ئه‌ڤرۆ نيوز:

سەرۆکێ نوونەراتیا ‏ENKS‏ ل ھەرێما کوردستانێ:‏سەرۆکێ نوونەراتیا ئەنجوومەنێ نیشتمانی یێ کوردی ل ھەرێما کوردستانێ دیار دکەت کو ئازادکرنا ‏قەشەیێ ئەمریکی ژ ئالیێ ئەردۆگانی ڤە بۆ ھندێ یە دا ھێرشی رۆژھەلاتێ فراتێ بکەت، ھندەک ‏کەس دبێژن ئەمریکا دی رێ نەدەت، ژ بۆ عەفرینێ ژی وەسا دگۆتن لێ مە دیت کا چاوا ل ‏عەفرینێ ژی ئەمریکا خوە بێدەنگ کر، پەیەدە بەھانا ددەتە دەستێ تورکیا دا ھێرشی رۆژئاڤایێ ‏کوردستانێ بکەت.‏

نۆری بریمو سەرۆکێ نوونەراتیا ئەنجوومەنێ نیشتمانی یێ کوردی ل ھەرێما کوردستانێ د ‏دیدارەکێ دا ل گەل رۆژناما ئەڤرۆ دیار کر کو پەیەدە ب سیاسەتا خوە یا شاش وەسا کر کو ‏عەفرین بکەڤیتە دەستێ تورکیا، شاشیێن پەیەدێ جارەکا دی وەسا کرینە کو ئەردۆگان گەفا ‏ھێرشکرنێ ل رۆژھەلاتێ فراتێ بکەت، بەری چەند رۆژان قەشەیێ ئەمریکی ژی ھاتە ئازادکرن و ‏نھا ئەردۆگان دبێژیت دێ ھێرش کەین و ئەز باوەرم دێ کەن ژی و گۆت: (گەلەک کەس دبێژن ‏ئەمریکا دێ رێ نەدەت کو تورکیا ھێرشی رۆژھەلاتێ فراتێ بکەت، بەری نھا بۆ عەفرینێ ژی ‏ھەمان تشت دھاتە گۆتن لێ تورکیا ل بەر چاڤێ جیھانێ ب ھەموو ھێزا خوە ھێرشی عەفرینێ کر ‏و داگیر کر و چو وەلاتەکێ ژی دەنگێ خوە نەکر، ھەمان تشت بۆ رۆژھەلاتێ فراتێ ژی دێ ھێتە ‏کرن، تورکیا و ئیرانێ بەری نھا ل دۆر کەرکووکێ رێککەفتنەک کربوون، نھا ژی رێککەفتنا وان ل ‏دۆر رۆژھەلاتێ فراتێ یە و ئەمریکا ژی گەھشتیە ھندەک مەرەمێن خوە و ئەز باوەر ناکەم کو چو ‏ئاستەنگیان ل ھەمبەر تورکیا دروست بکەت).‏

ل دۆر گەفێن بەرپرسێن روسیا کو دبێژن ئەمریکا دخوازیت ل رۆژئاڤایێ کوردستانێ دەولەتەکێ ‏دروست بکەت ژی ناڤھاتی دیار کو چو راستی بۆ ھندێ نینن، یا دی پەیەدە بخوە دەولەتا کوردی ‏رەت دکەت و چو بەرنامێن پەیەدێ بۆ ھندێ نینن. داخۆیانیێن پەیەدێ و ھەلویستێ وان یێ شاش ‏ھەمی دەمەکێ بەھانە بۆ دوژمنێن کوردستانێ دروست کرینە کو ھێرشی باژێرێن کوردستانێ بکەن ‏و وێران بکەن، ل باکورێ کوردستانێ د شەرێ خەندەقان دا شکەستن خوارن و چەندین باژێرێن ‏کوردستانێ وێران کرن، عەفرین ژی تووشی ھەمان چارەنڤیسێ ھات و نھا دخوازن بەھانە بدەنە ‏دەستێ ئەردۆگانی کو ھێرشی رۆژھەلاتێ فراتێ بکەت و گۆت: (پەیەدە و ھێزێن سەر ب وێ ھەتا ‏نھا چو تشتەک نەکرینە کو د خزمەتا دۆزا نەتەوی یا گەلێ کوردستانێ دا بیت، بەرۆڤاژی ھندێ ‏گەلەک ئاریشە ژی دروست کرینە، نھا ژی بەھانا ددەنە دەستێ تورکیا و ئەردۆگانی دا ھێرشی ‏رۆژئاڤایێ کوردستانێ بکەن، ئەردۆگان نھا کەسێ ئێکێ یە ل تورکیا و بانگەشا ھەلبژارتنان ژی ‏ناکەت، دەمێ دبێژیت دێ ھێرش کەین ئەز باوەرم ھندەک تشت ھەنە و ئازادکرنا قەشەیی ژی ‏رەنگە ژ بەر ھندێ بیت کو ئەمریکا سۆز دایە تورکیا دێ چو ئاستەنگیان دروست نەکەن).‏

