ئه‌ڤرۆ نیوز، زنار تۆڤى:
هونه‌رمه‌ند عه‌مه‌ر گوندى، كو نوكه ل وه‌لاتێ ئه‌لمانیا دژیت، د دیداره‌كێ دا بۆ ئه‌ڤرۆ نیوز دیار كر: وى دووماهیك ئه‌لبۆما خوه یا ب ناڤێ ” ناڤێ ته چیه” ل سالا 2009 به‌لاڤ كربوو، ئه‌ڤه ده‌مێ 11 سالان بوو، وى چو ئه‌لبۆم به‌لاڤ نه‌كربوون، هه‌ر چه‌نده ئه‌و هه‌ر چه‌ند سالان ئه‌لبۆمه‌كێ به‌لاڤ دكه‌ت و دیسان وى ئه‌لبۆمه‌كا نوو به‌رهه‌ڤ كربوو، لێ ژ ئه‌نجامێ شه‌رێ داعش وى ئه‌و ئه‌لبۆمه به‌لاڤ نه‌كر، ئه‌و بۆ خوه ل ده‌لیڤه‌كێ دگه‌ریا داكو ئه‌لبۆما خوه یا نوو به‌لاڤه بكه‌ت، لێ پشتى هنگێ كۆرۆنا به‌لاڤه بوو، له‌وما ئه‌و نه‌شیا ئه‌لبۆما خوه یا نوو به‌لاڤه بكه‌ت، دیسان خه‌لكێ مه ژى یێ د ره‌وشه‌كا نه‌باش دا ژیانا خوه دبورینیت، له‌وما دڤێ ره‌وشێ دا من نه دڤیا ئه‌لبۆما خوه یا نوو به‌لاڤ بكه‌م.
ناڤهاتى زێده‌تر گۆت: ئه‌لبۆما وى یا نوو ب ناڤێ ” ئاڤان” ه، كو په‌یڤێن وێ سترانێ یێن هه‌لبه‌ستڤان موحسن قۆچانى نه، ئه‌ڤ ئه‌لبۆمه ژ 10 تراكان پێك دهێت و هنده‌ك تراك ژى ب شێوێ پۆتپۆرى چێكرینه، هه‌روه‌سا وى دو سترانێن سالا 1989 ب ناڤێن ” تۆ دلى، پرچاته قه‌فتا نێرگزا” نوو كرینه و د ئه‌لبۆما خوه یا نوو دا به‌لاڤ كرینه، ئه‌و دێ ئه‌لبۆما خوه یا نوو ل یۆتیۆبێ خوه به‌لاڤ كه‌ت، ژبه‌ر ره‌وشا نوكه یا خه‌لكێ ئه‌و ئه‌لبۆما خوه ل بازارى به‌لاڤ ناكه‌ت، چونكى نوكه بازارێ ئه‌لبۆمان نه‌مایه، دیسان مه‌ره‌ما وى ئه‌وه خزمه‌تا هونه‌رێ كوردى و ب تایبه‌تى یێ ده‌ڤه‌را به‌هدینان بكه‌ت، هه‌موو مه‌زاختیێن ئه‌لبۆما خوه وى ژ كیستێ خوه داینه، هه‌تا نوكه د وارێ هونه‌رى دا كه‌سێ پشته‌ڤانیا وى نه‌كریه.
عه‌مه‌ر هێشتا دبێژیت: وى ل به‌ره چار سترانان ژ ئه‌لبۆما خوه یا نوو كلیپ بكه‌ت، هه‌ر چه‌نده وى ئه‌و شیان نینن، كومه‌زاختنه‌كا باش ل چێكرنا ڤیدیۆ كلیپێن خوه بكه‌ت، له‌وما وى ئه‌و تشتێن ئه‌و پێدڤى دبیتێ بۆ چێكرنا كلیپان هه‌موو بۆ كور و كچه‌كا خوه كرینه، هه‌موو كارێن وى یێن هونه‌رى ئه‌و دكه‌ن، دیسان كه‌نالێن كوردى گه‌له‌ك هاریكاریا سترانبێژێن ژن دكه‌ن و ئاهه‌نگان بۆ ددانن و كلیپیان ژى بۆ چێدكه‌ن، لێ ئه‌ڤ چه‌نده بۆ مه نینه، هه‌روه‌سا راگه‌هاندنا كوردى وه‌كو پێدڤى هاریكاریا مه ناكه‌ن، له‌وما د مالدا ئه‌ز كارێ خوه یێ هونه‌رى دكه‌م، هه‌روه‌سا ده‌زگه‌هه‌كێ سترانا ” تۆ دلى” بۆ من كلیپ كریه.
