ئه‌ڤرۆنيوز:
رێڤه‌به‌ريا گشتى يا كه‌شناسيێ وبيڤه‌له‌رزان ل هه‌رێما كوردستانێ ره‌وشا سه‌قايێ سوباهى شه‌مبيێ 17/11/2018 ل پارێزگه‌ها دهۆكێ وپارێزگه‌هێن دى يێن هه‌ريما كوردستانێ به‌لاڤكر.
رێڤه‌به‌ريا ناڤبرى ل دۆر سه‌قايێ سوباهى يێ پارێزگه‌ها دهۆكێ به‌لاڤكر كو ئه‌سمان ئه‌ور بيت وئه‌گه‌رێ بارانێن زۆر يا هه‌ى ل گه‌ل بريسيان ل ده‌ڤه‌رێن جودا جودا يێن پارێزگه‌هێ”.
دياركر ژى كو پلا گه‌رمێ سوباهى شه‌مبيێ ل پارێزگه‌ها دهۆكێ دێ 15 پله بيت.
ئه‌ڤرۆنيوز:
سه‌رۆك مه‌سعود بارزانى ئه‌ڤرۆ ئه‌ينيێ 16/11/2018 ب هه‌لكه‌فتا رۆژا جيهانى يا لێبۆرينێ په‌يامه‌ك به‌لاڤكر.
سه‌رۆك بارزانى دپه‌ياما خوه دا دبێژيت”لێبۆرين، هه‌ڤدو قه‌بوولكرن وپه‌سه‌ندكرنا جوداهيان، ژپيڤه‌رێن ناساندنا گه‌ل وه‌لاتێن پێشكه‌فتى يه، دچارچۆڤێ پرنسيبێن سه‌ره‌كى يێن گيانێ ديموكراسيێ يه ژى، ئه‌گه‌رێ سه‌ره‌كيێ سه‌ركه‌فتن وپێشكه‌فتنا هه‌رێما كوردستانێ ژى، بۆ گيانێ پێكڤه‌ژيانێ ولێبۆرينێ ل ڤێ هه‌رێمێ دا دزڤريت، كو سيمايه‌كێ جوان وشارستانى ب كوردستانێ به‌خشى يه ودده‌ڤه‌رێ دا كێم وێنه‌يه”.
گۆت ژى” لێبۆرين وئاشتى وپێكڤه‌ژيان فه‌رهه‌نگا هزاران سالا گه‌لێ كوردستانێ يه، بزاڤێن زۆر هاتينه كرن بۆ ژناڤبرنا ڤێ بهايێ بلند، به‌لێ دچوو ره‌وشه‌كێ دا گوهۆرين ب سه‌ردا نه‌هاتيه وهه‌رێما كوردستانێ به‌رده‌وام ب ناڤه‌ندا پێكڤه‌ژيانا هه‌موو نه‌ته‌وه وئايين وئايينزان دێ مينيت”.
سه‌رۆك بارزانى خوياكر”هه‌موو ئايين وبهايێن بلند يێن مرۆڤايه‌تى دووپاتى ل سه‌ر ب هێزكرنا پێكڤه‌ژيانێ ولێبۆرينێ دكه‌ن، له‌وما پێدڤيه ده‌زگه‌هێن په‌روه‌رده‌يى وفه‌رهه‌نگى يێن مه ژى گرنگيا زێده‌تر ب وى بوارى بده‌ن وهاندانا ڤى فه‌رهه‌نگى به‌رفره‌هتر بكه‌ن”.
ئه‌ڤرۆ نیوز،هه‌ژار مه‌عروف:
پشتی دوهی و ئه‌ڤرۆ یاریێن گه‌را پێنچێ ژ خۆلا پلا نایاب دووماهیی هاتین کو ب حه‌فتیا وه‌کهه‌ڤیا هاته دیارکرن کو سه‌رجه‌مێ حه‌فت یاریان پێنچ ب وه‌کهه‌ڤی ب دووماهیی هاتن و ١٣ گول دڤێ حه‌فتیێ دا هاتنه تومارکرن.
