ئەڤرۆ، رەمەزان ھەرنی:‏

ئەندامەکا پەرلەمانێ کوردستانێ دیارکر، بڕیاردان ل سەر خولا نوو یا ‏پەرلەمانێ کوردستانێ گەلەک زویە ژ بەر کو ھێشتا ژیێ خولا پێنجێ یا ‏پەرلەمانێ کوردستانێ ل روژێن دسەتپێکێدایە، بەلێ ئەڤ خولە دێ بیتە جھێ ‏باوەریا پڕانیا خەلکێ کوردستانێ ژ بەر کو دھێتە دیتن کو گەلەک قانون و ‏بڕیارێن گرنگ ل بەرژوەندیا گشتی بھێنە دەرخستن.‏

روبینا عەزیز ئەنداما پەرلەمانێ کوردستانێ بۆ روژناما ئەڤرۆ گوت: دھێتە ‏پێشبینی کرن ئەڤ خولا نوو یا پەرلەمانێ کوردستانێ گەلەک قانون و بریارێن ‏گرنگ بھێنە دەرخستن، یا گرنک ئەوە پەرلەمانتارێن ئافرەت بشێن کومەکا ‏قانون و رێسایێن جوان ل بەرژوەندیا ئافرەتێ و خێزانێ دەربیخیت و کار ژ بۆی ‏ئێکسانیا مافێ مروڤان د ناڤبەرا ژن و زەلاماندا بھێتە کرن.‏

روبینا گوت: ھەکە مەبەست و ڤیانا ئافرەتێ کارکرن بیت دشێت کارێن گرنگ و ‏باش ل ناڤ جڤاکی ئەنجامبدەت، دڤێت ئافرەت جودا ل رەگەزێ بەرامبەر ‏بزاڤێن رازیکرنا وەلاتیا بکەن، بەریا بزاڤا رازیکرنا پارتا خوە بکەت، دخوازم ‏ل کابینا نوو یا حوکمەتێ پتر ل کابینێن بۆری پۆستێن وەزاری ب ئافرەتا بھێنە ‏دان، تایبەت ھەردوو وەزارەتێن پەروەردەو ئابۆری کو لاپەرێن سەرەکی یێن ‏ژیانێ نە، پەروەردە لاپەرێ سەرەکیێ ژیانا ھەر ئافرەتەکێ یەو دەستپاکی ‏سالۆخەتەکێ نەگوھۆری ھەر ئافرەتەکێ یە د ژیانێدا باشترین وەزیر بۆ ‏وەزارەتێن پەروەردی و دارایی ئافرەتن.‏

ئه‌ڤرۆ نيوز، قائید میرۆ:

بڕیارە نێزیک پارتی دیموکراتی کوردستان وەک ھێزا ئێکێ یا سەرکەفتی د ‏ھەلبژارتنێن پەرلەمانێ کوردستانێ دا دەست ب دانوستانان بکەت، بۆ پێک ‏ئینانا کابینا نوویا حوکمەتا ھەرێما کوردستانێ و شیرەتکارەکێ پەرلەمانێ ‏کوردستانێ ژی دبێژیت، ڤێجارێ نابیت لایەنێن پشکداریێ د حوکمەتێ دا ‏بکەن ل دەرڤەژی پاڤێنە حوکمەتێ.‏

