ئه‌ڤرۆ نیوز ، زنار تۆڤى:

ئه‌ندامه‌كێ به‌رێ یێ په‌رله‌مانێ كوردستانێ به‌حسێ په‌یوه‌ندیێن دبلۆماسى یێن كوردان ل گه‌ل وه‌لاتێن جیهانى كر و د دیداره‌كێ دا بۆ ئه‌ڤرۆ نیوز دیاركر: ژ ئه‌گه‌رێ وێ داخستنا ل پشتى خیانه‌تا 16 ئوكتۆبه‌رێ ل كوردستانێ هاتیه‌ روودان، هه‌روه‌سا ب ئه‌گه‌رێ هه‌لویستێ هنده‌ك ده‌وله‌تێن هه‌رێمى ل سه‌ر ئه‌نجامدانا ریفراندۆمێ ل هه‌رێما كوردستانێ، لێ ئه‌م دشێین بێژین ئه‌و سیاسه‌تا سه‌ركه‌فتى یا سه‌رۆك بارزانى و نێچیرڤان بارزانى ب كارئیناى ل كوردستانێ ئه‌م شیاین رۆژ ب رۆژ ژ وێ دابرینێ و داخستنێ ده‌ربچین و نوكه‌ ژى كوردان په‌یویه‌ندیێن ڤه‌كرى یێن گه‌له‌ك باش هه‌نه‌، ل گه‌ل عیراقێ و ئیرانێ و توركیا و ده‌وله‌تێن كه‌نداڤى و هه‌روه‌سا ل گه‌ل ئورۆپا و ئه‌مریكا و نه‌ته‌وێن ئێكگرتى ژى، دیسا هێدى هێدى ئه‌م دێ ڤه‌گه‌رینه‌ سه‌ر ئاستێ خوه‌ یێ جاران، ل داهاتى دا ژى دێ هژمارا نوونه‌رێن هه‌رێما كوردستانێ ل ده‌رڤه‌ و هژمارا كونسۆلخانان ل هه‌رێمێ بلند بن و دێ زێده‌تر لێ هێن.

دكتۆر فه‌رسه‌ت سۆفى ئه‌ندامێ خولا به‌رێ یێ په‌رله‌مانێ كوردستانێ زێده‌تر دیاركر: ئه‌و په‌یوه‌ندیێن دبلۆماسى یێن حوكمه‌تا هه‌رێمێ چێكرین په‌یوه‌ندیێن واقعى نه‌ و نه‌ گرێداینه‌ ب رێیا حوكمه‌تا عیراقێ ڤه‌، ئه‌و په‌یوه‌ندى د گرێداینه‌ ب پێگه‌هێ ب هێز یێ هه‌رێما كوردستانێ، ب تایبه‌تى ئه‌و رۆلێ مه‌زن یێ هه‌رێما كوردستانێ گێراى د شه‌رێ دژى رێكخراوا تیرۆرستى یا داعشێ دا، دیسا ئه‌و پێگه‌هێ ب ئه‌گه‌رێ نه‌فتێ یێ كوردان هه‌ى، وه‌كریه‌ كو پشكه‌كا وان په‌یوه‌ندیان ببنه‌ په‌یوه‌ندیێن واقعى، ئه‌و په‌یوه‌ندیه‌ ب رێیا حوكمه‌تا عیراقێ تێپه‌ر نابن، چونكى هه‌كه‌ حوكمه‌تا عیراقێ پێ چێببا، دا ژمێژه‌ پشكه‌كا مه‌زن یا وان په‌یوه‌ندیان برن، به‌لێ ل گه‌ل هندێ ژى پێدڤیه‌ د وارێ په‌یوه‌ندیێن حوكمه‌تا هه‌رێما كوردستانێ ل گه‌ل عیراقێ وه‌كو “مه‌له‌فه‌كێ” بچنه‌ پێش.

ناڤهاتى گۆت ژى: بۆ پێشخستنا ڤان په‌یوه‌ندیان پێدڤیه‌ د وارێ ئابوورى دا كار بكه‌ین و بزاڤێ بكه‌ین، به‌رژه‌وه‌ندیێن وان وه‌لاتان ل هه‌رێما كوردستانێ جێگیر بكه‌ین، یێن كو په‌یوه‌ندیێن ئابوورى ل گه‌ل هه‌رێما كوردستانێ هه‌ین، كو ئه‌ڤه‌ خاله‌كا گه‌له‌كا گرنگ و ئه‌رێنى یه‌، دیسا دڤێت ئه‌م ب رێیا ده‌رگه‌هێ مافێ مرۆڤى و پێشخستنا دیموكراسیێ ل هه‌رێما كوردستانێ و پێگه‌هێ دیموكراسى یێ مافێ مرۆڤى ل هه‌رێما كوردستانێ نیشا جیهانێ بده‌ین و په‌یوه‌ندیه‌كا ب هێز دروست بكه‌ین، هه‌روه‌سا دڤێت ئه‌م وى پێگه‌هێ گرنگ پێشبێخین، چونكى ئه‌م وه‌كو هه‌رێما كوردستانێ ل جهه‌كێ ستراتیجى یێ گرنگ داینه‌، ئه‌م دشێین ئه‌وى جهێ جیۆپۆلیتیك یێ مه‌ هه‌یى، ب باشى ب كار بینین، بۆ هندێ كو هه‌رێما كوردستانێ ل سه‌ر ئاستێ جیهانێ وه‌كو جهه‌كێ گرنگ مامه‌له‌ ل گه‌ل بهێته‌ كرن، هه‌روه‌سا د وارێ دبلۆماسى ژى دا كورد شیاینه‌ پێنگاڤێن باش بهاڤێژن و ئه‌م گه‌له‌ك باش چووینه‌ پێش ژى، به‌لێ هێشتا مه‌ پێدڤى ب دبلۆماسیه‌ته‌كا چر و پرتر هه‌یه‌، دیسا دڤێت چاكسازیه‌كا گرنگ د وارێ په‌یوه‌ندیێن خوه‌ دا بكه‌ین ل گه‌ل وه‌لاتێن ده‌رڤه‌، داكو ل داهاتى پێنگاڤێن مه‌زنتر بهاڤێژین.