ئه‌ڤرۆ نيوز:

دبیت ب رەنگەکێ ریژەیی یا ب ساناھی بۆ مە ھەمیان ل دووڤ ھندەک بنەمایێن خوارنا ساخلەم بچین و ‏زێرەڤانیا سەنگێ خوە بکەین، ب تایبەت ھەکە ئەم ل مالێن خوە بین، دێ مە شیان ھەبن کونترۆلا تشتێ ‏د سەلاجێ دا بکەین و گەلەک یا سروشتی یە ئەم شریناھیان نەکرین بۆ نموونە ھەکە مە بڤێت قەلەو ‏نەبین، دیسان یا سروشتی یە ژی کو لێنانگەھا مە بەرھەمێن ساخلەم تێدا ھەبن کو ھاریکاریا مە بکەن ‏بۆ ئامادەکرنا دانێن ھەڤسەنگ و سڤک و کێم یەکەیێن گەرماتیێ تێدا ھەبن، بەلێ ئەڤ رەوشە دێ ھێتە ‏گوھارتن دەمێ کو ل جھەکی مە چو دەستەلات ل سەر نەبیت و ھەموو جورێن خوارنێ و شریناھیان لێ ‏بھێنە ئامادەکرن و بەرێ مە بکەڤیتە خوارنێ و ب راستی ژی راکێشانا حەزا مرۆڤی بۆ خوارنێ گەلەک ‏رێک یێن ھەین و یا ب زەحمەتە ئەم بشێین خوە ژ خوارنەکێ ب پارێزین ھەکە ب دەستێن ھندەک ‏تەباخچیێن شارەزا بھێتە دروستکرن و ئەم نەشێین ھێزا خوە ب پارێزین و وێ خوارنێ نەخوین، ‏شارەزایێن بەرھنگاریا قەلەویێ ھندەک شیرەت و ستراتیژیان پێشکێشی مە دکەن کو ھاریکارن بۆ وێ ‏چەندێ ئەم بشێین کونترولا خوە بکەین داکو خوارن نەبیتە فاکتەرەک بۆ قەلەویێ.‏

ھندەک دەلیڤەیان دا، ئەم نەچاردبین گەلەک دەمژمێران دناڤ سەنتەرێن بازرگانی دا بمینین داکو دیاری و ‏پێدڤیێن خوە بکرین، پشتی بۆرینا دەمەکی ئەم ھەست ب برسیبوونێ دکەین، بێی دەستێ مرۆڤی، مرۆڤ ‏نەچارە قەستا خوارنگەھەکێ یان کافتریایەکێ بکەت کو دناڤ یان نێزیکی وی جھی بیت و ل وێرێ دێ ‏دوژمنێن بەژن زراڤیا مە ل پێش چاڤێن مە کەڤن، بۆ نموونە رەنگە بیتزایەک ییا پێکھاتی بیت ژ 850 ‏کالوریان و 34 گرامێن روینی، یان پسکێتەک ھەبیت یا باشتر بیت کو 280 یەکەیێن گەرماتیێ دناڤدا ‏ھەبن، بەلێ ھەر ئەو رێژا روینی دناڤدا بیت ئەوا دناڤ دو رانکێن مریشکێن قەلاندی دا ھەین، و مرۆڤ ‏نەچارە تشتەکی بخووت دا برسا مرۆڤی بشکێت، ل وی دەمی دێ باشتر بیت مرۆڤ بسکێتێن سیرکری ‏بخوت کو پێکھاتینە ژ 340 یەکەیێن گەرماتیێ و 5 گرامێن روینی، بەلێ ب راستی نەخوارنەکا پلە ئێکە.‏

باشترین تشت کو تو ل بازاری برسی نەبی ئەوە زوو قەستا بازاری بکەی، یان سپێدێ زوو دەمێ ژنوو ‏دھێتە ڤەکرن، ئەڤە نە ب تنێ دێ مرۆڤی ژ قەرەبالغا بازاری دوور کەت، بەلکو ناھێلڕیت مرۆڤ ببیتە ‏قوربانیێ خوارنا بیتزایەکێ ل بازاری و مسوگەر ھەتا دەمژمێر 10 سپێدێ بێھنا بیتزا و خوارنان گەلەک ‏ب سەر بازاری دا نافریت و دلێ مرۆڤی ناچیتێ، ل وان دەمان ژی دێ ھێشتا باشتر بیت مرۆڤ تێشتەکا ‏باش بخوت بەری بچیتە بازاری، ئەڤجا چ ئەو خوارن فێٌی بیت یان پارچەکا نانی ل گەل پەنیری بیت، ‏بەری بچیتە بازاری داکو ھەست ب برسیبوونێ نەکەت.‏