هه‌لویستێ خۆلێ ب ڤی ره‌نگی یه پشتی بورینا ٥ یاریان
۱- پ. سلێمانیێ ۱۱ خاڵ
۲- دهۆک ۱۱ خاڵ
۳- ئارارات ۱۰ خاڵ
٤- پ. هەولێر ۱۰ خاڵ
٥- هەولێر ۷ خاڵ
٦- گازی باکوور ٦ خاڵ
۷- زێرەڤانی ٦ خاڵ
۸- دەربەندیخان ٦ خاڵ
۹- نەورۆز ٦ خاڵ
۱۰-هەندرێن ٥ خاڵ
۱۱- زاخۆ ٤ خاڵ
۱۲- ئاکرێ ٤ خاڵ
۱۳- برایەتی ۲ خاڵ
۱٤- شێروانە ۱ خاڵ
ئەڤرۆ نیوز ، زنار تۆڤی:
ئاژانسا رۆیته‌رز دایە دیارکرن، کو رێككه‌فتنا هه‌ولێر و به‌غدا ل دۆر نەفتا كه‌ركووكێ كه‌فتیه د وارێ بجهئینانێ دا و هنارتنا نەفتا كه‌ركووكێ بۆ به‌نده‌رێ جیهان یی تورکی ده‌ستپێكریە.
ئاژانسا رۆیته‌رز ژ چه‌ندین ژێده‌رێن كۆمپانیا نەفتا عیراقێ بەلاڤەکریە، كو ل سپێدەهیا ئەڤرۆ ئەینیێ 16 چریا دویێ نەفتا كه‌ركووكێ ب رێیا بۆریێن نەفتا كوردستانێ بۆ به‌نده‌رێ جه‌یهان یێ توركی هاتیە هنارتن.
هەروەسا وێ ئاژانسێ گۆتیه ژی، كو دێ رۆژانه 50 هەتا 60 هزار به‌رمیلێن نەفتا کەرکوکێ هێنه هنارتن، ئەڤە د ده‌مه‌كی دایە کو بەری روودانێن 16 ئۆكتۆبه‌رێ، رۆژانه نێزیكی 300 هزار به‌رمیلێن نەفتێ ژ کەرکوێ بۆ بەندەرێ جیهان دهاتنە هنارتن، لێ پشتی 16 ئۆكتۆبه‌رێ، هنارتنا نەفتا كه‌ركووكێ بۆ بەندەرێ جیهان یێ تورکی هاتبوو راگرتن.
ئاژانسا رۆیته‌رز ئەو ژی گۆتیه، کو رێككه‌فتنا هه‌ولێر و به‌غدا ل دۆر نەفتا كه‌ركووكێ، ژبه‌ر فشارێن ئیدارا ئه‌مریكا بوون، كو به‌رده‌وام بزاڤ دكر هه‌ردو ئالی بگه‌هنە رێككه‌فتنێ.
ئه‌ڤرۆ نیوز،هه‌ژار مه‌عروف:
پشتی دوهی سێ یانێن پارێزگه‌ها دهۆکێ نه‌شیان سه‌رکه‌فتنێ د یاریێن گه‌را پێنجێ دا توماربکه‌ن ئه‌ڤرۆ نوونه‌را چارێ ژی ژ پارێزگه‌هێ نه‌شیا د ڤێ گه‌رێ دا سه‌رکه‌فتنێ توماربکه‌ت.
تیما ته‌پا پێ یا زێره‌ڤانی هه‌لگرا ناسناڤێ وه‌رزێ بوری بوو یاریا چارێ ل دیڤ ئێک نه‌شیا سه‌وگه‌فتنێ توماربکه‌ت پشتی به‌ری ده‌مه‌کێ کێم ل یاریگه‌ها خوه وه‌کهه‌ڤبووی بێ گول ل گه‌ل یانا پێشمه‌رگا سلێمانیێ و ب ڤی ئه‌نجامێ زێره‌ڤانی خالێن خوه گه‌هاندنه شه‌ش خالان ژ پێنج یاریان به‌رامبه‌ر پێشمه‌رگا سلێمانیێ خالێن خوه گه‌هاندنه ١١ خالان پێشڤه چوو سه‌رێ لیستا خولێ.
ژلایه‌کێ دیڤه ل یاریگه‌ها خوه تیما پێشمه‌رگا هه‌ولێر سه‌رکه‌فتنه‌کا گرنگ ل سه‌ر یانه شێروانه تومارکر ب دو گولان به‌رامبه‌ر گوله‌کێ و ب ڤێ سه‌رکه‌فتنێ خالێن وێ بوونه ١٠ خال رێزا چازێ دهێت.
