ئه‌ڤرۆنيوز:
دكتۆر فوئاد حوسێن، به‌ربژارێ پارتی دیموكراتی كوردستان، بۆ پۆستێ سه‌رۆك كۆمارا عيراقێ، راگه‌هاند، ئه‌و ژلايێ سه‌رۆك مه‌سعود بارزانی و پارتی دیموکراتی کوردستان ڤه يێ هاتيه به‌ربژاركرن.
د. فوئاد حسێن دكۆنگره‌كێ رۆژنامه‌ڤانى دا ل به‌غدا گۆت” ل ده‌مێن بۆرى من كاركريه بۆ ديموكراسيێ ل عيراقێ ومه ب پێدڤى زانى يه ديموكراسيه‌ت ل سه‌ر بنه‌مايێ نه‌ته‌وى بيت ومن ل گه‌ل چه‌ندين پێكهاتان ل عيراقێ كاركريه.
ئاماژه كر” باگراوه‌ندێ سياسى وجڤاكى ل عيراقێ پشكه‌كێ په‌يوه‌ندى ب ره‌وشه‌نبيريا عيراقيان ڤه يا هه‌ى سه‌ره‌راى وان جوداهيێن كو هه‌بوون” .
به‌ربژارێ پارتى بۆ پۆستێ سه‌رۆك كۆمارا عيراقێ رۆهنكر ژى” ل تۆرێن جڤاكى هه‌وه‌كێ دژى مه يا ده‌ستپێكرى، به‌لێ نه‌شێن چياى ب هه‌رفينن، من چو جاران به‌رسڤا تۆمه‌تان نه‌دايه ونوكه ب پێدڤى دزانم به‌رسڤێ بده‌م”.
گۆت ژى” كه‌سه‌كێ سلێمانى وه‌سا به‌لاڤكريه كو هه‌ڤژينا من جوهى يه، به‌لێ هه‌ڤژينا من مه‌سيحى يه ودايك وبابێن وێ ژى مه‌سيحى نه وخێزانه‌كا ب ناڤوده‌نگه ل سه‌ر ئاستێ جيهانێ، وان گرنگى ب په‌روه‌ردێ يا داى وئه‌ز رێزێ ل هه‌موو ئايينان دگرم، كه‌سه‌كى ژ بنه‌مالا تاله‌بانى كو من رێزه‌كا مه‌زن بۆ تاله‌بانى يا هه‌ى ومن كار ژى يێ ل گه‌ل كر، ده‌نگوباسه‌ك به‌لاڤكريه كو دخوازن بارێ من يێ ده‌روونى بشكێنن، له‌وما دبێژمه وان ئه‌و هه‌وا وان ده‌ستپێكرى كاريگه‌رى ل سه‌ر ڤه‌كێشانا من نينه وه‌كو به‌ربژارێ پۆستێ سه‌رۆك كۆمارى”.
دياركر” چو جاران ناڤه‌گه‌رێم پاشڤه هه‌كه چه‌ندين هه‌وێن دى ژى ل سه‌ر من دروست بكه‌ن، چونكى ل بۆرى ئه‌م يێن هاتينه فێركرن چاوان خوه بپارێزين”.
ديسا گۆت” ريفراندۆم قه‌ده‌غه نينه ول عورفێ ديموكراسى دا ده‌ربرينا بۆچوونان يا ئاسايى يه، خه‌لكێ كوردستانێ تنێ بۆچوون ده‌ربريه وئه‌نجامێ وێ نه‌بوو واقع ووى ده‌مى ژى مه راگه‌هاند بۆ هه‌ر برياره‌كا چاره‌نڤيسساز دڤێت ل گه‌ل به‌غدا هه‌ڤپش بين.
گۆت ژى” ئه‌وێ مالا وى شووشه بيت، نابيت به‌ران دمالا خه‌لكى وه‌ركه‌ت”.
دكتۆر فوئاد حسێن گۆت ژى” ئه‌م پشكه‌كين ژ عيراقێ ويێن هاتين بۆ وێ چه‌ندێ نوونه‌رێن كوردان بين ل به‌غدا”.
گۆت ژى” هه‌كو په‌رله‌مانێ عيراقێ ده‌نگى ب من بده‌ن بۆ پۆستێ سه‌رۆكێ كۆمارا عيراقێ كارێ من يێ به‌راهيێ ڤه‌گه‌راندنا ده‌ستهه‌لاتا بجهئينانێ يه ل عيراقێ بۆ سه‌ر رێيا وێ يا دروست”.
نيشاندان