گەلەک یا سروشتی یە دەمێ مرۆڤ ل بازاری دگەریت و دوەستیێت دێ قەستا نێزیکترین جھێ فرۆتنا ‏شریناھیا کەت بۆ خوارنا کێکەکێ یان پسکێتەکێ، ب راستی ل وی دەمی ب تنێ مرۆڤی پێدڤی ب ‏بێھنڤەدانێ ھەیە، پروفیسورە مادلین فیرنسترۆم، رێڤەبەرا سەنتەرێ کونترولکرنا سەنگی ل زانکۆیا ‏بیتسبۆرک یا ئەمریکی دبێژیت: گەلەک یا خەلەتە ئەم شریناھیان بۆ خوە بکەینە دیاری ژبەرکو ئەم یێن ‏وەستیاین، چونکو ئەو ساخلەمیا مە تێک ددەن و سەنگێ مە زێدە دکەن.‏

ئه‌ڤرۆ نيوز:

ل وەرزێ پاییزێ ھندەک نەخوشیێن ئالوز پەیدادبن ئەوژی ژ ئەنجامێ گوھورینا سەقای، ئێکەم نەخوشی ‏ژ وان ھەستداریا وەرزانەیە، کو ب رێیا گل و گیایا یان کێزکا و بالندا ب رێیا ھەوای دھێنە ڤەگوھاستن ‏چونکو مرۆڤ دشێت ب ساناھی وەربگریت.‏

سایتێ ( کەنال فی) دیاردکەت کو دووکێل فاکتەرەکێ سەرەکی یە بۆ ھەستداریێ و پیسبوونێ و دیسا ‏زکماکی ژی رولەکێ گرنگ د تووشبوونێ دا دبینیت، ھەروەسا دیاردکەت کو ھەستداریا وەرزانە یا ب ‏مەترسی نینە و یا دومدرێژ ژی نینە، نیشانێن وێ پێک دھێن ژ ھاتنە خوارا دفنێ و کوخکێ و بێھنژنینێ ‏سوربوون و خوریانا چاڤا و ئێشانا سەری.‏

چارەسەریا وێ دەستپێدکەت ب خوپاراستنێ ئەوژی مانەڤە ل مال ھندی دشیان دابیت و گرتنا ‏پەنجەرێن ترۆمبێلێ و مالێ و شووشتنا سەری بەری نڤستنێ ل گەل ب کارئینانا بەرچاڤکێن دژی تیشکا ‏رۆژێ ل دەمێ دەرکەتن ل مالێ و پاشی ب کارئینانا دەرمان و دژەیێن ھەستداریێ ھەکە پێدڤی کر.‏

کوڤارا ( فرانس سوار) دیاردکەت کو ھەودانا گەوریێ سالانە 11 ملیون مرۆڤان ڤەدگریت و ب ‏تایبەت ژی ل وەرزێ پاییزێ و چارەسەریا وێ گەلەکا ب ساناھی یە ھەکە ژێدەرێ وێ ڤایرۆس بیت، ‏ئەوژی ب کارئینانا دەرمانا بۆ کێمکرنا ئێشانا گەوریێ، بەلێ ھەکە ژێدەرێ وێ بەکتریا ژ جورێ ئەی ‏بیت نەخوش دێ پێدڤی ب کارئینانا ئەنت بایتوکا بیت.‏

دەربارەی ھەودانا ھەناسێ کو کوخک و سەرئێشان دگەلدایە، یا پێدڤی یە ل سەر نەخوشی خوە ژ ‏جگارەکێشانێ دووربکەت.‏

کوڤار تەکەز دکەت کو ئەنفلاوەنزا ژ بەربەلاڤترین نەخوشیێن پائیزێ یە و نیشانێت وێ پێک دھێن ژ ‏سوتنا دفنێ و کوخکێ و بلندبوونەکا کێم یا پلا گەرماتیا لەشی و چارەسەریا وێ پێدڤی ب گەلەک ‏دەرمانان نابیت، بەلێ ھەکە نەخوش یێ دانعەمر بیت پێدڤیە ڤاکسینێ وەربگریت داکو ژیانا وی ژ ‏مەترسیێ بھێتە پاراستن.‏

( فراسن سوار) دیسا دیاردکەت کو ھەودانا گوھێ ناڤین گەلەم تووشی زارۆیان دبیت چونکو ئەو ‏بەکتریایێ گەوریێ دھێتە ڤەگوھاستن بو گوھی و ئێشانێ پەیدادکەت و یا باشترە ل وی دەمی شیرەت ژ ‏نوشداری بھێنە وەربگرتن.‏

ل دووماھیێ دبیت ھندەک جارا مرۆڤ تووشی ھەودانا گەوریێ و رووڤیکا ببن و ببنە ئەگەرێ زکچوونێ ل ‏وی دەمی یا پێدڤیە نەخوش گەلەک ئاڤێ ڤەخوت بۆ قەرەبووکرنا کێمیا شلەمەنیان و دەرمانێن پێدڤی ‏بۆ راوەستاندنا زکچوونێ ژی ب کاربینیت. ‏