ئه‌ڤرۆ نیوز ، زنار تۆڤى:
دكتۆر زه‌رده‌شت بابان راوێژكارێ فه‌رمى یێ كۆماریان ل ئه‌مریكا د دیداره‌كێ دا بۆ ئه‌ڤرۆ نیوز دیاركر: كو ئه‌گه‌رێن شكه‌ستنا ستراتیژیه‌تا سه‌ربازى یا ئه‌مریكا ل عیراقێ بۆ گه‌له‌ك ئه‌گه‌ران ڤه‌دگه‌ریت، ژ وان ژى ل سالا 2013 وه‌زاره‌تا به‌رگریا ئه‌مریكا فه‌رمان دابوو، چه‌ندین ئه‌فسه‌رێن شاره‌زا كو ره‌شنووسێ كار و چالاكیێن خوه بنڤێسن د شه‌رێ عیراقێ دا، وان ئه‌فسه‌ران ل سالا 2016 د دو پشكێن جۆدا دا ئه‌و راپۆرته د 1300 لاپه‌ران دا ته‌مام كریه، به‌لێ به‌رى كو ئه‌و راپۆرته ل بازنێ ده‌رڤه یێ سه‌ربازى دا بهێته خواندن، هاته قه‌ده‌غه‌كرن، هه‌روه‌سا ئه‌گه‌رێن شكه‌ستنا سه‌ربازى و ستراتیژیه‌تا ئه‌مریكا ل عیراقێ بۆ چه‌ند خالان ڤه‌دگه‌رن، ژ وان ژى كو د ماوێ شه‌رێ عیراقێ دا پێدڤیا ئه‌مریكا ب سه‌ربازێن زێده‌تر هه‌بوو، ژ پێخه‌مه‌ت سه‌ركه‌فتنێ ل سه‌ر یاخیبوویان و میلیشیاتێن شیعى یێن سه‌ر ب ئیرانێ ڤه، لێ ئه‌و سه‌ربازه ل به‌ر ده‌ستێ هێزێن ئه‌مریكى نه‌بوون، هه‌روه‌سا ئه‌مریكا شكه‌ستن د بزاڤێن راگرتنا ده‌ستێوه‌ردانێن ئیرانێ و سووریێ دا ئینا، ژبه‌ركو ئیرانێ و سووریێ به‌رده‌وام پشته‌ڤانى ل میلیشیاتێن سوننى و شیعى دكر و ئه‌مریكا ژى ستراتیژیه‌تا پێشكه‌فتى و كاریگه‌ر بۆ راگرتنا وێ پشته‌ڤانیێ نه‌بوون، له‌وما ئه‌و پشته‌ڤانى ب ره‌نگه‌كێ به‌رده‌وام مایه.
ناڤهاتى دیاركر ژى: هه‌ڤپه‌یمانى د شه‌ران دا یا سه‌ركه‌فتى نه‌بوو، هه‌روه‌سا به‌ره‌ف پێشڤه‌چوونا سه‌ربازى ئاقاره‌كێ سیاسى وه‌رگرتبوو، له‌وما ژبه‌ر ڤێ چه‌ندێ هه‌ڤپه‌یمانێن ئه‌مریكا هنارتنا سه‌ربازى بۆ عیراقێ سنوردار كربوو، دیسا گاردا نیشتیمانى یا عیراقى پێدڤى ب مه‌شقه‌كا زێده‌تر هه‌بوو، لدووڤ وێ راپۆرتا وان ئه‌رفسه‌ران به‌رهه‌ڤكرى گاردا نیشتیمانى یا عیراقى پێدڤى ب پشتگیریا زێده‌تر یا مادى مه‌شقكرنێ هه‌بوو، هه‌روه‌سا ئه‌گه‌ره‌كێ دى ئه‌و بوو، كو هێزێن عیراقى گه‌له‌ك باوه‌رى ب خوه هه‌بوو، دیسا ب درێژاهیا وى شه‌رى ئه‌ركێ رابه‌راتیا ئه‌مریكا بۆ مه‌شقكرنێ و چه‌كداركرنا هێزێن عیراقى، بۆ ئه‌گه‌رێ باوه‌رى ب خوه بوونا زێده، له‌وما پێدڤیاتیێن عیراقیان هاتبوونه سنورداركرن، هه‌روه‌سا بریارا زوو یا سه‌ربه‌خۆبوونا عیراقیان فشاره‌كا مه‌زن بوو ل سه‌ر سیاسیان.
زه‌رده‌شت بابانى ئه‌و ژى گۆت: ئه‌مریكا سیاسه‌ته‌كا كاریگه‌ر نه‌بوو هه‌مبه‌رى گرتیان، چونكى ئه‌مریكا بریار دابوو، كو مامه‌له‌یا دیلێن شه‌رى ل گه‌ل گرتیێن سه‌ر ب میلیشیاتان دا نه‌كه‌ت، ئه‌ڤێ ژى وه‌كر كو گه‌له‌ك ژ سوننى یان پشتى ئازادكرنا وان، دووباره بزڤرنه شه‌ركرنێ ل گه‌ل هێزێن ئه‌مریكیان، هه‌روه‌سا پرۆسا دیموكراسى پشتى ئازادكرنا عیراقێ سه‌قامگیرى په‌یدا نه‌كر، دیسا فه‌رماندێن سه‌ربازى یێن ئه‌مریكى باوه‌ریا وان وه‌سابوو، كو هه‌لبژارتنێن سالا 2005 یێن عیراقێ دێ ئارامیێ په‌یدا كه‌ن، به‌لێ ل جهێ ئارامیێ هه‌لبژارتن بوونه ئه‌گه‌رێ په‌یدابوونا كێشێن مه‌زهه‌بى و تائیفى ل عیراقێ.
نيشاندان