ئه‌و چه‌ند ژى ئاشكرا كر: لدووڤ شیانێن خوه ئه‌و دێ هه‌ر ئه‌لبۆمان چێكه‌ت، هه‌ر چه‌نده مودێل و بازارێ ئه‌لبۆمان نه‌مایه، دیسان د ڤان سالێن بورى دا وى چه‌ندین سترانێن سینگل چێكرینه، ب تایبه‌تى ل سه‌ر قاره‌مانیێن پێشمه‌رگێ كوردستانێ ل شه‌رێ دژى داعشان، هه‌روه‌سا هه‌موو داخوازیا وى ئه‌وه كو ئێدى زارۆیێن كوردان ل هه‌موو پارچێن كوردستانێ ته‌نا و ئارام بژین، هندى د ژیانێ دا مابم، دێ خزمه‌تا هونه‌رێ كوردى كه‌م، هه‌روه‌سا ته‌له‌فزیۆنا دهۆك و وار تیڤى گه‌له‌ك خزمه‌تا من كریه، دیسان هه‌كه كه‌سه‌ك هاریكاریا من بكه‌ت، دێ سۆپاسیا وى كه‌م و هه‌كه كه‌س نه‌كه‌ت ژى، ئه‌ز دێ هه‌ر خزمه‌تا هونه‌رێ كوردى كه‌م.
ئەڤرۆ نیوز، هۆشەنگ تاجر:
ئەندامەکێ دەستەیا رێڤەبەر یا رێکخراوا مافێن مرۆڤی یا رۆژهەلاتێ کوردستانێ بۆ ئەڤرۆ نیوز دیار کر کو ئەڤرۆ سپێدێ ل زیندانا ئورمیێ دو گرتیێن کوردێن رۆژهەلاتێ کوردستانێ هاتنە سێدارەدان.
هەمان ئەندامی ئەو یەک ژی دیار کو هەر دو گرتیێن کورد یێن ب ناڤێ ئەمیر حوسێن و عەلی عەبدی بەری نها سزایێ سێدارەدانێ ل سەر وان هاتبوو سەپاندن و ئەڤرۆ ژی ل زیندانا ئورمیێ هاتنە سێدارەدان.
ل گۆر زانیاریێن ئەڤرۆ نیوز هەر دو کەس بەری نها ب تاوانا کوشتنێ سزایێ سێدارەدانێ ل سەر وان هاتبوو سەپاندن.
ئەڤرۆ نیوز:
هایکو ماس وەزیرێ دەرڤە یێ ئەلمانیا راگەهاند کو وەلاتی وی ب چو رەنگەکێ ئێدی چەکان نافرۆشیتە تورکیا و گەلەک گرێبەستێن بەری نها ژی هاتینە هلوەشاندن.
وەزیرێ دەرڤە یێ ئەلمانیا ئەو یەک ژی دیار کر کو تشتێ تورکیا ل سووریێ کری ژ ئالیێ ئەلمانیا ڤە ب چو رەنگەکێ ناهێتە قەبوولکرن و ئەلمانیا ئێدی چەکان نافرۆشیتە تورکیا.
ئەڤرۆ نیوز:
ئەڤرۆ ل باژێرێ مێرسینێ یێ تورکیا دالیا مەحمود برازا سالح موسلیم هەڤسەرۆکێ بەریێ یێ پەیەدێ ب بریارا دادگەهێ ب مەرج هاتە ئازاد کرن.
دەزگەهێن راگەهاندنا تورکیا دیار دکەن کو برازا سالح موسلیم پشتی کو پشکنین بۆ هاتیە کرن ب مەرجێ کو نابیت سەرەدانا دەرڤەی تورکیا بکەت و دڤێت ل ژێر چاڤدێریا دەزگەهێ دادێ بیت و هاتە ئازاد کرن.
ئەڤرۆ نیوز:
ئەڤرۆ دایکا عایشە دایکا سێ شەهیدان وەغەر کر و سەرۆک مەسعود بارزانی ژی پەیامەک بەلاڤ کر.
