ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 24ى ئيلۆنا 2018ێ بهايێ زێر و زيڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 گرام زێرێ (ع) 18 | 36000 |
| 1 گرام زێرێ (ع) 21 | 42500 |
| 1 گرام زێرێ (ع) 22 | 44500 |
| 1 گرام زيڤ | 3000 |
ئه‌ڤرۆ نيوز:
پشكا دويێ يا زێده‌كرنا باجێ ل سه‌ر چه‌ند كه‌لوپه‌لێن چينى ژ لايێ ئه‌مريكا ڤه كه‌فته وارێ بجهئينانێ و ژ ئه‌گه‌رێ وێ چه‌ندێ شه‌رێ ئابوورى يێ وان دو وه‌لاتێن ب هێزێن جيهانێ چوو قووناغه‌كا نوو.
وه‌لاتێن ئێكگرتى يێ، ئه‌مريكا ب بهايێ 200 مليار دۆلاران باج بۆ چه‌ند به‌رهه‌مێن هاورده‌كرى يێن چينى زێده‌كر ب به‌هانه‌يا وێ چه‌ندێ كو دا مامه‌له وه‌كهه‌ڤ بيت ل گه‌ل چينێ.
ب گۆره‌يى نووچه‌كێ بى بى سى چينێ ژى ب بهايێ 60 مليار دۆلاران باج بۆ سه‌ر چه‌ند كه‌لوپه‌لێن ئه‌مريكى زێده كريه و دبێژيت: “ئه‌مريكا مه‌زنترين شه‌رێ ئابوورى د مێژوويێ ل دژى چينێ راگه‌هاند”.
ئەڤرۆ نیوز ، زنار تۆڤی:
رۆژناما شه‌رقولئه‌وسه‌ت یا له‌نده‌نی د نووترین هژمارا خوە دا دیارکریە، کو دكتور فوئاد حسێن به‌ربژاره‌كێ بهێزە بۆ وەرگرتنا پۆستێ سه‌رۆك كۆمارێ عیراقێ و ئەو دێ پتریا ده‌نگان بده‌ست خوەڤە ئینیت.
هەروەسا وێ رۆژنامێ د راپۆرته‌كا خوه دا دیارکریه، کو دكتور فوئاد حسێن و به‌رهه‌م سالح، دو به‌ربژارێن بهێزن بۆ وەرگرتنا پۆستێ سه‌رۆك،كۆمارێ عیراقێ، لێ لدووڤ هه‌موو پێشدیتنان، فوئاد حسێن به‌ربژاره‌كێ بهێزتره و دێ پتریا ده‌نگان بده‌ست خوەڤە ئینیت.
رۆژناما شەرقولئەوسەت یا لەندەنی ئەو ژی گۆتیە، کو رێكنه‌كه‌فتنا ئالیێن كوردستانی ل سه‌ر دیارکرنا به‌ربژاره‌كی بۆ پۆستێ سەرۆک کۆماری، بوویه ئه‌گه‌ر كو هه‌ر ئالیه‌كێ کوردستانی جۆدا بچیته به‌غدا و بزاڤا بده‌ستڤه‌ئینانا ده‌نگێن په‌رله‌مانتارێن شیعه و سوننه بكه‌ن، هەر چەندە ئه‌و پۆسته هه‌ر یێ كوردانه و هه‌ڤركی چه‌ند یا دژوار بیت، لێ دێ هەر ب ده‌نگێن په‌رله‌مانتاران ئێكلابیت.