ل دۆر پرۆژێن ئەنجوومەنێ نیشتمانی یێ کوردی ل سووریێ ژی نۆری بریمو راگەھاند کو ئەم ‏دخوازین قەیرانا سووریێ دوور ژ شەری و ب رێیێن سیاسی بھێتە چارەکرن، مە دڤێت د ‏سیستەمەکێ فیدرالی ل سووریێ دا کورد و نەتەوێن دی بگەھنە مافێن خوە، یێن دبێژن کورد نھا ‏دخوازن جودا ببن و دەولەتەکێ دروست بکەن ھەموو بۆ ھندێ نە دا ئاریشان بۆ مە دروست بکەن، ‏باشترین چارەسەری نھا بۆ رۆژئاڤایێ کوردستانێ فیدرالی یە و مە بەری نھا ژی ئەو یەک دیار کریە ‏و گۆت: (مخابن پەیەدە ناھێلیت و ئاریشان دروست دکەت، دیسان دێ ببنە ئەگەرێ ھندێ کو تورکیا ‏ھێرشی رۆژئاڤایێ کوردستانێ بکەت).‏

ناڤبری د دووماھیا ئاخڤتنا خوە دا ئەو یەک ژی دیار کر کو ئارمانجا سەرەکی یا تورکیا و دوژمنێن ‏کوردستانێ ئەڤە دا نەھێلن ھزرا نەتەوی یا رێبازا بارزانی بسەرکەڤیت و ئەو دخوازن رۆژھەلاتێ ‏فراتێ ژی کۆنترۆل بکەن دا ھەرێما کوردستانێ ب تەمامی بھێتە دۆرپێچ کرن، مخابن کورد بخوە ‏ئاریشان بۆ ھەڤدو دروست دکەن، دوھی کەرکووک رادەستی دوژمنێ مە کرن و نھا ژی ھندەک کەس ‏بەھانا ددەنە دەستێ تورکیا دا ھێرشی رۆژئاڤایێ کوردستانێ بکەت و ئاشکرایە ژی دێ دیسان گەلێ ‏مە ئاوارە بیت و دێ ژێرخانا ئابووری یا وەلاتێ مە ژناڤ چیت.‏

ئه‌ڤرۆ نيوز:

لایەنێن کەرکووکێ دخوازن بێی پارتی ھژمارەک بڕیارێن ‏گرنگ دەربارەی رەوشا کەرکووکێ بدەن و بۆ دانانا پارێزگاری ‏و سەرۆکێ جڤاتا پارێزگەھێ ب نھێنی رێکەفتن د ناڤبەرا ‏ئێکەتیێ و لایەنێن عەرەب و تورکومان ھاتیەکرن بەرپرسەکێ ‏پارتی ژی ئاشکراکر، بێی پارتی چو بڕیارێن گرنگ ل ‏کەرکووکێ سەرناگرن، دگەل ڤێ چەندێ ئەم دگەل ‏پشتگوھاڤێتنا چو لایەنێن سیاسی نینە ل پارێزگەھا کەرکووکێ. ‏

