ئه‌ڤرۆ، قائید میرۆ:

وەزارەتا پێشمەرگەی ب ھووری چاڤدێریا لڤینێن چەکدارێن گرۆپا تیرۆرستیا داعش دکەت، و ‏بەرپرسەکێ بلندێ وەزارەتا پێشمەرگەی ژی دیارکر، مەترسی ھەیە ھندەک دەڤەرێن عیراقێ ‏بکەڤنە بن دەستێ داعش و لڤینێن داعش ل چەند رۆژێن بۆری زۆر زێدەکریە و جھێ گومانێ یە ‏بۆ خەلکێ عیراقێ.‏
‏

عەمید رۆکن ھەژار عومەر، بەرپرسێ ھەماھەنگیا وەزارەتا پێشمەرگەی بۆ رۆژناما ئەڤرۆ گۆت: ‏ھێزێن پێشمەرگەی ل زۆربەیا دەڤەرێن کوردستانی یێن دەرڤەی ئیدارەیا حوکمەتا ھەرێما ‏کوردستانێ نەماینە وەکی سینورێ کەرکووک و دەوروبەرێ مووسل، بەلێ دڤەل ڤێ چەندێ ژی ‏وەزارەتا پێشمەرگەی ب رێیا دەزگەھێ ھەوالگەری بەردەوام ب رێیا ژێدەرێن خوە زانیاریان لدۆر ‏لڤینین داعش کۆم دکەت و چاڤدێریا رەوشێ دکەت، گورەی زانیاریێن گەھشتینە وەزارەتا ‏پێشمەرگەی لڤینێن چەکدارێن داعش لڤێ دووماھیێ بشێوەیەکێ بەرچاف زێدەکریە، بتایبەتی ل ‏سەر سنورێ ناڤبەرا عیراق و سووریا ل گەل دەڤەرێن رەبیعە و مووسل و دەوروبەرێ کەرکووکێ ‏قەبارێ داعش یێ بەرە ب زێدەبوونێ ڤە دچیت، لەوڕاژی مە وەک وەزارەتا پێشمەرگەی مەترسیا ‏خوە نیشادایە ھەکە رەوش بڤی شێوەی بیت دێ ھژمارەک دەڤەرێن عیراقێ کەڤنە بن دەستێ ‏داعش و مینا سالا 2014ێ دێ داعش دەستھەلاتێ وەربگریت، ھەتا ترسەکا مەزن ل دەف ئاکنجیێن ‏ڤان دەڤەران پەیداکریە و دترسن داعش جارەکادی ڤەگەڕیت.‏

بەرپرسێ ھەماھەنگیا وەزارەتا پێشمەرگەی دیارکر، رەوشا دەڤەرێن دکەڤنە چوارچوڤێ مادێ 140 ‏یێ دستوورێ عیراقێ زۆر یا ئالۆز و نە جێھگیربوی ددەمێ نوکەدا، ئەڤەژی پشتی ڤەکێشانا ھێزێن ‏پێشمەرگەی دھێت لسالا بۆری دا، کو ب ئەگەرێ روویدانێن 16ی ئۆکتۆبەرێ پێشمەرگەی ل ئەڤان ‏دەڤەران نەمایە و ھێزێن حەشدا شەعبی و سوپایێ عیراقێ نەشێن کۆنتڕۆلا رەوشێ بکەن، ژ بەر کو ‏خەلک بخوە ھەڤکاریا ئەڤان ھێزان ناکەت و سەرەدەریا وان ھێزێن عیراقێ ژی وەک پێدڤی نینە ل ‏گەل خەلکی، ھەروەسا ئەگەرێ دی یێ ئالۆزبوونا رەوشا دەڤەرێن کوردستانێ بۆ نە شارەزایا ھێزێن ‏عیراقی ڤەدگەڕیت کو خەلکێ دەڤەرێ نینە و چو زانیاریێن دروست و شارەزایێ لدۆر رەوشا ئەڤان ‏دەڤەران نینە ھەتا بشێن ب ساناھی کۆنتڕۆل بکەن.‏

