ئەڤرۆ نیوز ، زنار تۆڤی:

پەرلەمانتارێن هەڤپەیمانی بۆ دیموکراسی و دادپەروەریێ یێن پەرلەمانێ عیراقێ چوونە ل گەل فراکسیۆنا ئێکەتیێ ل عیراقێ و ژ ئەڤرۆ پێڤە فراکسیۆنا هەڤپەیمانیێ نامینیت، د ڤی واریدا په‌رله‌مانتاره‌كێ ئێكه‌تی نیشتیمانی کوردستان ل په‌رله‌مانێ عیراقێ گۆتیە، کو هه‌ردو په‌رله‌مانتارێن هه‌ڤپه‌یمانیا دیموكراسی و دادپه‌روه‌ریێ، چوونه‌ د ناڤا فراكسیۆنا ئێکەتیێ دا.

به‌ختیار شاوه‌یس، په‌رله‌مانتارێ ئێكه‌تیێ بۆ میدیایێن سه‌ر ب ئێکەتیێ ڤە دیارکریە، کو ل ده‌مێ ده‌نگدانا سه‌رۆك كۆمارێ عیراقێ، هه‌ردو په‌رله‌مانتارێن هه‌ڤپه‌یمانیا دیموكراسی و دادپه‌روه‌ریێ هاتینه‌ دناڤ فراكسیۆنا ئێكه‌تیێ دا و نوکە ژی ل گه‌ل فراكسیۆنا ئێكه‌تیێ کار دکەن و ژمارا كورسیێن ئێكه‌تیێ ل به‌غدا گه‌هشتنه‌ 20 كورسیان.

ناڤهاتی ئەو ژی خویاکریە: هه‌رچه‌نده‌ هەتا نوکە وان پەرلەمانتەران ب فه‌رمی چوونا خوه‌ بۆ ناڤ فراكسیۆنا ئێكه‌تیێ بەلاڤنەکریە‌، لێ ل ڤان نێزیکان، ئه‌و په‌رله‌مانتارە دێ چوونا خوه‌ ب فەرمی راگه‌هینن.

ئەڤرۆ نیوز ، زنار تۆڤی:

شارەزایەکێ سیاسى راگەهاندیە: عادل عه‌بدولمه‌هدى، سه‌رۆك وه‌زیرێ هاتیە راسپاردن بۆ پێکئینانا حوکمەتا نوو یا عیراقێ، ژ سه‌رۆك وه‌زیرێن پێشی باشتر نابیت و پێشبینی دهێتەکرن، کو نەچاربیت بۆ رازیكرنا هه‌موویان ئەو وه‌زاره‌تێن هاتینە‌ تێكههەلکرن جۆدا بکەت.

واسق هاشمى، شارەزایەکێ سیاسیە دبێژیت: سه‌رۆك وه‌زیرێ نوو هاتیە راسپاردن، ژ سه‌رۆك وه‌زیرێن پێشی باشتر نابیت، نەشێت ب ئازادانه‌ كابینا حوکمەتا خوە دیار بکەت، هەروەسا د‌ دانوستانێن پێكئینانا حوکمه‌تێدا دێ هه‌ژموونا حیزبی و كوتلێن سیاسی ل سه‌ر بیت.

ئەو ژی گوتیە‌: نوکە ره‌وشا سیاسى ب ‌شێوه‌کێ یە‌ کو کەسێ نەڤێت ببیته‌ ئۆپۆزسیۆن و ب هەبوونا دو كوتلێن مەزن دێ عه‌بدولمه‌هدى نەچار بیت،کو خوە ل ‌سه‌ر پێن خوە بگریت و مانا حوکمه‌تا وی، دێ دلێ هه‌موویان رازى کەت.
هاشمى دیارکر ژی‌: حوکمه‌تا داهاتی دێ ژیا پێشتر قه‌به‌تر بیت و عه‌بدولمه‌هدى دێ نەچار بیت وان وه‌زاره‌تێن هاتینە تێك‌هەلکرن دوباره‌ جۆدا بکەتە ڤە‌.