ئه‌ڤرۆ نیوز، نه‌وزاد هلۆرى:

وه‌زاره‌تا خواندنا بلند و ڤه‌كولینێن زانستى دیاركر كو پشتى ڤه‌كرنا ده‌رگه‌هێ بلندكرنا سكالایان بو قوتابیێن نه‌رازى یێن رێزا 12ێ ئاماده‌یى ، وان زێده‌تر ژ 15 هزار و 700  قوتابیێن دى ل زانكۆ و په‌یمانگه‌هێن هه‌رێما كوردستانێ وه‌رگرتن ، جهێن هژماره‌كا دى یا قوتابیان ژى هاته‌ گوهۆرین.

عه‌باس ئه‌كره‌م، په‌یڤدارێ وزاره‌تا خواندنا بلند و ڤه‌كولینێن زانستى گۆت: (پشتى كو قوتابیێن نه‌رازى ل هه‌رێما كوردستانێ سكالا بو وه‌زاره‌تا خواندنا بلند و ڤه‌كولینێن زانستى بلندكرى و پێداچۆن دوان سكالایان دا هاتیه‌كرن، هژماره‌كا زور یا قوتابیان دووباره‌ وه‌رگرتن ڤه‌).

زێده‌تر گۆت: (وه‌زاره‌تا خواندنا بلند یا هه‌رێما كوردستانێ نه‌ڤیایه‌ چو قوتابى ل مالێن خوه‌ بمینن و ماندووبوونا وان به‌رئاڤ دا بچیت ژبه‌رڤێ چه‌ندێ ‌وان ده‌رفه‌ته‌كا دى دایه‌ قوتابیان ، و ژسه‌رجه‌مێ 19 هزار و 854 سكالایێن كو هاتینه‌ بلندكرن د ئه‌نجام دا 15 هزار و 763 هاتنه‌ وه‌رگرتن، و چار هزار و 91 قوتابیێن دى جهێن خوه‌ ل كولیژه‌كێ بو كولیژه‌كا دى گوهۆرى یان ژ په‌یمانگه‌هان هاتنه‌ گوهۆرین بو زانكویان  و هاتنا ناڤێن قوتابیان ژى لسه‌ر ره‌زامه‌ندیا وان بوویه‌  و ئه‌و جهێ قوتابى سكالا ژبو وى بلندكرى ل وى جهى هاته‌ وه‌رگرتن).

ب گوره‌ى ئاخفتنێن عه‌باسى 674 قوتابى ده‌رچویێن خولا ئێكى بوون و زێده‌تر گۆت: (نوكه‌ ل زانكو و په‌یمانگه‌هێن هه‌رێما كوردستانێ 43 هزار و 426 قوتابى بو خواندنا سالا 2018-2019 هاتینه‌ وه‌رگرتن، وه‌زاره‌تا خواندنا بلند ب جوداهیا سێ نمره‌یان قوتابیێن ده‌رچویێن رێزا 12ێ بو خولا ئیكێ و دویێ وه‌رگرتن).

ئه‌ڤرۆنيوز:

شاره‌زايێن ئه‌مريكى ل دۆر ره‌وشا كه‌ركووكێ ره‌خنێ ل هه‌لويستێ ئيدارا ئه‌مريكى دگرن ل هه‌مبه‌ر سياسه‌تا وان يا شاش پشتى روودانێن داگيركرنا كه‌ركووكێ وده‌ڤه‌رێن دى يێن كوردستانى يێن ده‌رڤه‌ى ئيدارا هه‌رێما كوردستانێ ژلايێ له‌شكرێ عيراقێ وحه‌شدا شه‌عبى ڤه‌.

كێن پۆله‌ك، شاره‌زا دسياسه‌تا ده‌رڤه‌ يا ئه‌مريكا دا، داخوازا لێبۆرينێ ژ خه‌لكێ هه‌رێما كوردستانێ كر وهه‌لويستێ وى ده‌مى يێ ئه‌مريكا ژى ب شاشيه‌كا مه‌زن هژمارت.

پۆله‌ك، ل دووڤ كوردستان 24 دبێژيت” مخابن كه‌ركووك پشتى ئوكتۆبه‌را 2017 كه‌فته‌ دره‌وشه‌كا خراب دا، ئه‌نجامدا ڤالاهى دروستبوو بۆ زڤرينا داعشێ، ب ديتنا من پێدڤيه‌ پێشمه‌رگه‌ وله‌شكرێ عيراقێ پێكڤه‌ وب هه‌ماهه‌نگيا له‌شكرێ ئه‌مريكى، سه‌رپه‌رشتيا پاراستنا كه‌ركووكێ بكه‌ن”.

