ئه‌ڤرۆنيوز:

وه‌زاره‌تا خواندنا بلند وڤه‌كۆلينێن زانستى ل هه‌رێما كوردستانێ راگه‌هاند، بۆ چو كۆمه‌ل ورێكخراوان نينه‌ باوه‌رناما فه‌خرى ببه‌خشن وهه‌ر كۆمه‌له‌ك ورێكخراوه‌ك ڤى كارى ئه‌نجام بده‌ت، دێ روو ب روويێ قانوونێ كه‌ين.

عه‌باس ئه‌كره‌م، په‌يڤدارێ وه‌زاره‌تا خواندنا بلند وڤه‌كۆلينێن زانستى گۆت” ده‌مه‌كه‌ رێكخراوه‌ك ب ناڤێ فورات بۆ ئاشتيا جيهانى ل هه‌رێما كوردستانێ، باوه‌رناما دكتۆرايا فه‌خرى دبه‌خشيت، ل ڤێرێ بۆ رايا گشتى رادگه‌هينين ڤێ رێكخراوێ ژ دوور ونێزيك په‌يوه‌ندى ب وه‌زاره‌تا مه‌ڤه‌ نينه‌”.

گۆت ژى” ڤێ رێكخراوێ مافێ وێ چه‌ندێ نينه‌ باوه‌رناما دكتۆرايا فه‌خرى ببه‌خشيت، تنێ دشێت دچارچۆڤێ كارێ رێكخراوه‌يى خه‌لات وباوه‌رنامێن رێزلێنانێ ببه‌خشن”.

ئاماژه‌ كر” به‌خشينا دكتۆرايا فه‌خرى كارێ داموده‌زگه‌هێن ئه‌كاديمى يه‌ كو تنێ وه‌زاره‌تا خواندنا بلند ئه‌و مافێ هه‌ى ڤێ باوه‌رنامێ ببه‌خشيت”.

په‌يڤدارێ وه‌زاره‌تا خواندنا بلند دياركر” وه‌زاره‌تا مه‌ ل به‌رامبه‌ر به‌لاڤكرنا باوه‌رناما ب ناڤێ دكتۆرايا فه‌خرى، دێ كارمه‌ندێن رێكخراوێ روو ب روويێ قانوونێ كه‌ت وسكالايا قانوونى دێ ل سه‌ر تۆماركه‌ت”.

ئه‌ڤرۆنيوز:

جێگرێ سه‌رۆكێ پارتى ديموكراتى كوردستان، نێچيرڤان بارزانى ئه‌ڤرۆ چارشه‌مبى 26/9/2018 ل ئاهه‌نگا بانگه‌شا ليستا 183 يا پارتى ل سۆران راگه‌هاند، هنده‌ك كه‌س خه‌ونا چۆلكرنا هه‌ولێرێ دبينن، به‌لێ ل پردێ وسحێلا وهێزا پێشمه‌رگێ پارتى خه‌ونا دوژمنان شكاند ودووپاتكر كو پارتى دێ كوردستانێ ب هێزتر كه‌ت.

نێچيرڤان بارزانى گۆت ژى” سه‌ركه‌فتنا پارتى ئانكو كوردستان ب هێز ببيت وب هێز بمينيت، به‌رگرى ژ هه‌وه‌ وژ كوردستانێ جهێ شانازيێ يه‌”.

دياركر”  پارتی باوه‌رپێكرى ترين حزبه‌ ودشێت سه‌قامگيريا ده‌ڤه‌رێ بپارێزيت”.

ئاماژه‌ كر” هنده‌ك كه‌سان خه‌ونا چۆلكرنا هه‌ولێرێ دديت، به‌لێ ل پردێ وسحێلا هێزا پێشمه‌رگێ پارتى خه‌ونا دوژمنان شكاند، ل ده‌مه‌كى بزاڤ دكر قه‌وارێ هه‌رێما كوردستانێ نه‌هێلن وحوكمه‌تا هه‌رێما كوردستانێ ب هه‌لوه‌شيت، ئه‌و پارتى بوو رێ نه‌داى ودۆرپێچا ل سه‌ر هه‌رێما كوردستانێ لاداى”.

گۆت ژى” ده‌نگوباسێن خوه‌ش يێن ب رێڤه‌ وكوردستانێ دێ ب هێزتر لێكه‌ين، ئه‌و سه‌ركه‌فتنا مه‌ ل هه‌لبژارتنێن په‌رله‌مانێ عيراقێ تۆماركرى، ب هێزا خه‌لكى بوو وپارتى ل ئاراميێ گه‌شێ دكه‌ت، ژبه‌ركو حزبا ئاراميێ وئاڤه‌دانيێ يه‌ وبۆ هه‌موو هێزێن سياسى يێن عيراقى ژى دبێژين مه‌ دڤێت هه‌ڤپشكێن راسته‌قينه‌ بين”.

ديسا گۆت” چو رێككه‌فتنه‌ك بێ هه‌ولێرێ سه‌رناگريت ودێ هێزا هه‌ولێرێ بۆ به‌رژه‌وه‌نديا خه‌لكێ عيراقێ بكارئينين ومافێ وه‌لاتيان دێ ڤه‌گه‌رينين ودبێژينه‌ هه‌موو هێزێن كوردستانى ژى پارتى حزبه‌ك نينه‌ ده‌ليڤێن ستراتيژى بۆ خوه‌ ببه‌ت، هه‌كه‌ مه‌ ئه‌و كربا، ده‌مه‌ك بوو دا مه‌ هه‌موو كارين خوه‌ ب دووماهى ئينابان، له‌وما دڤێت پۆستێن كوردان ل به‌غدا بۆ به‌رژه‌وه‌نديا كوردستانێ بيت ورێگرى بيت ل پيلانگيريێ دژى كوردستانێ”.

رۆهنكر ژى” چو حزبه‌كێ هندى پارتى چاڤ ل پاراستن وئازادى وژيانا خه‌لكێ كوردستانێ نينه‌، له‌وما مه‌ دڤێت ب ده‌نگێ خه‌لكى كورسيێن پارتى ل په‌رله‌مانێ كوردستانێ زێده‌ بكه‌ين وپلانا پارتى بۆ خوه‌شگوزه‌رانيێ سه‌ربگريت وكوردستان زێده‌تر ب هێز بكه‌ڤيت”.