ئەڤرۆ نيوز:‏

یاریێن گەرا چارێ یێن قوناغا کومان ژ قارەمانیا یانێن ئوروپا قارەمانێن خولان بریارە ئەڤ شەڤە ‏بەردەوامی پێ بھێتە دان و د یاریێن ئەڤ شەڤە دا ھەردو یانێن مانچستەر یونایتد یا ئنگلیزی و ڤالنسیا یا ‏ئسپانی د مەترسیا ب جە ھێلانا قارەمانیێ دا ھەکە نەشیان سەرکەفتنێ تومار بکەن.‏

د کوما ھەشێ دا یانا ڤالنسیا یا ئسپانی دێ مێڤانداریا یانا بونج بویز یا سویسری کەت، یانا ڤالنسیا ژ ‏سێ یاریێن بوری ب تنێ دو خال ب دەستڤە ئیناینە ب وەکھەڤیێ ل گەل یانا دێ یاریێ د گەل کەت و ‏یانا مانچستەر یونایتد کو د ڤێ یاریێ دا یانا ڤالنسیا یا داخوازکریە سێ خالێن یاریێ ب دەستڤە بینت ‏داکو ھیڤیێن خوە ب شێوەکێ تمام ژ دەست نەدەت و ڤالنسیا دێ پێشڤە چیتە رێزا دویێ ھەکە ‏یوڤانتوس سەرکەفتن ل سەر مانچستەر یونایتد تومارکر.‏

ژ لایەکێ دویڤە ئەرکێ یانا مانچستەر یونایتد ب ساناھیترە ژبەرکو چار خال یێن ھەین، لێ یا ‏داخوازکریە ب ئەنجامەکێ سەرکەفتی یاریا خوە ل گەل یوڤانتوس ل یاریگەھا وێ ب دووماھی بینت ‏ئەوژی سەرکەفتن یان ب کێماسی وەکھەڤی و ھەکە ئەڤ چەندە ب جە نەئینا و یانا ڤالنسیا شیا ‏سەرکەفتنێ ل سەر یانا سویسری تومار بکەت دێ ھێتە پێشیا وێ و ھەلویستێ وێ بو ئێکلاکرنێ دێ ‏مینت ل گەل ڤالنسیا د گەرا دووماھیێ دا ژبو ب دەستڤەبرنا پلێتا دویێ یا دەربازبونێ بو قوناغا دویێ.‏

د کوما پێنجێ دا ھەردو یانێن ئەیاکس ئەمستردام یا ھولەندی و بایرن میونخ یا ئەلمانی ئەوێل ل دویڤ ‏ئێک دھێن ل رێزێن ئێکێ و دویێ ب حەفت خالان د یاریێن خوە یێن ئەڤ شەڤە دا ب کێماسی پێدڤی ‏ب خالەکێ نە دا پێنگاڤەکا مەزن بەرب قوناغا دویێ پاڤێژن ئەوژی یانا بایرن میونخ مێڤانداریا یانا ‏ئەیاک ئەسینا یا یونانی خودانا رێزا دوماھی بێ خال دکەت و ئەیاکس ئەمستردام دبیتە مێڤانا یانا ‏بنفیکا یا پرتەگالی خودانا رێزا سییێ ب سێ خالان کو یانا پرتوگالی ژی ھیڤیێن ھەین ھەڤرکیا ئێک ژ دو ‏پلێتێن ڤێ کومێ بکەت ب مەرجەکی د یاریا خوە یا ڤێ گەرێ دا سەرکەفتنێ تومار بکەت و ل ھەمبەر ‏ھەڤرکا وێ یا سەرەکی ل سەر قارەمانیا کومێ یانا ئەلمانی توشی خوسارەتیێ یان وەکەفیێ بیت.‏

د کوما شەشێ دا ھەر چار یانێن ڤێ کومێ ھیڤیێن دەربازبونێ یێن ھەین ژبەرکو سەرکێشا کومێ شەش ‏خال یێن ھەین و ھەڤرکا وێ لیون پێنج خال و ھەردو یانێن رێزا سیێ و چارێ دو خال یێن ھەین.‏

ل یاریگەھا خوە یانا مانچستەر سێتی دێ مێڤانداریا یانا شاختار دونیستیک یا ئوکرانی کەت و ھەتا ‏رادەکێ مەزن ئەرکێ یانا ئنگلیزی یێ ب ساناھی یە ژبەرکو ل یاریا بوری ب سێ گولان بێ بەرامبەر ‏سەرکەفتن ل سەر ڤێ یانێ تومارکربوو و زێدەتر ھەموو یاریزانێن وێ د بەرھەڤن، لێ یانا ئوکرانی ژی ‏ھیڤیێن ئێک ژ پلێتێن ڤێ کومێ یێن ھەین.‏

ژ لایەکێ دویڤە ئەرکێ یانا لیون یا فرەنسی یێ ب ساناھی نابیت دەمێ مێڤانداریا یانا ھەڤینھام یا ‏ئنگلیزی دکەت و د ڤێ یاریێ یانا لیون یا داخوازکریە سەرکەفتنێ تومار بکەت ھەکە بڤێت بەری یاریێن ‏گەرێن دووماھیێ ھەلویستێ خوە باش بکەت و ئەڤ چەندە دەمەکی دایە یانا ھوڤینھایم ژی دێ ھەمی ‏شیانا مەزێخیت پێخەمەت گەشکرنا ھیڤیێن خوە و ھەکە پلێتا دویێ ژی ب دەستڤە نەئینت چونا خوە ‏بو خولا یانێن ئوروپا خوش بکەت.‏