د پەیاما خوە دا سەرۆک مەسعود بارزانی دیار دکەت کو دایکا عایشە نموونا خوراگریێ و ئازایەتیێ بوو و من ئەو شانسە هەبوو کو سەرەدانا وێ بکەم و گەلەک تشتان ژێ فێر ببم.
سەرۆک بارزانی دیار ژی دکەت کو سەرەخوشیێ ل خزم و کەسوکارێن دایکا عایشە دکەم و خوە ب شریکێ خەما وان دزانم و داخواز ژ خودایێ مەزن دکەم کو رەحمەتیێ ب بهەشتا خوە شاد بکەت.
دایکا عایشە وەکو دایکا شەهیدان دهاتە نیاسین و سێ کورێن وێ د شەرێ ل دژی رێکخراوا تیرۆرستی یا داعشێ دا شەهید بوون و ئەڤرۆ د ژیێ ٩٤ سالیێ دا ژ بەر نەخوشیێ وەغەر کر.
ئەڤرۆ نیوز:
سەرۆکێ حوکمەتا هەرێما کوردستانێ مەسرور بارزانی ل گەل هەڤسەرۆکێ ئێکەتیێ بافل تالەبانی کۆمبوون و د کۆمبوونێ دا بەحسێ ئاریشێن نها ل کوردستانێ و ئالۆزیێن د ناڤبەرا پارتی و ئێکەتیێ دا هاتنە کرن.
ل گۆر زانیاریان هەڤسەرۆکێ ئێکەتیێ دیار کریە کو نابیت ئالۆزیێن د ناڤبەرا پارتی و ئێکەتیێ دا کارتێکرنێ ل کارێ حوکمەتا هەرێما کوردستانێ بکەت و ئەو وەکو ئێکەتی پشتەڤانیێ ل حوکمەتێ دکەن.
ژ ئالیێ خوە ڤە سەرۆکێ حوکمەتا هەرێما کوردستانێ دیار کریە کو کوردستان د قۆناغەکا سەخت دا دەرباز دبیت و ئالۆزیێن نها کارتێکرنەکا خراب ل جڤاکێ کریە و دڤێت هەموو ئالی پشتەڤانیێ ل بەرنامێ چاکسازیێ یێ حوکمەتێ بکەن دا حوکمەت بشێت خزمەتا هەموو وەلاتیان ل هەرێما کوردستانێ بکەت.
ئه‌ڤرۆ نیوز:
رێكخراوا ساخله‌میا جیهانی هوشداریا بلند بوونا ژماره‌یا توشبوویێن ڤایرۆسێ كورونایێ و تانوكه عیراق د قوناغا مه‌ترسیێ دایه.
وائیل حتاحت سه‌رۆكێ تیما فریاگۆزاریا رێكخراوا ساخله‌میا جیهانێ ل عیراقێ راگه‌هاند تانوكه عیراق ژ قوناغا مه‌ترسیێ دا ده‌رباز نه‌بوویه، هێشتا سیناریو ریب ری پێله‌كا بهێزا ڤایرۆسی دایه، هه‌كه رێ و ئاوایێن خو پاراستنێ و دوور كه‌ڤتن ژ كۆمڤه‌بوونێن جڤاكی و گرێدانا ده‌ستگوركان نه هێته بكار ئینان زۆر زێده بن توشبوو، دیار نه‌مانا ڤایرۆسی ب ئاوایه‌كی ئاخڤتن و هیرده‌كاری ژ روویێ زانستی ڤه نینه، مه‌ترسی ژ ده‌وله‌ته‌كێ بۆ ده‌وله‌ته‌كا دی جودایه ئه‌ڤه ژی پێگیربوون ب رێنماییان دهێته گوهارتن، ژماره‌یا توشبوویێن عیراقێ ب پێگیربوون ب رێ و ئاوایێن خوپاراستنێ و كۆنترول ل سه‌ر دهێته‌كرن.
سه‌رۆكێ تیما فریاگوزاریا رێكخراوا ساخله‌میا جیهانی ل عیراقێ راگه‌هاند پێدڤیه ته‌ركیز بهێته‌كرن ل سه‌ر توخیبداركرنێ بۆ تێكه‌لبوونا وه‌لاتیان، هوشداریا ئه‌وێ چه‌ندێ ژی دا بلند بوونا ژماره‌یا توشبوویێن ڤایرۆسی ل رۆژێن چه‌ژنێ هه‌كه رێنمایی نه ئێنه بجهكرن دێ زۆر زێده بیت.
نيشاندان