هه‌ژی گوتنێ هه‌رسێ یانێن دی یێن پارێزگه‌هێ دهۆک و ئاکرێ و زاخۆ دوهی ئه‌وژی وه‌کهه‌ڤبوون کو دهۆک ل گه‌ل هه‌ولێر و زاخۆ ل گه‌ل نه‌وروز بێ گول و ئاکرێ ل گه‌ل گازی باکور ب سێ گولان
ئەڤرو نیوز , ئێقبال عومەر:
ئەندامەكێ پەرلەمانێ كوردستانێ ژ فراكسیونا پارتی دیموكراتی كوردستان دیاركر, كو قونسولێ توركیا هایداركریە ل سەر وێ توپبارانكرنا دەڤەرێن سنوری ژلایێ توپخانە و فروكێن سوپایێ توركیا ڤە جهێ قەبولكرنێ نینە پێدڤیە سنورەك بو ڤێ یەكێ بهێتە دانان.
موحسن دوسكی، ئەندامێ پەرلەمانێ كوردستانێ گۆت, پەرلەمانتارێن فراكسیونا پارتی دیموكراتی كوردستان ل گه‌ل(هاكان كاراچای) كونسۆلێ توركیا ل هه‌رێما كوردستانێ كۆمبوون و چەندین مژارێن گرنگ یێن هەرێمێ هاتنە بەحسكرن و مە ب درێژی گەنگەشە ل گەل كر دەربارەی توپبارانكرنا دەڤەرێن سنوری ژلایێ توپخانە و فروكێن له‌شكرێ توركیا ڤە, كو بەردەوام خەلكێ سڤیل دبنە قوربانی و ب تایبەتی ژی من قەزا ئامێدیێ كرە نمونە كو دده‌مێ كێمتر ژ سالەكێ یە ب دەهان وەلاتیێن سڤیل یێن قەزا ئامێدیێ ژلایێ فروكێن توركیاڤە هاتينە شەهیدكرن و هەروەسا فروكێن توركیى جهێن ئاڤەدان و گەشتوگوزاری دكەنە ئارمانجا خوە یا بوردومانكرنێ ئەڤەژی ناهێتە قه‌بولكرن ژبه‌ركو خەلكێ مە چو گونەها خوە نینە و هەروەسا نابیت هوون وەك حوكمەتا توركیا و هەروەسا (پەكەكە) دەڤەرێن مە بكەنە جهێ ململانێ و شەر و ئالوزیێن خوە بەردەوام ل سەر ملك و مالێن مە ئاگر و ئاسنان ببارینن ئیدی ئەم قەبوولناكەین كو خەلكێ مەیێ سڤیل ببیتە قوربانی, یا پێدڤیە حوكمەتا توركیا و پەكەكە رێزێ ل سەروەریا ئاخا كوردستانێ بگرین
موحسن دوسكی زێدەتر گوت: من بو دا دیاركرن كو ئێدی پێدڤیە سیاسەتەكا گونجای هەبیت دەربارەی ئاریشێن پەكەكێ و توركیا و نابیت ژ نها وێڤە خەلكێ مە ببیتە قوربانی كێشێن دناڤ بەرا توركیا و پەكەكێ دا, پێدڤیە پەكەكە و توركیا ڤان ئالوزیێن خوە ببەنە دناڤا ئاخا خوەدا, هەروەسا من گوتە كونسۆلێ توركیا پێدڤیە وەلاتيێن كوردستانێ ب تایبەتی یێن دەڤەرا ئامێدیێ بهێنە قەرەبووكرن، ژبەركو ب دەهان كەس هاتینە شەهیدكرن و برینداركرن و هەروەسا 27 سالە خەلكێ وان دەڤەران نەشێن سەرەدانا گوندێن خوە بكەن و گوندێن وان هەر دكاڤل و وێرانكرینە وداهاتێ گوندێن وان هەموو ب هەدەر دچیت و هەروەسا ئەڤ گوندە هەموو هاتینە سوتن ژبەر بومبەبارانكرنا له‌شكرێ توركیا ل سەر ڤان گوندان .
وى پەرلەمانتاری دیاكر ژی, كو ( هاكان كاراچای) كونسۆلێ توركیا ل هەرێما كوردستانێ دبێژیت ئەم دلگران دبین دەمێ وەلاتیەكێ سڤیل دهێتە كوشتن و ئەڤە ب شاشی دهێنە كوشتن, لێ ئەم نزانین كا پەكەكە یە یان سڤیلە، ژبەركو ل وان دەڤەران چەكدارێن پەكەكێ لێ هەنە و هەركەسێ ئەم ل وان دەڤەرێن پەكەكە لێ هەی ببینین دێ هێنە بومبەبارانكرن ژبەركو ئەو دەڤەر دیاركرینە و هەر جهەكێ پەكەكە بچیتێ ئەم دێ ل دووف چین لەوما پێدڤیە هون ژی وان ژ باژێر و گوندان دوور بێخن، ژبەركو پەكەكە ئاریشەیە بۆمە, هه‌كه مە چو كێشە دگەل ئاخا باشوورێ كوردستانێ و عیراقێ نینن به‌لكو كێشا، مە دگەل پەكەكێ يه.
