ئه‌ڤرۆنيوز:

وه‌زاره‌تا چاندنا عيراقێ ئه‌ڤرۆ ئێكشه‌مبى 18/11/2018قه‌ده‌غه‌كرنا كرينا به‌رهه‌مێ باجانان ژ ده‌رڤه‌ راگه‌هاند.

وه‌زاره‌تا ناڤبرى دراگه‌هاندنه‌كێ دا به‌لاڤكر” ل دووڤ نڤيسارا لژنا كاروبارێن ئابوورى ل جڤاتا وه‌زيرێن عيراقێ كو به‌رهه‌مێن چاندنێ ئه‌وێن ئينانا وان ل دووڤ رۆزناما چاندنێ قه‌ده‌غه‌، رازيبوون هاته‌ كرن ل دۆر قه‌ده‌غه‌كرنا كرينا به‌رهه‌مێ باجانان ژ هه‌موو ده‌رگه‌هێن سنورى هه‌ر ژ رۆژا 18/11/2018.

وه‌زاره‌تا چاندنا عيراقێ دياركر كو ئه‌گه‌رێ ڤێ بريارێ دزڤريت بۆ هه‌بوونا به‌رهه‌مه‌كێ مه‌زن يێ باجانا ناڤخوه‌يى وداخواز ژ ده‌رگه‌هێن سنورى ل عيراقێ كر پێگيريێب ڤێ بريارێ بكه‌ن.

ئه‌ڤرۆنيوز:

رێڤه‌به‌رێ په‌يوه‌نديان وپێكڤه‌ژيانا ئايينى ل وه‌زاره‌تا ئه‌وقافێ وكاروبارێن ئايينى ل هه‌رێما كوردستانێ راگه‌هاند، ئه‌مريكا گۆژمێ 187 مليۆن دۆلاران بۆ پاراستنا جهێن كه‌مينه‌يێن ئايينى ل عيراقێ ته‌رخانكرينه‌، دياركر ژى كو مه‌ داخواز ژ كونسۆلخانا ئه‌مريكى ل هه‌رێمێ كريه‌ رێژه‌كا به‌رچاڤ ژڤى گۆژمى بۆ كه‌مينه‌يێن ئايينى ل هه‌رێما كوردستانێ بهێنه‌ ته‌رخانكرن.

مه‌ريوان نه‌قشبه‌ندى، رێڤه‌به‌رێ په‌يوه‌نديان وپێكڤه‌ژيانا ئايينى ل وه‌زاره‌تا ئه‌وقافێ وكاروبارێن ئايينى بۆ (ئه‌ڤرۆنيوز) گۆت” ئه‌مريكا ب ڤى شێوه‌ى ئه‌و گۆژمێ پاره‌ى بۆ كه‌مينه‌يێن ئايينى ل عيراقێ ته‌رخان كرينه‌ 51 مليۆن دۆلار بۆداگرتنا پێدڤيێن ب له‌ز 9 مليۆن دۆلار بۆ هاريكاريا ڤه‌گه‌راندنا وان ئاوارێن ل كۆمه‌لگه‌ها وكه‌مپان ئاكنجى و 68 مليۆن دۆلار بۆ ڤه‌ژاندنا ئابوورى و5 مليۆن دۆلار بۆ رێگرتنێ ل هه‌ر كاره‌ساته‌كێ كو ئگه‌ر هه‌بيت دپاشه‌رۆژێ دا تووشى كه‌مينه‌يێن ئايينى ببيت و37 مليۆن دۆلار بۆ پاقژكرنا وان ده‌ڤه‌رێن كه‌مينه‌يێن ئايينى تێدابوو ژ مين وته‌قه‌مه‌نيان و8 مليۆن و500 هزار دۆلار بۆ چاره‌سه‌ركرنا ده‌رونى وسه‌ر ژنوو ئاڤاكرنا كه‌سايه‌تيێ و2 مليۆن دۆلار بۆ پاراستنا شوونوارێن دێرين يێن كه‌مينه‌يێن ئايينى ل سه‌رانسه‌رى عيراقێ”.

مه‌ريوانى دياركر ژى” دكۆمبوونه‌كێ دا ل گه‌ل كونسۆلخانا ئه‌مريكى ل هه‌رێما كوردستانێ،مه‌ داخواز كريه‌ ژ وى گۆژمێ 2 مليۆن دۆلاران ئه‌وێ هاتيه‌ ته‌رخانكرن بۆ پاراستن ونووژه‌نكرنا شوونوارێن كه‌مينه‌يێن ئايينى ل عيراقێ، جهێن ل هه‌رێما كوردستانێ ژى هه‌ين بكه‌نه‌ دناڤ به‌رنامێ خوه‌ دا، ئه‌وى هه‌ر ئێك ژ په‌رستگه‌ها لالش يا ئێزديان ل قه‌زا شێخان وكه‌نيسا مارگۆرگيس يا مه‌سيحيان ل هه‌ولێرێ وشكه‌فتا باب يا به‌هائيان ل سه‌رگه‌لۆ وشكه‌فت وپه‌رستگه‌ها قسقاپان يا زه‌راده‌شتيان ل قه‌زا دوكان ومه‌زارێ پيرۆزێ كاكه‌ييان ل گوندێ هاوار ل هه‌له‌بجه‌ وبۆ دياركرنا ڤان جهان ژى مه‌ بۆچوونێن نوونه‌رێن وان هه‌موو ئايينان وبه‌رپرسێن ئيدارى يێن وان جهان ژى وه‌رگرتيه‌”.

خوياكر ژى” هه‌تا نوكه‌ مه‌ به‌رسڤا كونسۆلخانا ئه‌مريكى وه‌رنه‌گرتيه‌، به‌لێ پشته‌ڤانيا داخوازيا مه‌ كريه‌”.