ئه‌ڤرۆنيوز:

سه‌رۆكێ به‌ره‌يێ توركمانى راگه‌هاند، ل گه‌ل به‌رهه‌م سالحى رێكه‌قتين كو هێزێن پێشمه‌رگێ كوردستانێ نه‌ڤه‌گه‌رن بۆ ناڤ باژێرێ كه‌ركووكێ وده‌وروبه‌رێن وى.

ئه‌رشه‌د سالحى، سه‌رۆكێ به‌ره‌يێ توركمانى ئه‌ڤرۆ ئێكشه‌مبى 28/10/2018 ل كه‌ركووكێ بۆ سومه‌ريه‌ نيوز گۆت”  بابه‌تێ ‌زڤرينا هێزێن پێشمه‌رگه‌ى بۆ كه‌ركووكێ ل گه‌ل به‌رهه‌م سالح سه‌رۆك كۆمارا عيراقێ هاتيه‌ ئێكلاكرن كو رێ نه‌هێته‌ دان هێزێن پێشمه‌رگه‌ى بزڤرن بۆ ناڤ باژێرێ كه‌ركووكێ”.

هه‌روه‌سا گۆت”رێككه‌فتن يا هاتيه‌ كرن كو هێزه‌كا له‌شكرى ژ پێكهاتێن دناڤ پارێزگه‌ها كه‌ركووكێ بهێته‌ پێكئينان وسه‌ر ب وه‌زاره‌تا ناڤخوه‌ يا به‌رگريا عيراقێ بيت وئه‌ركێ وێ پاراستنا ناڤ باژێرێ كه‌ركووكێ وده‌وروبه‌رين وى بيت”.

دوهى به‌رهه‌م سالح ل ده‌مێ سه‌ره‌دانا وى بۆ سلێمانيێ راگه‌هاندبوو”ده‌ستپێشخه‌ريه‌كا نوو سه‌باره‌ت به‌رقه‌راكرنا ئاسايشا باژێرێ كه‌ركووكێ هاتيه‌ كرن”.

ئه‌ڤرۆنيوز:

شيره‌تكارێ جڤاتا ئاسايشا هه‌رێما كوردستانێ مه‌سرور بارزانى ئه‌ڤرۆ ئێكشه‌مبى 28/10/2018 پێشوازى ل ماكسيم ماكسيمۆڤ باليۆزێ روسيا ل عيراقێ كر.

دكۆمبوونه‌كێ دا، پێشهاتێن سياسى وله‌شكرى يێن ده‌ڤه‌رێ ب گشتى وپێكئينانا حوكمه‌تا نوو يا هه‌رێما كوردستانێ وچاوانيا چاره‌كرنا كێشێن دناڤبه‌را به‌غدا وهه‌ولێرێ وپه‌يوه‌نديێن ديرۆكى دناڤبه‌را روسيا وهه‌رێما كوردستانێ هاتنه‌ به‌حسكرن.

مه‌سرور بارزانى ل دۆر پێكئينانا كابينا نوو يا حوكمه‌تا عيراقێ ئاماژه‌ ب وێ چه‌ندێ كر كو پێكئينانا حوكمه‌تا نوو يا عيراقێ پێنگاڤه‌كا باش بوو بۆ به‌ر ب پێشڤه‌چوونا پرۆسا سياسى ل عيراقێ وهيڤيدارين سه‌رۆك وه‌زيرێن عيراقێ يێ نوو دنێزيكترين ده‌م دا پێكهاتا كابينا خوه‌ تمام بكه‌ت.