ئه‌ڤرۆ نیۆز، سالار دۆسكی:
ژڤانه سوباهی 17/11/2018 پارتی دیموكراتی كوردستان خودانا 45 كورسیێن په‌رله‌مانی ده‌ست ب دانوستاندنێن پێكئینانا كابینا نه‌هێ یا حوكمه‌تا هه‌رێما كوردستانێ ل گه‌ل ئالیێن سیاسی بكه‌ت.
ئه‌ڤرۆ رۆژا ئه‌ینی 16/11/2018 كه‌نالێ KNN زمان حالێ ته‌ڤه‌گه‌ڕا گوڕان ئاشكراكر كو سوباهی رۆژا شه‌مبی، دێ دانوستاندن ل سه‌ر پێكئینانا كابینا نوو یا حوكمه‌تێ ل باژێرێ سلێمانیێ ده‌ست پێ كه‌ن، ژڤانه شانده‌كێ بلندێ پارتی ل سه‌ر ئاستێ مه‌كته‌با سیاسی سه‌ردانا باژێرێ سلێمانیێ بكه‌ت.
هه‌ر هه‌مان راگه‌هاند دا هاتیه كو شاندێ پارتی دێ ب سه‌رۆكاتیا ئازاد به‌رواری بیت ئه‌ندامێ مه‌كته‌با سیاسی یا پارتی دیموكراتی كوردستان، دێ سه‌ردانا هه‌ر ئێك ژ ته‌ڤگه‌ڕا گوِران و ئێكه‌تیا نشتیمانی یا كوردستانێ كه‌ت.
ئەڤرۆ نیوز:
كۆمسیۆنا بلندا سه‌ربه‌خۆ یا هه‌لبژارتنان ل عیراقێ راگه‌هاندیە، کو ل حه‌فتیا بهێت دێ مووچێ كارمه‌ندێن رۆژا هه‌لبژارتنان هێنە به‌لاڤه‌كرن.
فه‌رمانگه‌ها هه‌لبژارتنان ل كۆمسیۆنا بلندا سه‌ربەخۆ یا هه‌لبژارتنان ل عیراقێ، د به‌یانه‌كێ دا راگه‌هاندیه، کو جڤات و رێڤه‌به‌ریا هه‌لبژارتنان ل حه‌فتیا بهێت دێ ده‌ست ب به‌لاڤكرنا مووچێ كارمه‌ندێن سه‌ر سندۆقێن ده‌نگدانێ كه‌ت.
هەروەسا دیاركریه ژی، کو ئه‌ڤ مووچه یێ وان كارمه‌ندانه، ئه‌وێن ل رۆژا هه‌لبژارتنێن 12 گولانا 2018 وەکو کارمەند كار ل سه‌ر سندۆقێن دەنگدانێ كرین.
ئەڤرۆ نیوز ، تۆڤی:
ئەڤە ماوێ چار هەیڤانە هونەرمەندا کورد جانێ، ل تورکیا هاتیە دەستەسەرکرن و دادگەها ئەدرنە یا تورکیا سزایێ شەش سالێن زیندانکرنی ل سەر سەپاند.
نەورۆز ئاکالین، پارێزەرا سترانبێژ جانێ بۆ ئاژانسا فەرمی یا ئەلمانیا راگەهاندیە: کو دادگەها ئەدرنە یا تورکیا هونەرمەند جانێ ب سووچا بانگەشا تیرۆرێ ل سەر تۆرێن جڤاکی و ئەندامەتیا پەکەکێ ب شەش سالێن زیندانێ سزا دایه.
هەروەسا گۆتیه ژی: نوکە رەوشا دەروونی یا جانێ یا خرابە، ژبه‌ركو ئەو یا بێ گونەهە و چو راستی ژبۆ وان سوچان نینن، یێن داینە پال وێ.
سترانبێژا کورد جانێ، کو خودانا رەگەزناما ئەلمانی یە، ل خزیرانا ئەڤ سالە ل ئاهەنگەکا بانگەشا هەلبژارتنان یا هەدەپێ ل باژارێ ئەدرنە یێ رۆژئاڤایێ ستەنبۆلێ هاتبوو گرتن و ژ بەر وێنێن وێ ل گەل سەرکردێن پەکەکێ ل تۆرێن جڤاکی ب پشتەڤانیا تیرۆێ هاتیە گرتن.
نيشاندان