عەمید رۆکن ھەژار عومەر گۆت: مە داخوازکریە ل ھەڤپەیمانێن نێڤدەولەتی کریە پێشمەرگە ‏ڤەگەڕیت دەڤەرێن کوردستانی، چونکە ب دیتنا من تنێ چارەسەر ڤەگەڕیانا پێشمەرگەیە بۆ ئەڤان ‏دەڤەران و چێکرنا ھێزەکا ھەڤبەشک د ناڤبەرا پێشمەرگە و ھەڤپەیمان و عیراقێ دا، ھەتا ‏ھەڤپەیمان ژی ل گەل ئەڤێ پێشنیارا مەنە بۆ ڤەگەڕیانا ھێزێن پێشمەرگەی، بەلێ ھێشتا ‏نەگەھشتینە رێککەفتنێ ل گەل بەغدا، بەری نوکە ژبەر بابەتێ ھەلبژارتنان بەغدا وەک پێدڤی یا ‏بەرھەڤ نەبو بگەھینە رێککەفتنێ، بەلێ پیشتی ھەلبژارتن دووماھی ھاتی و حوکمەتا نوو ھاتیە ‏ئاڤاکرن، گوھۆڕین ب سەر ھەلویستێ بەغدا ژی ھاتینە کرن، ھەکە ھەماھەنگی د ناڤبەرا پێشمەرگە ‏و ھەڤپەیمان و ھێزێن عیراقێ دا نەبیت، ئەڤە بێگومان دێ رەوش بەرە ب ئالۆزیەکا زۆر زێدەتر ‏بچیت و داعشێ مفا ل ئەڤێ ڤالاھیا ناڤبەرا ھێزێن پێشمەرگە و عیراقی وەرگرتیە، ئەم ئەڤرۆ یێت ‏زانین قەبارێ داعش چەند مەزنتربویە لبەرێ و مەترسیا وانا چەندە بۆسەر عیراقێ، لەوڕا ژبلی ‏چێکرنا ھەماھەنگیێ بۆ لێدانا داعش چو چارەسەرێن دی نینن، بتایبەتی ل دەڤەرێن لڤین تێدا ‏زێدەبوی.‏

ئه‌ڤرۆنيوز:

پشتى به‌غدا به‌رهه‌ڤيا خوه‌ بۆ چاره‌كرنا كێشان ل گه‌ل هه‌رێما كوردستانێ دياركرى، شانده‌كێ حوكمه‌تا هه‌رێما كوردستانێ ب سه‌رۆكاتيا نێچيرڤان بارزانى سه‌رۆك وه‌زيرێن هه‌رێمێ بۆ دانوستاندنێ ل دۆر كێشين هه‌لاويستى، دێ سه‌ره‌دانا به‌غدا كه‌ت.

سه‌فين دزه‌يى، په‌يڤدارێ حوكمه‌تا هه‌رێما كوردستانێ راگه‌هاند، چه‌ند رێككه‌فتنه‌كێن ده‌ستپێكى ل گه‌ل حوكمه‌تا عيراقێ يێن هاتينه‌ ئه‌نجامدان ول دۆر هه‌موو كێشێن نه‌هاتينه‌ چاره‌كرن ژى، شانده‌كێ بلند يێ حوكمه‌تا هه‌رێما كوردستانێ دێ سه‌ره‌دانا به‌غدا كه‌ت.

ل دووڤ كوردستان 24، گرنگترين ئه‌و بابه‌تێن شاندێ حوكمه‌تا هه‌رێما كوردستانێ دێ دانوستاندنێ  ل دۆر وان كه‌ت ل به‌غدا پێك دهێن ژ كێشا په‌ترۆلێ، پشكا هه‌رێما كوردستانێ ژ بودجا گشتى يا عيراقێ وره‌وشا كه‌ركووكێ وشاندێ حوكمه‌تا هه‌رێمێ دێ ب سه‌رۆكاتيا نێچيرڤان بارزانى سه‌رۆك وه‌زيرێن هه‌رێما كوردستانێ بيت.