دپشكه‌كا دى يا ديدارێ دا، شيره‌تكارێ جڤاتا ئاسايشا هه‌رێما كوردستانێ به‌حسێ لڤينێن تيرۆرستێن داعشێ ل ده‌ڤه‌رێ كوردستانى يێن ده‌رڤه‌ى ئيدارا هه‌رێما كوردستانێ كر

هه‌ردو لا دووپاتى ل گرنگى وب هێزكرنا په‌يوه‌نديان دناڤبه‌را هه‌ردو گه‌لێن كوردستانێ وروسيا كر، ل دۆر وێ چه‌ندێ باليۆزێ روسيا ل عيراقێ ئاماژه‌ كر كو سه‌ركردايه‌تيا سياسى يا روسى ب گرنگى ڤه‌ سه‌حدكه‌ته‌ ره‌وشا كوردان وپێگه‌هێ هه‌رێما كوردستانێ ل رۆژهه‌لاتا ناڤين وراگه‌هاند كو روسيا په‌يوه‌نديه‌كا ب هێز ل گه‌ل هه‌رێمێ يا هه‌ى وكارى بۆ پێشڤه‌برنا زێده‌تر يا وان په‌يوه‌نديان دهه‌موو بواران دا دكه‌ت.

ئه‌ڤرۆنيوز:

ئێڤاريا ئه‌ڤرۆ ئێكشه‌مبى 28/10/2018 وه‌زيرا به‌رگريا ئيتاليا ئێليزابێتا ترێنتا گه‌هشته‌ فرۆكخانا هه‌ولێر يا نێڤده‌وله‌تى وژلايێ كه‌ريم شنگالى وه‌زيرێ پێشمه‌رگه‌ ب وه‌كاله‌ت پێشوازى لێ هاته‌ كرن.

برياره‌ وه‌زيرا به‌رگريا ئيتاليا ل گه‌ل به‌رپرسێن بلند يێن هه‌رێما كوردستانێ كۆم ببيت وبه‌حس ل ره‌وشا هه‌رێما كوردستانێ وعيراقێ بكه‌ن.

ئه‌ڤرۆنيوز:

نێچيرڤان بارزانى، سه‌رۆك وه‌زيرێن هه‌رێما كوردستانێ ئه‌ڤرۆ ئێكشه‌مبى 28/10/2018 پێشوازى ل راشد ئه‌لمه‌نسوورى كۆنسۆلێ ئيماراتێ ل هه‌ولێرێ كر ب هه‌لكه‌فتا ب دووماهى هاتنا كارێ وى.

كونسۆلێ ئيماراتێ سوپاسيا سه‌رۆك وه‌زيران وده‌زگه‌هێن په‌يوه‌نديدار يێن حوكمه‌تا هه‌رێمێ كر بۆ هاريكارى وهه‌ماهه‌نگيێ ل سه‌رخستنا كار وچالاكيێن وى كو بووينه‌ ئه‌گه‌رێ پتر ب هێزكرنا په‌يوه‌نديێن هه‌رێمێ وئيماراتێ، دووپات كر ژى كو ئيمارات گرنگيه‌كا مه‌زن ب په‌يوه‌نديێن خوه‌ ل گه‌ل هه‌رێما كوردستانێ دده‌ت ودێ ئه‌و په‌يوه‌نديه‌ دبه‌رده‌وام بن ژى.

نێچيرڤان بارزانى، كار وچالاكيێن كونسۆلێ ئيماراتێ ل هه‌رێما كوردستانێ ب تايبه‌تى دبوارێ ب هێزكرنا په‌يوه‌نديێن هه‌ردو لا وگه‌هاندنا هاريكاريێن مرۆڤايه‌تى بۆ ئاواره‌ وپه‌نابه‌ران ل سالێن دژوار يێن بۆرى ب بلند نرخاندن وهيڤيا سه‌ركه‌فتنێ بۆ وى خواست دكارێ وى يێ نوو دا، هه‌روه‌سا دياركر كو هه‌رێما كوردستانێ ب گرنگى ڤه‌ سه‌حدكه‌ته‌ په‌يوه‌نديێن خوه‌ ل گه‌ل وه‌لاتێ ئيماراتێ وهاريكارى وئاسانكاريا حوكمه‌تا هه‌رێمێ ژى بۆ كونسۆلێ نوو يێ ئيماراتێ ل هه‌رێما كوردستانێ نيشان دا.