ئه‌ڤرۆ نيوز:

‏ب بریارا حەیدەر عەبادی، سەرۆک وەزیرێن عیراقێ، ھژمارەکا زۆر یا خێزانێن عەرەب ‏ڤەدگەرنە شنگال و زۆمار و دەڤەرا رەبیعە. ژێدەرەکی ئاشکرا کر کو ژ سەرجەمێ ‏وان 50 خێزانێن ڤەگەریاینە شنگال، 40 کەس د ناڤا وان خێزانان دا ژ تیرۆرستێن ‏داعشێ بوون و دەست ل گەل کارەساتا شنگالێ دا ھەبوون و ژ لایێ سۆپایێ عیراقێ ‏ب خوەڤە ھاتینە دەستەسەرکرن و ل گۆەری زانیاریان، 40% عەربێن ڤەدگەرنە ‏شنگالێ بەری نھا دەست ل گەل رێکخراوا تیرۆری داعشێ ھەبووینە.‏

قاسم شەشۆ، فەرماندێ فەرماندەیا پێشمەرگێ کوردستانێ ل شنگالێ بۆ ئەڤرۆ دیار ‏کر، ب بریارا حەیدەر عەبادی، پتر ژ 50 خێزانێن عەرەب ژ ھۆزا (جحێش) ‏ڤەگەریاینە گوندێ گولات ل نێزیک مەزارگەھێ شەرفەدین و ئەڤ یەک ژی بێی رازیبوونا ‏مەبوویە، چونکو بەری ھاتنا ڤان خێزانێن عەرەب، سۆپایێ عیراقێ ئەم ب ڤێ یەکێ ‏ئاگەھدارکربووین کو عەبادی بریارا ھاتنا وان دەرکریە و مە گۆتبوو وان یا دروست ‏نینە بھێن، چونکو رەنگە ببیتە ئەگەرێ پەیدابوونا کێشەیێن جڤاکی ل دەڤەرێ.‏

شەشۆ ئەو یەک ژی بۆ ئەڤرۆ ئاشکرا کر کو ئەڤ خێزانێن عەرەب یێن گوندێ گولات ‏ھەموو ئەوبوون ھاریکاریا چەکدارێن داعش کری، کەچ و کور و زارۆیێن ئێزدی ‏برەڤینن و بکۆژن و ئەم وەکو کوردێن ئێزدی ب چو رەنگان ھاتنا وان قەبوول ناکەین ‏و گۆت: ژبلی وان خێزانان ھژمارەکا دی یا خێزانێن عەرەب جارەکا دی ھاتینە ‏شنگال و زومار و رەبیعە و لێ ئاکنجی بووینە و ھەموو ژی ب بریارا عەبادی ھاتینە، ‏وەکو سۆپایێ عیراقێ ئەم ئاگەھدارکرین.‏

ژێدەرەکی ژ قەزا شنگالێ دیار کر، ئەڤ پێلا ئاوارەیێن عەرەب ژ پارێزگەھێن دن یێن ‏عیراقێ جارەکا دن ڤەدگەرن مالێن خوە و ب ئەڤێ چەندێ ئێزدی دلگران کرینە ژ بەر ‏ھەر ئەو عەرەب بوون یێن رێکخراوا تیرۆرستیا داعشێ ب ھەڤکاریا وان دەست ب ‏کۆمکوژیا شنگالێ ھاتیە کرن کو ب ھەزاران ژ ئێزدیان ھاتنە کوشتن و گرتن و ‏رەڤاندن و دەستەسەرکرن.‏

قاسم شەشۆ ئەو یەک ژی ئاشکرا کر، پشتی ھاتنا حەشدا شەعبی بۆ شنگالێ، رێ ‏ھاتیە خۆشکرن، جارەکا دی عەرەب ڤەگەرنە ناڤا شنگالێ و ب تایبەت ئەو عەرەبێن ‏دەست د کۆمەلکوژیا ئێزدیان دا ھەی و ئەڤ بریارا عیراقێ دای ل دۆر ڤەگەراندنا 50 ‏خێزانێن عەرەبی بۆ شنگالێ یا تاکلایەنانەبوویە و ب چو رەنگان ب دلێ مە نەبوویە، ‏چونکو پتریا وان خێزانان دەست ل گەل کۆمەلکۆژیا ئێزدیان دا ھەبوویە و ھاتنا وان ‏ژی مەترسیە بۆ سەر دەڤەرێ.‏