ئەڤرۆ نيوز:
ترکیە صدیق گوران، بەربژارا ژمارە 98 لسەر لیستا 183 ێ یا پارتی دیموکراتی کوردستان، بەرنامەیێ کارێ خوە بۆ روژناما ئەڤرۆ راگەھاند ، ھەکە ھاولاتیێن کوردستانێ باوەری بمە ئیناو بۆینە نوونەرێ خەلکێ خوە ل پەرلەمانێ کوردستانێ بریارە ل گەل ئەندامێن فراکسیونا پارتی دیموکراتی کوردستان ل پەرلەمانێ کوردستانێ ب دوو قوناغا کاربکەین ، قوناغا ئێکێ شەرێ باشتر کرنا پروژێن خزمەتگوزاری کەین ل پەرلەمانێ کوردستانێ،پروژێن خزمەتگوزاری ل ھەموو دەڤەرا ئەنجامبدەین تایبەت دەڤەرێن دورە دەست ل سەنتەرێ قەزاو پارێزگەھا وەک ئاڤاکرنا نەخوشخانەیان و قوتابخانەیان و باشترکرنا رێکێن ھاتن و چونێ ل ھەمو سێکتەرا ئەو جھێ پێدڤی بیت پروژەیان بۆ ھاولاتیا ئاڤا بکەین کو مفا بو دەڤەرێ بگشتی بوارێ ئابۆری ھەبیت کو خەلکێ دەڤەرێ ب خوە کارلسەر کەن و رێژەکا کەسێن بێکار ببن خودان کار لسەر وان پروژەیان کو دھێنە ئەنجامدان کو راستەو خو پەیوەندی ب ژیانا ھاولاتیان ڤە ھەیە ، قوناغا دوی ل شەرێ بجھکرنا پروژەیا ل پەرلەمانێ کوردستانێ دێ باشتر کرنا پروژێن مەزن و نیشتیمانی و نەتەوی بیت ل پەرلەمانی ب ھەڤکاریا ئەندامێن پەرلەمانێ کوردستانێ ، ھەردیسا دەڤەرا بەردەرەش دەڤەرەکا نمونەیە ل بوارێ پێکڤە ژیانێ دی بزاڤا کەین ئەو پەیوەندی باشتر ببن ،پێدڤیە پرسێن گرنک ب توافقا پەرلەمانێ کوردستانێ بھێنە بجھکرن.
ترکیە صدیق گوت: ژلایێ کەرتێ ساخلەمیێ ڤە دێ کارکەم ژبۆی باشتر کرنا رەوشا کەرتێ ساخلەمیێ پرانیا گوندێن دەڤەرا بەردە رەش بنگەھێن ساخلەمیێ نینە دێ بزاڤا کەین وەک پارتی دیموکراتی کوردستان ل دەڤەرێ کەرتێَ ساخلەمیێ بەرەڤ پێَش ببەین ل دابینکرنا دەرمان و نەخوشخانێن گەرووک ل دەڤەرێ بۆ وێ چەندێ باشتر چاڤدێریا ساخلەمیا خەلکێ خوە بکەین ل ناڤ کەرتێ ساخلەمیێ کاردکەم ھەست ب کێماسیێن دەڤەری َدکەم ژلایێ ساخلەمیێ ڤە لەورا بۆ دەڤەرەکا بەرفرەھا وەک بەردەرەش دێ مەزنترین پروژێن ساخلەمیێ کار ژبۆی کەم،قەزا بەردەرەش پێدڤی ب خزمەتەکا باش ھەیە ل بوارێ ساخلەمیێ ھەیە، ئافرەتێن دەڤەرا بەردەرەش گەلەک پێدڤی ب ژیانەکا باشترو ھەژی تر ھەیە.
ترکیە دیارکر: ل بوارێ ھاتن و چونێ دێ ل گەل جھێن شولەژی ل حوکمەتا کوردستانێ دێ بزاڤا کەین کو رێکێن ب رێکا مەرگ و مرنی َھاتیە ناسین ژیانێ بۆ ڤەگەریننین ل سنورێ قەزا بەردەرەش رێکێن وێ بۆینە مەترسی ل سەر ژیانا ھاولاتیا ھندەک جە ھاتینە دروستکرن و بەھرا پتر ماینە دێ کار کەین بۆ تەمامکرن و باشترکرنا ھەمو رێکێن دەڤەرا بەردەرەش پشتی دچینە پەرلەمانێ کوردستانێ.
ئەڤرۆ نیوز ، زنار تۆڤی:
سەرۆک بارزانی پەیامەک دەربارەی کاندیدکرنا د. فوئاد حسێنی بۆ پۆستێ سەرۆک کۆمارێ عیراقێ بەلاڤەکریە و جەخت ل سەر هندێ کریە کو ب هەموو شیانێن خوە دێ پشتەڤانیێ لێ کەن.