د کوما حەفتێ دا ھەڤرکی ل سەر ھەردو پلێتێن دەربازبونێ یا بەردەوامە ل ناڤبەرا ھەرسێ یانێن روما ‏سەرکێشا گومێ ب شەش خالان و ریال مەدرید ب ھەمان ھژمارا خالان و سیسکا موسکو ب چار خالان و ‏ئەڤ شەڤە یانا ریال مەدرید ب سەرکێشیا راھێنەرێ خوە یێ بەروەخت سانتیاگو سولاری دێ کەڤیتە ‏بەرامبەر ئەزمونا دویێ پشتی وەرگرتنا ڤی ئەرکی پشتی ل یاریا خولا ئسپانیا یا ئێکێ سەرکەفتن ‏تومارکری و سەرکەفتنا ریال د ڤێ یاریێ دا دبیتە ببیتە ھاریکار و ھاندەر سەروکێ یانێ فلورنتینو پێرێز ‏پشتبەستنێ ل سەر بکەت و ب فەرمی ببیتە راھێنەر دەمێ یاریا خوە ل گەل یانا ڤیکتوریا بێلزن یا ‏چیکی دکەت و ھەتا رادەکێ مەزن سەرکەفتنا ریال یا نێزیکی و دێ رێکا وێ بەرامبەر دەربازبونێ بو ‏قوناغا بھێت ھێتە خوشکرن ب مەرجەکی یاریا دناڤبەرا ھەردو یانێن روما و سیسکا موسکو ل روسی ب ‏وەکھەڤی ب دووماھی بھێت یان یانا روسی سەرکەفتنێ تومار بکەت.‏

بو ڤێ یاریێ راھێنەرێ ریال لیستەک ب ناڤێن یاریزانێن پشکداری راگەھاندیە کو ناڤێن یاریزانان ‏مارسێلو، دانی کارفاخال، رافائێک فاران، فییخو و ماریانو دیاز ل گەل دا نینە ب ئەگەرا ھنگافتنێ.‏

ئه‌ڤرۆ:‏

رۆژناما مارکا ئسپانی ل دووڤ چەند ژێدەرێن سایتێ فوتبول لیکس چەند بەلگە بەلاڤ کرینە تێدا یانا ریال ‏مەدرید یا ئسپانی تومەتبار کریە ب دروستکرنا قارەمانیا سوپەرا ئوروپی ئەو ژی قارەمانیەکە نزیکی ‏قارەمانیا ئوروپا قارەمانێن خولان ( چامپیونزلیگ).‏

رۆژناما مارکا زێدەتر دیارکریە سەرەرای رێککەفتن ھاتیە کرن شێوازێ قارەمانیا ئوروپا قارەمانێن خولان ‏بھێتە گوھۆرین ب شێوازەکێ نووی لێ ئەندریا ئەنیێلی سەروکێ دەستەیا یانێن ئوروپی‎ ‎خویاکر ئەڤ ‏گوھۆرینێن نوو دێ ل سالا 2021 بن و دبیت قارەمانیەکا پێگوھۆر ژی ھەبیت.‏

ل دووڤ وان ژێدەرێن سایتێ فوتبول لیکس ئاشکرا کرین کو بەری نوکە ب رێکا پوستەکێ 13 لاپەر ‏گەھشتە سەروکێ یانا ریال مەدرید فلرونتینو پێرێز ل 22 ھەیڤا بوری ژلایێ کومپانیا کاپیتال پارتنرز یا ‏وەبەرھێنانێ کو بەری نوکە کا لگەل سەروکێ یانا مەلەکی کریە و تێدا پشتەڤانیا خوە دیارکریە بۆ ڤێ ‏پێنگاڤێ ئەوا دێ قارەمانیەکا نوو دروست کەن و تێدا بەحس ل شێوازێ دروستکرنا قارەمانیا سوپەرا ‏ئوروپی دکەت ل سالا 2021 کو ئەڤ قارەمانیە دێ بۆ ماوێ بیست سالان بیت ب پشکداریایانێن ‏زلھێزێن ئوروپا ئەوێن پشکداری د قارەمانیا ئوروپا قارەمانێن خولان و ھاتیە پێشنیار کرن 16 یانە ل ‏دەسپێکێ پشکداریێ بکەن ئەو ژی یانێن بایرن میونخ، ریال مەدرید، بەرشەلونە، یوڤانتوس، پاریس ‏سان جێرمان، میلان،مانچستەر یونایتد، مانچستەر ستی، لێڤەرپول، ئارسنال، ئەتلەتیکو مەدرید، ‏روما، ئەنترمیلان، بروسیا دورتموند و مارسیلیا یا فرەنسی.‏

ئەڤ قارەمانیە دێ ھێتە دروستکرن و برێڤەبرن ژلایێ کومپانیەکا ئسپانی ڤە کو تنێ دو کومپانیان پشک د ‏ڤی بواری دا ھەنە کو مەزنترین پشک د ڤێ کومپانیێ دا ریال مەدرید ھەیە ئەو ژی رێژەیا 18.77%.‏

ھەر ل دۆر ڤی بابەتی یانێن پاریس سان جێرمان یا فرەنسی و بایرن میونخ یا ئەلمانی رەدکر ئەوان چو ‏دانوستاندن دەربارەی ڤێ قارەمانیێ دا کربیت سەرەرای کو سەروکێ یانا ئەلمانی کارل ھاینز رومینیگێ ‏تومەتبارە ژ بەرپرسیارەتیا سەرکێشا ڤێ کودەتایێ دژی ئێکەتیا تەپا پێ یا ئوروپی.‏