مەحما خەلیل، قائیممقامێ قەزا شنگال راگەھاند، ئەڤ عەرەبێن ڤەگەریایینە شنگال ‏ھاتینە سەر گۆندێن (حەساویس، پیر قاسم، جرێوا) و ئەڤە ژی پێنگاڤەکا ئاشکرایە ‏بۆ تەعریبکرنا شنگالێ و ھندەک ژ وان ژی بێگومان دەست د کۆمەلکوژیا ئێزدیان دا ‏ھەبوویە و پێدڤیە ئەو ھەموو بھێنە دەستەسەرکرن و رادەستی دادگەھێ بھێنە کرن، ‏چونکو ھەر ئاکنجیەکێ قەزا شنگالێ ب تایبەت یێن عەرەب و دەست ل گەل داعشێ ‏ھەبیت، ناڤێن وان ھاتینە تۆمارکرن و ھەموو بەلگەیێن تاوانانێن وان ژی ل بەر ‏دەستن و ھەموو دێ گەھنە سزایێ خوە.‏

مەحما گۆتیشی: حکوومەتا عیراقێ ئەنقەست رێیا دھۆک بۆ شنگالێ ناڤەکەت و وان ‏مەرەمێن خوە یێن تایبەت پێ ھەنە، بۆ ھندێ ل دووڤ دلێ خوە شنگالێ تەعریب بکەن ‏و حکوومەتا عیراقێ ب تنێ رێکێ ب خێزانێن عەرەب ددەت ب ڤەگەرنە شنگالێ و ‏دەست ب سەر مال و مولکێن کوردێن ئێزدی دا بگرن و شنگال ب تەمامی بھێتە ‏تەعریبکرن.‏

ئه‌ڤرۆ نيوز:

ژ بەر درێژبوونا دەمێ قەیرانا دارایی ل کوردستانێ رەوشا کرێداران گەلەک خراب ‏بوویە و تووشی ھەموو جۆرە قوربانیدانەکێ بووینە پێخەمەت دانا کریا ھەیڤانە یا ‏خانویێن تێدا دژین. سەروکێ کومەلا کرێدارێن کوردستانی راگەھاند، ل گوری ئامارێن ‏ل بەر دەست، 150 ھزار خێزان وەک کرێدار ھەنە ل کوردستانێ ب تنێ ئەڤ ھژمارە ‏ھاتیە تومارکرن و رەوشا وان رۆژ بۆ رۆژێ خرابترە، نوکە چەندین کرێدارێن ناڤێن ‏خوە تومارکرینە بۆ فروشتنا گولچیسکێن خوە پێخەمەت دابینکرنا کریا خانیێن خوە ‏و ھەیڤانە ھەتا نوکە ھژمارەکا کرێدارێن گولچیسکێن خوە فروتینە دا کو کریا خوە ‏بدەن، ژ بەر کو چۆ داھات نینە و د خانیێن کرێدا دژین.‏

بەرھەم سەردار قەرەداغی سەروکێ کومەلا کرێدارێن کوردستانی بۆ رۆژناما ئەڤرۆ ‏گۆت: رێژەکا مەزنا وەلاتیان ھێشتا نەشێن کریا خوە یا ھەیڤانە بدەن کو 120 ھزار ‏دینارە، لەورا رێژا ژێکڤەبوونێ دناڤبەرا ژن و مێران دا زێدەبوویە و ئاریشێن جڤاکی ‏بەرفرەھتر بووینە چەندین جارا مە داخوازا بەلاڤکرنا یەکەیێن ئاکنجیبوونێ کریە بۆ ‏کرێداران، بەلێ ھەتا نوکە داخوازیا مە نەھاتیە بجھکرن، ھژمارەکا کرێدارێن خانی ب ‏زێدەگاڤی ئاڤاکرینە ل ھەموو کوردستانێ و ھەموو پارێزگەھا چاڤەرێ دکەین ‏حوکمەت تاپۆ بکەت. چارە یا رەوشا خرابا کرێدارێن ل بەرچاڤ بگریت و مەترسی ‏ھەیە ھەتا دھێنە تاپۆکرن بھێنە خرابکرن ژلایێ لژنێن نەھێلانا زێدەگاڤیان ڤە، رۆژ ‏بۆ رۆژێ رێژا کرێدارێن یا زێدە دبیت و چۆ چارە ژی بۆ رەوشا وان ناھێنە دیتن.‏

قەرەداغی ئاشکراکر: ل گوری ئامارێن ل بەر دەست، 150 ھزار خێزان وەک کرێدار ‏ھەنە ل کوردستانێ ب تنێ ئەڤ ھژمارە ھاتیە تومارکرن و رەوشا وان رۆژ بۆ رۆژێ ‏خرابترە، نوکە چەندین کرێدارێن ناڤێن خوە تومارکرینە بۆ فروشتنا گولچیسکێن ‏خوە پێخەمەت دابینکرنا کریا خانیێن خوە و ھەیڤانە ھەتا نوکە ھژمارەکا کرێدارێن ‏گولچیسکێن خوە فروتینە دا کو کریا خوە بدەن، ژ بەر کو چۆ داھات نینە و د ‏خانیێن کرێدا دژین.‏