ئەڤە ژی دەقێ پەیاما سەرۆک بارزانیە:
ب ناڤێ خودایێ بەخشندە و میهرەبان
دەربارەی دیاركرنا كاندیدێ پارتی دیموكراتی كوردستان بۆ پۆستێ سەرۆك كۆمارێ عیراقێ، دا مە پێ خۆش بیت هەکە لایەنێن كوردستانی پێكڤە ل سەر ئێك كەس رێككەفتبان، بەلێ مخابنی ئەڤە روو نەدا، بۆ ئێكلاکرنا ڤی بابەتی مەكتەبا سیاسی یا پارتی ئەز سەرپشك كرم كو كەسەکێ دیاری بكەم بۆ بەربژارکرنا پۆستێ سەرۆك كۆماری، ب ئەگەرێ شیان و لێهاتوویا وی من ب باشی زانی كو بەرێز د. فوئاد حسێنی بۆ وی پۆستی كاندید بكەم.
د. فوئاد حسێن چو ل قۆناغا شۆرەشا ئیلۆنێ و ل سەرۆكایەتیكرنا دیوانا سەرۆكاتیا هەرێمێ و قۆناغێن دیتر یێن ژیانا خوە كەسەکێ دلسۆز و دەسپاك بوویە و من باوەریەکا تەمام ب شیانێن وی هەیە و من قەناعەت ژی هەیە کو دێ ئەركێن خوە ب باشی جێبەجێ کەت د پۆستێ سەرۆكاتیا كۆماریدا هەم بۆ گەلێ كوردستانێ و هەم بۆ عیراقێ و پێكهاتێن عیراقێ دێ كەسەکێ ب مفا و خەمخۆر بیت.
ب هەموو شیانان دێ پشتەڤانیێ ل د. فوئاد حسێنی كەین و هیڤیا سەركەفتنێ بۆ دخوازین.
مەسعود بارزانی
24ـی 9ـی 2018.
ئه‌ڤرۆ نيوز:
سه‌رۆك مه‌سعود بارزانى راگه‌هاند كو ئه‌وا ل 16ى ئوكتۆبه‌رێ ل كه‌ركووك روودايى خيانه‌تا نشتيمانى بوو و گرۆپه‌كێ دياركرى ب رێكه‌فتن ل گه‌ل حه‌شدا شه‌عبى و نوونه‌رێ سۆپايێ پاسداران ل پێش چاڤێن ئه‌مريكا ب تانك و چه‌كداران خوه خسته ناڤا كه‌ركووكێ و ژ پشتێ ڤه خه‌نجه‌ر ل مه دان.
د چارچۆڤێ پرۆگرامه‌كێ ڤه‌كۆلينى دا يێ كه‌نالێ جه‌زيره يێ قه‌ته‌رى ب ناڤێ “ما خفى اعظم” كو يێ تايبه‌ت بوو ب ئه‌نجامدانا ريفراندۆنا سه‌ربه‌خۆيا كوردستانێ و ده‌رهاڤێژێن وێ كو ساله‌كێ به‌رى نوكه ل 25ى ئيلۆنا 2017ێ هاتبوو ئه‌نجام دا و نێزيكى 93% يا خه‌لكێ كوردستانێ ب به‌لێ ده‌نگ دابوو گۆت: “دبيت هه‌بن د وى ده‌مى دا گۆت بيت كو بڕيارا ريفراندۆمێ ل وى ده‌مى يا خه‌له‌ته، به‌لێ ب بۆچوونا من و سێ مليۆن وه‌لاتيان بڕياره‌كا راست و قانوونى و دستوورى و مافه‌كێ سرۆشتى يێ گه‌لێ كوردستانێ يه، نوكه ژى يێ ئاماده‌مه ريفراندۆمه‌كا دى بهێته كرن و دا بزانن گه‌لێ كوردستانێ يێ رژده ل سه‌ر ئه‌وێ بڕيارا دايى يان لێڤه‌بووينه”.
