیل و یانا پاریس سانجێرمان نیمار بۆ که‌سێن نێزیکی خوه دیارکریه ل وه‌رزێ بهێت دێ ڤه‌گه‌ریته یانا خوه یا به‌ری نوکه به‌رشه‌لونا.
ل به‌رنامه‌یێ ئه‌لشرینگیتو کو ئێک ژ به‌رنیاسترین به‌رنامه‌یێن وه‌رزشی یه ل ئیسپانیا هاتیه دیارکرن نیمار هزرا ڤه‌گه‌راندنا خوه کریه بۆ یانا خوه یا به‌ری دو سالان ژی هاتیه ڤه‌گوهاستن کو یاریزانێ به‌رازیلی بۆ چه‌ند که‌سێن نێزیکی خوه دیارکریه وه‌رزێ ئه‌ڤ ساله دێ دووماهیی وه‌رز بیت ل گه‌ل یانا پاریس و پاش دێ ڤه‌گه‌ریته یانا به‌رشه‌لونا.
وی به‌رنامه‌یی ئاشکراکریه ژی ب هیچ ره‌نگه‌کی ناڤێ ریال مه‌درید نیماری دیارنه‌کریه و به‌حس ل چوونا ریال مه‌درید نه‌کریه سه‌راره‌ی سه‌روکێ یانا ریال مه‌درید ماوه‌کێ درێژه گرنگیه‌کا مه‌زن ب ڤه‌گوهاستنا وی دکه‌ت لێ نیمار هه‌تا نوکه به‌حس ل چونا ریال مه‌درید ب هیچ ره‌نگه‌کی نه‌کریه.
نيشاندان