ناڤبری گۆت ژی: ل کوردستانێ مۆلەت ب 181 یەکێن ئاکنجیبوونێ ھاتیەدان، بەلێ ‏مخابن نەھاتینە تەمامکرن رەوشا کرێدارێن رۆژ بۆ روژێ خرابترە و پێدڤیە حوکمەت ‏رێگە چارەکێ بینیت بۆ کێمکرن و نەھێلانا کرێدارێن ب ڤی رەنگی، نوکە رێژا 24% ‏یا خەلکێ کوردستانێ کرێدارن، پێدڤیە ھاریکاریەکا گشتی بۆ کرێیا بھێتە کرن و ل ‏ڤێ رەوشا ئالوز دووماھی بھێن، رۆژانە ھەرەشەیا خوەکوشتنێ و فروتنا گولچیسکێن ‏خوە دکەن پێخەمەت دابینکرنا کریا خانیا کو ھەیڤانە داھاتێ وان بەھرا کریا وان ‏ناکەت یان دڤێت ئەوێن خانی ب زێدەگاڤی ئاڤاکری بۆ تاپۆ بکەن یان ئێکەیێن ‏ئاکنجیبوونێ بھێنە بەلاڤکرن ل سەر کرێدارێن ل ھەموو کوردستانێ.‏

ئەڤرۆ نيوز:‏

عەزیز ئیبراھیم عەزیز عەبدو گوران،بەربژارێ ژمارە 49 ل سەر لیستا ‏‏183ێ یا پارتی دیموکراتی کوردستان، بەرنامەیێ کارێ خوە بۆ روژناما ‏ئەڤرۆ راگەھاند، ئێکەم کارێ من پشتی دبمە پەرلەمانتار ل سەر لیستا ‏ژمارە 183 ێ یار پارتی دیموکراتی کوردستان دێ کارناما پارتی بیت، ‏بۆ چار سالێن داھاتی یێن پەرلەمانێ دێ ھەمو برگەو ماددەیەیێن وێ ‏کارنامێ بجە بینین، کو ژبۆی بەرژەوەندیا ھاولاتیێن کوردستانێ ھاتیە ‏دراشتن ، ژبلی کارناما پارتی من بەرنامێ خوە ھەیە پشتی ب دەست ‏ڤەئینانا باوەریا خەلکی بۆ سنورێ قەزا بەردەش تایبەتی و کوردستانێ ‏ب گشتی سنورێ قەزا بەردەرەش یا دەولەمەندە ب کەرتێ چاندنێ باشتر ‏کرنا ژێرخانا ئابۆریا کوردستانآ ب گشتی و قەزا بەردەرەش ب تایبەتی ‏یە ،دێ بزاڤا کەم ژبۆی ڤەکرنا ھژمارەکا کارگەە و کومپانیا ل دەڤەرێ ل ‏بوارێ چاندنێ بۆ وێ چەندێ ھاولاتی و جوتیار ھەردو مفادار بن ژ کەرتآ ‏چاندنێ و داھاتێ وێ ژی ھەر بۆ خەلکێ دەڤەرێ بیت ،خەلکێ دەڤەرا ‏گورانەتی و بەردەرەش ھژمارەکا مەزن دەرچویێن پەیمانگە ە و زانکویان ‏ھەنە پێدڤیە مفا ژ زانست و شیانێن وان بھێتە دیتن دەرفەتێن کاری ژبۆی ‏وان بھێنە دیتن کاربکەت ل دەڤەرێ قەزا بەردەرەش دکەڤیتە سێگوشەیا ‏ناڤبەرا سێ پارێزگەھێن دھوک و ھەولێرو موسل دەڤەرەکا ستراتیژیە ‏پێدڤی ب پروژێن زێدەتر یێن خزمەتگوزاری ھەیە لێ بھێنە بجھکرن کو ‏ژبلی دێ دەرفەتێن کاری زێدەبن و دێ ئابۆریا دەڤەرێ باشتر بیت.‏

عەزیز ئیبراھیم گۆت: قەزا بەردەرەش و دەڤەرا گورانەتی و دەشتا ‏نافکوڕێ دەڤەرەکا ئابۆریە ژلایێ چاندنێ و بازرگانیێ ڤە دێ ھەمو بزاڤا ‏کەین ل پەرلەمانی بۆ رێکخوشکرنا رێکێن ناڤبەرا قەزا بەردەرەش و ‏موسل دا ژبۆی وێ چەندێ بازرگانیەکا باشترە ھەناردەکرنا بەرھەمێ ‏کوردستانآ بۆ ناڤەراستا عیراقێ گرنگی دانەکا باشتر ب کەرتێ چاندنێ ‏و مفا گەھاندن ب جوتیارا دێ کارکەین کو کوردستان چۆ بەرھەمەکێ ژ ‏دەرڤە ھاوردە نەکەت. ‏