ده‌رباره‌يى سه‌ره‌دانا قاسم سلێمانى فه‌رماندێ فه‌يله‌قا قودس يا سۆپايێ پاسدارێن ئيرانێ بۆ لايێ سه‌رۆك بارزانى چه‌ند رۆژان به‌رى ئه‌نجامدانا ريفراندۆمێ و پشت به‌ستن ل سه‌ر وێ چه‌ندێ كو دڤێت ريفراندۆم بهێته پاشخستن، سه‌رۆك بارزانى بۆ كه‌نالێ جه‌زيره گۆت: “هاتبوو و من پێشوازى لێكر و به‌رسڤا من بۆ وان هه‌موو ئه‌و به‌رسڤ بوو كو ريفراندۆم ناهێته پاشخستن و چ دبيت بلا ببيت”.
هه‌روه‌سا د ده‌رباره‌يى رۆلێ ئيدارا ئه‌مريكا ل دۆر پرسا ريفراندۆمێ راگه‌هاند: “بلا يێ راست بم ل گه‌ل هه‌وه، ئه‌مريكا چو رۆژه‌كێ ژ رۆژان نه‌گۆتيه پشته‌ڤانيا ريفراندۆمێ دكه‌م، به‌لێ چو جاره‌كێ ژى نه‌گۆتيه دژى ريفراندۆمێ مه، پشتى ئيدارا ئه‌مريكا هاتيه گوهۆڕين و ئه‌وێن به‌رپرساتيا دوسيا ريفراندۆمێ و په‌يوه‌نديێن گشتى گرتيه ده‌ست، زێده ژ پێدڤى چوون و پشته‌ڤانيا به‌غدا كر، مه‌ره‌ما من بالوێزێ ئه‌مريكا و خودێ وه‌زيرێ به‌رێ يێ ژ ده‌رڤه يێ ئه‌مريكا ريكس تيله‌رسۆنه، جاره‌كێ ب تله‌فۆنێ گۆته من پێدڤيه ڤه‌گه‌رنه‌ڤه بۆ هێلا سالا 2003ێ، من ژى گۆتێ ئه‌رێ تو دزانى هێلا 2003ێ چيه هه‌تا داخواز بكه‌يى بۆ وێ هێلێ ب ڤه‌گه‌رن، ئه‌و هێل نه سنورێ ئيدارى يه و نه‌يێ ناڤبه‌را پارێزگه‌هانه، به‌لكۆ هێلا ته‌ماس يا ناڤبه‌را پێشمه‌رگه‌يى و سۆپايێ سه‌دام حسێن بوو.
ده‌رباره‌يى ده‌ست به‌رداربوون ژ پۆستێ سه‌رۆكاتيا هه‌رێما كوردستانێ پشتى ريفراندۆمێ و روودانێن 16ى ئوكتۆبه‌رێ، سه‌رۆك بارزانى گۆت: “ژ ئه‌گه‌رێ وێ چه‌ندێ ده‌ستبه‌رداريى پۆستێ خوه نه‌بوويمه كو من ريفراندۆمێ خه‌له‌تى كربيت، چونكو هه‌كه وه‌سان با، دا داخوازا لێبۆرينێ كه‌م، به‌لكو ئه‌و پۆست ده‌ستكه‌فتێ هه‌لبژارتنان بوو، ئێدى ده‌مێ وى ب دووماهى هات، ژ به‌ر هندێ ژى من رێ نه‌دا ئه‌و ده‌م بهێته زێده‌كرن، چونكو هه‌ر درێژكرنه‌ك دا زيانێ گه‌هينيته من و مێژوو و خه‌باتا من.
ل دووماهيێ سه‌رۆك بارزانى گۆت: “نوكه په‌يوه‌نديێن ل گه‌ل به‌غدا باش بووينه و به‌ر ب باشيێ ژى دچن و پشكه‌ك ژ كێشان هاتينه چاره‌كرن و به‌ر ب چاره‌كرنێ دچن، به‌لێ هه‌ر يێ رژدم ل سه‌ر وێ چه‌ندێ كو گه‌لێ من مافێ بڕيار دان و دياركرنا چاره‌نڤيسێ خوه يێ هه‌يى”.