لایەنێن سیاسیێن کەرکووکێ گەھشتینە باوەریێ پشتی ‏روویدانێن 16ی ئۆکتۆبەرێ درێژیدان ب دەستھەلاتا سەربازی ‏ھەتا بھێت دێ زیانێن مەزنتر بۆ کەرکووکێ ھەبن، ئەڤەژی ‏بۆیە ئەگەرێ ڤێ چەندێ بزاڤێ بکەن بۆ چارەسەرکرنا ‏ئاریشەیێن کەرکووکێ و بۆچوونا لایەنێن سیاسی لدۆر ‏داگیرکرنێ ھاتیە گۆھۆڕین، ژبەرکو زۆربەیا لایەنێن ‏کەرکووکێ ژبلی پارتی و ئێکگرتووی پشتەڤانیا داگیرکرنا ‏کەرکووکێ ژلایێ حەشدا شەعبی و ھێزێن عیراقی دکر، بەلێ ‏ئاستەنگا سەرەکیا ھەمبەر لایەنێن کەرکووکێ دانانا ‏پارێزگارەکێ کوردە بۆ کەرکووکێ.‏

نوکە ئێکەتی بێی پارتی یا کەفتیە بزاڤان بۆ دانانا ‏پارێزگەرەکێ ئێکەتی بۆ کەرکووکێ و دانا سەرۆکێ جڤاتێ ب ‏تورکومانان گورەی زانیاریێن رۆژناما ئەڤرۆ ئێکەتی و لایەنێن ‏تورکومان و عەرەب گەھشتینە رێکەفتنێ، دکتۆر محەمەد ‏خورشید بەرپرسێ لقێ 3ێ یێ پارتی دیموکراتی کوردستان ل ‏کەرکووکێ بۆ رۆژناما ئەڤرۆ گۆت: مە وەکی پارتی پێ باشە ‏ھەر بڕیارەکا گرنگ دەربارەی کەرکووکێ بھێتەدان، پێدڤیە ‏پێکڤەبیت و چو لایەنەک نەھێتە پشتگوھاڤێتن، ھەتا ئەف ‏بابەتە مە وەکی پارتی دگەل ئێکەتیێ و لایەنێن عەرەب و ‏تورکومانێن کەرکووکێ ژی بەحسکریە، پشتگوھاڤێتنا پارتی ل ‏خیانەتا 16ی ئۆکتۆبەرێ وەرە ھەتا نوکە ئەنجامێن وێ ‏دیاربووینە، لەروڕاژی چو بڕیارێن گرنگ ل کەرکووکێ بێی ‏پارتی سەرناگرن.‏

پارتی یا بەرھەڤنینە ڤەگەڕیت کەرکووکێ ھەتا کەرکووک بن ‏دەستھەلاتەکا داگیرکەرا خۆسەپین بیت، لایەنێن دی یێن ‏کوردی و عەرەب و تورکومانژی دخوازن بھەر شێوەیەکێ بیت ‏پارێزگارەکێ نوو بھێتە دانان ل جھێ پارێزگارێ ب وەکالەت ‏ھەگەر بن دەستێ عەسکەری دا بیت.‏

دکتۆر محەمەد خورشید دیارکر، ھەکە خەلکەک ھەبیت بێی ‏ڤەگەڕیانا پارتی بۆ کەرکووکێ پێنگاڤەکا وەسا پاڤێت بۆ دانانا ‏پارێزگەرەکێ نوو یان ھەر بڕیارەکا گرنگ بێی پارتی بھێتە ‏دەرکرن، ب دیتنامە پێدڤیە دەستپێکێ رەوشا کەرکووکێ ‏بھێتە ئاسایی کرن ڤێجا ئەم ھەموو پێکە بڕیاران لدۆر پرسێن ‏گرنگ بدەین، ڤێ قۆناغێ دا پۆستێ پارێزگاری مافێ کوردانە، ‏ھەر کوردەک زۆرتر خزمەتا کەرکووکێ و کەرکووکیان بکەت ‏ئەڤە ببیتە پارێزگار، ئەڤە بۆچوونا پارتی لدۆر دانانا ‏پارێزگارەکێ نوو، بەلێ ھەردەمێ مادێ 140 یێ دستوورێ ‏عێراقێ ھاتە بجە ئینان، ئەڤە وی دەمی ھەر کەسەک ل ھەر ‏پێکھاتەکا کەرکووکێ و سەر ب کیش لایەنێ سیاسی بیت ‏ئاسایی یە ببیتە پارێزگارێ کەرکووکێ.‏