هه‌روه‌سا گۆت” شێوازێ ره‌فتاركرنا ئه‌مريكا ل ده‌مێ رودانێن كه‌ركووكێ شاشيه‌كا مه‌زن بوو، ئه‌ز وه‌كو ئه‌مريكيه‌ك هيڤيدارم خه‌لكێ كوردستانێ بزاڤا دووباره‌ ب هێزكرنا په‌يوه‌نديێن مه‌ بده‌ن وبزاڤێ بكه‌ن جاره‌كادى باوه‌رێ ب ئه‌مريكا بكه‌ن، هه‌رچه‌نده‌ هه‌كه‌ ئه‌ز كورد بم، دێ زانم ئه‌ڤه‌ كاره‌كێ ب ساناهى نينه‌”.

ديڤيد پۆلاك،شاره‌زا دكاروبارێ رۆژهه‌لاتا ناڤه‌راست دا دبێژيت” گرنگترين تشت ئه‌وه‌ لايه‌نێن سياسى يێن كوردستانێ ململانێ يا ناڤخوه‌يى ب راوه‌ستينن ودووپاتيێ ل سه‌ر ئێكرێزيا نه‌ته‌وى وبه‌رژه‌وه‌نديا خه‌لكى بكه‌ن، دزانم ئه‌ڤه‌ كاره‌كێ ب ساناهى نينه‌، به‌لێ ب ديتنا من كورد فێرى وانه‌يه‌كا گران بوون، ئه‌وژى هه‌كه‌ د ئێكرێز نه‌بن، دێ هێنه‌ دوراندن وهه‌كه‌ دئێكرێز بن دێ دسه‌ركه‌فتى بن”.

ئه‌ڤرۆنيوز:

سه‌رۆكا فراكسيۆنا پارتى ديموكراتى كوردستان ل په‌رله‌مانێ عيراقێ راگه‌هاند، ياداشته‌كا 21 خالى وه‌كو تێبينى وداخوازيێن كوردان ل سه‌ر كارناما حوكمه‌تا نوو يا عيراقێ، مه‌ پێشكێشى عادل عه‌بدولمه‌هدى سه‌رۆك وه‌زيران كريه‌ وچاڤه‌ريێ به‌رسڤێ دكه‌ين.

ڤيان سه‌برى، سه‌رۆكا فراكسيۆنا پارتى ل په‌رله‌مانێ عيراقێ گۆت” مه‌ وه‌كو فراكسيۆنا پارتى ئه‌و ياداشته‌ كو هه‌موو مافێن كوردان بخوه‌ڤه‌ دگريت، پێشكێشى سه‌رۆك وه‌زيرێن عيراقێ كريه‌ بۆ وێ چه‌ندێ ل كارناما حوكمه‌تا نوو دا بهێنه‌ جێگيركرن وبجهئينان، نوكه‌ ژى ئه‌م چاڤه‌رێ به‌رسڤا واناينه‌ ل دۆر داخوازيێن خوه‌، به‌لێ هێشتا كۆمبوونا په‌رله‌مانى نه‌هاتيه‌ كرن تاكو بزانين دێ چ به‌رسڤ بۆ داخوازيێن مه‌ هه‌بيت”.

سه‌رۆكا فراكسيۆنا پارتى ل په‌رله‌مانێ عيراقێ زێده‌تر بۆ مالپه‌ري فه‌رميێ پارتى ديموكراتى كوردستان گۆت” ئه‌و ياداشتا مه‌ هه‌موو مادێن دستوورى وه‌كو مادێن 140 و105، جڤاتا بلند يا فيدرالى وپێشمه‌رگه‌ ومافێ جوتياران، قه‌ره‌بووكرنا كه‌سوكارێن ئه‌نفال وشه‌هيدان وبكارنه‌ئينانا له‌شكرى دژى مه‌، رێزگرتن ل فيدراليه‌تێ وبجهئينانا هه‌ڤپشكيێ وهه‌ڤسه‌نگيێ وته‌وافوقێ ومافێ گه‌لێ كورد دپۆستێن سيادى وله‌شكرى وباليۆزخانان ب خوه‌ڤه‌ گرتيه‌”.

خوياكر ژى” ب ئاخڤتن وب ياداشت ژى مه‌ ئه‌و داخوازيه‌ پێشكێشى سه‌رۆك وه‌زيران كريه‌ وپێدڤيه‌ ئه‌و بكه‌ته‌ به‌نده‌كێ سه‌ره‌كيێ كارناما حوكمه‌تێ ونابيته‌ بهێنه‌ پشت گوه هاڤێتن”.

ئاماژه‌ كر”ئه‌م دخوازين كێشێن خوه‌ ل گه‌ل به‌غدا ب دانوستاندنان چاره‌ بكه‌ين، چونكى چاره‌كرنا كێشان ب دانوستاندنێ دهێته‌ كرن، قۆناغا نوكه‌ ژى، قۆناغا پێشكێشكرنا ياداشت ودانوستاندنايه‌”.