ئەڤرۆ نيوز:
دکتور سەباح محمود ئاغا زێباری بەربژارێ ژمارە 40 ل سەر لیستا پارتی دیموکراتی کوردستان بۆ ھەلبژارتنێن پەرلەمانێ کوردستانێ بۆ روژناما ئەڤرۆ دا دیارکرن کو مە کوردان گەلەک زەحمەت و قوربانی دایە و تێکوشین کریە ھەتا کو گەھشتی نە ڤێ قوناغێ، بەر ھندێ دڤێت بزانین یێ باش کی یە؟ یێ خراب کیە؟ کی دبەرژەوەندیا مملەتی دا کاردکەت؟ کی بوویە ئەگەر کوردستان بگەھیتە ڤی ئاستەی؟ کی دێ ئارمانجا کوردا دەست نیشان کەت؟ ب دیتنا من خەبات و تێکوشین دەستکەفت د بەر چاڤن کا کێ ب دەست خوڤە ئیناینە، کو ئەو ژی پارتی دیموکراتی کوردستان بوویە، چونکی د رێبازا پارتی و بارزانی دا ھەستا نەتەوەی یا بەرزە و ئەڤ رێبازە ھاتیە دامەزراندن بۆ خزمەتا خەلکێ ھەرێما کوردستانێ، بەر ھندێ د ڤێت ئەم ھەمی ھاروکار و پشتەڤانێن وێ قیادا سیاسی بین کو خوە ب خودانێ مملەتێ خوە دزانیت و پشتەڤانێن وێ قیادێ بین کو خو دکەتە قوربان بۆ پاراستنا مللەتێ خوە.
دکتور سەباحی گۆت: کو ھەلبژارتنا من بۆ پەرلەمانتاریێ ئارمانجا من خزمەتکرنا خەلکی یە، ھەکە نە ئەز ھەر پێدڤی ژی نیمە و من چو کێماسی و ئاریشە ژی نینە وەک تاکە کەس، لێ ئارمانجا من ئەوە ئەز بشێم خزمەتا خەلکی بکەم و وان گازندە و کێماسیێن خەلکی کار سەر بکەین، ئەز چ سوزا نادەم کو بێژم دێ فلان تشتی کەم، لێ ئەز دبێژم یا شیانێن مندا بیت بۆ خەلکی بکەم و کەمتەرخەمیێ نەکەم و ھەمی پێنگاڤا ھاڤێژین د بەرژەوندیا گشتی دا کارکەین، ئەگەر چ بارودوخێن نەخۆش ب سەر مللەتی دا نەھێن وەک سالێن چووی، کو داعش ھاتی و کاودان نەخۆش لێھاتن.
بەربژارێ پارتی یێ ھژمارە 40 ل سەر لیستا پارتی ئاماژە دا وێ چەندێ کو دروشمێ من یێ پارتی دیموکراتی کوردستانە کو ئارمانج دروستکرنا کوردستانەکا بھێزە، بێ کو بسپوریا من وەک دکتورە د بوارێ تەندروستی کو من پتر شارەزایی یا ھەی، دێ ھەمی بزاڤا کەم کو سیستەمەکێ ساخلەمیێ مودێرن بۆ ھەرێما کوردستانێ دروست بکەین و ئەو کێم و کاسیێن کو کو ناڤ کەرتێ ساخلەمیێ دا ھەی نەھێلین و چارە بکەین، دا بشێین پتر خزمەتا خەلکێ ھەرێما کوردستانێ بکەین و ھەمی تاکەکێ کوردستانێ ژ وی سیستەمی و گوھۆرینا مفاداربن.
ئه‌ڤرۆ نيوز:
ئه‌ڤرۆ رۆژا دوشه‌مبى بهايێ په‌ترۆلا خاڤ بلندبوون ب خوه ڤه ديت، ئه‌ڤه ژى ژ ئه‌گه‌رێ نێزيكبوونا ژڤانێ بجهئينانا سزايێن ئه‌مريكا ب سه‌ر كه‌رتێ په‌ترۆلا ئيرانێ دا، بازرگان پێشبينى دكه‌ن ئه‌و ئه‌گه‌ره و د چه‌ند هه‌يڤێن بهێت دا، بهايێ به‌رميله‌كا په‌ترۆلێ دێ گه‌هيته د سه‌ر 90 دۆلاران دا.