دکتۆر مەدحەت سلێمان، شیرەتکارێ پەرلەمانێ کوردستانێ دیارکر” پێک ‏ئینانا کابینا نوویا حوکمەتا ھەرێما کوردستانێ وەک بەرێ نینە و یا ب ‏ساناھیە، ژبەر کو پارتی دیموکراتی کوردستان 45 کۆرسیێن پەرلەمانی ھەنە ‏و دشێت بشێوەیەکێ ساناھی حوکمەتێ پێک بینیت، بەلێ نوکە پارتی ‏چاڤەڕێی ڤەگەڕیانا سەرۆک بارزانیە بۆ چاوانیا دەستپێکرنا دانوستانان لدۆر ‏پێک ئینانا حوکمەتا نوویا کوردستانێ، گورەی زانیاریێن من پارتی و ئێکەتی ‏دێ پێکڤە حوکمەتێ راگەھانن، بەلێ پارتی دخوازیت لایەنێ سیێ ژی ‏پشکداریێ بکەت کو ئەوژی بزاڤا گۆڕانە، ھەگەر بزاڤا گۆڕان بخوازیت ‏پشکدایێ د کابینا نوویا حوکمەتێ دا بکەت، ئێکگرتووژی خوە ئێکلا کریە دێ ‏ببنە ئۆپۆزسیۆن، ھندی کۆمەلا ئیسلامیەژی بێدەنگی ھەلبژارتیە ددەمێ ‏نوکەدا، ئەز پێشبینی دکەم پێک ئینانا حوکمەتێ د ناڤبەرا سێ ھێزان بیت ‏ئەوژی پارتی و ئێکەتی و گۆڕان، ھەرچەندە ئێکەتی حەزناکەت گۆڕان ‏پشکداریێ د حوکمەتا داھاتیا ھەرێما کوردستانێ دا بکەت، چونکە دەمێ ‏گۆڕان پشکداریێ بکەت دێ بەلافکرنا پۆستێن حوکمەتێ گورەی ھژمارا ‏کۆرسیێن پەرلەمانی بیت ئێکەتیێ زۆر پۆست بەرناکەڤن وی دەمی.‏

ئەڤی شیرەتکارێ پەرلەمانێ کوردستانێ گۆت: پارتی ھەتا نوکە پێداگیریێ ل ‏سەر ئەنجامێن ھەلبژارتنان بۆ بەلاڤکرنا پۆستێن کابینا نوویا حوکمەتێ ‏دکەت، ئانکو لدووڤ ئەنجامێن ھەلبژارتنان ھەر لایەنەکی چەند کۆرسی ھەبن ‏لدووڤ کۆرسیان پۆست بھێنە بەلافکرن نەک زێدەتر، بەلێ ھەکە لایەنێ سیێ ‏کو بزاڤا گۆڕانە پشکداری حوکمەتێ نەکەت، ئەڤە دێ ب شێوەیەکێ دی ‏پارتی و ئێکەتی د ناڤبەرا خوەدا پۆستێن حوکمەتێ بەلاڤ کەن، ھێشتا ‏دیارنینە دێ ل سەر چو بنەمایەکی بگەھنە رێککەفتنێ لدۆر پێک ئینانا ‏حوکمەتا ھەرێما کوردستانێ.‏

دکتۆر مەدحەت سلێمان ئاماژەدا، پێدڤیە د خۆلا ڤێجارێ دا پارتی کار ل سەر ‏ڤێ چەندێ بکەت ھەر لایەنەکێ سیاسی خوە ئێکلا بکەت ھەکە پشکداری د ‏حوکمەتێ دا کر، نابیت پێیەک دناڤا حوکمەتێ و پێیەک ئۆپۆزسیۆن بیت، ‏ھەرلایەنەکێ پشکداریێ حوکمەتێ و سەرۆکاتیا پەرلەمانی دا بکەت، دبیت ب ‏بەرنامێ حوکمەتێ رازی بیت و نابیت لایەن ھەبیت دناڤا حوکمەتێ دا یێ ‏پشکدار بیت و دژی کارێن حوکمەتێ ژی کار بکەت، و ل راگەھاندنێ ھێرشی ‏حوکمەتێ بکەت، ئەڤە ل سەرانسەری جیھانێ بڤی شێوەی حوکمەت ‏بڕێڤەدچن، نەک وەکی قۆناغێن بۆری لایەنێن سیاسی دەستپێکێ پشکداریێ د ‏حوکمەتێ دا بکەن و پۆستێن بلند ھەبن، بەلێ ل دەرڤەی حوکمەتێ پاڤێنە ‏پیستێ حوکمەتێ و دژی حوکمەتێ کار بکەن.‏