عەزیز د یارکر، پێدڤیە ئەم ھەمو خزمەتا ھێزێن پێشمەرگەی بکەین و ‏پشتەڤانێن پێَشمەرگەی بین بەرھەمێ ئازادی و ژیان و ژیارا ھەمو ‏کوردستانیا بەرھەمێ کەدو ماندیبۆنا پێشمەرگەیە ، ھەڤدەم ماموستا ‏پشکەکا گرنگن ل ناڤ جڤاکی پێگەھاندنا نڤشێ نو ب درێژاھیا شەرێ ‏داعش پێشمەرگە ل سەنگەران بۆن و ماموستایا زاروکێن ماموستا فێَری ‏زانست دکرن لەورا پێشمەرگەو ماموستا ھەژی ژیانەکا باشترن.‏

ئەڤرۆ نيوز:‏

ئيدریس ئيسماعیل عه‌بوش بەربژارێ ژمارە 62 ل سەر لیستا 183 یا پارتی ‏دیموکراتی کوردستان ل سنورێ لقا ھەشت یا پارتی ل زاخو، بەرنامێ کارێ خوە بۆ ‏رۆژناما ئەڤرۆ دیار کر و گۆت: (پروگرامێ من پروگرامێ پارتیە و ئەو پروگرامێ ‏پارتی دانای و ئەو خالێن کو پارتی دەسنیشان کری دێ بزاڤێ کەین وان ھەموو ‏خالا ب رێک و پێکی جێبەجێ بکەین، و دێ کار کەین بۆ بنیاتنانا کوردستانەکا ‏بھێز).‏

ئيدریس ئیسماعیل ئەو چەندە ژی گۆت: (ئەرکێ من یێ سەرەکی دێ داکوکی کرن ‏و بەرەڤانیکرن بیت ژ مافێن ھەموو وەلاتیێن کوردستانێ).‏

بەربژارێ ژمارە 62 یا پارتی دیارکر،(ھەکە من باوەریا وەلاتیێن کوردستانێ ب ‏دەستڤە ئینا و بۆمە پەرلەمانتار، من چەندین بەرنامە و پلان ھەنە، ژ وان ژی یا ‏زور گرنگ بو ڤی خەلکی بھێتە کرن نەھێلانا بێ کاریێ یە، ھەروەسا پیتە دان و ‏چالاک کرن و پێشخستنا کەرتێ تایبەت، داکو دەرفەتا کاری پتر بو خەلکی پەیدا ‏ببیت، دڤێت گرنگیەکا زور ب بەرھەمێ ناڤخو و جوتیارا بھێتە دان، چونکی ‏کوردستان وەلاتەکێ بخێر و بێرە، ھەروەسا ھەبۆنا ژینگەھەکا ساخلەمیێ یا ‏پێشکەفتی ژ ھەموو تشتی گرنگترە). ‏

ئيدریس ئيسماعیل عه‌بوش خوەیاکر: (ئەز ل ئەلمانیا دژیم، لێ ژ بۆ ھندێ ھاتیمە ‏کوردستانێ داکو خزمەتا خەلکی و نەتەوا خوە بکەم).‏

ئيدریس ئيسماعیل عه‌بوش بەربژارێ ژمارە 62 ل سەر لیستا 183 یا پارتی ‏دیموکراتی کوردستان گۆت: (ھەکە خەلکی بڤێت کو پارتی و پەرلەمانتارێن پارتی ‏کارێن باش بو وان بکەن پێدڤیە ئێکەم جار دەنگێ خوە بدەنە پارتی، ھەکە نە ‏ئەم نەشێین وەک پێدڤی کار بکەین، ئەڤجا پێدڤیە خەلکێ مە ڤێجارێ رێژا ھەرە ‏باش یا دەنگا بدەنە لیستا پارتی، داکو پارتی پێدڤی ب لایەنێن دیتر نەبیت و ‏بشێت ب رێیا پەرلەمانتارێن خوە بریار و یاسایێن باش بو ڤی خەلکی جێبەجێ ‏بکەتن، ھەروەسا بڤی ئاوایی ئەم دێ شێین کارێن باش کەین و ئەز گرنتیێ ددەمە ‏خەلکێ مە ئەو پروژێ پارتی دانای ھەموویان دێ جێبەجێ کەتن لێ قوناغ ‏قوناغ).‏