ده‌مژمێر 8:01 ده‌قيقه‌يى سپێده‌هيا ئه‌ڤرۆ، بهايێ به‌رميله‌كا په‌ترۆلا خاڤ بڕنت بۆ 1.02 دۆلاران بلند بوو و گه‌هشته 79.82 دۆلاران.
هه‌ڤده‌م بهايێ به‌رميله‌كا په‌ترۆلا خاڤ تكساس ژى 82 سه‌نتان بلند بوو و گه‌هشته 71.60 دۆلاران.
رێكخراوا وه‌لاتێن هنارتنا په‌ترۆلێ (ئۆپێك) و رۆسيا كو مه‌زنترين به‌رهه‌مئينه‌رێن په‌ترۆلا جيهانێ نه، دانوستاندنا بلندكرنا ئاستێ به‌رهه‌مئينانا په‌ترۆلێ دكه‌ن ب مه‌ره‌ما قه‌ره‌بووكرنا هنارتنا په‌ترۆلا ئيرانێ، به‌لێ هه‌تا نوكه چو بڕيار د وێ ده‌ربارێ دا رانه‌گه‌هاندينه.
ئه‌ڤرۆ نيوز:
د. فوئاد حسێن سه‌رۆكێ ديوانا سه‌رۆكاتيا هه‌رێما كوردستانێ بۆ راگه‌هاند كو مه‌سعود بارزانى ب فه‌رمى داخواز ژ وى كريه به‌ربژارێ پارتى بيت بۆ سه‌رۆك كۆماريا عيراقێ.
به‌ربژارێ پارتى بۆ سه‌رۆك كۆماريا عيراقێ دا زانين ژى كو پارتى دێ كار كه‌ت كو ب ده‌ركه‌ڤيت و گۆت: “سه‌ره‌دانا كاك نێچيرڤان بارزانى بۆ به‌غدا هه‌ر بۆ وێ مه‌ره‌مێ بوويه”.
فوئاد محه‌مه‌د حسێن كى يه؟
- كورده‌كێ فه‌يلى يه.
- ل سالا 1949 ل خانه‌قين ژ دايك بوويه.
- خواندنا سه‌ره‌تايى و ناڤنجى و ئاماده‌يى ل خانه‌قين ته‌مام كريه.
- ل سالا 1971 كوليژا په‌روه‌ردێ ل به‌غدا ته‌مام كريه.
- پشتى وى ده‌مى وه‌كو مامۆستا ل خانه‌قين هاتيه دامه‌زراندن.
- 1967 چوو زانكۆيا به‌غدا. ل وێرێ بوويه ئه‌ندامێ ئێكه‌تيا قوتابيێن كوردستان. پاشان ژى ئه‌ندامێ پارتى ديموكراتى كوردستان.
- ل ده‌ڤه‌را لژنا خانه‌قين يا پارتى و لژنا به‌غدا يا پارتى كادرێ پێشكه‌فتى بوويه.
- ل ده‌سپێكا سالا 1974ێ بوويه پێشمه‌رگه.
- ژ لايێ سه‌ركرداتيا شوره‌شێ ڤه وه‌كو نوونه‌رێ شوره‌شێ چوويه كوێت.
- پشتى نسكۆيا شوره‌شێ بوويه په‌نابه‌ر ل هۆله‌ندا و ل وێرێ چه‌ندين چالاكيێن سياسى ئه‌نجام داينه.
- ل سالا 1976ێ بوويه سكرتێرێ كۆمه‌لا خوێندكارێن كوردستانێ ژ ده‌رڤه‌يى وه‌لاتى.
- سالا 1987ێ بوويه جێگرێ سه‌رۆكێ ئينستتيوتا كورد ل پاريس.
ده‌سپێكا سالا 1984ێ ده‌ست ژ ئێكه‌تيێ به‌ردايه پشتى ل سالا 1975ێ گه‌هشتيێ و وه‌كو كه‌سه‌كێ سه‌ربه‌خۆ كارێ سياسى كريه.
ل ئادارا 1991ێ وه‌كو كه‌ساتيه‌كێ سياسى يێ سه‌ربه‌خۆ پشكدارى د كۆنگرێ ئۆپۆزسيۆنا عيراقێ ل به‌يروت كريه.
- ل خزيرانا 1992ێ وه‌كو سياسيه‌كێ سه‌ربه‌خۆ پشكدارى د كۆنگرێ ئۆپۆزسيۆنا عيراقێ ل ڤيه‌ننا دا كريه.
- ل هه‌يڤا 11 يا 1992ێ وه‌كو سياسيه‌كێ سه‌ربه‌خۆ پشكدارى د كۆنگرێ ئۆپۆزسيۆنا عيراقێ دا كريه ل سه‌لاحه‌دين كو فيرالى تێدا هاتيه سه‌پاندن.
- ل سالا 1999ێ ديسا وه‌كو كه‌ساتيه‌كێ سه‌ربه‌خۆ پشكدارى د كۆنگرێ ئۆپۆزسيۆنا عيراقێ دا كريه ل نيويورك.
- ل سالا 2002ێ ل له‌نده‌ن د كۆنگرێ ئۆپۆزسيۆنا عيراقێ دا وه‌كو كه‌ساتيه‌كێ كوردێ سه‌ربه‌خۆ پشكدار بوويه.
- پشتى ژناڤچوونا رژێما به‌عس هاتيه عيراقێ و ئێك بوويه ژ سه‌رپه‌رشتيارێن وه‌زاره‌تا په‌روه‌ردا عيراقێ.
- ئه‌ندامێ جێگرێ مه‌جلس حوكم بوويه ل عيراقێ.
- ده‌مێ سه‌رۆكاتيا هه‌رێما كوردستانێ هاتيه دامه‌زراندن، بوويه سه‌رۆكێ ديوانا سه‌رۆكاتيا هه‌رێما كوردستانێ.
ئه‌ڤرۆ نيوز:
پارتى ديموكراتى كوردستان ل سالرۆژا ريفراندۆمێ دێ مه‌زنترين كه‌رنه‌ڤالا جه‌ماوه‌رى بۆ هه‌وا هه‌لبژارتنا ليستا 183 ئه‌نجام ده‌ت و به‌رپرسه‌كێ وێ ژى دده‌ت دياركرن كو دێ ب ئاماده‌بوونا سه‌رۆك بارزانى و 100 هزار كه‌سان بيت.
ئارى نانه‌كه‌لى، كارگێرێ رێكخستنا لقێ دو يێ پارتى ديموكراتى كوردستان بۆ مالپه‌رێ فه‌رميێ پارتى ديموكراتى كوردستان راگه‌هانديه كو ل رۆژا 25ى ئيلۆنا 2018ێ ل ياريگه‌ها شه‌هيد فره‌نسۆ حه‌ريرى ل باژێرێ هه‌ولێرێ، پارتى ديموكراتى كوردستان ب ئاماده‌بوونا سه‌رۆك مه‌سعود بارزانى و سه‌ركرداتيا پارتى و 100 هزار كه‌سان دێ بانگه‌شا گشتى و يا مه‌زن د رێيا مه‌زنترين كه‌رنه‌ڤال دا ئه‌نجام ده‌ت وه‌كو هه‌وه‌ك بۆ ليستا پارتى ديموكراتى كوردستان و ب مه‌زنترين كه‌رنه‌ڤال دهێته هژمارتن.
پارتى ديموكراتى كوردستان ب 100 به‌ربژاران پشكدارى د هه‌وا هه‌لبژارتنێن په‌رله‌مانێ كوردستانێ دا كريه و هه‌تا نوكه چه‌ندين ئاهه‌نگێن جه‌ماوه‌رى ل پارێزگه‌هێن جودا يێن هه‌رێما كوردستانێ ئه‌نجام داينه و ل دووڤ گۆتنێن به‌رپرسێن پارتى بڕياره نێزيكى 40 كورسيێن په‌رله‌مانێ كوردستانێ ب ده‌ست ڤه بينيت.
نيشاندان